ତୀତସ 2 - New Testament in Pengo Parja Languageହାର୍ଦିକାବୁର୍ କାଜିଙ୍ଗ୍ ହାର୍ଦି କାମାୟ୍ କିନାସ୍ 1 ମାତର୍ ଏନେଙ୍ଗ୍ ତିତସ, ସତ୍ ହିକ୍ଷା ହୁଦାଙ୍ଗ୍ ଇନାକା ହାର୍ ହେଦାଙ୍ଗ୍ ଏପେଙ୍ଗ୍ ପାର୍ତି କିନାକାରିଙ୍ଗ୍ ହିକ୍ଷା ହିୟାଟ୍। 2 ଏପେଙ୍ଗ୍ ଆଗେ ବୁଡ଼ା ମାନାୟାରିଙ୍ଗ୍ ହିକ୍ଷା ହିୟାଟ୍ ଯେ, ହେୱାର୍ ଜାର୍ ଜିବୁନ୍ତିଙ୍ଗ୍ କଣ୍ଟ୍ରୁଲ୍ କିନାର୍, ଜେକନିକାର୍ ସନ୍ମାନ୍ କିତିଲେକେ ବ୍ଯବହାର୍ କିନାର୍, ଆରେ ବୁଦି ହୁଦାଙ୍ଗ୍ ବ୍ଯବହାର୍ କିନାର୍। ହେୱାର୍ ଈଶ୍ୱରତିଙ୍ଗ୍ ବେସି ପାର୍ତିକିନାର୍, ଜେକନିକାରିଙ୍ଗ୍ ହାର୍ଦି ମାନ୍ତାଙ୍ଗ୍ ଲାଡ୍ କିନାର୍, ଆରେ ୱିଜୁ ଦୁକ୍କଷ୍ଟତିଙ୍ଗ୍ ପା ସମ୍ୱାଲି କିନାର୍। 3 ହେଲେକେ ହାତାନିକାଙ୍ଗ୍ ପା ହିକ୍ଷା ହିୟାଟ୍ ଇନେସ୍ ଈଶ୍ୱରତିଙ୍ଗ୍ ସନ୍ମାନ୍ କିତିଲେକେ ହେୱେକ୍ ବ୍ଯବହାର୍ କିନିକ୍, ଜେକନିକାରିଙ୍ଗ୍ ନିନ୍ଦା କିଉକ୍। କାଲିଙ୍ଗ୍ ଉଣୁକ୍, ଆରେ ହେୱେକ୍ ଇନେସ୍ ସତ୍ ଆରେ ହାର୍ଦି ବିଷୟରେ ଜେକନିକାରିଙ୍ଗ୍ ହିକାଇ କିନିକ୍। 4 ଲାଗିଙ୍ଗ୍ ହେୱାର୍ ଜିପଲି କଗ୍ଲେକ୍ ଲାଗାୟ୍ ର ମାନି କିତିଲେକେ ଆନାର୍, ଆରେ ହେୱେକ୍ ତା ଡକ୍ରାହିକାଙ୍ଗ୍ ଆରେ ହିମ୍ଣା ୱାକ୍ଡ଼ାକାଙ୍ଗ୍ ଇନେସ୍ କିଜି ଲାଡ୍ କିନିକ୍। 5 ଇନେସ୍ ବୁଦିତାଙ୍ଗ୍ ବ୍ଯବହାର୍ କିନିକ୍, ଇନେସ୍ ଡକ୍ରାହିତାକେ ବିଶ୍ୱାସ୍ତାକେ ମାନ୍ଗିନିକ୍। ଇନେସ୍ ଇଲ୍ତିଙ୍ଗ୍ ହାର୍ଦାଙ୍ଗ୍ ଚାଲାଇ କିନିକ୍, ଇନେସ୍ ହାର୍ଦି କଗ୍ଲେ ଆନାକା, ଆରେ ଡକ୍ରାହି କାତା ମାନିକିଜି ମାନି ବିଷୟରେ ହିକାଇ କିନିକ୍। ଲାଗିଙ୍ଗ୍ ଇମ୍ଣି ମାନାୟ୍ ଈଶ୍ୱର କାତାତିଙ୍ଗ୍ ନିନ୍ଦା କିଦେଙ୍ଗ୍ ଆଡୁର୍। 6 ହେଲେକେ ବେଣ୍ଡିଆ ହିମ୍ଣାକାଙ୍ଗ୍ ୱିଜୁ ବିଷୟରେ ବୁଦିତାଙ୍ଗ୍ ବ୍ଯବହାର୍ କିନି କାଜିଙ୍ଗ୍ ସାହାସ୍ ହିୟାଟ୍। 7 ଏପେଙ୍ଗ୍ ର ମାନାୟ୍ ମାନି କିତିଲେକେ ୱିଜୁ ବିଷୟରେ ହାର୍ଦି କାମାୟ୍ କିୟାଟ୍। ଏପେଙ୍ଗ୍ ଈଶ୍ୱର ବିଷୟରେ ହିକ୍ଷା ହିନିହିଙ୍ଗ୍ ହାର୍ଦି ମାନ୍ତାଙ୍ଗ୍ ଆରେ ମାନାୟାର୍ ସନ୍ମାନ୍ କିତିଲେକେ ହିକ୍ଷା ହିୟାଟ୍। 8 ମାନାୟାର୍ ନିନ୍ଦା ହିଦ୍ୱି ଲେକେ ସତ୍ ହିକ୍ଷା ୱିଜୁଦିନ୍ ହିୟାଟ୍। ଲାଗିଙ୍ଗ୍ ମିଙ୍ଗେଙ୍ଗ୍ ବିରଦ୍ କିଦ୍ନି ମାନାୟାର୍ ପା, ମା ବିଷୟରେ ଇମ୍ଣି କରାପ୍ ବେଣ୍ ୱେଚ୍ଚେଙ୍ଗ୍ ଆଡ୍ୱାଦାଙ୍ଗ୍ ଲାଜ୍ ପାୟାଆନାର୍। 9 ଏପେଙ୍ଗ୍ ଦାସ୍ ଆତି ମାନାୟାରିଙ୍ଗ୍ ହିକ୍ଷା ହିୟାଟ୍ ଯେ, ହେୱାର୍ ଜାର୍-ଜାର୍ ମାଲିକ୍ କାତାତିଙ୍ଗ୍ ମାନିକିଜି ମାନ୍ଗାନାର୍। ହେୱାର୍ ମାଲିକାର୍ ୱାରି ଆତି ଲେକେ ବ୍ଯବହାର୍ କିୟେର୍ ଆରେ ହେୱାରିଙ୍ଗ୍ କାତା ଉଲ୍ଟାଇ କିମେର୍। 10 ହେୱାର୍ ମାଲିକ୍ତାଙ୍ଗ୍ ଇନାକା ପା ଚର୍ କିମେର୍, ମାତର୍ ହେୱାର୍ ୱିଜୁଦିନ୍ ବିଶ୍ୱସ୍ତ ମାନାର୍ ଇଞ୍ଜି ଚଚେର୍। ମା ଇମ୍ଣି ଈଶ୍ୱର ମାଙ୍ଗେଙ୍ଗ୍ ଉଦାର୍ କିଦ୍ନାକାନ୍ ବିଷୟରେ ହିକ୍ଷା ହିୟେର୍, ହେୱାର୍ ଇଲେକେ ବ୍ଯବହାର୍ କିନି ଦର୍କାର୍, ହେୱାରିଙ୍ଗ୍ ମାନାୟାର୍ ସନ୍ମାନ୍ କିନାର୍। 11 ଇନେସ୍କି ୱିଜୁ ମାନାୟାର୍ ଉଦାର୍ କାଜିଙ୍ଗ୍ ଈଶ୍ୱର ତା ଦୟା ଚଚ୍ଚାତାନ୍ନା। 12 ଆସେଙ୍ଗ୍ ଇନେସ୍ ଅଦରମ୍ ଆରେ ପୁର୍ତିନି ଇଚାତାଙ୍ଗ୍ ପିସ୍ତି ଇ ନଙ୍ଗୟ୍ନି ଯୁଗ୍ତ ଇ ପୁର୍ତିତାକେ ବୁଦି ହୁଦାଙ୍ଗ୍, ଦରମ୍ ମାନାୟ୍ ଆଜି ଜିବୁନ୍ କାଟିକିନି ଦର୍କାର୍। 13 ଆରେ ଇମ୍ଣି ଆହା ମାଙ୍ଗେଙ୍ଗ୍ ୱାରି କିଦ୍ନାତ୍, ଆରେ ମା ଗାଜା ଈଶ୍ୱର ଆରେ ଉଦାର୍ କିଦ୍ନି ଯୀଶୁ ଖ୍ରୀଷ୍ଟ ଗୌରବତାଙ୍ଗ୍ ୱାନାକାଦିଙ୍ଗ୍ କାସିମାଞ୍ଜେଙ୍ଗ୍ ଈଶ୍ୱର ମାଙ୍ଗେଙ୍ଗ୍ ଦୟା ହିକାୟ୍ କିତ୍ତାନ୍ନା। 14 ଆସେଙ୍ଗ୍ ଇନେସ୍ ତା ମାନାୟ୍ ଆଜି ୱିଜୁ ହାର୍ଦି କାମାୟ୍ କିନି କାଜିଙ୍ଗ୍ ଆରେ ଅଦରମ୍ ଜିବୁନ୍ତାଙ୍ଗ୍ ମୁକ୍ତି କିଦ୍ଦେଙ୍ଗ୍ ଆରେ ୱିଜୁ କରାପ୍ ବ୍ୟବହାର୍ତାଙ୍ଗ୍ ହପ୍ତେଦେଙ୍ଗ୍ ଯୀଶୁ ଖ୍ରୀଷ୍ଟ ଜାର୍ ଜିବୁନ୍ତିଙ୍ଗ୍ ହିତାନ୍ନା। 15 ଇ ୱିଜୁ ବିଷୟ କ୍ରୀତି ଦୀପ୍ତାକେ ମାନି ପାର୍ତି କିନାକାରିଙ୍ଗ୍ ହିକ୍ଷା ହିୟାଟ୍। ଏପେଙ୍ଗ୍ ହେୱାରିଙ୍ଗ୍ ପୁରା ଆଦିକାର୍ ହୁଦାଙ୍ଗ୍ ସାହାସ୍ ହିୟାଟ୍ ଆରେ ହେୱାରିଙ୍ଗ୍ ଟିକ୍ କିୟାଟ୍, ଏପେଙ୍ଗ୍ ଇମ୍ଣି ହିକ୍ଷା ହିନାଦେର୍ ହେ ହିକ୍ଷାତିଙ୍ଗ୍ ଇନେର୍ ପା ଗିଣ୍ କିଦ୍ମେର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation