1 पतरस 1 - Walangi

नमस्कार

^1-2 ए ट्यारे भाई त भेणिओं, परमेश्वरे चुणो मेह्‍णुओ! जे पुन्तुस, गलाती, कप्पादूकिया, एशिया त बिथुनिया इलाके अन्तर परदेशी के ईं खिल्हिर कइ बिशो असे। अउं पतरस यीशु मसीहे प्रतिनिधि तुसी सोबी जे नमस्कार कता। तुस परमपिता परमेश्वरे पेहलाई केआं चुणो थिए कि तुस शुची आत्माई बेलि यीशु मसीहे बोक माने त तसे भकते बेलि शुचे बणे। परमेश्वरे कृपादृष्टि तुसी पुठ भुन्ति रिहे त तुसी शान्ति मेती रिहे। आमीन

जीन्‍ती उम्मीद

³ हें परमपिता परमेश्वरे त प्रभु यीशु मसीहे बोउए गुणगान लौता भो कि तेन असी पुठ सुआ दाह कर कइ यक नोउआं जनम दुतो असा, त यीशु मसीह मरो तेन्हि अन्तरा दुबारी जीआ। ई कर कइ तेन हेन्धे यक जीन्‍ती उम्मीद दुतो असी।

⁴ मतलब कि परमेश्वरे स्वर्ग अन्तर तुसी जे ई विरासत रखो असी जे कदी खतम ना भुन्ति, ना कुस्तुरी भुन्ति, होर ना तसे शान घटती।

⁵ तेस मसीह पुठ विश्वास करणे बेलि परमेश्वरे अपु ताकत जुए तुं रक्षा किओ असी, ताकि तुस बचुण तकर सुसुर बिशियेल, जे परमेश्वरे पंची करणे टेम अन्तर भुणे बाड़ु असु।

⁶ इस बझई जोई तुस खुशी मनाण दिए। आं! बेशक अभेईं केहि दिने लिए, ई जरूरी भोई गो असु कि केहि किस्मी इम्तिहाने बेलि तुस दुख अन्तर असे।

⁷ पर एसे बेलि तुं विश्वास परखिन्ता कि ए मजबूत असा कि नेईं। किस कि खतम भुणे बाड़ा सुन्ना बि त आगी बेलिए परखिन्ता। तुं विश्वास त सुन्ने केआं बि सुआ कीमति असा। अगर परखुण अन्तर तुं विश्वास मजबूत रेहाल त जपल यीशु मसीह वापिस एन्ता, तपल जे शान त इज्जत परमेश्वर मेणे बाड़ी असी, तेस अन्तर तुस बि हेस्सेदार बणियेल।

⁸ तुस यीशु जोई बजन हेरणे परेम कते। होर अब त तेस पुठ बजन हेरणे बि विश्वास कर कइ अत खुश असे कि तुं बुखि हसती त तुं खुशी कोई ठिकाणे नेईं।

⁹ किस कि तेस विश्वासे फल तुसी मेओ असा। से फल भो, तुं बचुण।

¹⁰ कुछ भविष्य वक्ती तुसी पुठ भुणे बाड़ी परमेश्वरे ई दाह दयाई बारे भविष्य वाणि किओ थी। तेन्हि परमेश्वरे तुसी बचाणे बारे सुआ खोजबीन त जांच पड़ताल की।

¹¹ जे मसीहे आत्मा तेन्हि अन्तर थी, से मसीहे दुख सीढ़णे त तढ़ेया पता तस सुआ इज्जत मेणे उगाही तेन्के धे दिती। तोउं त तेन्हि ई गणपुछ की कि मसीह कोउं भोई बटता, त ए सोब बोक कपल पूरी भुन्ति।

¹² अभेईं जे बोक स्वर्ग केईआं लंघो शुची आत्माई बेलि खुश खबरी शुणाणे बाड़े तुसी शुणाई छो असी, से परमेश्वरे तेन्हि भविष्य वक्ती हरालो थी कि तेन्हि ए सोब बोके अपफ जे ना बल्कि तुं लिए बोलो थी। होर इन्हि बोकी के स्वर्गेदूत बि ध्यान जोई हेरणे लाछ कते।

शुची जिन्‍दगी जीण

¹³ तोउं त, अपु अपु मन तेयार कर कइ त अपफ जे वश अन्तर रख कइ, तेस दाह दयाई भाड़ अन्तर बिशे, जे यीशु मसीहे प्रकट भुणे टेम तुसी मेणे बाड़ी असी।

¹⁴ केहणा मानणे बाड़े गभुर के ईं अपु अपु जीण सुधारिण दिए। त मसीह बारे जाणण केआं पेहले जे तुं बुरी इच्छा थी, तेन्के हेसाब जुए जीण छड़ दिए।

¹⁵ पर जीं तुसी भिआणे बाड़ा परमेश्वर शुचा असा, तिहांणि तुस बि अपु पूरे चाल चलण अन्तर शुचे बणे।

¹⁶ किस कि धरमे कताब अन्तर लिखो असु, “शुचा बणे, किस कि अउं शुचा असा।”

¹⁷ होर तुस परमेश्वर जे “ए बोउआ!” बोल कइ प्रार्थना कते जे बजन केहर-बेहर कइ हर यक जेईं अपु अपु कमे हेसाब जोई पंची कता। तोउं त, इस धरती पुठ परदेशी ईं जीणे टेम परमेश्वर इज्जत दी कइ जीण दिए।

¹⁸ किस कि तुस जाणते कि परमेश्वरे तुस तुं बाव दादु केआं खड़ चलो तुं नकम्मी चाल चलण केईआं छुड़को असे। त तेन तुस खतम भुणे बाड़ी चीजी जीं सुन्ने, चन्नी बेलिए नेईं छुड़को।

¹⁹ बल्कि सुआ कीमति मसीहे लहुए बेलिए छुड़काओ असे मतलब नरदोष त बजन कलंके किएऊ बेलि।

²⁰ एस कमे लिए परमेश्वरे मसीह भुमण बणुण केआं पेहलाई चुणो थिआ, पर तुं भलाई लिए अब इस अखिरि जुग अन्तर से प्रकट किआ।

²¹ तसे बेलिए तुस तेस परमेश्वर पुठ विश्वास कते, जेन से मरो तेन्हि अन्तरा जीआ त सुआ इज्जत दिती, ताकि तुं विश्वास त उम्मीद परमेश्वर पुठ भो।

²² त किस कि यकी होरी जोई परेम करण जे तुसी सच्चे वचन मान कइ अपु अपु मन शुचे किओ असे, त अखिर तकर पूरे मन लाई कइ यक होरी जोई खरे परेम कते रिहे।

²³ किस कि तुसी खतम भुणे बाड़ु बिएजु बेलि ना, बल्कि न खतम भुणे बाड़े बिएजु बेलिए नोउआं जनम मेओ असा। से बिएजु परमेश्वरे वचन भो, जे जीन्ता त अमर असा।

²⁴ किस कि धरमे कताब अन्तर ई लिखो असु कि “हर यक मेह्‍णु घासे ईं असा, होर तसे रंगरूप घासे फियुड़ ईं असु। घास शुख घेन्तु त फियुड़ झड़ घेन्तु,

²⁵ पर प्रभु परमेश्वरे वचन जुग जुग रेहन्ता।” एईएं खुश खबरी वचन असा, जेसे तुसी बुछ प्रचार भुओ थिआ।