1 थेस्सलु 5 - Walangi

प्रभु यीशु दुबारी एणे जे तेयार बिशुण

¹ ए भाई त भेणिओं! प्रभु यीशु दुबारी एणे वकत त रोजे बारे तुसी जे किछ बि लिखणे जरूरत नेईं।

² किस कि तुस अपफ जाणते कि जीं चोर राति अजगता एन्ता, तिहांणि प्रभु यीशु बि अजगता दुबारी एन्ता।

³ जपल मेह्‍णु बोते कि “सुख शान्ति असी, कोई डर नेईं”, त तिखेईं जीं गभुरवाल जिल्हाणु शुले लगती, तीं तेन्हि पुठ अजगता आफत एन्ती त से किछ कर कइ बि ना बचते।

⁴ पर ए भाई त भेणिओं! इस बोकी बारे तुस अत बि अणजाण नेईं कि से रोज तुसी पुठ चोरे ईं अजगता एईयाल।

⁵ किस कि तुस सोब टगड़ियार त दिसाई कम करणे बाड़े असे। अस ना रात ना अन्हार अन्तर बिशणे बाड़े असे।

⁶ तोउं त अस होरी के ईं उंघो ना लौते, पर खड़ खड़ त चौकाने बिशो लौते।

⁷ किस कि जे उंघते, से ब्यादि उंघते, होर जे नशा कते, से बि ब्यादि ईं नशा कते।

⁸ पर अस त टगड़ियारी भिन्थ। त असी प्रभु यीशु पुठ विश्वास करणे त यकी होरी जोई परेम करणे कवच डब कइ त प्रभु यीशु जे असी बचान्ता, तेस बचणे उम्मीदे टोफ लाई कइ चौकाने बिश्ते।

⁹ किस की परमेश्वरे असी अपु कोप जे ना, बल्कि हें प्रभु यीशु मसीह अन्तर बचुण जे ठीक किओ असु।

¹⁰ यीशु असी जे इस बझई जुए मुआ, ताकि अस चहे चौकाने बिशो भोल या मरो भोल, सोब मी कइ तेस जोई जीए।

¹¹ तोउं त यक होरी हिम्मत दिए त यकी होरी के तरक्की करणे बझह बणे, जीं तुस करुं बि लगो असे।

अखिरि बोके

¹² त ए भाई त भेणिओं! अस तुसी जे हथ जोड़ते कि जे तुसी बुच कम कते, त प्रभु यीशु अन्तर तुसी बधान्ते, त तुसी शिचालते, तेन्के इज्जत करे।

¹³ त तेन्के कमे बझई जुए परेम जुए तेन्हि सुआ इज्जते लेएक समझे त अपफ बुच उई मी कइ बिशे।

¹⁴ ए भाई त भेणिओं! अस तुसी जे छनेअरे कते कि जे नकम्मे असे, तेन्हि समझाण दिए! डरो तेन्हि हिम्मत दिए! त जे कमजोर असे तेन्के मदत करे! त सोबी जुएई उई मी कइ बिशे!

¹⁵ हेरी बिशे कि कोई केसे नुकसाने बदले नुकसान ना करे। पर हर वकत खरु कम करण जे तेयार बिशे। अपफ बुच त होरी जोई भलाई करणे कोशिश कते रिहे।

¹⁶ हर वकत खुश बिशे।

¹⁷ त हमेशा प्रार्थना कते रिहे।

¹⁸ हर बोक पुठ धन्यवाद करे: किस कि यीशु मसीह अन्तर परमेश्वर चहन्ता कि तुस इहांणि करे।

¹⁹ शुची आत्माई कम ना रोके।

²⁰ जपल कोई भविष्य वाणि करियाल त तसे बोकी पुठ ध्यान दिए।

²¹ हर बोक परखे, त जे खरी असी, तस मने।

²² केसे किस्मी बि बुराई ना करे।

अशुशी त नमस्कार

²³ त अभेईं, जे परमेश्वर शान्ति देन्ता, से अपफ तुसी पूरा शुचा करे; त तुं आत्मा, प्राण, त तुं जिसम हें प्रभु यीशु मसीह दुबारी एण तकर बजन कोई दोषे त बचाई रखे।

²⁴ जेन तुस भिहो असे, से यकीन लेएक असा त इहांणि कता।

²⁵ ए भाई त भेणिओं! असी जे प्रार्थना करे।

²⁶ सोब भाई भेणि जोई शुचे गड़ेमेड़े करे।

²⁷ अउं तुसी प्रभु सोहो दिआन्ता कि इस चिट्ठि सतसंगे सोबी मेह्‍णु पढ़ कइ शुणाए।

²⁸ हें प्रभु यीशु मसीहे कृपादृष्टि तुसी पुठ भुन्ति रिहे। आमीन!