2 कुरिन्थ 5 - Walangi

हें स्वर्गे डेरा

¹ असी पता असा कि इस धरती पुठ डेरा, जे हें जिसम असा, जपल बेह्ढ़िन्ते त असी स्वर्ग अन्तर यक ईं गी मेतु, जे हथे बइ ना, बल्कि परमेश्वरे बेलि बणो भुन्तु। से कुछ पले नेईं, बल्कि हमेशा हमेशा लिए भुन्तु।

² इस बझई जुए असी इस जिसम अन्तर बिशुण चिंग लगतु, त अस स्वर्गे तेस डेरे, जे स्वर्गे जिसम भो डबण जे भाड़ते,

³ ताकि तस डबणे पता अस नगे ना भोल।

⁴ त जपल तकर असी इस जिसमे डेरा डबो असा, असी कष्ट भुन्ता। कष्ट इस बझई जुए नेईं कि अस इस जिसम छड़ण चहन्ते, बल्कि अस चहन्ते कि झट इस मुकणे बाड़े जिसम पुठ स्वर्गे से नामुकणे बाड़ा जिसम एई घिए।

⁵ जेन असी ई भुण जे ठीक किओ असु, से परमेश्वर भो। तेन अपु आत्मा हेन्धे दी कइ ई पक्कु किओ असु कि से अपु सोह पूरा कता।

⁶ तोउं त अस हमेशा नडर रेहन्ते। असी पता असा कि जपल तकर अस इस जिसम अन्तर असे, अस प्रभु केआं दूर असे।

⁷ किस कि अस विश्वास कइ जीन्ते, ना कि टीरे बेलि हेर हेर कइ।

⁸ इस बझई जुए अस नडर रेहन्ते त जिसम केआं बखरी कइ प्रभु जुए साते बिशुण सुआ अब्बल समझते।

⁹ त हें इच्छा ई असी कि चहे अस साते भोल या दूर भोल, अस तस खुश भुणे कम कते रिहे।

¹⁰ किस कि ए त पक्कु असु कि असी सम्हाई जे, मसीह पंची कते टेम, अपु जिसमे भले-बुरे कमे फल मेण जे, यक रोज तसे अगर खड़ भुण असु।

परमेश्वर जुए मेह्‍णु मिआण

¹¹ तोउं त, प्रभु मान कइ अस मेह्‍णु शिचालते, समझान्‍ते। परमेश्वर हें मन त हाल जाणता त हें उम्मीद असी कि तुं अन्तरात्मा बि जाणती।

¹² अस फिर अपफ बधाण नेईं लगो, बल्कि अस तुन्धे हें बारे रोभ लाणे मौका देण लगो असे। एसे बेलि तुस तेन्हि घमण्डी मेह्‍णु जे जवाब दी बटियेल, जे मेह्‍णु के बोकी पुठ रोभ लान्ते, ना कि तेस पुठ, जे तेन्के मन अन्तर असु।

¹³ किस कि अगर अस जगरे असे त परमेश्वर जे। होर अगर अस होश अन्तर असे त तुं लिए असे।

¹⁴ किस कि मसीह, जेन असी जुए परेम किआ, अस तेसे दिवाने बण गो असे। असी ए पक्का पता असा कि सम्हाई जेईं जे यक मर गा। त से सम्हाई तेस जुए मर गे।

¹⁵ सम्हाई जेईं जे मसीह इस बझई जुए मुआ, कि जे जे बि मर कइ दुबारी जी घेन्ते, से अपु मर्जी जुए ना, बल्कि तसे मर्जी जुए जीएल जे तेन्के खातिर मर गा त दुबारी जी बि गा।

¹⁶ तोउं त, अभेईं केआं खड़ अस केसे जे बि जिसमे हिसाब जुए ना समझते। पेहले पेहले बेशक अस मसीह बि जिसमे हिसाब जुए समझतेथ, पर अब हउ नेईं।

¹⁷ तोउं त, अगर केनि मसीह पुठ विश्वास किओ असा, से परमेश्वरे यक नोई सृष्टि भुओ असी। तेस अन्तर जे पुराणि बोक असी, से खतम भोई गो असी, होर सोब कुछ नोउ भुओ असु।

¹⁸ ए सोब परमेश्वरे कनार भुओ असु। तेन अस मसीहे बेलि अपफ जुए मिए त मेल मिलाप बाड़ी सेवा हेन्धे दुतो असी।

¹⁹ एसे मतलब ई भुआ कि परमेश्वरे मसीहे बेलि पूरा मतोक अपफ जुए मिआ। तेन तेन्के सम्हाई पाप छड़ दिते त हेन्धे मेल मिलाप बाड़ी सेवा दिती।

²⁰ इस बझई जुए, अस मसीहे राजदूत भो त परमेश्वर हें बेलि अपु बोक मेह्‍णु समझान्ता। मसीहे खातिर अस तुसी जे हथ जोड़ते कि परमेश्वर जुए मेल मिलाप करे।

²¹ किस कि तेन कदी पाप नेओथ किओ, से हें खातिर ईं यक पापी ईं बणा, ताकि तेस पुठ विश्वास करणे बेलि अस परमेश्वरे अगर धर्मी बणियेल।