1 तिमुथि 6 - Walangi

¹ जे जे बि गुलामी अन्तर असे, से सोब अपु अपु मालिके सुआ इज्जत करे, ताकि बाहरी मेह्‍णु परमेश्वरे नओं त हें शिक्षाई बारे बुराई ना कइ बटियेल।

² होर जेन्के मालिक विश्वासी असा, तस विश्वास अन्तर भाई समझ कइ इज्जत घट ना करे, बल्कि तसे सेवा खरी करे, किस कि तेन्के खरी सेवाई फायदा तस भुन्ता, जे यक विश्वासी त तेन्के ट्यारा असा। ई सोब बोक तोउ तेन्हि समझाण त जोर दी कइ निआंग देन्ते रेह।

गलत शिक्षा त धने लोभ

³ हें प्रभु यीशु मसीहे बोके त शिक्षा परमेश्वरे इच्छाई हेसाब जुओई असी। त जे मेह्‍णु तस खरी शिक्षा छड़ दी कइ गलत शिक्षा देन्ता,

⁴ से मेह्‍णु चौड़ा भोई गो असा त तस अपफ पता नेईं कि से मेह्‍णु की की शिचालता। पर तस कुछ शब्द पुठ झगड़ीणे बीमारी लग गो असी, जेसे बेलि जड़ण, लड़ाई, बुरी बोक त होरी पुठ झूठा बेहेम पैदा भुन्ता।

⁵ त जेन्के बुद्धि भ्रष्ट भोई गो असी, त जे सच्चाई केआं दूर भोई गो असे, से सोचते की परमेश्वरे वचन शिचालण सुआ धन कठेरणे तरीका असा। तेन्के बुच बेहला झगड़ा भेएड़ा भुन्ता।

⁶ पर जे अपु कमाई पुठ खुश भोई कइ परमेश्वरे भक्ति कता, तसे सोबी केआं मोटी कमाई असी।

⁷ किस कि असी धरती पुठ ना कुछ अण्हतो असु, होर ना कुछ इठिआ नी बटते।

⁸ होर अगर असी केआं खाण जे रौठि त डबुण जे झिणे असे त असी तेसे जोई खुश भुण लौतु।

⁹ पर जे सुआ धन कठेरण चहन्ते, से तेस परीक्षा अन्तर त जाल अन्तर, होर नुकसान देण बाड़ी सुआ लाछ अन्तर फसते, जे तेन्हि हाड़ अन्तर फटान्ती त मुकाई छती।

¹⁰ किस कि रुपेई के लालच सोबी बुराई के जड़ असी, जेस तोपते तोपते सुआ मेह्‍णु परमेश्वरे सच्चा वचन छड़ दी कइ अपु अपफ सुआ दुखे बेलि लहुलुहान किओ असे।

तिमुथियुस जे नीजी संदेश

¹¹ पर ए परमेश्वरे मनखा, तिमुथियुसा! तु इन्हि सोबी बोकी केआं दूरु बिश त धरम, भक्ति, विश्वास, परेम, धीरज त अपफ घटाई कइ बिशुण जे अपु पूरी ताकत ला।

¹² अपु विश्वास मजबूत रखण जे खरा मुकाबला कते रेह त जेस अमर जीवने लिए परमेश्वरे तु भिहो असा त जेस बारे तेईं सुआ मेह्‍णु के अगर खरी हिम्मत जुए उगाही दुतो थी, तस ना गवां।

¹³ सोबी कें धे जिन्‍दगी देणे बाड़ा परमेश्वर, त राज्यपाल पुन्तियुस पिलातुसे सम्हाणि खरी हिम्मत जुए उगाही देणे बाड़ा यीशु मसीह उगाह रख कइ अउं तोउ जे ई निआंग देन्ता,

¹⁴ कि जपल तकर हें प्रभु यीशु मसीह दुबारी ना एन्ता, तपल तकर इन्हि निआंगी पूरी ताकत त मन केआं मनीण दिए।

¹⁵ परमेश्वर अपु ठीक किओ टेम पुठ प्रभु यीशु दुबारी लंघान्ता। किस कि से परमधन्य असा, सद यके राजा असा, सेईंए राजी के राजा, त प्रभु के प्रभु असा,

¹⁶ होर सद सेईंए अमर असा, त से ईं टगड़ी जगाई बिश्ता, जेठि कोई ना घेई बटता। से मेह्‍णु ना कदी काओ असा होर ना हेर बटते। तसे शान त राज्य हमेशा भुन्ता। आमीन!

¹⁷ इस मतोके अमीर मेह्‍णु जे बोल कि से अपु धन पुठ रोभ ना किढ़े त जेस धने कोई विश्वास नेईं तस पुठ भरोसा ना करे। बल्कि परमेश्वर पुठ अपु भरोसा रखे जे हें सुखे लिए सोब कुछ खुल कइ देन्ता।

¹⁸ से खरे कम करे त खरे कम अन्तर अमीर बणे, होर मदत करण त दान देण अन्तर चुस्त रिहे।

¹⁹ ईं कर कइ से एण बाड़े रोजे लिए अब्बल धन कठा कते, जे कि अमर जीवने लिए अब्बल खाई ईं बणता, त तेन्हि खरा जीवन मेई सकियेल।

²⁰ त ए तिमुथियुसा! जे सच्चा वचन तेन्धे दुतो असे, तेन्हि सही सलामत रख कइ मेह्‍णु शिचालिण दे; त जे शिक्षा परमेश्वरे इच्छाई खिलाफ असी, तेस केआं त जुठी बोकी बेहेस केआं बि दूर बिश।

²¹ किस कि केहि मेह्‍णु एईएं ज्ञान समझ कइ माने त प्रभु यीशु पुठ अपु विश्वास केआं मुकीर गो असे। तोउ पुठ परमेश्वरे कृपादृष्टि भुन्ति रिहे।