2 कुरिन्थ 10 - Walangi

अपु प्रतिनिधि भुणे बारे पौलुसे जवाब ( 10:1—13:10 ) पौलुसे अपु सेवाई बारे जवाब देण

¹ अउं पौलुस अपु कनारा तुं छनेअरे कता। में बारे सुआ जेईं बोते कि मुंह सामणे भोल त डरोरा, होर दूर भोल त सक्त। अउं पौलुस मसीहे ईं नरम बण कइ तुसी जे बोता

² छने, जपल अउं तुसी केईं एऊं त तुसी जुए सक्त बरताब करणे लिए मजबूर ना करे। किस कि जे बोते कि में जीणे लियागत धरती हिसाब जुए असी, तेन्हि धमकाण अउं जाणता।

³ आं, ए बोक त सच्ची असी कि अस इस धरती पुठ बिश्ते, पर अस मतोके हिसाब जोई झगड़ीन्‍ते नओं।

⁴ बल्कि अस जे हथियार घिन कइ मडीन्‍ते, से इस धरती ना। से त परमेश्वरे ती ताकतवर हथियार असा। तसे बेलि अस शैताने नियको ताकत खतम कते त झुठी बेहेस मुकान्ते।

⁵ अस परमेश्वरे ज्ञाने खिलाफ हर यक सोच मुकाई छते त सोबी के मन मसीहे वश अन्तर कते, ताकि सोब तसे निआंग माने।

⁶ त जपल तुस पूरी निआंग मानते, त अस तेन्हि निआंगी ना मानणे बाड़ी जे सज्जा देन्ते।

⁷ तुस मेह्‍णु सद बाहरी बइ हेरते। अगर केसे अपफ पुठ एत भरोसा असा, कि से मसीहे भो, त तसे लिए ईं समझुण बि जरूरी असु, कि जीं से मसीहे भो, तीं अस बि मसीहे भिन्थ।

⁸ तोउं त, अउं अपु तेस हके बारे जे प्रभु तुसी बरबाद करण जे नेईं, बल्कि बणाण जे हेन्धे दुतो असे, तेस बारे अगर घमण्ड करुं त अउं ना लजिन्ता।

⁹ तुस ईं ना समझे कि अउं अपु चिट्ठि बेलिए तुसी डराण चहन्ता।

¹⁰ किस कि केहि केहि बोते, “तसे चिट्ठि वजनदार त असरदार भुन्ति, पर से हेरण सुआ कमजोर असा त तसे बोके बि गावेई ईं भुन्ति।”

¹¹ जे ईं बोते, से ई जाण घिए कि जे जे बोके अस पतोबारी चिट्ठि अन्तर लिखते, तेन्हि तुं सामणि कर कइ हरालते बि।

¹² अस अपफ तेन्हि मेह्‍णु जोई बराबरी करणे कोशिश न कते, जे अपफ खास मानते। किस कि से अपफ मुर्ख भुण साबित कते, जपल से यकी होरी बराबरी कते, त अपु औकात बि हरालते।

¹³ जीं बि भोल, अस अपु हद केआं ज्यादा कदी घमण्ड न कते। पर तेस सेवा तकर घमण्ड कते, जे परमेश्वरे असी जे ठहरेरो असी, जेस अन्तर तुस बि असे। एसेरी मुताविक अस घमण्ड बि कते।

¹⁴ तुसी पुठ घमण्ड कर कइ अस अपु हद पार करण नेईं लगो, किस कि सोबी केआं पेहले अस मसीहे खुश खबरी शुणान्ते शुणान्ते तुसी तकर पूज गो असे।

¹⁵ त अपु सेवा केआं बाहरी, केसे होरी के सेवा पुठ, अस घमण्ड न कते। पर असी भरोसा असा कि, जीं जीं तुं विश्वास बधियाल, तीं तीं तुं बझई जोई, हें सेवाई मुताविक, अस बि बधते घेन्ते।

¹⁶ तोउं, अस तुसी केआं बि दूर दूर तकर घेई कइ खुश खबरी प्रचार कते। पर होर जगाई होरी जे कम किओ असु, तढ़ि लिए असी घमण्ड करणे कोई जरूरत नेईं।

¹⁷ जीं कि धरमे कताब अन्तर लिखो असु, “जेस जेईं घमण्ड करण असा, त से प्रभु पुठ घमण्ड करे।”

¹⁸ किस कि अब्बल सेईंए भुन्ता, जेस प्रभु अब्बल मानता। न कि से, जे अपु अपफ अब्बल बणता।