1 थेस्सलु 4 - Walangi

परमेश्वर खुश करणे जीवन

¹ त ए भाई त भेणिओं! अस तुसी जे हथ जोड़ कइ प्रभु यीशु अन्तर समझाण लगो असे कि परमेश्वर खुश करण जे त तेस लेएक जीण जे जीं तुसी असी केआं शिचो असु, होर अभेईं करण लग गो असे, तेस हउ बि कते रिहे।

² किस कि तुसी पता असा की प्रभु यीशु कनारा असी तुसी जे की की निआंग दुतो असी।

³ किस कि परमेश्वरे इच्छा ई भो कि तुस शुचे बणे: मतलब कि नाजायज रिश्ता रखण केआं अपफ बचाई रखे।

⁴ त ईं पता लाए कि कीं कइ अपु जिसम शुचा त इज्जत जुए रखते।

⁵ तुस तेन्हि होरे जाति मेह्‍णु के ईं मौज मस्ती अन्तर ना बिशे, जे परमेश्वर ना जाणते।

⁶ इस बोक पुठ कोई बि अपु भाई या भेण ना ठगे, होर ना तेन्हि पुठ कोई जोर ना लाण। किस कि असी पेहले ईं तुसी जे बोलो असु त खबरदार बि किओ असे कि प्रभु इन्हि सोबी बोकी के सज्जा देन्ता।

⁷ किस कि परमेश्वरे अस शुचे भुण जे भिओ असे, ना कि जुठे भुण जे,

⁸ त जे इन्हि बोकी ना मानते, से असी मेह्‍णु ना, बल्कि जे परमेश्वरे तुं धे अपु शुची आत्मा देन्ता तस ना मानते।

⁹ ए ट्यारेओ! असी ना लगतु कि भाईचारे बारे मोउं किछ लिखणे जरूरत असी, किस कि एसे बारे तुसी अपफ परमेश्वर केआं शिचो असु।

¹⁰ तोउं त तुस मकिदुनिया इलाके सोबी भाई भेणि जुओई बि तीं परेम जुएई बिश्ते। पर ए भाई भेणिओं! अस तुं छनेअरे कते कि तुस परेम अन्तर हउ बि बधते रिहे।

¹¹ त जीं असी तुसी जे निआंग दुतो असी, तीं सोबी जोई शान्ति जोई बिशुण जे, अपु अपु सरसला चलाण जे त अपु हथे बइ कमाण जे हिम्मत करे।

¹² इ करणे बेलि तुस होरे मेह्‍णु सम्हाणि बधिआ जिन्‍दगी काट बटते त तुं कोई घटी ना भोल।

प्रभु दुबारी एण

¹³ ए भाई त भेणिओं! अस चहन्ते की तुस तेन्के बारे जाणे जे विश्वासी मरी गो असे ताकि तुस अविश्वासी के ईं शोक ना करे। तेन्के कोई उम्मीद नेईं, पर हें असी।

¹⁴ किस कि अस विश्वास कते कि यीशु मर कइ दुबारी जी गो असा। त ईं बि पक्कु असु कि जे विश्वासी मर गो असे, जपल परमेश्वर तेन्हि स्वर्ग नेण जे यीशु लंघान्ता त से तेन्हि दुबारी जीआई कइ अपफ जुए घिन घेन्ता।

¹⁵ अस प्रभु वचन केआं तुसी जे ईं बोते कि प्रभु यीशु दुबारी एणे टेम, अस जे जीन्ता भुन्ते, कदी बि तेन्हि मरो विश्वासी केआं पेहले प्रभु जोई ना मीते।

¹⁶ किस कि प्रभु अपफ स्वर्ग केआं एन्ता; तिखेईं सुआ लियार लगती त ताकतवर स्वर्गेदूते अवाज शुणती त परमेश्वरे रेशमि बजती। होर जे मसीह अन्तर मरो असे, से पेहले जी घेन्ते।

¹⁷ तिखेईं अस जे तपल तकर जीन्ते भुन्ते, अस बि तेन्हि जुए बदेए पुठ खड़िए नीइन्ते, ताकि अम्बर पुठ प्रभु जुए मीते त ईं भोई कइ अस हमेशा प्रभु जुए बिश्ते।

¹⁸ त इन्हि बोकी बइ यक होरी हिम्मत देन्ते रिहे।