1 थेस्सलु 3 - Walangi

तिमुथियुस लंघाण

¹ तोउं त, जपल असी केआं हउ न बिशिउ त असी एथेन्स शेहर अन्तर अकेले बिशणे ठीक किउ।

² त असी मसीहे खुश खबरी अन्तर हें भाई त परमेश्वरे सेवा करण अन्तर हें साथी तिमुथियुस तुं भेएड़ जे लंघा, ताकि से विश्वास अन्तर तुसी मजबूत कराल त हिम्मत दियाल,

³ जेस बेलि कोई बि भाई या भेण इन्हि दुखी त कष्टी के बझई जोई डर ना घिए। किस कि तुस अपफ जाणते कि असी इन्हि जुए बिशुण असु।

⁴ किस कि पेहले बि जपल अस तुं अठि थिए त अस तुसी जे बोतेथ कि असी दुख त कष्ट सेहण जरूरी असे। होर इहांणि बि भु, जेस तुस बि जाणते।

⁵ तोउं त जपल मोउं केआं बिशियेरु नेओथ त तुं विश्वासे हाल चाल पुछुण जे तिमुथियुस लंघा। किस कि मोउं डर थिआ कि जीं तीं कर कइ शैताने तुस परीक्षा अन्तर गोताई छो भोल त हें कमाई इहांणि बेकार भोई गई।

तिमुथियुसे बधिआ खबर

⁶ पर अभेईं तिमुथियुस, जे तुं भेएड़ केआं वापिस अओ असा, तेन तुं विश्वास त परेम बारे बधिआ खबर शुणाई। होर तेन असी जे ईं बोक बि लाई कि तुस असी बोडे परेम जुए याद कते त जीं अस तुसी जोई मीण चहन्ते, तीं तुस बि असी जोई मीण चहन्ते।

⁷ तोउं त ए भाई त भेणिओं! तुं ईं विश्वासे बझई जुए असी एत दुख त कष्ट अन्तर बि शान्ति मेओ असी।

⁸ किस कि अगर तुस विश्वास अन्तर मजबूत बिशियेल त हें अन्तर बि नोउआं जोश एन्ता रेहन्ता।

थेस्सलुनीका शेहरे मेह्‍णु जे पौलुसे प्रार्थना

⁹ जे सुख तुसी परमेश्वरे सम्हाणि हेन्धे दुतो असा, तसे बदले तुं बारे असी परमेश्वरे कीं धन्यवाद करुण?

¹⁰ अस भ्यागे ब्यादि ईं हथ जोड़ कइ प्रार्थना कते कि तुसी जोई झट मीण जे एन्ते, त तुं विश्वास अन्तर जे कमी असी, तस पूरा कते।

¹¹ त अभेईं हें पिता परमेश्वर त हें प्रभु यीशु मसीह तुसी जोई मीण जे असी अपफ बथ हरालाल।

¹² त प्रभु ईं कराल कि जीं अस तुसी जोई परेम कते, तीं तुस बि ना सद अपफ जुओई, बल्कि होरी जोई बि परेम करे त परेम अन्तर बधते घिए।

¹³ ताकि, से तुं मन ईं शुचा बणाल कि जपल हें प्रभु यीशु मसीह अपु सोब शुचा मेह्‍णु जुए एन्ता त हें परमेश्वरे त बोउए सम्हाणि तुं मन बजन दोषे मेईंयाल।