ତୀତସ 3 - New Testament in Pengo Parja Languageହାର୍ଦି କାମାୟ୍ କିନି କାଜିଙ୍ଗ୍ ରେଡି ଆଜି ମାନାଟ୍ 1 ସାସନ୍ କିନାକାର୍ ଆରେ ତା ଆଦିକାର୍ ପାୟାଆତି ମାନାୟାର୍ ତାରେନ୍ କିନାକା ଆରେ କାତା ମାନି କିଦେଙ୍ଗ୍, ଆରେ ୱିଜୁ ପର୍କାର୍ ହାର୍ଦି କାମାୟ୍ କିନି କାଜିଙ୍ଗ୍ ରେଡି ଆଜି ମାନାଟ୍। 2 ଇନେରିଙ୍ଗ୍ ନିନ୍ଦା କିୱେଦେଙ୍ଗ୍, ଇନେର୍ ହୁଦାଙ୍ଗ୍ ଗଣ୍ଡ୍ଗଲ୍ ଆୱେଦେଙ୍ଗ୍। ଜେକନିକାର୍ ହୁଦାଙ୍ଗ୍ ସାଙ୍ଗ୍ସାତି ଲେକେ ମାଞ୍ଜେଙ୍ଗ୍, ଆରେ ୱିଜୁ ମାନାୟାର୍ ହୁଦାଙ୍ଗ୍ ସାଦୁ ମାନାୟ୍ ଲେକେ ବ୍ଯବହାର୍ କିଦେଙ୍ଗ୍ ଏପେଙ୍ଗ୍ ପାର୍ତି କିନାକାରିଙ୍ଗ୍ ୱିଜୁଦିନ୍ ମାନ୍ତ ଏତୁକିୟାଟ୍। 3 ଇନେସ୍କି ଯୀଶୁଙ୍ଗ୍ ପାର୍ତିକିୱି ଆଗେ ଆପେଙ୍ଗ୍ ପା ମୁର୍କ ଆଜି ଈଶ୍ୱରତିଙ୍ଗ୍ ମାନିକିୱାଦାଙ୍ଗ୍ ମାଚାପ୍, ମାନାୟାର୍ ମାଙ୍ଗେଙ୍ଗ୍ ଟକାଇ କିଜି ମାନ୍ଞ୍ଚାର୍। ଆରେ ଆପେଙ୍ଗ୍ ବାରବିନି କରାପ୍ ଇଚା ଆରେ ୱାରିନି ଜିବୁନ୍ କାଟିକିନି ଦାସ୍ ଆଜି ମାଚାପ୍। ଆପେଙ୍ଗ୍ ପୁରା କରାପ୍ ଆରେ ଜେକନିକାରିଙ୍ଗ୍ ଆକାର୍ ଆଜି ଜିବୁନ୍ କାଟିକିଜି ମାଚାପ୍। ମାନାୟାର୍ ମାଙ୍ଗେଙ୍ଗ୍ ଗିଣ୍କିଜି ମାନ୍ଞ୍ଚାର୍ ଆରେ ଆପେଙ୍ଗ୍ ପା ଜେକନିକାରିଙ୍ଗ୍ ଗିଣ୍କିଜି ମାଚାପ୍। 4 ଇ ଲେକେ ଆତିସ୍ପା ଈଶ୍ୱର ମା ଉଦାର୍ କିଦ୍ନାକାନ୍ ତା ଦୟା ଆରେ ଲାଡ୍ ମାଙ୍ଗେଙ୍ଗ୍ ଚଚ୍ଚାତାନ୍। 5 ଆପେଙ୍ଗ୍ ଦରମ୍ କାମାୟ୍ କିତାପ୍ନା ଇଞ୍ଜି, ହେୱାନ୍ ମାଙ୍ଗେଙ୍ଗ୍ ମା ପାପ୍ନି ଦଣ୍ଡ୍ତାଙ୍ଗ୍ ଉଦାର୍ କିଦ୍ୱାତାନ୍ନା, ମାତର୍ ତା ଦୟାତାଙ୍ଗ୍ ହେୱାନ୍ ମାଙ୍ଗେଙ୍ଗ୍ ଉଦାର୍ କିତ୍ତାନ୍ନା। ଈଶ୍ୱର ମାଙ୍ଗେଙ୍ଗ୍ ପୁନି ଜିବୁନ୍ ହିତ୍ତାନ୍ନା। ହେୱାନ୍ ମା ପାପ୍ ମାବେତାଙ୍ଗ୍ ଦେହା କିତ୍ତାନ୍ନା ଆରେ ପୁନି ବାବ୍ରେ ଜିବୁନ୍ କାଟିକିନି କାଜିଙ୍ଗ୍ ସାଇଜ କିତ୍ତାନ୍ନା। ହେୱାନ୍ ମାଙ୍ଗେଙ୍ଗ୍ ପବିତ୍ର ଆତ୍ମା ହିଜି ଇଦାଙ୍ଗ୍ ୱେଚ୍ଚାତାନ୍ନା। 6 ମାଙ୍ଗେଙ୍ଗ୍ ଉଦାର୍ କିଦ୍ନି ଯୀଶୁ ଖ୍ରୀଷ୍ଟ ଇନାକା କିତ୍ତାନ୍ନା, ହେଦାଙ୍ଗ୍ କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ପବିତ୍ର ଆତ୍ମା ବାହାକିନି କାଜିଙ୍ଗ୍ ଆରେ ଦୟାତାଙ୍ଗ୍ ଆଦିକ୍ କିଜି ହିତ୍ତାନ୍ନା। 7 ଈଶ୍ୱର ଇଦାଙ୍ଗ୍ ୱେଚ୍ଚାତାନ୍ନା, ଇନେସ୍ ଆସେଙ୍ଗ୍ ତା ଦୟାତାଙ୍ଗ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆନାପ୍, ଆରେ ପୁରା ଆହାତାଙ୍ଗ୍ ୱିଜ୍ୱି ଜିବୁନ୍ନି ଆଦିକାର୍ ଆଦେଙ୍ଗ୍ ଆଡ୍ନାପ୍। 8 ଆନେଙ୍ଗ୍ ୱେଚ୍ଚି ମାନ୍ଞ୍ଚି ଇ ବେଣ୍ତିଙ୍ଗ୍ ପାର୍ତିକିନି ଦର୍କାର୍। ଲାଗିଙ୍ଗ୍ ଆନେଙ୍ଗ୍ ଇଚା କିନାଙ୍ଗା ଯେ ଈଶ୍ୱରତାକେ ପାର୍ତିକିନି ମାନାୟାର୍ ଇନେସ୍ ହାର୍ଦି କାମାୟ୍ କିନି କାଜିଙ୍ଗ୍ ମାନ୍ଦିୟାନ୍ ହିଦେଙ୍ଗ୍ ଆଡ୍ନାର୍, ଇଦାଙ୍ଗ୍ କାଜିଙ୍ଗ୍ ହେୱାରିଙ୍ଗ୍ ଇ ୱିଜୁ ବିଷୟ ବେସି ବାଡ଼୍କାସ୍ କିଜି ହିକ୍ଷା ହିୟାଟ୍। ଇ ୱିଜୁ ବିଷୟ ହାର୍ ଆରେ ୱିଜୁ ମାନାୟ୍ କାଜିଙ୍ଗ୍ ସାଇଜ କିନାନ୍। 9 ମାତର୍ ଏନେଙ୍ଗ୍ ମୁର୍କିୟା ଜୁକ୍ତି, ଆକଦାଦିନି କୁଟୁମ୍ ବିଷୟରେ, ଆରେ ମୋଶା ଲେକିକିତି ସାସ୍ତର୍ ବିଷୟରେ ଜୁକ୍ତିତାଙ୍ଗ୍ ଆରେ ଗଣ୍ଡ୍ଗଲ୍ତାଙ୍ଗ୍ ପାର୍ତି କିନାକାଦେର୍ ଦେହା ମାନେର୍। ଇନେସ୍କି ଇୱିଜୁ ଇନା ଲାବ୍ନି ବିଷୟ ଆକାୟ୍ ଆରେ ଇନେର୍ କାଜିଙ୍ଗ୍ ପା ଇନାକା ସାଇଜ ଆଦୁତ୍। 10 ଇମ୍ଣି ମାନାୟ୍ ବୁଲ୍ ହିକ୍ଷାହିଜି ମଣ୍ଡ୍ଲିତିଙ୍ଗ୍ ବାଗ୍କିଦେଙ୍ଗ୍ ଉପାୟ୍ କିନାନ୍, ଇଲେକେ ମାନାୟ୍ତିଙ୍ଗ୍ ରଗ, ଆୱିତିସ୍ ରିହା ଜାଗ୍ରତ୍ କିୟିକିଜି ଟିକ୍ କିୟାଟ୍। ଯଦି ହେୱାନ୍ ୱେନ୍ୱିତିସ୍, ଲାଗିଙ୍ଗ୍ ତାବେତାଙ୍ଗ୍ ଦେହାଆଡ। 11 ଇନେସ୍କି ଇଦାଙ୍ଗ୍ ଏପେଙ୍ଗ୍ ପୁନାଟ୍ ଯେ ଇଲେକେ ମାନାୟ୍ ପୁନ୍ଞ୍ଜିବୁଜାଆଜି ପା ହେୱାନ୍ ବୁଲ୍ ହାଜ୍ଦିଙ୍ଗ୍ ହାନାନା ଆରେ ପାପ୍ କାମାୟ୍ କିନାନା। ଲାଗିଙ୍ଗ୍ ହେୱାନ୍ ଜାର୍ କିତି ପାପ୍ କାମାୟ୍ ହେୱାନିଙ୍ଗ୍ ଦସି କିନାତା। ସେସ୍ ଆଦେସ୍ ଆରେ ଜୁଆର୍ 12 ଆନେଙ୍ଗ୍ ମି ଲାଗାୟ୍ ଆର୍ତ୍ତେମା କି ତୁକିକଙ୍ଗ୍ ପକ୍ତାନାଙ୍ଗ୍, ଏଚେକାଡ଼୍ଦ ହେୱାର୍ ବିତ୍ରେତାଙ୍ଗ୍ ରକାନ୍ ୱାଜି ଇକାନାନ୍, ଏପେଙ୍ଗ୍ ନା ଲାଗାୟ୍ ନିକପଲି ସହର୍ତାକେ ଏଚେକ୍ ବେଗି ୱାଦେଙ୍ଗ୍ ଉପାୟ୍ କିନାଦେର୍। ଇନେସ୍କି ନିକପଲି ସହର୍ତାକେ ପିନିମାସ୍ କାଟି କିଦେଙ୍ଗ୍ ଆନେଙ୍ଗ୍ ଉପାୟ୍ କିତାଙ୍ଗ୍ନା। 13 ଓକିଲ ଜିନା ଆରେ ଆପୋଲ ହେୱାର୍ ହାଜ୍ଦିଙ୍ଗ୍ ହାନି ୱେଡ଼ାଲିଙ୍ଗ୍, ଏପେଙ୍ଗ୍ ଇନାକା ପା ସାଇଜ କିଦେଙ୍ଗ୍ ଆଡ୍ନାଦେର୍ ହେୱାରିଙ୍ଗ୍ ହିୟାଟ୍, ଇନେସ୍କି ହେୱାରିଙ୍ଗ୍ ଇନା ଅବାବ୍ ଆମେତ୍। 14 ହେଲେକେ ଏପେଙ୍ଗ୍ ପାର୍ତି କିନାକାରିଙ୍ଗ୍ ହିକ୍ଷା ହିୟାଟ୍ ଯେ ମାନାୟାର୍ ଇନେସ୍ ହେୱାରିଙ୍ଗ୍ ଦର୍କାର୍ଆନି ଜିନିଷ୍ ପାୟାଆନାର୍, ଇଦାଙ୍ଗ୍ କାଜିଙ୍ଗ୍ ପାର୍ତି କିନାକାର୍ ହାର୍ଦି କାମାୟ୍ କିନି କାଜିଙ୍ଗ୍ ନେ ମାନ୍ କିଜି ମାନେର୍। ଲାଗିଙ୍ଗ୍ ହେୱାର୍ ତା ଜିବୁନ୍ତ ଇନାୱେଡ଼ାଙ୍ଗ୍ ପା ପାଡ଼୍ ହିଲ୍ୱି ଲେକେ ଆଉର୍। 15 ନା ହୁଦାଙ୍ଗ୍ ମାନି ୱିଜୁ ପାର୍ତି କିନାକାର୍ ମିଙ୍ଗେଙ୍ଗ୍ ଜୱାର୍ କିଦ୍ନାରା। କ୍ରୀତି ଦୀପ୍ତାକେ ମାନି ପାର୍ତି କିନାକାରିଙ୍ଗ୍ ଇମ୍ଣାକାର୍ ମାଙ୍ଗେଙ୍ଗ୍ ଲାଡ୍ କିଦ୍ନାର୍, ହେୱାରିଙ୍ଗ୍ ମା ଜୱାର୍ ପା ୱେଚାଟ୍। ମାପୃ ମି ୱିଜାକାରିଙ୍ଗ୍ ଦୟା କିଦେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation