1 यूहन्ना 3 - Walangi

¹ हेरे! परमपिता असी जोई ईं परेम किओ असा कि अस परमेश्वरे गभुर बोलिन्ते। होर सच्चे अस असे बि। इस मतोके मेह्‍णु असी ना जाणते, किस कि तेन्हि से बोउ बि ना जाण बटा।

² ए ट्यारेओ! अब अस परमेश्वरे गभुर भिन्थ, होर अगर जे अस की भुन्ते, से पता नेईं। तोउं बि, अत त जाणते कि जपल मसीह एईयाल त अस तसे ईं बणते, किस कि अस तेस तिहांणि हेरते जीं से असा।

³ होर जे कोउं मसीह पुठ ई उम्मीद रखता, से अपणे आप बि तिहांणि शुचा कता जीं से असा।

⁴ जे कोउं पाप कता, से नियम टोड़णे दोषी बणता; किस कि पाप करण नियमे खिलाफ भुण असु।

⁵ तुसी पता असा कि मसीह हें पाप नेण जे इस धरती पुठ आ। होर तसे अन्तर कोई पाप नेईं।

⁶ जे कोउं मसीह जुए जुड़ बिश्ता, से पाप ना कता। होर जे कोउं पाप कता, तेन ना त से काओ असा, होर ना तेस जाणता।

⁷ ए गभुरुओ! केसेरी बेहकावे अन्तर ना एईए। जे धरमे कम कता से धर्मी असा, जीं मसीह धर्मी असा।

⁸ जे कोउं पाप कता, से शैताने गभुर भो, किस कि शैतान शुरुवात केआं पाप कते अओ असा। परमेश्वरे कुआ तोउं आ ताकि से शैताने कमी के खातमा करियाल।

⁹ जे परमेश्वरे गभुर भुन्ते, से पाप कते न रेहन्ते; किस कि परमेश्वरे गुण तेस अन्तर बणोरे रेहन्ते। तोउं त, से पाप कते ना रेहन्ते, किस कि से परमेश्वरे गभुर भो।

¹⁰ एसे बेलि पता लगता कि कोउं परमेश्वरे गभुर भो त कोउं शैताने गभुर भो। जे कोउं धरमे कम ना कता, होर जे विश्वासी जोई परेम न कता, से परमेश्वरे कनारा नेईं।

यक होरी जोई परेम करे

¹¹ जे समाचार तुसी शुरुवात केआं शुणो असा, से ईं कि असी यक होरी जुए परेम जोई बिशुण।

¹² होर असी कैने ईं ना बणुण जे तेस दुष्ट शैताने थिआ। तेन अपु भाई मार छड़ा। तेन से किस मारा? किस कि कैने अपु कम बुरे थिए, होर तसे भाई कम खरे थिए।

¹³ ए ट्यारेओ! अगर मतोके मेह्‍णु तुसी हेर नफरत कते त हैरान ना भुओ।

¹⁴ असी पता असा कि होरे विश्वासी जोई परेम करणे बेलि अस मरणे वश केआं छूट कइ अमर जीवन अन्तर पुजी गो असे; होर जे परेम ना कता से मरणे वश अन्तर भुन्ता।

¹⁵ जे कोउं विश्वासी जोई नफरत कता, से मेह्णुमारे ईं असा; होर अस जाणते कि मेह्णुमारी अमर जीवन ना मेता।

¹⁶ असी परेमे पता एस केआं लगा कि मसीहे हें लिए अपु प्राण दिते; त असी बि होर विश्वासी के लिए अपु प्राण देण चहिए।

¹⁷ पर जेस केसे केईं मतोके धन दौलत असी, होर से अगर जरूरतमन्द विश्वासी पुठ तरस ना खाआल, त तेस अन्तर परमेश्वरे परेम कीं रेहन्ता?

¹⁸ ए गभुरुओ! असी सद अपु बोके या जिभुड़ बइ ना, बल्कि कम त सच्चाई बइ बि परेम करिए लौता।

परमेश्वरे सामणि हौसला

^19-20 एसेरी बेलि असी पता लगता, कि जे परमेश्वर सच्चा असा, अस तसेरी भो। होर हें मन असी दोष दियाल बि त तसे सामणि अस अपु हौसला रख बटते, किस कि परमेश्वर हें मन केआं बोडा असा, त सोब कुछ जाणता।

²¹ ए ट्यारेओ! अगर हें मन असी दोष न दियाल, त असी परमेश्वरे सामणि हौसला भुन्ता।

²² होर जे कुछ बि अस मगते से असी तेस केआं मेतु, किस कि अस तसे निआंग मानते त जे तेस खरु लगतु तेस अस कते।

²³ तसे निआंग ई भो कि असी तसे कुआ यीशु मसीह पुठ विश्वास करण, होर जीं तेन हेन्धे निआंग दुतो असी तिहांणि अपफ बुच परेम रखण।

²⁴ त जे तसे निआंग मानता, से परमेश्वर जुए होर परमेश्वर तस जुए जुड़ कइ बिश्ता। से शुची आत्मा जे परमेश्वरे हेन्धे दुतो असी, तेस केआं असी पता लगता कि से असी जुए जुड़ कइ बिश्ता।