1 कुरिन्थ 1 - Walangi

नमस्कार त शुरुवाती बोके ( 1:1-9 ) नमस्कार

^1-2 ए ट्यारे कुरिन्थुस शेहरे परमेश्वरे सतसंग! अउं पौलुस त हें भाई सोस्थेनुस तुसी सम्हाई जे नमस्ते कते। परमेश्वरे अउं अपु इच्छाई बेलि यीशु मसीहे प्रतिनिधि बणो असा। त परमेश्वरे तुस सम्हाई जेईं जे यीशु मसीह पुठ विश्वास कर कइ शुचे भुण जे भिहो असे त शुचे किओ असे। सद तुसे ना, बल्कि से सम्हाई जेईं बि तेन भिहो असे, जे हें प्रभु यीशु मसीह नओं पुठ विश्वास कर कइ प्रार्थना कते।

³ हें परमपिता परमेश्वरे त प्रभु यीशु मसीहे कृपादृष्टि तुसी पुठ भुन्ति रिहे त तुसी शान्ति मेती रिहे। आमीन

पौलुस परमेश्वरे धन्यवाद करण

⁴ में ट्यारे भाई त भेणिओं! यीशु मसीह पुठ विश्वास कर कइ जुड़ुणे बेलि में परमेश्वरे जे जे अशुश तुन्धे दुतो असी, तढ़ि लिए अउं हमेशा तसे धन्यवाद कता।

⁵ मसीह जुए जुड़ुणे बेलि तेन तुन्धे सम्हाई धेर दुतो असु मतलब तसे सम्हाई बोकी समझण त बोलुण जे तेन तुन्धे शक्ति दुतो असी।

⁶ एसे बेलि तेन ई हराल छड़ु कि हें प्रभु यीशु मसीहे बारे जे उगाही असी दुतो थी, से यकदम सही असी।

⁷ परमेश्वरे तुन्धे सुआ वरदान दुतो असे, किस कि तुस हें प्रभु यीशु मसीह दुबारी एणे बोडे धीरे जुए भाड़ बिशो असे। त तुं अन्तर कोई कमी पेशी ना भो लौती।

⁸ परमेश्वर तुसी अखिरि टेम तकर मतलब कि हें प्रभु यीशु मसीहे दुबारी एणे रोज तकर नरदोष रखता।

⁹ किस कि से परमेश्वर यकीन लेएक असा जेन तुस भिहो असे, ताकि तुस तसे कुआ हें प्रभु यीशु मसीहे साथी बणे।

सतसंग अन्तर फूट भुण ( 1:10—4:21 )

¹⁰ ए ट्यारेओ! हें प्रभु यीशु मसीहे प्रतिनिधि भुणे खातिर अउं तुसी जे हथ जोड़ कइ बोता कि छने, सोबी अणबण केआं दूर रेह त यकी होरी जुए राड़-मीड़ कइ बिशे। तुं सम्हाई के मन त ध्यान यकजूट भो लौता।

¹¹ क्लोई देईए केनि मेह्‍णु मोउं जे बोलो असु कि तुं बुछ बेहेस भुण लगो असी।

¹² में बोलुणे मतलब असा कि तुसी बुछ केहि केहि बोते कि “अउं पौलुसे चेला भो” त होरा बोता, “अउं भाई अपोलुसे भो”। कोउं बोता “अउं भाई पतरसे भो” त होरा बोता “अउं मसीहे चेला भो”।

¹³ सोचे त धिक, मसीह कि बंटि गो असा ना? अउं पौलुस कि तुसी जे क्रूस पुठ ढनाओ थिआ ना? होर कि तुस में चेला बणण जे पुओणि अन्तर चुसो थिए ना?

¹⁴ अउं परमेश्वरे धन्यवाद कता कि भाई क्रिसपुस त भाई गयुस छड़ दी कइ मेईं होर कोई जेईं बि पुओणि अन्तर नेईं चुसो।

¹⁵ त कोई ई ना बोल सकता कि से में चेला बणुण जे पुओणि अन्तर चुसिए असा।

¹⁶ (हाँ, मेईं भाई स्तिफनासे टब्बरा बि पुओणि अन्तर चुसो थिआ। एन्हि छड़ कइ मोउं चेता नेईं कि मेईं होरा कोउं जेईं पुओणि अन्तर चुसो असा।)

¹⁷ किस कि मसीहे अउं मेह्‍णु पुओणि अन्तर चुसुण जे नेईं लंघो, बल्कि तसे खुश खबरी प्रचार करण जे लंघो असा। त अउं तस खुश खबरी बधाई बुधुई बोकी के बेलि प्रचार ना कता, किस कि तीं करणे बेलि क्रूस पुठ मसीहे मरणे ताकत मेह्‍णु समझ ना बटते।

मसीह - परमेश्वरे ताकत त बुद्धि

¹⁸ किस कि जे परमेश्वर केआं अलग भोई कइ मरण लगो असे, तेन्हि मसीहे क्रूसे बारे हें बोक “बकवास” लगती, पर असी ए “परमेश्वरे ताकत” लगती, किस कि तेन अस बचाओ असे।

¹⁹ किस कि धरमे कताब अन्तर परमेश्वर बोता, “अउं अक्लदार मेह्‍णु के अक्ल मुकाई छता, त चलाक मेह्‍णु के चलाकी चोर छता।”

²⁰ त तेन्हि अक्लदार मेह्‍णु के अक्ले की भु? त तेन्हि पण्डिती त भाषणवाजी के की भु? परमेश्वर इस मतोके सम्हाई अक्ल बेअक्लि कइ छड़ी।

²¹ किस कि परमेश्वर अपु बुद्धि बेलिए ठीक किउ कि मेह्‍णु अपु अक्ली बेलि तसे बारे पता ना लगियाल, बल्कि तेस ई खरु लगु कि हें खुश खबरी प्रचार पुठ जेन्हि विश्वास किआ, तेन से बचा। केहि मेह्‍णु समझते कि अस इरुह अपु शंकरेड़ शुखाड़ण लगो असे।

²² यहूदी मेह्‍णु चमत्कारे कम तोपते, त गैर यहूदी मेह्‍णु बणो चुणो ज्ञान तोपते।

²³ पर अस मेह्‍णु बचाण जे मसीह क्रूस पुठ मरणे बारे प्रचार कते। यहूदी मेह्‍णु ना मानते कि मसीह मर सकता त गैर यहूदी मेह्‍णु सोचते कि ए सोब बेकार असु।

²⁴ पर जे जे अमर जीवन देण जे परमेश्वरे भिहो असे, तेन्हि मसीह अन्तर परमेश्वरे ताकत त बुद्धि मेती, चहे से यहूदी भोल, चहे गैर यहूदी भोल।

²⁵ किस कि परमेश्वरे कोई बि कम मेह्‍णु बेशक बेअक्लु लगतु, तोउं बि से मेह्‍णु के अक्ल केआं बध कइ असु। त परमेश्वरे कोई बि कम मेह्‍णु बेशक कमजोर लगतु, तोउं बि से मेह्‍णु ताकत केआं बध कइ असु।

²⁶ ए ट्यारेओ! तुस अपु बारे सोचे कि जपल परमेश्वर तुस भिहो थिए त तुस कीं थिए? तुसी बुछ सुआ जेईं मतोके हेसाब जुए ना अक्लदार थिए, होर ना ताकतवर थिए। तुस त खरे खानदान अन्तर बि जमो नेओथ।

²⁷ तोउं बि परमेश्वरे तुस चुणे, जे मतोके हेसाब जुए बेअक्ले थिए, ताकि जे अक्लदार असे तेन्हि लज लवान्ते। परमेश्वरे तुस चुणे जे मतोके हेसाब जुए कमजोर थिए, ताकि जे ताकतवर असे तेन्हि लज लवान्ते।

²⁸ परमेश्वरे त इस मतोके नीच, रशुणी त जे भुणे नेओथ, से मेह्‍णु चुणो असे ताकि जे मतोक अन्तर बोडे असे, तेन्हि लज लवान्ते।

²⁹ इस बझई जोई कोई बि मनख परमेश्वरे अगर रोभ ना लाई बटता।

³⁰ परमेश्वरे ई तुस यीशु मसीह पुठ विश्वास करणे बझई जुए जीन्ते किओ असे, किस कि मसीहे बेलि परमेश्वरे तुन्धे बुद्धि दुतो असी; तेन तुस अपफ जुए मिओ असे, अपफ जे तुस शुचे किओ असे त तुस पापे शंकीड़ी केआं छुड़को असे।

³¹ तोउं त, जीं धरमे कताब अन्तर लिखो असु, तीं तुसी करुण। लिखो असु कि “जे रोभ लाण चहन्ता, तस प्रभु किओ कम पुठ रोभ लाण”।