1 पतरस 2 - Walangi

जीन्ता घोड़

¹ तोउं त, सोब किस्मी बैर, छल कपट, बेईमानी त जड़ुण, त हर किस्मी गुरहाज छड़ दिए।

² होर नओएं जमो गभुर ईं तेस शुचे दुधे लाछ करे, जे तुं आत्माई लिए असु, ताकि तसे बेलि तुस बध बटियेल त बच घियेल।

³ किस कि तुसी प्रभु कृपा मेहसुस कइ छओ असी।

⁴ त प्रभु यीशु भेएड़ एईए, जे मेह्‍णु त रेज समझा, पर परमेश्वरे से चुणो असा त तसे सामणि सुआ खास असा। से जीन्ता घोड़ असा।

⁵ यीशु पुठ विश्वास करणे बेलि तुस बि जीन्ते घोड़ी के ईं असे, जेन्हि मिआई कइ परमेश्वर अपफ जे यक देहेर बणाण लगो असा, जेठि तसे आत्मा भुन्ति। तुस तेस देहेर अन्तर तेन्हि शुचे पुजारी के ईं बि असे, जे यीशु मसीहे बेलि परमेश्वर जे ईं भकत चढ़ान्ते, जे परमेश्वर आत्माई जुए त तसे जोग असा।

⁶ ई जीं धरमे कताब अन्तर परमेश्वरे बोलो असु: “हेरे, अउं यरुशलेम अन्तर यक ईं कुणे घोड़ टगान्‍ता, जे चुणो त सुआ कीमति असा: होर जे कोउं तेस पुठ विश्वास कता, से कदी बि लजिन्ता नोउ।”

⁷ तोउं त, तुस जे तस पुठ विश्वास कते, तुं लिए से सुआ कीमति असे। पर जे विश्वास ना कते तेन्के लिए से, “जे घोड़ मिस्त्री रेज समझो थिआ, सेईंए कुणे पुठि खास घोड़ भोई गा।”

⁸ होर, “मेह्‍णु उछुट छाणे घोड़ त भीं झड़ाणे पलण बण गा” किस कि से वचन न मानणे बझई जोई उछुट घेन्ते, जीं पेहलाई केआं परमेश्वरे ठीक किओ थिउ।

⁹ पर तुस यक चुणो वंश, राजे पुजारी के टज, शुचे प्रजा त परमेश्वरे अपु मेह्‍णु भो, ताकि जेन तुस अन्हारे केआं अपु चमत्कारी टगड़ियार अन्तर भिओ असे, तसे किओ चमत्कारे प्रचार करे।

¹⁰ पेहले तुस परमेश्वरे प्रजा नेओथ, पर अब परमेश्वरे प्रजा भो। पेहले तुसी पुठ परमेश्वरे दाह नेओथ भो, पर अब तुसी पुठ तसे दाह भुओ असी।

विश्वासी मेह्‍णु के जीण

¹¹ ए ट्यारेओ! अउं तुं छने कता कि तुस अपु अपफ परदेशी त यात्री मान कइ तेन्हि मतोके इच्छाई केआं दूर बिशे, जे तुं आत्माई खिलाफ लड़ाई कती।

¹² होरे परमेश्वर ना मानणे बाड़े मेह्‍णु के बुच तुं चाल चलण ईं खरा लौता भो कि जेन्हि जेन्हि बोकी अन्तर से तुसी कुकर्मी मान कइ बदनाम कते, से तुं खरे कम हेर कइ परमेश्वरे एणे रोज तसे गुणगान करियेल।

¹³ प्रभु इज्जत देण जे मेह्‍णु के बणो हर यक अधिकारी के वश अन्तर बिशे, चहे से राजा भो, जे सोबी पुठ राज कता,

¹⁴ या राजे लंघो होरे अधिकारी के, किस कि से बुरे कम करणे बाड़ी जे सज्जा देणे जे त खरे कम करणे बाड़ी के तारीफ करण जे असे।

¹⁵ किस कि परमेश्वर इच्छा ई भो कि तुस भले कम कर कइ मुर्खी के मुर्खे बोक बन्न करे।

¹⁶ अजाद भोई कइ बिशे, पर अपु अजादी बेलि बुराई न घटिण; पर अपु अपफ परमेश्वरे नौखर समझ कइ जीण दिए।

¹⁷ सोबी के इज्जत करे। अपफ बुच उई मी कइ बिशे। परमेश्वर हेर डरे। होर, राजे इज्जत करे।

¹⁸ ए नौखरो! हर यक इज्जत जोई अपु मलिके वश अन्तर बिशे, न सद तेन्के जे भले त शरीफ असे, पर तेन्के बि जे नकठर असे।

¹⁹ किस कि अगर कोउं परमेश्वर याद कर कइ अन्याय अन्तर बि दुख त कड़ा-क्लेश सीढ़ता, से परमेश्वर खुश कता।

²⁰ किस कि अगर तुस बुरे कम कर कइ धीरज जुए मार खाआल त एस अन्तर कुछ बाधरी बोक असी ना? ना! पर अगर भलु कम कर कइ तुस धीरज धर कइ दुख उठाल त परमेश्वर खुश भुन्ता।

²¹ होर परमेश्वरे तुस एसेरी लिए ईं भिओ बि असे कि तुस बि तेसेरीं चाल हंटे, किस कि मसीहे बि तुं लिए दुख सेह कइ तुसी जे यक नमूना बणो असा।

²² “न त तेन कोई पाप किआ, होर न कोई छल कपटे बोक की।”

²³ तेन होरी के बजरुण शुण कइ, केसे जे ना बजरुण। होर दुख तकलीफ खाई कइ बि केसे धमकी न दिती। पर अपु अपफ जे तेस न्यायी के हवाले किआ, जे सच्चाई जुए पंची कता।

²⁴ तेन अपफ हें सोब पाप अपु जिसम पुठ घिन कइ क्रूस पुठ चढ़ गा, जेसे बेलिए अस पाप करण जे मरो तेन्के ईं भोई गे ताकि धरमे लिए जिन्‍दगी जीएल; तसेरी मार खाणे बेलिए तुस ठीक भुओ असे।

²⁵ किस कि तुस पेहले हरेईए ढडुड़ के ईं थिए, पर अब अपु प्राणी के रक्षा करणे बाड़ा त पुहाली केईं वापस एई गो असे।