1 तिमुथि 5 - Walangi

होरे विश्वासी जे जिम्मेबारी

¹ ए तिमुथियुसा! अपफ केआं मोटी जे टाटोरी कइ बोक ना कर, बल्कि तेन्हि अपु बोउए ईं समझ कइ इज्जत जुए बोके कर। त जे तोउ केआं मठुड़ असे, तेन्हि अपु भाई ईं समझाण दे।

² मोटी जिल्हाणु अपु ईये ईं त जवान कुई अपु भेण ईं मान कइ पूरे शुचे मन जुए समझाण दे।

³ खास कर तेन्हि विधवाई के ख्याल रख, जेन्हि मदते सक्त जरूरत असी।

⁴ पर अगर केसे विधवा केईं कोई गभुर या पौतुर पौतीर असे त पेहले तेन्हि अपु टब्बर अन्तर विश्वासे चाल चलुण त अपु ईये बोउए परेमे बदला देण शिचुण लौतु, किस कि परमेश्वर एसे बेलि खुश भुन्ता।

⁵ जेस विधवा केईं कोई मदत करणे बाड़ा नेईं त यकदम अकेली असी, से परमेश्वर भाड़ती त अपु जरूरते लिए भ्यागे ब्यादि परमेश्वर जे विनती प्रार्थना कती रेहन्ती।

⁶ पर जे विधवा मौज मस्ती करण लगती, से जीं यक किस्मे मरी गो असी।

⁷ सोबी जेईं इन्हि बोकी के बारे शिचाल, ताकि कोई तेन्के बारे बुरी बोक ना करे।

⁸ पर अगर कोई अपु खास कर अपु टब्बरे देखभाल ना कता त तेन अपु विश्वास छड़ दुतो असा, त से अविश्वासी केआं बि ज्यादा बुरा भोई गो असा।

^9-10 सतसंग जेन्हि विधवाई के मदत कता, तेस सूची अन्तर सद तेन्के नओं लिखे, जे विधवा साठ साल केआं ज्यादी उमरी भोल, जेन सिर्फ यक धाणि रखो भोल, जेसे खरु कम करणे बारे मेह्‍णु बुच पिछाण भोल, त जेन अपु गभुर सुसुर पाड़ो भोल, होर मेहमानी के खरा ख्याल रखो भोल, त शुचे मेह्‍णु सेवा किओ भोल, त दुखी मेह्‍णु मदत किओ भोल, होर सोब भले कम करुण जे मन किओ भोल, सद तेन्हि विधवाई के नओं लिखे, जेन्के सतसंग मदत कता।

¹¹ पर जे जवान विधवा असी, तेन्के नओं ना लिख, किस कि जपल से होरा ब्याह करण चहन्ती त यीशु मसीह जे दुतो अपु जुबान बिसिर छती त अपु घर बसाण चहन्ती।

¹² त से अपु अपफ दोषी ठहरान्‍ती, किस कि तेन अपु पेहली जुबान टोड़ो असी।

¹³ से दुआरोड़ी घेई घेई कइ आलसी बण घेन्ति। सद आलसी ना बल्कि से चथोकिरी बण कइ होरी के कम बगाड़ती। त जे तस बोलुण ना लौतु तस बोती।

¹⁴ तोउं त अउं इ चहन्ता कि जे जवान विधवा असी, से होरा ब्याह करे। तेन्हि गभुर जमाणण त गीहे ख्याल रखण लौता, ताकि मसीहे केसे दुश्माण असी बदनाम करणे मौका ना मेईंयाल।

¹⁵ किस कि केहि विधवा परमेश्वरे बोक ना मान कइ शैताने पता घेण लग गो असी।

¹⁶ अगर केसे विश्वासी जिल्हाणु केईं कोई विधवा असी त ई खरु भुन्तु कि विश्वासी अपफ तसे देखभाल करे, ताकि से सतसंग पुठ बोझ ना बणियेल। त सतसंग तेन्हि विधवाई के देखभाल कर बटियेल, जे यकदम अकेली असी।

¹⁷ जे मुखिये सतसंगे कम-काज सुसुर हेरते, खास कइ जे परमेश्वरे वचने प्रचार करण त शिचालण अन्तर कष्ट उठान्ते, तेन्हि सोबी मेह्‍णु दुई गुणा इज्जते हकदार समझे।

¹⁸ किस कि धरमे कताब अन्तर लिखो असु, “खला पुरोड़णे बाड़े चूरे मुंह ना बन्हुण।” किस कि “कमाणे बाड़ा अपु मजूरी हकदार असा।”

¹⁹ अगर कोई मेह्‍णु केसे मुखिया पुठ दोष लाआल त तेन्के बोक दुई, टाई उगाहे बगैर ना मनीण।

²⁰ अगर से दोषी भोल त सोबी के सामणे तस समझाण दिए, ताकि होरे मेह्‍णु बि डरियेल।

²¹ अउं यीशु मसीह, परमेश्वर त तसे चुणो स्वर्गेदूती उगाह बड़ाई कइ तोउ जे निआंग देन्ता कि एन्हि सोबी बोकी पूरा मन जोई मनीण दिए। त केसे बि कम अन्तर केहर-बेहर ना करे।

²² बगैर परखणे केसे मेह्‍णु मुखिया बणाण जे झट हथ ना रख। होरी पाप अन्तर सात ना दे, पर अपफ जे शुचा रख।

²³ एण बाड़े रोज अन्तर सद पोण न पी। पर अपु पेटे लिए धिक धिक अराख बि पीण दे, किस कि तु घड़ी घड़ी बीमार भुण लगो असा।

²⁴ केसे केसे मेह्‍णु पापी के सोबी पता भुन्ता त परमेश्वरे न्याय करण केईआं पेहलाई पुजी घेन्ता। पर केसे केसे मेह्‍णु पापी के केसे बि पता ना भुन्ता, पर तेन्के परमेश्वरे न्याय करणे रोज पता लग घेन्ता।

²⁵ तीं, कुछ मेह्‍णु के भले कम तपले नजर एन्ते, होर कुछ मेह्‍णु के भले कम पता केई घेन्ते।