1 तिमुथि 4 - Walangi

गलत शिक्षा शिचालणे बाड़े

¹ शुची आत्मा सुसुर बोती कि एण बाड़े रोज अन्तर सुआ मेह्‍णु धोखा देण बाड़े मेह्‍णु के शिक्षा त दुष्ट आत्माई बारे शिक्षा मान कइ प्रभु यीशु पुठ विश्वास करण छड़ देन्ते।

² ए तेन्हि झूठे मेह्‍णु के कपटे बझई जुए भुन्तु, जेन्के अन्तरात्मा मर गो असी।

³ से ब्याह करण केआं मेह्‍णु ठाकते, त किछ खाणे चीज खाण ना देन्ते। पर परमेश्वरे खाणे चीज तोउं दुतो असी कि जे तेस पुठ विश्वास कते त सच्चाई पिछाणो असी, तसे धन्यवाद दी कइ खाए।

⁴ किस कि परमेश्वरे जे बि बणो असु, से सम्हाई खरु असे त खाणे लेएक असु। पर शर्त ईं असी कि परमेश्वरे धन्यवाद दी कइ खओ लौतु।

⁵ किस कि से परमेश्वरे वचन त प्रार्थनाई बेलि शुचे भोई घेन्ते।

यीशु मसीह बधिया सेवक

⁶ बे कोईया, अगर तु विश्वासी भाई भेणि जे इन्हि बोकी के चेता दिआन्ता रेहन्ता त तु यीशु मसीहे बधिआ सेवक बणता। त विश्वासे वचन त जे खरी शिक्षा तेईं अभेईं तकर मनो असी, तेन्हि बोकी बइ तें लालन-पालन भुन्ता रेहन्ता।

⁷ पर बेधर्मी बोकी त स्याणी जिल्हाणु के मन गढ़त कथाई केआं दूर बिश, होर जीं यक खिलाड़ी कसरत कते रेहन्ता, तीं तु बि परमेश्वरे भक्ति अन्तर जीण जे पूरा कोशिश कते रेह।

⁸ किस कि जिसमे कसरते फायदा सद इस जिन्‍दगी अन्तर असा। पर परमेश्वरे भक्ति सम्हाई बोकी जे फायदामन्द असी, किस कि एस अन्तर इस टेमे जिन्‍दगी त एणे बाड़ी जिन्‍दगी जुबान असी।

⁹ ई बोक सच्ची त मानणे लेएक असी।

¹⁰ अस तोउं मेहनत त कष्ट कते, किस कि हें विश्वास तेस जीन्ता परमेश्वर पुठ असा, जे सम्हाई मेह्‍णु, खास कर विश्वासी मेह्‍णु बचाणे बाड़ा असा।

¹¹ तु एन्हि बोकी के निआंग देन्ता रेह त शिचालते रेह।

¹² तु परमेश्वरे वचन अन्तर, तें चाल चलण अन्तर, परेम त विश्वास अन्तर होर शुचे विचार अन्तर सम्हाई विश्वासी जे नमूना बण, ताकि तें कम उमरी बझई जुए कोई तें बोक अणशुणि ना करे, पर सोब पूरा मन लाई कइ शुणे।

¹³ जपल तकर अउं ना एईयाल, तपल तकर सतसंग अन्तर धरमे कताब पढ़ीण, शिचालण त प्रवचन देन्ता रेह।

¹⁴ परमेश्वरे जे वरदान तेन्धे दुतो असा, तस पूरे जोश जुए इस्तेमाल कर, किस कि ए वरदान सतसंगे स्याणी जपल तोउ पुठ हतेउ रख कइ प्रार्थना किओ थी, तपल भविष्य वाणि बेलि तोउ मेओ थी।

¹⁵ अन्हि बोकी मन लाई कइ ध्यान जोई कते रेह, जेसे बेलि सोब मेह्‍णु विश्वास अन्तर तें तरक्की हेरियेल।

¹⁶ अपु जीण त अपु प्रवचने पेहरा दिआ कर त इन्हि बोकी पुठ टिग बिश, किस कि अगर तु ईं कता रेहन्ता त तु सद अपफ जे ना, बल्कि जे तें बोक मानते, तेन्के बि बचणे बझह बणता।