1 तिमुथि 3 - Walangi

सतसंगे मुखिया

¹ ए त सच्ची बोक असी कि जे मुखिया बणुण चहन्ता, तेन खरु कम करणे मन किओ असा।

² त इ जरूरी असु कि मुखिया दोषी ना लौता, त यके जुएली धाणि लौता, फर्तुआटा ना लौता, मेह्‍णु जुए सुसुर बिशणे बाड़ा लौता, जेसे मेह्‍णु इज्जत कते। से सेवा पाणि करणे बाड़ा लौता त बधिया शिचालणे बाड़ा लौता।

³ ना प्याकड़, ना कुटीण बाड़ा, ना झगड़ीण बाड़ा त ना लालची लौता, बल्कि से खरा लौता।

⁴ तेन अपु टब्बरे खरा ख्याल रखो लौता त अपु गभुर बि वश अन्तर रखो लौते।

⁵ (किस कि जे अपु टब्बरे सुसुर ख्याल ना रख बटता, से परमेश्वरे सतसंगे कीं ख्याल रखता?)

⁶ फि नोउआं विश्वासी ना भुण चहिए, किस कि ईं ना भुओ लौतु कि से रोभ किढ़ाल त शैताने ईं सज्जा मेईंयेल।

⁷ विश्वासी मेह्‍णु छड़ दी कइ होरे मेह्‍णु के बुच बि मुखिये खरी इज्जत भो लौती। ई ना भुओ लौतु कि तेन्हि मेह्‍णु के चाथि के बझई जुए जीं जानवर जाल अन्तर फस कइ छूट ना बटते, तीं से बि शैताने जाल अन्तर फस घियेल।

सतसंगे सेवक

⁸ तीं सतसंग अन्तर जे सेवक भुन्ते से इज्जतदार लौते। से ढोंगी त प्याकड़ ना लौते, होर अपु फायदे लालची बि ना लौते।

⁹ पर परमेश्वरे दुतो विश्वासे सच्चा वचन अपु अन्तरात्मा अन्तर रखणे बाड़े लौते।

¹⁰ इन्हि सेवकी बि पेहले परखुण जरूरी असु। तोउं अगर नरदोष मेईंयेल त से सतसंगे सेवक बणाण।

¹¹ तिहांणि जिल्हाणु बि इज्जतदार लौती। से दोष लाणे बाड़ी ना लौती, बल्कि खरी त हर बोक पुठ यकीन करणे लेएक लौती।

¹² सेवक यके जुएली धाणि लौता, अपु गभुरु त अपु टब्बरे बधिआ ख्याल रखणे बाड़ा लौता।

¹³ किस कि जे सेवके कम सुसुर कते तेन्हि खरी इज्जत मेती त यीशु मसीह पुठ जे विश्वास असा तस बोलुण जे बि सुआ हिम्मत मेती।

बोडी नियको बोक

¹⁴ मोउं उम्मीद असी की अउं झट तोउ केईं जे एन्ता, फि बि ई चिट्ठि तोउं लिखुण लगो असा

¹⁵ कि अगर मोउं एण अन्तर चेरे भोई घियेल त तोउ पता लगियेल कि जीन्ता परमेश्वरे गी, जे कि सतसंग असा, तथ अन्तर मेह्‍णु कीं उरतुण-बरतुण, किस कि से सच्चाई थम त खाई भो।

¹⁶ होर एथ अन्तर कोई शक नेईं कि हें विश्वासे नियोको बोक सुआ बोडी असी: यीशु मसीह मनख बण कइ जमा, शुची आत्माई तस धर्मी बोलु, तेन स्वर्गेदूती दर्शण दिते, त तेस बारे पूरी धरती पुठ प्रचार भुआ, धरती पुठ सुआ मेह्‍णु तेस पुठ विश्वास किआ, त परमेश्वर बोडी महिमा जुए तस स्वर्ग जे घिन गा।