2 कुरिन्थ 2 - Walangi

¹ त दुबारी एई कइ तुसी दुख देण जे मेईं ना चहु।

² अगर अउं तुसी दुख देन्ता त कोउं मोउं खुश कता? तुसी दुख दी कइ कि अउं तुसी केआं सुख मेणे उम्मीद कइ बटता ना? ना!

³ तोउं त, मेईं सक्ति कइ से चिट्ठि लिखि, ताकि जपल अउं तुसी केईं एऊं त तुसी केआं सुखे बदले मोउं दुख ना मेईंयेल। मोउं पक्का यकीन असा कि तुस सम्हाई में खुशी चहन्ते त अगर अउं खुश भुन्ता त तुस बि खुशी घेन्ते।

⁴ मेईं त बोडे दुख जुए रोलते रोलते तुसी जे चिट्ठि लिखो थी। में मकसद ई नेओथ कि तुसी दुख दिउं, बल्कि तेस बेलिए तुसी बताउं कि तुस मोउं कत ट्यारे असे।

दोषी माफ करण

⁵ अउं सुआ सक्ति ना कर कइ बोता कि अगर केनि मोउं दुख दुतो असा, त मोउं लगतु कि तेन ना कि सद मोउं दुख दुतो असा, बल्कि कुछ हद तक तेन तुसी बि दुख दुतो असा।

⁶ तेस मेह्‍णु अपु गलती समझाण जे तुं सतसंगे जे सज्जा दुतो असी, सेईंया रज्जि असी।

⁷ त अभेईं तुसी से माफ करण लौते त हिम्मत देण लौती ताकि से सुआ दुखे बेलि टूट ना घियेल।

⁸ तोउं त, अउं तुसी जे हथ जोड़ता कि तुस तस दुबारी भाईचारे अन्तर अण्हे, ताकि से बिझ घियाल कि तुस तेस जोई परेम कते।

⁹ मेईं ए तोउं लिखु कि हेरुं कि तुस सच्चे बि सम्हाई बोकी पुठ में मानते ना।

¹⁰ त अगर तुसी कोउं जेईं केसे बोकी पुठ माफ किओ असे त समझे कि मेईं बि से माफ किओ असे। अगर मेईं माफ किओ असे त से सिर्फ तुं खातिर, मसीह सामणे किओ असे।

¹¹ ना त अस शैताने चाल अन्तर फस घेन्ते, किस की असी पता असा कि तसे चाल की असी।

त्रोआस शेहर अन्तर पौलुसे परेशानी

¹² जपल अउं त्रोआस शेहर अन्तर मसीहे खुश खबरी प्रचार करण जे पुजा त प्रभु मेन्धे मौका दिता।

¹³ पर ट्यारा भाई तीतुस ना भुणे बझई जुए में मन तठि न लगा। त अउं तेन्हि छड़ दी कइ मकिदुनिया राज्य जे घेई गा।

¹⁴ पर परमेश्वरे जइ करे कि से हमेशा असी जीं जीतणे बाड़ी के हसुड़े जुओई मिआई कइ नेन्ता। से होरी के बुछ यक अब्बल मुश्क ईं मसीहे ज्ञान बांटण जे हें मदत कता।

¹⁵ किस कि जे परमेश्वरे बचाओ असे त जे पाप अन्तर मरुण लगो असे, तेन्हि बुछ अस जीं यक अब्बल धूपे मुश्क ईं असे, जेस मसीह परमेश्वरे अगर धुखान्ता।

¹⁶ जे अपु अपु पाप अन्तर मरुण लगो असे, तेन्हि जे अस यक जहरिली ब्यार ईं असे जे मौत आणती। पर जे परमेश्वरे बचाओ असे, तेन्हि जे अस यक अब्बल मुश्क ईं असे जे नोउआं जीवन आणता। बोले त धिक, ईं कम करणे औकात केसेरी असी ना?

¹⁷ अस तेन्के ईं नेईं जे लाली के ईं परमेश्वरे वचन मिआई-मिउई कइ बेचते। पर किस कि परमेश्वरे अस लंघो असे त अस मसीहे सेवक असे। अस पूरे सच्चाई जुए तसे वचन शुणान्ते।