1 कुरिन्थ 5 - Walangi

सतसंग अन्तर खरा खोटा स्यापा ( 5:1—6:20 ) सतसंग अन्तर नाजायज कमे खिलाफ पौलुसे शिक्षा

¹ तुं बारे ई खबर शुण कइ त अउं हैरान भोई गो असा कि तुसी बुछ ईं बि नाजायज कम भुण लगो असे, जे कि अविश्वासी मेह्‍णु के बुछ बि ना भुन्ते। तुसी बुछ कोई यक मेह्‍णु असा जेन अपु बोउए दोकी जुएली, अपु जुएली बणाई कइ रखो असी।

² थु बारा थु! तुसी शरम अओ लौतीथ, पर तुस त रोभ लाण लगो असे। तुसी ईं कम करणे बाड़ा बखरे छइ छाण थिआ।

³ आं, बेशक अउं तुसी जुओई साते नेईं, पर में आत्मा त तुसी जुओई असी ना? अउं जीं कोई तुसी जुओई असा, एस कम करणे बाड़े जे ई सज्जा शुणाई छो असी।

⁴ जपल तुस प्रभु यीशु नओं बेलि किठे भुन्ते त में आत्मा बि तुसी जुए भुन्ति। तपल हें प्रभु यीशु नओएं ताकते बेलि तेस मेह्‍णु सतसंग केआं बखेर छड़े त शैताने हवाले कइ छड़े, ताकि तस अशी एईयेल।

⁵ तोउं शयद से अपु मन बदिल कइ गलत कम करण छड़ देन्ता त तसे आत्मा प्रभु यीशु न्याय करणे रोज बच घेन्ति।

⁶ तुसी की पता नेईं ना कि धिखुभई टकेणे सम्हाई आटा टकाण छता? तिहांणि एस मेह्‍णु के पाप होरी सम्हाई पाप अन्तर फसाई छता। तोउं त तुसी इस पुठ रोभ ना लाण चहिए।

⁷ बल्कि पापी के गुण जे कि पुराणे टकेणे ईं असा, तस दूर फटाई छड़े। किस कि मसीह असी बचाण जे बचणे त्योहारे किएऊ ईं भकत चढ़ि गो असा। तोउं तुस तपले गुन्हो आटे ईं बजन कोई पापे शुचे बणियेल।

⁸ त चले, अस हें बचणे त्योहार खुशी जुए मनान्ते रिहूं। अपु गलत कम त पापे गुण जुए ना, जे कि पुराणे टकेणे ईं असे, बल्कि शुचा त सच्चाई जुए मनान्ते, जे यक बगैर टकेणे रौठि ईं असे।

⁹ मेईं अपु इस केआं पेहली चिट्ठि अन्तर लिखो थिउ कि तुस तेन्हि मेह्‍णु जुए कोई लेण देण ना रखे, जे गलत तरीके जुए जिसमे संमंध रखते।

¹⁰ में बोलुणे मतलब ई नेओथ कि तुसी इस धरती कोई बि गलत तरीके जुए जिसमे संमंध रखणे बाड़े जुए, लालची त प्याकड़ी जुए त मुर्तिपुजा करणे बाड़े जुए कुछ लेण देण ना रखे, किस कि तोउं त तुसी इस धरती केआं बाहर बिशुण एन्तु।

¹¹ पर में बोलुणे मतलब ई असा कि जे बि अपफ जे मसीहे विश्वासी बोल कइ गलत तरीके जुए जिसमे संमंध रखता, लालच कता, मुर्तिपुजा कता, ग्या देन्ता, होरी भुंजान्ता, त अराख पीन्ता रेहन्ता, तेस जुए कोई लेण देण ना करे। अउं त बोता कि तेस जुए खाण पीण बि नउ।

¹² जे सतसंगे ना भिन्थ, त बाहर बाड़े असे, तेन्के पंची कर कइ मोउं की फायदा? तुसी त जे सतसंगे भिन्थ तेन्के पंची करीण असी।

¹³ परमेश्वर तेन्के पंची कता जे सतसंगे न भिन्थ। पर तुसी लौतु कि जे बुगड़ोरा मेह्‍णु तुं बुछ असा, तस बाहर किढ़े।