1 थेस्सलु 1 - Walangi

नमस्कार

¹ ट्यारे थेस्सलुनीका शेहरे भाई त भेणिओं! में पौलुसे, सिलवानुसे त तिमुथियुसे कनारा तुसी सोबी जे नमस्कार। तुस जे हें परमपिता परमेश्वरे त प्रभु यीशु मसीहे सतसंगे भो, तुसी प्रभु कृपादृष्टि त सुख शान्ति मेती रिहे। आमीन

थेस्सलुनीका शेहरे मेह्‍णु के विश्वास त कम

² ए भाई त भेणिओं! अस टाहो जेईं रोज तुसी जे परमेश्वरे धन्यवाद कते त लगातार तुसी जे प्रार्थना कते।

³ त हें परमपिता परमेश्वरे सम्हाणि तुस विश्वास अन्तर जे कम कते, परेम जुओई जे मेहनत कते त हें प्रभु यीशु मसीह पुठ जे तुं पक्की उम्मीद असी, तस याद कते।

⁴ होर, ए परमेश्वरे ट्यारे भाई त भेणिओं! असी पता असा कि परमेश्वरे तुस सम्हाई चुणो असे।

⁵ किस कि जपल असी खुश खबरी तुसी शुणाई त से सद बोक नेओथ, पर तठि शक्ति त शुची आत्मा, होर पक्का विश्वास थिआ। तुसी त पता ईं असा कि अस तुं भलाई लिए तुं बुच कीं बिशतेथ।

⁶ त तुसी सोब कष्ट त लज सही कइ परमेश्वरे वचन शुची आत्माई खुशी जुए मान छड़े। त जीं प्रभु चहन्ता, होर जीं अस कतेथ, तीं तुस बि करण लगे।

⁷ अब त तुस ईं बण गो असे कि पूरे मकिदुनिया त अखया इलाके अन्तर जे विश्वासी असे से सोब तुं ईं बणुण चहन्ते।

⁸ किस कि तुसी केईआं परमेश्वरे वचन अभेईं ना सद मकिदुनिया त अखया इलाके अन्तर प्रचार भुण लगो असा, बल्कि तस केआं बाहर बि भुण लगो असा। त जेठि जेठि बि अस घेन्ते, तठि मेह्‍णु परमेश्वर पुठ तुं विश्वासे बारे बोके कते। असी कुछ बि बोलुण ना एन्तु।

⁹ किस कि से अपफ हें बारे बतान्ते कि तुसी हें कीं आबिश किओ थिउ, त कीं मुर्ति पूजा छड़ दी कइ यक सच्चा त जीन्ता परमेश्वरे सेवा करण जे मन बदला।

¹⁰ होर से ईं बि बोक कते रेहन्ते कि तुस कीं परमेश्वरे कुआ यीशु मसीह स्वर्ग केईआं एणे हेरी बिशो असे। परमेश्वरे से मरो मेह्‍णु केआं दुबारी जीन्ता किओ असा त यीशु असी परमेश्वरे एणे बाड़े कोप केआं बचान्ता।