1 कुरिन्थ 2 - Walangi

क्रूस पुठ मरो मसीहे प्रचार करण

¹ ए ट्यारेओ! जपल अउं तुसी केईं अओ थिआ त मेईं परमेश्वरे नियोको बोक बोडी बोडी बोके बड़ाई कइ त अपु अक्ल जुए प्रचार न किआ।

² किस कि तुसी जुए बिशणे टेम मेईं ठीक किओ थिउ कि अउं हर बोक पुठ मुर्ख बणता, पर सद यीशु मसीहे त तसे क्रूस पुठ मरणे बारे जाणकार बणता।

³ त तुसी बुछ अउं कमजोर त डर कइ ठरकता रेहन्ताथ।

⁴ में बोक त समाचार अपु अक्ली बणो चुणो बोके बेलि नेओथ, पर परमेश्वरे आत्माई ताकते बेलि थी,

⁵ ताकि तुं विश्वास मेह्‍णु के अक्ल पुठ ना, बल्कि परमेश्वरे ताकत पुठ भुओल।

परमेश्वरे आत्मा केआं बुद्धि

⁶ तोउं बि, ई नेईं कि अस बिलकुल अक्ले बाड़ी बोके ना कते। अस जपल पक्के विश्वासी के बुछ भुन्ते त बोडी अक्ले बाड़ी बोके कते। पर ए मतोके त तस पुठ राज करणे बाड़ी के अक्ल के ईं नेईं, किस कि से मुकणे बाड़ी असी।

⁷ पर अस परमेश्वरे नियोको बुद्धि बारे बोके कते। से नियोको बोक ई असी कि तेन भुमण त धरती बणुण केआं पेहलाई असी इज्जत देण जे ठीक किओ थी।

⁸ इस मतोके केसे बि अधिकारी परमेश्वरे ई बुद्धि समझ ना आई, किस कि अगर समझ एन्तीथ त से ताकतवर प्रभु यीशु क्रूस पुठ ना ढनान्तेथ।

⁹ पर जीं धरमे कताब अन्तर लिखो असु कि “जे केनि ना का, होर जे केनि ना शुणा मनखे मन अन्तर जे कदी ना लुंगा परमेश्वरे ए सोब तेन्हि जे बणाउ जेन्हि तेस पुठ अपु दिल ला।”

¹⁰ ए सोब नियोको बोक परमेश्वरे अपु आत्माई बेलि असी जे बतो असी, किस कि तसे आत्मा सम्हाई कुछ तोपती। से त परमेश्वरे मने भियो बि पता लान्ती।

¹¹ किस कि केसे मने भेद सद तसेरी आत्मा जाणती, होर कोई ना। तीं परमेश्वरे मने भेद बि सद तसेरी आत्मा जाण बटती, होर कोई ना।

¹² पर असी मतोके आत्मा नेईं मेओ, बल्कि परमेश्वरे आत्मा मेओ असी। त अस से सम्हाई समझ बटते जे परमेश्वर मुफत अन्तर हेन्धे दुतो असु।

¹³ होर, तस अस मतोके अक्ले बाड़ी बोके बेलि ना शिचालते, बल्कि परमेश्वरे आत्माई शिचालो बोकी के बेलि शिचालते। त शुची आत्माई मदते बेलि अस जे शुची आत्मा मन कइ बिश्ते तेन्हि शिचालते।

¹⁴ जे मेह्‍णु जिसमे इच्छाई बेलि जीन्ता, से परमेश्वरे आत्माई दुतो वर ना मानता, किस कि से तस रंगाड़ ईं लगता। से तेन्हि वरी ना समझ बटता किस कि तेन्हि वर शुची आत्माई मदते बेलि ईं समझ बटते।

¹⁵ जे परमेश्वरे आत्मा मान कइ जीन्ता, से हर यक चीजी बारे सुसुर पंची कइ बटता। पर तसे पंची करण जिसमे इच्छाई बेलि जीणे मेह्‍णु वश अन्तर नेईं।

¹⁶ धरमे कताब बि ई बोती कि, “प्रभु मने भियो केसे बि पता नेईं। कोई बि तस शिचाल ना बटता।” पर असी विश्वासी मसीहे ईं मन मेओ असा।