1 यूहन्ना 5 - Walangi

विश्वासे बेलि मतोक जीतुण

¹ जेसे ई विश्वास असा कि यीशु ईं मसीह भो, से परमेश्वर केआं जमो असा। होर जे कोउं जनम देणे बाड़े जोई परेम कता, से तेस जोई बि परेम कता जे तेस केआं जमो असा।

² जपल अस परमेश्वर जोई परेम कते होर तसे निआंग मानते, त असी पता लगता कि अस परमेश्वरे गभुर जोई परेम कते।

³ परमेश्वर जोई परेम करणे मतलब कि असी तसे निआंग मनीण। होर तसे निआंग मनीण ओखी नेईं।

⁴ किस कि जे कोई परमेश्वर केआं जमो असे, से मतोक जीतता। होर मतोक पुठ से जीत जेसे बेलि मेती से हें विश्वास भो।

⁵ मतोक पुठ जीतणे बाड़ा कोउं भो? सद सेईंए जेसे विश्वास असा कि यीशु ईं “परमेश्वरे कुआ” भो।

यीशु मसीहे बारे उगाही

⁶ जे इस धरती पुठ एई कइ पाणि अन्तर चुसा त अपु लहु बहाई कइ मर गा, से एईएं यीशु मसीह भो। से ना कि सद पाणि अन्तर चुसिआ बल्कि अपु लहु बहाई कइ मर गा। होर जे एसे बारे उगाही देन्ती, से शुची आत्मा भो; त से सच्ची असी।

⁷ एसे बारे उगाही देणे बाड़ी टाई असे:

⁸ से भो शुची आत्मा, पुओणि त लहु। होर टाहो यके बोक पुठ रजामंद असे।

⁹ अगर हें मेह्‍णु के उगाही अति मानिन्ती त परमेश्वरे उगाही त तेस केआं बि बोडी असी। परमेश्वरे उगाही ई असी कि तेन अपु कोईया बारे उगाही दुतो असी।

¹⁰ जे परमेश्वरे कुआ पुठ विश्वास कता, से ई जाणता कि परमेश्वरे उगाही सच्ची असी। होर जेन परमेश्वर पुठ विश्वास नेईं किओ, तेन से झूठा बणाई छड़ा। किस कि तेन तेस उगाही पुठ विश्वास ना किआ, जे परमेश्वरे अपु कोईया बारे दुतो असी।

¹¹ होर से उगाही ई भो कि परमेश्वरे हेन्धे अमर जीवन दुतो असा। ए जीवन तसे कोईये बेलि ईं मेता।

¹² जे परमेश्वरे कुआ जुए जुड़ कइ बिश्ते, तेन्हि अमर जीवन मेता। होर जे तस जुए जुड़ कइ ना बिश्ता, तेन्हि अमर जीवन ना मेता।

अमर जीवने बारे ज्ञान

¹³ तुस, जे परमेश्वरे कोईया नओं पुठ विश्वास कते मेईं तुसी जे तोउं लिखो असु, ताकि तुस जाण घियेल कि अमर जीवन तुसी मेई गो असा।

¹⁴ होर तेस परमेश्वर पुठ हें ईं भरोसा असा कि अगर अस तसे इच्छाई हेसाब जुए कुछ मगते, त से हें शुणता।

¹⁵ त अगर असी पता असा कि जे कुछ बि अस तेस केआं मगते, से हें शुणता, त अस ई बि जाणते कि जे कुछ असी तेस केआं मगु, से मेई गो असु।

¹⁶ अगर तुस कोउं विश्वासी ईं पाप कता हेराल, जेसे फल मौत नेईं, त तसे लिए प्रार्थना करे त परमेश्वर तसे धे जीवन देन्ता। अउं ई बोक सद तेन्के बारे बोता जेन्हि ईं पाप किओ भोल जेसे फल मौत नेईं। पर ईं पाप बि असा जेसे फल मौत असी; जे ईं पाप कते तेन्के बारे अउं प्रार्थना करण जे ना बोता।

¹⁷ हर यक बुरे कम पाप असा, पर ईं पाप बि असा जेसे फल मौत नेईं।

¹⁸ अस जाणते कि जे कोउं परमेश्वर केआं जमो असा, से पाप कता ना रेहन्ता, किस कि परमेश्वरे अपु कुआ यीशु मसीह तेसे देखभाल कता। दुष्ट शैतान तेस छुई बि ना बटता।

¹⁹ अस जाणते कि अस परमेश्वर केआं असे, होर पूरा मतोक तेस दुष्ट शैताने वश अन्तर गो असा।

²⁰ अस ई बि जाणते कि परमेश्वरे कुआ एई गो असा। तेन हेन्धे समझ दुतो असी कि अस तेस पिछाणियेल, जे सच्चा असा। होर किस कि अस तसे कुआ यीशु मसीह जुए जुड़ कइ बिश्ते, त अस तेस जुए बि जुड़ कइ बिश्ते, जे सच्चा असा। एईएं यीशु मसीह सच्चा परमेश्वर भो त अमर जीवन देणे बाड़ा भो।

²¹ ए गभुरुओ! अपु अपफ मुर्तिपुजा करण केआं बचाई रखे।