2 कुरिन्थ 13 - Walangi

अखिर चेतावनी

¹ अब टेके लिंगि अउं तुसी केईं एण लगो असा। त जीं धरमे कताब बोती कि “दुई या टाई उगाही के बेलि ईं हर यक बोक पक्की करीण” तीं करण असु।

² दोके फेरि जपल अउं तुसी केईं अओ थिआ त कुछ मेह्‍णु पाप अन्तर शची गो थिए। होर सुआ जेईं तेन्के साथ दुतो थिआ। मेईं तपल बि से खबरदार किओ थिए, त अभेईं बि दूर बिश कइ दुबारी बोलुण लगो असा कि इस फेरि एई कइ अउं तुसी ना छता।

³ तुसी सबूत लौताथ ना कि सच्चे बि मसीह में बेलि बोक कता कि ना कता। अउं बोता कि से तुं अगर कमजोर नेईं, बल्कि ताकतवर असा।

⁴ किस कि से कमजोर भोई कइ क्रूस पुठ मर गा, पर अब परमेश्वरे ताकत जुए जीन्ता असा। त आं, तस जुए अस शयद तुसी कमजोर लगते, पर तुसी सबक देण जे असी केईं परमेश्वरे रज्जि ताकत असी।

⁵ तोउं त, अपफ परखी कइ पता लाए कि सच्चे बि तुस विश्वास अन्तर असे ना? तोउं तुसी पता लगता कि यीशु मसीह तुं अन्तर भुन्ता। पर अगर मसीह तुं अन्तर ना भुन्ता, त तुस अपु परखुण अन्तर नाकाम भोई गो असे।

⁶ अउं उम्मीद करण लगो असा कि तुं परखुण अन्तर तुसी पता लगता कि अस नाकाम ना भुए।

⁷ अस परमेश्वर जे प्रार्थना करण लगो असे कि तुस पाप कर कइ असी प्रतिनिधि भुणे ताकत साबित करणे लिए मजबूर ना करे। बल्कि तुस सोब कुछ सुसुर करे, बेशक तसे बेलि असी अपु प्रतिनिधि भुणे ताकत हरालणे कोई मौका ना मेईंयाल।

⁸ किस कि, अस सच्चाई खिलाफ कुछ ना कइ बटते, बल्कि सोब कुछ सच्चाई लिए कते।

⁹ अस तपल खुश भुन्ते, जपल अस कमजोर त तुस ताकतवर भुन्ते। हें प्रार्थना हमेशा इहांणि भुन्ति कि तुस मसीहे विश्वास अन्तर बस घिए।

¹⁰ इन्हि बोकी अउं तुं पतोबारी लिखता, किस कि परमेश्वरे तुस मेन्धे बणाण जे दुतो असे, बिगाड़ण जे नेईं दुतो। तोउं, जपल अउं एऊं त तुसी पुठ मोउं अपु हक इस्तेमाल करणे जरूरत ना पड़ियेल।

अखिरि बोके त नमस्कार ( 13:11-14 )

¹¹ अब ए ट्यारेओ! यके मन भोई कइ, त उई मी कइ बिशे। खुश रिहे त हिम्मत रख कइ विश्वास अन्तर बस घिए। होर परेम त शान्ति देणे बाड़ा परमेश्वर तुसी जोई साते रेहन्ता।

¹² यकी होरी शुचे गड़ेमेड़े करे।

¹³ इठियाणि सोब विश्वासी तुसी जे नमस्कार बोते।

¹⁴ प्रभु यीशु मसीहे कृपादृष्टि, परमेश्वरे परेम त शुची आत्माई संग तुसी सोबी जोई भुन्ति रिहे। आमीन