ତୀତସ 1 - New Testament in Pengo Parja Languageଜୱାର୍ 1 ଆନେଙ୍ଗ୍ ପାଉଲ ଇ ଚିଟି ଲେକିକିନାଙ୍ଗା, ତିତସ ଏନେଙ୍ଗ୍ ନା କାଜିଙ୍ଗ୍ ରକାଇ ସତ୍ ହିମ୍ଣା ଲେକେ। ଇନେସ୍କି ମା ରିକାସ୍ ପାର୍ତି କିନାକା ରଞ୍ଜାଙ୍ଗ୍। ଆନେଙ୍ଗ୍ ରକାଙ୍ଗ୍ ଈଶ୍ୱର ଦାସ୍ ଆରେ ଯୀଶୁ ଖ୍ରୀଷ୍ଟନି ବାଚିକିତି ଚେଲା। ଈଶ୍ୱର ବାଚିକିଜି ମାଚି ମାନାୟାରିଙ୍ଗ୍ ପାର୍ତିତିଙ୍ଗ୍ ବାଡ଼୍କାସ୍ କିନି କାଜିଙ୍ଗ୍ ଆରେ ସତ୍ ହିକ୍ଷା ବିଷୟରେ ପୁଞ୍ଜେଙ୍ଗ୍ ସାଇଜ କିନି କାଜିଙ୍ଗ୍ ଆନେଙ୍ଗ୍ ଦାଇତ୍ପ ପାୟାଆତାଙ୍ଗ୍ନା। ଇନେସ୍ ହେୱାର୍ ଈଶ୍ୱରତିଙ୍ଗ୍ ସନ୍ମାନ୍ କିତିଲେକେ ଜିବୁନ୍ କାଟିକିନାର୍। 2 ଇ ଲେକେ ଆତିସ୍ ହେୱାର୍ ଈଶ୍ୱର ହୁଦାଙ୍ଗ୍ ୱିଜ୍ୱି ଜିବୁନ୍ ମାଞ୍ଜେଙ୍ଗ୍ ଆହା କିତାର୍ନା। ଇନେସ୍କି ଈଶ୍ୱର ଇନାୱେଡ଼ାଙ୍ଗ୍ ପା ମିଚ୍ ୱେଚୁନ୍, ହେୱାନ୍ ପୁର୍ତିତିଙ୍ଗ୍ ରହ୍ନି ଆଗେ ଇଦାଙ୍ଗ୍ ପାର୍ମାଣ୍ କିତାନ୍ନା ଯେ ତା ମାନାୟାର୍ ୱିଜ୍ୱି ଜିବୁନ୍ ପାତେକ୍ ମାନ୍ଗାନାର୍। 3 ଇଦାଙ୍ଗ୍ ହେ ଟିକ୍ ୱେଡ଼ାଲିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ଇ ହାର୍ଦିକାବୁର୍ ଶୁଣାୟ୍ କିତାନ୍ନା ଆରେ ଆସେଙ୍ଗ୍ ୱିଜାକାର୍ତାକେ ଶୁଣାୟ୍ କିନାସା। ଈଶ୍ୱର ମାଙ୍ଗେଙ୍ଗ୍ ଉଦାର୍ କିଦ୍ନାକା ଦାୟିତ୍ପ ହିତ୍ତାନ୍ନା, ଆରେ ହେୱାନ୍ କାଜିଙ୍ଗ୍ ଇ କାମାୟ୍ କିଦେଙ୍ଗ୍ ଆଦେସ୍ ହିତ୍ତାନ୍ନା। 4 ମା ଆବା ଈଶ୍ୱର ଆରେ ଉଦାର୍ କିଦ୍ନି ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା ଆରେ ଶାନ୍ତି ହିଦେନ୍। ପ୍ରାଚିନ୍ ପାଦ୍ ପାୟାଆନି ଯଗ୍ଯ 5 ନା ଆଦେସ୍ତାଙ୍ଗ୍ ପୁରା ଆୱି କାମାୟ୍ ୱିଜୁ ପୁରା କିଦେଙ୍ଗ୍, ଆରେ ୱିଜୁ ସହର୍ତାକେ ପ୍ରାଚିନାରିଙ୍ଗ୍ ବାଚି କିଦେଙ୍ଗ୍ ଆନେଙ୍ଗ୍ କ୍ରୀତି ଦୀପ୍ତାକେ ମିଙ୍ଗେଙ୍ଗ୍ ପିସ୍ତି ୱାତ୍ତାଙ୍ଗ୍। 6 ଇମ୍ଣି ମାନାୟ୍ତାକେ ଦସ୍ ହିଲ୍ଗୁତ୍, ର ଡକ୍ରି ଇଡ଼୍ଜି ମାନାନ୍। ତା ହିମ୍ଣା ୱାକ୍ଡ଼ାର୍ ପାର୍ତି କିନାକାର୍ ଆଜି ମାନ୍ଗାନାର୍ ଆରେ ହାର୍ଦି ଚାଲିଚଲନ୍ ଆଜି ମାନ୍ଗାନାର୍ କି ଆୟା ଆବାର୍ କାତା ୱେନାର୍, ଇ ଲେକେ ମାନାୟ୍ତିଙ୍ଗ୍ ପ୍ରାଚିନ୍ ପାଦ୍ତ ବାଚି କିୟାଟ୍। 7 ଇନେସ୍କି ବିଶପ୍, ଈଶ୍ୱର କାମାୟ୍ ଦେକାଶୁଣା କିନି ମାନାୟ୍ ଆତି କାଜିଙ୍ଗ୍ ହେୱାନ୍ ଲାଗାୟ୍ ଇନା ଦସ୍ ପା ହିଲ୍ୱି ଦର୍କାର୍। ହେୱାନ୍ ଜାର୍ ଇଚା ଅନୁସାରେ କାମାୟ୍ କିୱାକାନ୍ ଆଜି ମାନି ଦରକାର୍, କି ଗାଡ଼ିତିଙ୍ଗ୍ ଗାଡ଼ି ରିସା ଆୱି ମାନାୟ୍ ଆନି ଦର୍କାର୍। ମଦୁୱା ଆୱାଦାଙ୍ଗ୍ ମାନ୍ଗାନାନ୍, କି ଗଣ୍ଡ୍ଗଲ୍ କିୱାକାନ୍ ଆୱାଦାଙ୍ଗ୍ ମାନ୍ଗାନାନ୍, କି ଦନ୍ ଆହାତାଙ୍ଗ୍ ଜେକନିକାନିଙ୍ଗ୍ ଟକାଇ କିୱାକାନ୍ ଆୱାଦାଙ୍ଗ୍ ମାନ୍ଗାନାନ୍, ମାତର୍ ହେୱାନ୍ ଗତାକାଙ୍ଗ୍ ହାର୍ଦାଙ୍ଗ୍ ମାନିକିନି ଦର୍କାର୍। 8 ହେୱାନ୍ ହାର୍ଦି ବିଷୟ କିଦେଙ୍ଗ୍ ଇଚା କିଜି ମାନ୍ଗାନାନ୍, ବୁଦିତାଙ୍ଗ୍ ଚାଲିଚଲନ୍ କିଜି ମାନ୍ଗାନାନ୍, ନ୍ଯାୟ୍ତାଙ୍ଗ୍ ବ୍ଯବହାର୍ କିଜି ମାନ୍ଗାନାନ୍, ଦରମ୍ ମାନାୟ୍ ଆଜି ମାନ୍ଗାନାନ୍, ଆରେ ଜାର୍ତିଙ୍ଗ୍ କଣ୍ଟ୍ରୁଲ୍ କିନି ଦର୍କାର୍। 9 ଇମ୍ଣି ହିକ୍ଷା ହେୱାନ୍ ପାୟାଆତାନ୍ନା ହେ ପାର୍ତିକିନି ହିକ୍ଷାତିଙ୍ଗ୍ ହେୱାନ୍ ବେସି ପାର୍ତିକିନି ଦର୍କାର୍। ଲାଗିଙ୍ଗ୍ ହେୱାନ୍ ସତ୍ ହିକ୍ଷାତାଙ୍ଗ୍ ଜେକନିକାନିଙ୍ଗ୍ ସାହାସ୍ କିଦେଙ୍ଗ୍ ଆଡ୍ନାନ୍ ଆରେ ତା ହିକ୍ଷାତିଙ୍ଗ୍ ବିରଦ୍ କିନି ମାନାୟାରିଙ୍ଗ୍ ଟିକ୍ କିଦେଙ୍ଗ୍ ଆଡ୍ନାନ୍। ବୁଲ୍ ହିକ୍ଷାହିନି ମାଷ୍ଟେରାର୍ 10 ଆନେଙ୍ଗ୍ ମିଙ୍ଗେଙ୍ଗ୍ ଇଦାଙ୍ଗ୍ ୱେଚ୍ଚାନାଙ୍ଗା, ଇନେସ୍କି ବେସିହେନି ମାନାୟ୍ ସତ୍ ହିକ୍ଷାତିଙ୍ଗ୍ ବିରଦ୍ କିନାର୍। ଇ ମାନାୟାର୍ ଇନା ମୁଲ୍ୟ ହିଲ୍ୱି ହିକ୍ଷା ହିନାର୍ ଆରେ ଜେକନିକାରିଙ୍ଗ୍ ଟକାଇ କିନାର୍, ଇନେସ୍କି ସୁନତ ବିଦିତିଙ୍ଗ୍ ମାନିକିନି ଦଳ୍ନି ମାନାୟାର୍। 11 ହେୱାରିଙ୍ଗ୍ ହିକ୍ଷାହିନି କାଜିଙ୍ଗ୍ ସୁଯଗ୍ ହିମାଟ୍। ଇନେସ୍କି ହେୱାର୍ ହିକ୍ଷା ହିୱି କାତା, ହେୱାର୍ ହେ ହିକ୍ଷା ହିନାର୍, ଆରେ ପୁରା ପରିବାର୍ନି ମାନାୟାରିଙ୍ଗ୍ ପାର୍ତିତିଙ୍ଗ୍ ବାଙ୍ଗାଇ କିନାର୍। ହେୱାର୍ ଡାବୁଙ୍ଗ୍ ପାୟାଆନି ଆହାତାଙ୍ଗ୍ ଇଦାଙ୍ଗ୍ କିନାର୍। 12 କ୍ରୀତି ଦୀପ୍ତାକେ ମାନି ରକାନ୍ ମାନାୟ୍ତିଙ୍ଗ୍ ଇନେରିଙ୍ଗ୍ ହେୱାର୍ ଗିତ୍ କୁଡ଼ିଆ ଇଞ୍ଜି ମାନିକିନାର୍, ହେୱାନ୍ ଇ ଲେକେ ୱେଚ୍ଚି ମାଚାନ୍, “କ୍ରୀତି ଦୀପ୍ତାକେ ମାନି ମାନାୟାର୍ ୱିଜୁଦିନ୍ ମିଚ୍ କାତା ୱେଚ୍ନାର୍। ହେୱାର୍ ରାନ୍ନି ପଶୁ ଲେକେ ବ୍ଯବାହାର୍ କିନାର୍। ହେୱାର୍ ଆଡ଼୍ସିଆ ଆରେ ପେଟ୍ ପଶୁ ଆଜି ମାନ୍ଗାନାର୍।” 13 କ୍ରୀତି ଦୀପ୍ତାକେ ମାନି ମାନାୟାର୍ ବିଷୟରେ ୱେଚ୍ଚିମାଚି ଇ କାତା ସତ୍। ଲାଗିଙ୍ଗ୍ ହେୱାର୍ ଇନେସ୍ ଯୀଶୁ ଖ୍ରୀଷ୍ଟନି ସତ୍ ହିକ୍ଷାତିଙ୍ଗ୍ ପାର୍ତିକିନାର୍। 14 ଆରେ ହେୱାର୍ ଇନେସ୍ ଯିହୁଦିର୍ କାତାତିଙ୍ଗ୍ ୱେଞ୍ଜେଙ୍ଗ୍ ମାନ୍ କିନାର୍, ଆରେ ସତ୍ ହିକ୍ଷାତିଙ୍ଗ୍ ମାନିକିୱି ମାନାୟାର୍ ନିୟମ୍ତିଙ୍ଗ୍ ହେୱାର୍ ଇନେସ୍ ୱେନୁର୍, ଇଦାଙ୍ଗ୍ କାଜିଙ୍ଗ୍ ହେୱାରିଙ୍ଗ୍ ଷ୍ଟିଟ୍କିଜି ଜାଗ୍ରତ୍ କିୟିକିୟାଟ୍। 15 ହାର୍ଦି ମାନାୟାର୍ କାଜିଙ୍ଗ୍ ୱିଜୁ ବିଷୟ ନେ ହାର୍। ମାତର୍ କରାପ୍ ଆରେ ପାର୍ତିକିୱି ମାନାୟାର୍ କାଜିଙ୍ଗ୍ ଇମ୍ଣି ବିଷୟ ପା ହାର୍ ଆକାୟ୍। ଇନେସ୍କି ହେୱାର୍ ମାନ୍ ଆରେ ବୁଜାଆନି ଶାକ୍ତି ଇ ରିଣ୍ଡାଙ୍ଗ୍ ନେ କରାପ୍। 16 ଇ ବୁଲ୍ ହିକ୍ଷାହିନି ମାଷ୍ଟେରାର୍ ଈଶ୍ୱରତିଙ୍ଗ୍ ପୁନାପ୍ ଇଞ୍ଜି ୱେଚ୍ନାର୍, ମାତର୍ ହେୱାର୍ କାମାୟ୍ ଚଚ୍ନାତ୍ ଯେ ହେୱାର୍ ହେୱାନିଙ୍ଗ୍ ପୁନୁର୍। ହେୱାର୍ ବେସି କରାପ୍ ଆରେ ଈଶ୍ୱରତିଙ୍ଗ୍ ମାନିକିଉର୍। ହେୱାର୍ ଅଲପ୍ପା ହାର୍ଦି କାମାୟ୍ କିଦେଙ୍ଗ୍ ଆଡୁର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation