1 कुरिन्थ 13 - Walangi

¹ चहे अउं मेह्‍णु के अणजाणी भाषा बोलु, चहे अउं स्वर्गेदूती के बोली बोलु, पर अगर अउं परेम ना करुं, त अउं जीं घंटेई त कंछेई के ईं खाली अवाज करुं।

² त चहे अउं भविष्य वाणि करुं, चहे सम्हाई ज्ञान त राज समझी घिउं, चहे अउं विश्वास कर कइ फाट बि गोतेउं पर अगर अउं परेम ना करुं, त ना अउं कुछ भो, ना मेईं कुछ किउ।

³ चहे अउं अपु सम्हाई मेह्‍णु जे दान करुं, चहे अउं अपु जिसम आगी हवाले करुं पर अगर अउं परेम ना करुं, त में हथ किछ ना लगु।

⁴ त ए ट्यारेओ! जे होरी जोई परेम कता से तेन्हि जोई धीरज त दाह दया जुए धरान्ता। से केसे हेर न जड़ता। से अपु तारीफ अपफ न कता, होर न ई से घमण्ड कर कइ फुलता।

⁵ जे होरी जोई परेम कता से होरी जोई बुरा बरताब न कता। होर न से सद अपु भलाई बारे सोचता। से बोक बोक पुठ लेहेर न किढ़ता। जे कोउं तसे बुरु कते, से तेन्हि केआं बदला नेणे बारे ना सोचता।

⁶ जे होरी जोई परेम कता से होरी के बुरे बुरे कम हेर कइ खुश न भुन्ता, बल्कि तेन्के सच्चाई हेर कइ खुश भुन्ता।

⁷ जे होरी जोई परेम कता, से हमेशा सीढ़ता। से हर हालत अन्तर तस पुठ विश्वास कता। से कदी हिम्मत ना हारता त हमेशा धीरज रखता।

⁸ तोउं त, जे मेह्‍णु होरी जोई परेम कता, से कदी न हारता। भविष्य वाणि करीण त अणजाणे भाषा बोलीण कदी न कदी खतम भोई घेन्ति। होर परमेश्वरे बारे जे ज्ञान बुद्धि असी से बि कदी न कदी शठे घेई घेन्ति। पर परेम ईं असा जे हमेशा रेहन्ता।

⁹ किस कि अस जाणते कि जे समझणे ज्ञान बुद्धि त भविष्य वाणि करणे वरदान हेन्धे दुतो असा, से पूरा नेईं बल्कि अधूरा असा।

¹⁰ पर जपल मसीह एन्ता, तपल जे किछ वरदान अधूरे असे, से मुक घेन्ते।

¹¹ जपल अउं मठुड़ थिआ त अउं मठुड़ गभुर के ईं बोताथ। मोउं अन्तर मठुड़ गभुर ईं अक्ल थी त अउं मठुड़ गभुर ईं सोचताथ। पर जपल अउं बोडा भोई गा त मठड़ियारी सोब बोके छूट गई।

¹² अभेईं त अस जीं खराब शिशे अन्तर अन्हारी शकल केण लगो असी। पर यक रोज जरूर एन्ता, जिएस अस तस अमाणि-समाणि हेर बटते। अभेईं असी तसे बारे पूरा पता नेईं। पर जपल से एईयाल, जीं तेस हें बारे पूरा पता असा, तीं असी बि तसे बारे पूरा पता लग घेन्ता।

¹³ परमेश्वर पुठ विश्वास, तसे वादे पुठ उम्मीद त होरी जोई परेम करण ए टाहो हमेशा रेहन्ते। पर अन्हि टाहोई अन्तर परेम सोबी केआं बोडा असा जे असी होरी जोई करण।