2 कुरिन्थ 4 - Walangi

कमजोर भाण अन्तर कीमति धन

¹ किस कि अस परमेश्वरे कृपादृष्टि बेलिए ईं तस सेवा कते, त अस उम्मीद न छते।

² बल्कि अस से सोब बेशर्मी कम, जे मेह्‍णु नियोकान्‍ते, से करण छड़ दुतो असे। परमेश्वरे वचन झूठा बणाण त चलाकी करण असी रशुणे लगते। परमेश्वर हें उगाह असा कि अस सद सच्चाई बोते, ताकि होरे मेह्‍णु असी पुठ भरोसा कइ बटियेल।

³ तोउं बि, अगर हें खुश खबरी अन्तर, कुछ बोक नियको लगती त से सद तेन्हि जे, जे परमेश्वर केआं दूर भोई गो असे।

⁴ तेन्हि से खुश खबरी टगड़ियार न केती, जे परमेश्वरे यकी दुई मसीहे रौनक भो, किस कि इस धरती जे देवता असा, तेन तेन्के मन अन्हारा कइ छो असा।

⁵ त अस अपु बारे नेईं बल्कि यीशु मसीह बारे प्रचार कते कि से “प्रभु” भो त मसीह यीशु खातिर अस अपफ तुं गुलाम समझते।

⁶ किस कि, ए सेईंए परमेश्वर भो, जेन सृष्टि बणाणे टेम बोलु कि “अन्हारु केआं टगड़ियार चमके।” त परमेश्वरे ईं अपु टगड़ियार हें मन अन्तर चमकाओ असी ताकि अस परमेश्वरे तेस रौनक मसीह यीशु बेलि समझ बटते।

⁷ तोउं बि, अस जीं यक कमजोर भाणे ईं असे, जेठि ए कीमति धन रखो असा। एसे बेलि ए साफ भुन्तु कि हें सुआ खरी ताकत हें अपु नेईं, बल्कि परमेश्वरे भो।

⁸ हें चोहरो कना परेशानी त दुख असी, तोउं बि अस बरबाद नेईं भुओ। सुआ लिंगि अस बटी गो असे, तोउं बि अस बेउम्मीद नेईं भुओ।

⁹ सुआ लिंगि अस भुंजो असे, तोउं बि अस अकेले नेईं भुओ। सुआ लिंगि झड़ो असे, तोउं बि अस खतम नेईं भुओ।

¹⁰ एसे बेलि अस हर बेले प्रभु यीशु दुख त मरुण अपु जिसम अन्तर मेहसुस कते, ताकि तसे जीवन बि हें जिसमे बेलि मेह्‍णु केई बटियेल।

¹¹ आं, अस जीन्ते भुन्ते हर बेले मरणे सामणा कते, ताकि यीशु मसीहे जीवन एस मुकणे बाड़ी जिसम केआं बि सुसुर केई घियेल।

¹² त बेशक मौत असी पुठ असर करण लगो असी, पर तुं आत्माई बि फायदा भुण लगो असी।

¹³ त जीं धरमे कताब अन्तर लिखो असु कि “मेईं विश्वास किआ, तोउं त अउं बोता” अस ई सोब तोउं बोते किस कि अस बि विश्वास कते त हें अन्तर बि सेईंए विश्वासे आत्मा असी।

¹⁴ असी पता असा कि जेन प्रभु यीशु मरुण केआं दुबारी जीआ, से असी बि मसीह यीशु साथी जाण कइ दुबारी जीआन्ता त तुसी जुए मिआई कइ स्वर्ग अन्तर अपु अगर आणता।

¹⁵ किस कि जे किछ बि भुण लगो असु, से सोब तुसी जे असु। इसे बेलि सुआ मेह्‍णु बुछ परमेश्वरे कृपा भुन्ति त सुआ जेईं परमेश्वरे महिमा करण जे तसे धन्यवाद कते।

अशी अन्तर हिम्मत ना हारीण

¹⁶ इस बझई जुए अस कदी उम्मीद ना छते। बेशक, हें केणे बाड़ा जिसम कमजोर भुण लगो असा, तोउं बि हें आत्मा हर रोज नोई भुण लगोरी सी।

¹⁷ हें कुछ घड़ी पोले दुख कष्ट, असी जे सुआ खास त अमर जीवने महिमा बणाण लगोरी सी।

¹⁸ किस कि हें ध्यान, केणे बाड़े चीजी पुठ नेईं, बल्कि जे चीज केती नउ, तेस पुठ असा। किस कि जे चीज केती, से कुछ देर लिए ईं असी। पर जे चीज न केती, से कदी ना मुकती।