1 कुरिन्थ 8 - Walangi

सवाल करणे लेएक रीति रिवाजे बारे सलाह ( 8:1—11:1 ) भकत चढ़ो चीज खाणे बारे

¹ आं, होरी यक बोक! भकत चढ़ो चीजे बारे असी पता असा कि “असी सोबी केईं ज्ञान असा”। एस ज्ञाने बेलि मेह्‍णु रोभ किढ़ते, पर परेमे बेलि सुहलियत भुन्ति।

² अगर कोई सोचता कि तस कुछ पता लग गो असा, त तस जेसे बारे पता भुण लौताथ, तेस बारे तस अभेईं तकर कुछ पता नेईं लगो।

³ पर अगर कोई परमेश्वर जोई परेम कता, त परमेश्वर तस जाणता।

⁴ त, मुर्ति केईं चढ़ो चीजे खाणे बारे असी पता असा कि मुर्ति त भुन्ति पर तेन्हि अन्तर परमेश्वरे कोई गुण ना भुन्ते। होर परमेश्वर छड़ दी कइ होर कोई नेईं।

⁵ आं, बेशक मेह्‍णु मानते कि स्वर्ग अन्तर त धरती पुठ भगवान असे (आं, जीं सुआ “भगवान” त “प्रभु” असे।)

⁶ तोउं बि अस सद यके परमेश्वर मानते। सेईंए बोउ असा, जेस केआं सम्हाई किछ अओ असु त जेसे लिए अस असे। हें सद यके प्रभु असा, मतलब यीशु मसीह जेसे बेलि सम्हाई किछ अओ असु त जेस बेलि अस असे।

⁷ पर सम्हाई जेईं ईं ना समझते। से चढ़ो चीजी प्रसाद समझ कइ खांते, किस कि से अभेईं तकर मुर्ति कुछ समझते। तोउं त तेन्के विश्वास कमजोर भुणे बझई जोई से अपफ जे दोष देन्ते।

⁸ पर तुस बोले, से प्रसाद कि असी परमेश्वरे सामणि खरा बणान्ता ना? तस ना खेआल त हें कुछ नुकसान न भुन्ता, होर, अगर खेआल बि त कुछ फायदा बि ना भुन्ता।

⁹ पर तुस चौकाने बिशे। ईं ना भो लौतु कि तुं ए समझदारी कम हेर कइ विश्वास अन्तर कमजोर मेह्‍णु दुबारी पाप ना कइ बिशियेल।

¹⁰ किस कि अगर कोई तें ईं समझदार मेह्‍णु देहेर अन्तर बिशो प्रसाद खांता केआल त कि तसे बि मन ना कता ना कि से बि मुर्ति जे चढ़ो चीजे खआल?

¹¹ तोउं, तुं समझदारी बझई जुए विश्वास अन्तर कमजोर मेह्‍णु खतम भोई घेन्ता, जेस बचाण जे बि मसीह अपु जान दिती।

¹² ईं ईं तुस अपु भाई खिलाफ कम कर कइ त तेन्के कमजोर विश्वास जे गोता दी कइ तुस मसीह खिलाफ पाप करण लगो असे।

¹³ तोउं त, में खांजे खाण अगर में भाई जे पाप करणे बझह बणता, त अउं तेस चढ़ो चीज कदी ना खऊं, ताकि अउं अपु भाई पाप करणे लुन्ज ना दिउं।