1 तिमुथि 2 - Walangi

सतसंग अन्तर पूजा अराधना करणे बारे शिक्षा

¹ सोबी केआं पेहले अभेईं अउं तुसी जे हथ जोड़ कइ बोता कि परमेश्वरे सम्हाणि सोबी मेह्‍णु जे छनेअरे, विनती, प्रार्थना, त धन्यवाद करे।

² परमेश्वरे सम्हाणि राजा त होरे मोटे अधिकारी जे बि प्रार्थना करे, ताकि अस सुख शान्ति जुए परमेश्वर पुठ विश्वास कर कइ त पूरी इज्जत जुए जी बटियेल।

³ ईं हें बचाणे बाड़ा परमेश्वर जे खरु लगतु त तस सुआ पसंद कता।

⁴ परमेश्वर ईं चहन्ता कि सोबी मेह्‍णु तसे सच्चाई सुसुर पता लगियाल त से सम्हाई बच घियेल।

⁵ किस कि यक परमेश्वर असा, होर परमेश्वर त मनखे बुच बि सद यक बचामी असा, से यीशु मसीह भो, जे इस धरती पुठ मेह्‍णु रूप अन्तर ओ थिआ।

⁶ तेन अपफ अपु मर्जी जुए अपु जान दी कइ सोबी बचाणे मुल दिता। होर इसे बेलि ए बि साबित भुआ कि परमेश्वर सच्चे बि मेह्‍णु बचाण चहन्ता, जे तेन अपु ठीक किओ टेम पुठ हरालु।

⁷ अउं सच बोता कि इस बझई जुए ईं अउं प्रचारक, त यीशु मसीहे प्रतिनिधि बणो असा। परमेश्वरे अउं होरे जाति मेह्‍णु जे सच्चाई त विश्वासे शिक्षा देण जे नियुक्त किओ असा। ए बोक झूठ नेईं।

⁸ तोउं त अउं चहन्ता कि तुस जेस जगाई बि सतसंग कते त सम्हाई मड़द अपु शुचे हथ खड़ियेर कइ प्रार्थना त दुआ करे। त ईं ख्याल रखे की तुं जिन्‍दगी परमेश्वरे लेएक असी, त तुं बुच लेहरीण त कोई झगड़ा भेएड़ा नेईं।

⁹ तिहांणि जिल्हाणु बि कउंचेई कइ त धीरज जुए बिशे। तेन्हि ना झशुड़ गुढि कइ, होर ना सुन्ने त कीमति मोती बेलि अपफ ठाटीण, बल्कि सुसुर झिणे लाई लुई त खरे कम कइ-कुइ अपु अपफ ठाटिए।

¹⁰ किस कि जे जिल्हाणु परमेश्वर मानती तस ए करण जचतु।

¹¹ त सतसंग कते टेम जिल्हाणु हल्ला ना करण, पर पूरे ध्यान जुए शिचुण।

¹² अउं बोता कि सतसंग कते टेम जिल्हाणु मड़द पुठ हुकुम ना चलाण, ना तस शिचालुण, पर अडोल बिशुण।

¹³ किस कि परमेश्वरे पेहले मड़द “आदम” बणा, तोउं तसे जुएली “हब्बा” बणाई;

¹⁴ होर पेहले शैताने आदम ना, बल्कि हब्बा ठगाई छइ त पापण बणि।

¹⁵ तोउं त परमेश्वरे तसे धे शुली के टेम चिड़ंग दिती। तोउं बि अगर जिल्हाणु धीरज जुए विश्वास कती रेहन्ती, परेम जोई सोबी जुए उरतती-बरतती, होर अपफ शुचे रखती त बच घेन्ति।