1 पतरस 3 - Walangi

धाणि त जुएली

^1-2 तिहांणि, ए जिल्हाणुओ! तुस बि अपु अपु धाणि वश अन्तर बिशे, ताकि तेन्हि अन्तरा अगर कोउं जेईं वचन न मानता भोल, त अपु जुएली भक्ति त शुचा चाल चलण हेर कइ वचन पुठ विश्वास करियाल। तेन्हि कोई समझाणे जरूरत नेईं, बल्कि तेन्के जुएली जीणे ईं तेन्हि यीशु पुठ विश्वास करान्ता।

³ तुं ठाटिण-ठुटिण मेह्‍णु हरालणे बाड़ा न लौती, जीं कि झशुड़ गुढुण, सुन्ने चन्नी गेहणे लाण त रंग रंगी झिणे डबण।

⁴ पर तुं ठाटिण-ठुटिण तुं अन्तर नियोको गुणे लौता, जे नरम त शान्त गुण रखणे बेलि भुन्ता। ए सजावट कदी ना मुकणे बाड़ी मोती के ईं असी। ए परमेश्वरे सामणि सुआ कीमति असी।

⁵ पेहलकण जमाने शुची जिल्हाणु बि जे परमेश्वर पुठ उम्मीद रखतीथ, अपु अपु धाणि वश अन्तर बिश कइ ठटिन्‍तीथ।

⁶ अब्राहमे जुएली सारे बि तिहांणि किउ। से अब्राहमे केहणा मानतीथ त तेस जे “मालिक” बोतीथ। त अगर तुस बि भलाई करियेल त केसे किस्मी डर हेर न डरेल त सारे कुई बोलिन्ती।

⁷ तिहांणि, ए मेह्‍णुओ! तुस बि अक्लदारी जुए अपु अपु जुएली जोई साते जिन्‍दगी बिताण दिए किस कि से तुं ई ताकतवर नेईं। होर तुस तेन्के इज्जत करे ताकि परमेश्वरे दाहे बेलि तेन्हि बि तुसी जोई साते अमर जीवने वरदान मेईंयेल। तोउं तुं हर यक प्रार्थनाई जवाब मेईंयाल।

भलाई करण जे दुख सेहण

⁸ ए ट्यारेओ! अखिर अन्तर अउं तुसी बताण चहन्ता कि तुस सम्हाई यक रुह त उई मी कइ बिशे। यक होरी पुठ दाह दया करे। तुं दिल नरम त दाह बाड़ा लौता।

⁹ बुराई बदले बुराई न करीण। होर बजरुण के बदले बजरुण नओं; बल्कि तसे बदले अशुश देण, किस कि तुस एसेरी लिए ईं भिहो असे ताकि तुस अशुशी के हकदार बण बटियेल।

¹⁰ किस धरमे कताब अन्तर लिखो असु कि “जे कोउं खुशी जुए जिन्‍दगी जीणे इच्छा रखता, त खरे दन हेरण चहन्ता, तेस अपु जिभुड़ बुराई केईआं, होर, अपु मुंह कपटी बोके करण केआं रोक रखण एन्ते।

¹¹ तस बुराई सात छड़ देण, त हमेशा भलाई करीण लौती; तस शान्ति तोपुण लौती त हमेशा उई मी कइ बिशुण लौतु।

¹² किस कि प्रभु नजर हमेशा धर्मी मेह्‍णु पुठ लगोरी रेहन्ती, होर से हमेशा प्रार्थना दुआ शुणता। पर प्रभु बुराई करणे बाड़ी हेर मछोड़ा देन्ता।”

¹³ अगर तुस हमेशा भलाई करण जे तेयार बिश्ते त फि तुं बुराई करणे बाड़ा कि कोउं असा ना?

¹⁴ अगर तुसी भलाई करणे बझई जुए दुख बि मेईंयाल, त तुस धन्य असे; तोउं बि मेह्‍णु के डराणे बेलिए न डरे, होर न परेशान भुए।

¹⁵ पर मसीह इज्जत दी कइ अपु प्रभु माने। कोउं अगर तुसी केआं मसीह पुठ तुं उम्मीदे बारे पुछियाल, त तस जे परेम त इज्जत जोई जवाब देणे लिए हमेशा तेयार बिशे।

¹⁶ होर अपु अपु अन्तरात्मा साफ रखे, ताकि जे मसीह अन्तर तुं खरे चाल चलणे बेज्जती कते, तुसी भुंजान्ते टेम लजियेल।

¹⁷ किस कि बुराई करणे बझई जोई दुख तकलीफ सीढ़ण केआं खरु असु कि तुस भलाई करणे बझई जोई दुख तकलीफ सीढ़े, अगर परमेश्वर इहांणि चहन्ता त।

¹⁸ किस कि मसीह बि सोबी के पापे लिए यक लिंग मर गा। एसे मतलब असा कि अधर्मी के लिए धर्मी मेह्‍णु मर गा, ताकि असी परमेश्वर केईं पुजाल। जिसमे हेसाब जोई त मेह्‍णु मसीह मार छड़ा, पर आत्माई बेलि परमेश्वरे से दुबारी जीआई छड़ा।

¹⁹ तेस आत्माई बेलिए घेई कइ मसीह तेन्हि कैद आत्माई जे बि प्रचार किआ।

²⁰ त सुआ साल पेहले जपल नूह पाणि जहाज बणाण लगो थिआ, तपल मेह्‍णु परमेश्वर ना मानतेथ। सुआ लाह रख कइ परमेश्वर तेन्हि भाड़ बिशो थिआ, तोउं बि से तस केईं ना आए। तपल जहाज अन्तर बिश कइ सद कुछ मेह्‍णु मतलब अठ मेह्‍णु बाढ़े पाणि केईआं बचे। पता मसीहे परमेश्वर ना मानणे बाड़े तेन्हि मेह्‍णु के आत्माई केईं घेई कइ प्रचार किआ।

²¹ से बाढ़े पाणि आजकण जमाने पाणि अन्तर चुसुणे यक निशाणी भो। ए हरालता कि परमेश्वर यीशु मसीह दुबारी जीआणे बेलि अब तुसी बचान्ता; ए चुसुण जिसमे मैल साफ करण जे नेईं, बल्कि साफ अन्तरात्मा मेण जे विनती करीण असी।

²² यीशु अब स्वर्ग अन्तर घेई कइ परमेश्वरे देहणा कना सुआ इज्जते जगाई बिश गो असा। त सोब स्वर्गेदूत, सोब अधिकार त सोब ताकतवर दुष्ट आत्मा तसे वश अन्तर असी।