2 कुरिन्थ 3 - Walangi

नोई जुबानी सेवक

¹ अस की दुबारी अपफ बधेरीण लगो असे ना? असी की तुसी केईआं या केसे होरी केईआं केसे सिफारिशे जरूरत असी ना, जीं केहि केहि अपफ जुए साते आणते?

² ना! तुस त हें चिट्ठि ईं असे, जे असी अपु दिल अन्तर लिखो असी, ताकि तुसी हेर कइ सम्हाई पढ़ियेल त तेन्हि पता लगियाल।

³ आं! तुस तेस चिट्ठि ईं असे जे मसीहे अपफ लिखि त असी केईं पुजाई छड़ी। तुसी स्याही बेलि नेईं लिखो, बल्कि जीन्ते परमेश्वरे आत्माई बेलि लिखो असु। होर तुसी तेसे ईं घोड़े पठि पुठ ना, बल्कि मनखे दिल पुठ लिखो असु।

⁴ अस ए इस बझई जुए बोते, किस कि मसीहे बेलि परमेश्वर पुठ हें पूरा यकीन असा।

⁵ ई नेईं कि अस बोल बटते कि ए सोब करणे ताकत असी केईं असी, बल्कि हें ताकत त परमेश्वर केईआं एन्ती।

⁶ सेईंए असा, जेन हेन्धे नोई जुबानी प्रचार करण जे ताकत दुतो असी। ए ताकत कोई नियमे चिट्ठि नेईं, बल्कि तसे आत्माई भो, किस कि नियमे बेलि मौत एन्ती, पर तसे आत्माई बेलि जीवन मेता।

⁷ जे नियम घोड़े पठ पुठ लिखो थिए त जेसे बेलि मौत आई, अगर तस देणे टेम अति रौनक थी कि इस्राएले मेह्‍णु मूसे मुंहे धे हेर बि ना बटु,

⁸ त परमेश्वरे आत्माई नियम एणे टेम कि घट रौनक भुन्ति ना?

⁹ किस कि जे असी दोषी बणान्ता तेस नियम अन्तर अगर अति रौनक थी, त जे असी धर्मी बणान्ता तेस अन्तर त कति रौनक भुण असी।

¹⁰ आं! इस टेमी रौनक पेहलकण तेस रौनक केआं बि सुआ बध गो असी।

¹¹ किस कि दुई पले नियम अगर रौनक जुए आ त जे हमेशा हमेशा लिए भुन्ता, से कतु सुआ रौनक जुए एन्ता?

¹² इस बझई जुए ईं, अस डर कइ ना, पर खरे हिम्मत जुए कम कते।

¹³ अस तेस मूसे ईं नेईं जेन अपु मुंह पुठ परदा लाई रखा, किस कि इस्राएले मेह्‍णु तसे मुंहे रौनक ना हेर बटतेथ, जे घटती गो थी।

¹⁴ पर तेन्के बुद्धि भ्रष्ट भोई गो थी। आं, सच्चे बि आज तकर बि तेन्हि इहांणि बुद्धि असी। जपल बि से पुराणि जुबान पढ़ुण शुणते, त तेन्के अगर से परदा अभेईं बि लगोरा असा, किस कि मसीह छड़ कइ होर कोई जेईं तेस परदे किढ़ न बटता।

¹⁵ सच्चे बि, आजकण रोज तकर बि जपल बि मूसे नियम पढ़ते, तेन्के मन पुठ परदा लगोरा असा कि से ना समझियेल।

¹⁶ पर जपल कोई प्रभु यीशु कना जे खरकता, तस जे से परदा झड़ घेन्ता।

¹⁷ प्रभु यक आत्मा भो त जेठि बि प्रभु आत्मा असी, तठि अजादी असी।

¹⁸ होर अस सम्हाई, जे बजन कोई परदे प्रभु रौनक पुठ ध्यान कते, अस मठे मठे शिशे अन्तरी तसे शक्ली ईं भुण लगो असे। होर अस तसे रौनकी बइ भरीण लगो असे, किस कि ए प्रभु केआं भुन्ति जे कि यक आत्मा असी।