2 कुरिन्थ 1 - Walangi

नमस्कार त शुरुवाती बोके ( 1:1-11 ) नमस्कार

¹ ट्यारे कुरिन्थुस शेहरे परमेश्वरे सतसंग त पूरे अखया राज्य परमेश्वरे चुणो मेह्‍णुओ! अउं पौलुस, जे परमेश्वरे इच्छाई बेलि मसीह यीशु प्रतिनिधि असा त हें भाई तिमुथियुस, तुसी जे नमस्ते कते।

² हें परमपिता परमेश्वरे त प्रभु यीशु मसीहे कृपादृष्टि तुसी पुठ भुन्ति रिहे त तुसी शान्ति मेती रिहे। आमीन

पौलुस परमेश्वरे धन्यवाद करण

³ चले, अस हें परमेश्वरे त हें प्रभु यीशु मसीहे बोउए धन्यवाद कते, जे दाह कता त सुख चैन देन्ता।

⁴ से असी सोब परेशानी अन्तर बि सुख चैन देन्ता, ताकि अस बि, जे परेशान असे तेन्हि सोबी जे तेस सुख चैन दी बटुं, जे तेन हें धे दुतो असा।

⁵ आं! जीं असी मसीह जे सुआ कष्ट त परेशानी असी, तीं मसीहे बेलि बि असी जे सुख चैन बि असा।

⁶ अगर अस परेशान असे त तुं बचुण त सुख चैन जे। होर अगर असी सुख चैन मेओ असा त तुं सुख चैन जे, जेसे बेलि जे दुख तकलीफ अस सेहन्ते, तस तुस बि धीरज धर कइ सेह बटियेल।

⁷ तुं बारे असी पूरा यकीन असा कि जीं कष्ट सेहणे अन्तर तुसी हें साथ दुतो असा, तीं हें सुख चैन अन्तर बि तुसी सुख चैन मेता।

⁸ ए ट्यारेओ! एशिया इलाके अन्तर असी पुठ जे जे कष्ट आ, अस ई ना चहन्ते कि तसे बारे तुस अणजाण रेह। अस एत भुंजो थिए कि जीणे उम्मीद असी छड़ दुतो थी।

⁹ आं! सच बोलियेल त असी त लगु कि शयद असी मरणे सज्जा मेओ असी। पर ए सोब इस बझई जुए भु, ताकि अस अपु ताकत पुठ ना, बल्कि परमेश्वरे ताकत पुठ भरोसा कते, जे मरो तेन्हि दुबारी जीआन्ता।

¹⁰ त जेन असी तेस ईं मरणे हालत केआं बचा, से हउ बि असी बचान्ता। तेस पुठ हें उम्मीद असी कि भविष्य अन्तर बि से असी बचान्ता रेहन्ता।

¹¹ अगर असी जे प्रार्थना कर कइ तुस बि हें मदत कते त सुआ जेईं के प्रार्थना बेलि प्रभु असी अशुश देन्ता। होर सुआ जेईं तसे धन्यवाद कते।

पौलुस त कुरिन्थुस शेहरे सतसंग ( 1:12—7:16 ) पौलुस अपु घेणे योजना बदलीण

¹² अस इस बोकी पुठ रोभ किढ़ बटते त हें अन्तरात्मा बि इ उगाह देन्ती कि असी पूरी सच्चाई जुए, शुची जिन्‍दगी जीओ असी, खास कर तुं सामणि। ए असी मेह्‍णु दुतो ज्ञाने बेलि नेईं किओ, बल्कि परमेश्वर केआं भुओ कृपादृष्टि बेलि।

¹³ तुसी जे अस कुछ होरु नेईं लिखुण लगो, बल्कि सद सेईंए, जे तुस पढ़ बटते त बिझ घेन्ते। त अभेईं, जीं तुस हें बारे धिक धिक समझो असे, मोउं उम्मीद असी कि अखिर अन्तर तुस पूरु समझ घेन्ते।

¹⁴ तोउं, यीशु मसीहे एणे रोज तुस असी पुठ रोभ लान्ते त अस तुसी पुठ।

¹⁵ किस कि मोउं इस बारे पूरा यकीन थिआ, त मेईं तुं आ जे एणे मन बड़ो थिआ ताकि तुसी में बेलि दुई दुई लिंग अशुश मेईंयेल।

¹⁶ मेईं त सोचो थिउ कि मकिदुनिया राज्य घेण पेंत, तुस केईं एऊं त पैठते टेम बि तुसी केईं एऊं ताकि यहूदिया राज्य वापिस घेण जे तुस में किछ मदत करियेल।

¹⁷ त ई उपाय करुं अन्तर, मेईं कि जल्दबाजी की ना? की अउं होरे मेह्‍णु के ईं अपु फायदा लिए अभेईंए “हाँ, हाँ” त अभेईंए “ना, ना” बोलुण जे तेयार असा ना?

¹⁸ कदी ना! जीं परमेश्वर यकीन लेएक असा, तीं तुसी जे अस बि यकीन लेएक असे। त हें “हाँ” हमेशा “हाँ” असा, त हें “ना” हमेशा “ना” असा।

¹⁹ होर परमेश्वरे कुआ यीशु मसीह हमेशा यकीन लेएक असा, जेसे बारे अउं पौलुस, सिलवानुस त तिमुथियुस तुं बुच प्रचार किओ असा। से कदी झूठ ना बोता।

²⁰ त यीशु मसीहे बेलि ईं परमेश्वरे सम्हाई जुबान हमेशा पूरी भुन्ति। तोउं त, परमेश्वरे महिमा भुण जे अस यीशु मसीहे बेलि “आमीन” बोते।

²¹ त परमेश्वर ईं असा, जे तुसी त असी, मसीह पुठ मिआई कइ बसान्ता त

²² असी पुठ अपु मुहर लाई कइ तेन अस नियुक्त किओ असे। अपु आत्मा निशाणी तौर पुठ हें अन्तर छोओ असी।

²³ परमेश्वर में उगाह असा कि अउं इस बझई जुए तुं कुरिन्थुस शेहर जे ना आ, ताकि में बोके बेलि तुसी कष्ट ना भुओल।

²⁴ तुस ई ना समझे कि विश्वासे बारे अस तुसी पुठ हुकुम चलाण चहन्ते। अस त तुसी जुए कम करणे बाड़े असे, ताकि तुस खुश भोई बटियेल। असी पता असा कि तुस विश्वास अन्तर सीरी के ईं टडी कइ बस गो असे।