ରୋମିୟ 9 - New Testament in Pengo Parja Languageଈଶ୍ୱର ଆରେ ତା ମାନାୟାର୍ 1-3 ନଙ୍ଗୟ୍ ଯଦି ମାଙ୍ଗେଙ୍ଗ୍ ଈଶ୍ୱର ଲାଡ୍ତାଙ୍ଗ୍ ଇନାକା ବିନେ କିଦ୍ଦେଙ୍ଗ୍ ଆଡ଼୍ଦୁତା, ଲାଗିଙ୍ଗ୍ ନା ଯିହୁଦି ମାନାୟାର୍ ଈଶ୍ୱରତାଙ୍ଗ୍ ଇନାକିଦେଙ୍ଗ୍ ଅଲ୍ଗା ଆତାର୍। ଆନେଙ୍ଗ୍ ହେୱାର୍ କାଜିଙ୍ଗ୍ ବେସି ଦୁଃକ୍ ଆନାଙ୍ଗା, ଆରେ ପା ନା ଗରବ୍ତାକେ ହେୱାର୍ କାଜିଙ୍ଗ୍ ୱିଜୁଦିନ୍ ବେସି କଷ୍ଟ ଆନାତା। ଯଦି ନା ନିଜର୍ ଲଗାଙ୍ଗ୍ ଉଦାର୍ କିନି କାଜିଙ୍ଗ୍ ଖ୍ରୀଷ୍ଟତାଙ୍ଗ୍ ଅଲ୍ଗା ଆୟା ଆନାତ୍, ଲାଗିଙ୍ଗ୍ ଆନେଙ୍ଗ୍ ହେଦିଲିଙ୍ଗ୍ ପା ରାଜି। ଆନେଙ୍ଗ୍ ସାକି ଲେକେ ଖ୍ରୀଷ୍ଟ ହୁଦାଙ୍ଗ୍ ସତ୍ ୱେଚ୍ନାଙ୍ଗା। ପବିତ୍ର ଆତ୍ମା ଆରେ ନାମାନ୍ ପା ସାକି ହିନାତା ଯେ, ଇଦାଙ୍ଗ୍ ମିଚ୍ ଆକାୟ୍। 4 ହେୱାର୍ ଇସ୍ରାଏଲନି ମାନାୟାର୍, ଈଶ୍ୱର ହେୱାରିଙ୍ଗ୍ ନେ ତା ମେହିର୍ ଆନି କାଜିଙ୍ଗ୍ ବାଚିକିଜି ମାଚାନ୍। ଈଶ୍ୱର ତା ଗୌରବ ହେୱାରିଙ୍ଗ୍ ହିଜିମାଚାନ୍। ହେୱାନ୍ ହେୱାର୍ ହୁଦାଙ୍ଗ୍ ପାର୍ମାଣ୍ କିଜି ମାଚାନ୍, ଆରେ ହେୱାନ୍ ତା ଦରମ୍ ସାସ୍ତର୍ତିଙ୍ଗ୍ ହିତାନ୍। ହେୱାର୍ ତାଙ୍ଗେଙ୍ଗ୍ ପୁଜାକିନି ସୁଯଗ୍ ପାୟାଆତାର୍ ଆରେ ହେୱାରିଙ୍ଗ୍ କାବା ଆନି ପାର୍ମାଣ୍ ୱିଜୁ ଈଶ୍ୱର କିତାନ୍। 5 ହେୱାର୍ ଆକଦାଦିର୍ ଈଶ୍ୱରତିଙ୍ଗ୍ ଗାଜାକାର୍ ମାଚାର୍, ଆରେ ଖ୍ରୀଷ୍ଟ ନିଜେ ର ଯିହୁଦି ମାଚାନ୍, ଏଚେଦିନ୍ ପାତେକ୍ ହେୱାନ୍ ମାନାୟ୍ ରୁପ୍ ଆଜି ପୁର୍ତିତାକେ ମାଚାନ୍। ଆରେ ହେୱାନ୍ ଈଶ୍ୱର ମାଚାନ୍, ଇନେର୍ ୱିଜୁ ଜିନିଷ୍ ଜପି ସାସନ୍ କିନାନା, ଆରେ ହେୱାନ୍ ୱିଜୁଦିନ୍ ଜୟ୍-ଜୟ୍ ପାୟାଆନି ଦର୍କାର୍। ଆମେନ୍। 6 ଆନେଙ୍ଗ୍ ୱେଚ୍ଚୁଙ୍ଗା ଯେ, ଇସ୍ରାଏଲନି ମାନାୟାରିଙ୍ଗ୍ ଈଶ୍ୱର ହିତି ପାର୍ମାଣ୍ ପୁରା କିଦେଙ୍ଗ୍ ଆଡ୍ୱାତାତ୍, ଇନେସ୍କି ୱିଜାର୍ ମାନାୟାର୍ ଯିହୁଦି ଜାତିନି କୁଟୁମ୍ତାକେ ଜନମ୍ ଆଜି ମାଚିସ୍ ପା ସତ୍ ଯିହୁଦି ଆକାୟ୍। 7 ହେୱାର୍ ୱାରା ଅବ୍ରାହାମନି କୁଟୁମ୍ ନିକାର୍, ହେୱାରିଙ୍ଗ୍ ହାତ୍ପା ଅବ୍ରାହାମନି ହିମ୍ଣା କିୱାତାତ୍ନା। ଇନେସ୍କି ଦରମ୍ ସାସ୍ତର୍ତାକେ ଲେକାଆତାତ୍ନା, “ୱାରା ଇସାକତାଙ୍ଗ୍ ମି ଲାତ୍ରା ଗାଣା କିୟାଆନାତ୍।” ଇନେସ୍କି ଅବ୍ରାହାମନି ଅଲ୍ଗା ହିମ୍ଣାଙ୍ଗ୍ ମାଚାର୍। 8 ଲାଗିଙ୍ଗ୍ ଇ ଅର୍ତ ଇଲେକେ ଯେ, ଅବ୍ରାହାମ ଲାତ୍ରାନି ମେହି ଆୱିତିସ୍ପା ଈଶ୍ୱର ମେହିର୍ ଆୟାଆଉତ୍। ଇନେସ୍କି ପାର୍ମାଣ୍କିତି ହିମ୍ଣା ନେ ଅବ୍ରାହାମ ମେହିର୍ ଆନାର୍। 9 ଇନେସ୍କି ଈଶ୍ୱର ଅବ୍ରାହାମତିଙ୍ଗ୍ ପାର୍ମାଣ୍ କିଜି ମାଚାନ୍ ଯେ, “ୱାନି ବରସ୍ ଆନେଙ୍ଗ୍ ନିତାକେ ଲେଉଟା ଆଦ୍ନାଙ୍ଗ୍, ଆରେ ନି ଡକ୍ରିଙ୍ଗ୍ ସାରାଙ୍ଗ୍ କାଡ଼୍ଦେ ଆଜି ମାନ୍ଙ୍ଗାନାତ୍।” 10 ଆରେ ହେ କାଡ଼୍ଦେ ଇସାକ ମା ଆକଦାଦି ମାଚାନ୍। ହେୱାନ୍ ଗାଜାଆତି ପାଚେ ରିବିକାଙ୍ଗ୍ ବିବାଆତାନ୍, ଇନେର୍ ଜାଉଁଣା ହିମ୍ଣାକାଙ୍ଗ୍ ଜନମ୍ କିଜି ମାଚାତ୍। 11 ମାତର୍ ହେୱାର୍ ଜନମ୍ ଆୱି ଆଗେ, ହାର୍ କି କରାପ୍ ଗଟାଆୱି ଆଗେ ହେ କଗ୍ଲେ ଈଶ୍ୱରତାଙ୍ଗ୍ ର କାବୁର୍ ୱେନ୍ଞ୍ଜି ମାଚାତ୍ ହେ କାବୁର୍ ପୁନିକିନାତା ଯେ, ମାଦି ହାର୍ କି କରାପ୍ କାମାୟ୍ କାଜିଙ୍ଗ୍ ଆକାୟ୍, ମାତର୍ ଈଶ୍ୱର ଜାର୍ ଇଚା ଆନୁସାରେ ବାଚିକିନାନ୍। 12 ଈଶ୍ୱର ସାରାଙ୍ଗ୍ ୱେଚ୍ଚି ମାଚାନ୍ ଯେ, “ନି ଗାଜାକାନ୍ ମାଜି ନି ଲାତ୍ରାନି ମାନାୟାରିଙ୍ଗ୍ ନି ହିରୁକାନ୍ ମାଜି ନି ଲାତ୍ରାନି ମାନାୟାର୍ ହେବା କିନାର୍।” 13 ସାସ୍ତରତାକେ ଇଲେକେ ଲେକାଆତାତ୍ନା, “ଆନେଙ୍ଗ୍ ଏଷୌତିଙ୍ଗ୍ ଆହ୍ୱାଦାଙ୍ଗ୍ ଯାକୁବଙ୍ଗ୍ ଲାଡ୍ କିତାଙ୍ଗ୍।” 14 ଲାଗିଙ୍ଗ୍ ଆସେଙ୍ଗ୍ ଇନାକା ଇଞ୍ଜି ୱେଚ୍ନାସ୍? ଈଶ୍ୱର ଇନାକା ଅନ୍ୟାୟ୍ କିତାନ୍ନା? ମୁଡ଼୍କେ ଆକାୟ୍। 15 ଇନେସ୍କି ଈଶ୍ୱର ମୋଶାଙ୍ଗ୍ ୱେଚ୍ଚି ମାଚାନ୍, “ଆନେଙ୍ଗ୍ ବାଚି କିତାକାରିଙ୍ଗ୍ ଦୟା କିନାଙ୍ଗ୍, ଆରେ ଆନେଙ୍ଗ୍ ବାଚିକିତି ମାନାୟାର୍ କାଜିଙ୍ଗ୍ କାନିକରମ୍ ଆନାଙ୍ଗ୍।” 16 ଲାଗିଙ୍ଗ୍, ଈଶ୍ୱର ଇନେରିଙ୍ଗ୍ ବାଚିକିନାନ୍ ତାଙ୍ଗେଙ୍ଗ୍ ହେୱାନ୍ ଦୟା କିନାନ୍, ଲାଗିଙ୍ଗ୍ ଆସେଙ୍ଗ୍ ଜାର୍ ଇଚାତାଙ୍ଗ୍ କି କଷ୍ଟ କାମାୟ୍ କିଜି ହେଦାଙ୍ଗ୍ ପାୟା ଆଉତ୍, ଇନେସ୍କି ଈଶ୍ୱର ଇନେରିଙ୍ଗ୍ ବାଚିକିନାନ୍ ତାଙ୍ଗେଙ୍ଗ୍ ନେ ହେୱାନ୍ ଦୟା କିନାନ୍। 17 ଇନେସ୍କି ଈଶ୍ୱର ମିସର୍ ଦେସ୍ନି ଫାର ରାଜାଙ୍ଗ୍ ୱେଚ୍ଚି କାତା ସାସ୍ତର୍ତାକେ ଇଲେକେ ଲେକାଆତାତ୍ନା, “ଆନେଙ୍ଗ୍ ନି ଆଗେ ନା ଶାକ୍ତି ଚଚ୍ନି କାଜିଙ୍ଗ୍ ନେ ନିଙ୍ଗେଙ୍ଗ୍ ରାଜା କିତ୍ତାଙ୍ଗ୍ନା, ଲାଗିଙ୍ଗ୍ ନା ଶାକ୍ତି ବିଷୟରେ ପୁର୍ତିନି ୱିଜାର୍ ମାନାୟ୍ ପୁନାର୍।” 18 ଲାଗିଙ୍ଗ୍, ଏପେଙ୍ଗ୍ ହୁଡ଼୍ନାଦେର୍ ଯେ, ଈଶ୍ୱର ଇଚାକିତି ମାନାୟାରିଙ୍ଗ୍ ନେ ଦୟା କିନାନ୍, ଆରେ ହେୱାନ୍ କେତେକ୍ ମାନାୟ୍ତିଙ୍ଗ୍ ତା କାତାତିଙ୍ଗ୍ ମାନି କିୱେଦେଙ୍ଗ୍ ବାଚି କିତାନ୍ନା। 19 ଲାଗିଙ୍ଗ୍ କେତ୍ଜାଣ୍ ମାଙ୍ଗେଙ୍ଗ୍ ଇଞ୍ଜେଙ୍ଗ୍ ଆଡ଼୍ଦାନାର୍, “ଈଶ୍ୱର ଇନାକିଦେଙ୍ଗ୍ ମାଙ୍ଗେଙ୍ଗ୍ କରାପ୍ ଇଞ୍ଜି ଇନାନା? ଇନେସ୍କି ହେୱାନ୍ ଇନାକା ଇଚାକିନାନ୍ ହେଦାଙ୍ଗ୍ ହେୱାନ୍ କିନାନ୍, ଆରେ ତାଙ୍ଗେଙ୍ଗ୍ ଇନେର୍ ମୁନା କିଦେଙ୍ଗ୍ ଆଡୁର୍।” 20 ଏପେଙ୍ଗ୍ ତାଙ୍ଗେଙ୍ଗ୍ ଇନ୍ମାଟ୍ ଏନେଙ୍ଗ୍ ଇନାକାୟ୍? ଇନେସ୍କି ଏନେଙ୍ଗ୍ ରକାୟ୍ ନାର୍ ମାନାୟ୍ ଈଶ୍ୱର ହୁଦାଙ୍ଗ୍ ଜିକାଟାଣା ଆଦେଙ୍ଗ୍ ଆଡୁୟ୍। ଏନେଙ୍ଗ୍ ହେୱାନ୍ ରସ୍ତି ଜିନିଷ୍ ଆରେ ତାଙ୍ଗେଙ୍ଗ୍ ଇଲେକେ ଇନାକା ଟିକ୍ ଆକାୟ୍, “ଏନେଙ୍ଗ୍ ନାଙ୍ଗେଙ୍ଗ୍ ଇନାକିଦେଙ୍ଗ୍ ଇଲେକେ ରସ୍ତାତାୟ୍ନା?” 21 ଏଚେପାଦ୍ନା ର କୁମାର୍ ଚିକ୍ଲା ଟାଙ୍ଗା ରହ୍ନାନ୍, ହେପାଦ୍ନା ହେୱାନ୍ ହେଦାଙ୍ଗ୍ ସଜାଇ କିଜି ର ଟାଙ୍ଗା ରସ୍ତେଙ୍ଗ୍ ହେ ଚିକ୍ଲା ବ୍ଯବହାର୍ କିନାନ୍, ଆରେ ହେ ହାର୍ତି ଚିକ୍ଲା କାଚ୍ରା ଗାଦିତାକେ ତୁସିହିଦେଙ୍ଗ୍ ପା ଅଦିକାର୍ ମାନାତ୍। 22 ଈଶ୍ୱର ବିନାସ୍ କିଦେଙ୍ଗ୍ ବାଚିକିତି ମାନାୟାରିଙ୍ଗ୍, ହେୱାନ୍ ଇଚା କିଜି ବିଚାର୍ କିନାନ୍, ଆରେ ହେୱାନ୍ ହେୱାର୍ ବିରଦ୍ତାକେ ତା ସାକ୍ତି ଚଚ୍ନି ଅଦିକାର୍ ମାନାତ୍, ମାତର୍ ହେୱାନ୍ ହେୱାର୍ କାଜିଙ୍ଗ୍ ସାସ୍ ଆଜି କାତାନ୍ନା। 23 ଈଶ୍ୱର ଇମ୍ଣାକାରିଙ୍ଗ୍ ଆଗେ ଦୟାକିଜି ତା ଗୌରବ ହିନି କାଜିଙ୍ଗ୍ ବାଚିକିଜି ମାଚାନ୍, ହେୱାର୍ ପା ତା ଗୌରବ ପାୟାଆନି ଅଦିକାର୍ ମାନାତ୍। 24 ଆସେଙ୍ଗ୍ ପା ଦୟା ପାୟାଆନି ଅଦିକାର୍ ମାନାତ୍, ଏଚେଜାଣ୍ତିଙ୍ଗ୍ ହେୱାନ୍ ଯିହୁଦି ଜାତିନି ମାନାୟାର୍ତାଙ୍ଗ୍ ଆରେ ବିନ୍ଜାତିନି ମାନାୟାର୍ତାଙ୍ଗ୍ ବାଚି କିତାନ୍ନା। 25 ଈଶ୍ୱର ହଶିୟା ଲେକିକିତି ସାସ୍ତର୍ତାକେ ଇଲେକେ ବିନ୍ଜାତିନି ମାନାୟାର୍ କାଜିଙ୍ଗ୍ ୱେଚ୍ଚାନ୍ନା ଯେ, “ଇମ୍ଣି ମାନାୟାର୍ ନାଲକ୍ ଆୱାଦାଙ୍ଗ୍ ମାଚାର୍, ହେୱାରିଙ୍ଗ୍ ନଙ୍ଗୟ୍ ଆନେଙ୍ଗ୍ ନାଲକ୍ ଇଞ୍ଜି ଇନାଙ୍ଗ୍। ଆରେ ଇମ୍ଣାକାରିଙ୍ଗ୍ ଆନେଙ୍ଗ୍ ଆଗେ ଲାଡ୍ କିୱାଦାଙ୍ଗ୍ ମାଚାଙ୍ଗ୍, ହେୱାରିଙ୍ଗ୍ ନଙ୍ଗୟ୍ ଆନେଙ୍ଗ୍ ଲାଡ୍ କିନାଙ୍ଗ୍।” 26 “ଆରେ ପା ହେ ସାସ୍ତର୍ତାକେ ଇଲେକେ ଲେକାଆତାତ୍ନା, ଦିନେକ୍ ଆନେଙ୍ଗ୍ ହେୱାରିଙ୍ଗ୍ ୱେଚ୍ଚି ମାଚାଙ୍ଗ୍, ‘ଏପେଙ୍ଗ୍ ନାଲକ୍ ଆକାୟ୍।’ ମାତର୍ ନଙ୍ଗୟ୍ ହେୱାରିଙ୍ଗ୍ ୱେଚ୍ନାନ୍, ‘ଏପେଙ୍ଗ୍ ନଙ୍ଗୟ୍ ଜିବୁନ୍ ମାନି ଈଶ୍ୱରନି ହିମ୍ଣା କାଦେର୍।’ ” 27 ଭବିଷ୍ଯତବକ୍ତା ଯିଶାୟ ଲେକିକିତି ସାସ୍ତର୍ତାକେ ଇସ୍ରାଏଲ ଜାତିନି ବିଷୟରେ ଇଲେକେ ଲେକାଆତାତ୍ନା ଯେ, “ହେୱାନ୍ ଇସ୍ରାଏଲନି ମାନାୟାରିଙ୍ଗ୍ ଗାଜାକାଟ୍ କିଜି ୱେଚ୍ଚି ମାଚାନ୍। ଇସ୍ରାଏଲନି ମାନାୟାର୍ ହାମ୍ଦୁର୍ କାଣ୍ଡିନି ବାଲିଆ ଲେକେ ବେସିହେନି ଆଜି ମାଚିସ୍ ପା ଈଶ୍ୱର ଉଣା ମାନାୟ୍ତିଙ୍ଗ୍ ନେ ରକ୍ଷା କିନାନ୍।” 28 “ଇନେସ୍କି ଈଶ୍ୱର ବେଗି ପୁର୍ତିନି ୱିଜାର୍ ମାନାୟାରିଙ୍ଗ୍ ରମାଟ୍ ବିଚାର୍ କିନାନ୍।” 29 ଆରେ ପା, ଯିଶାୟ ଇଲେକେ ୱେଚ୍ଚାନ୍ନା, “ଯଦି ୱିଜୁ ସାକ୍ତି ମାନି ମାପୃ କୁଟୁମ୍ ବାଡାୟ୍ କିନି କାଜିଙ୍ଗ୍ ମାଙ୍ଗେଙ୍ଗ୍ ହିଦ୍ୱାତାନ୍ନା, ଲାଗିଙ୍ଗ୍ ଈଶ୍ୱର ସଦୋମ ଆରେ ଗମୋରା ସହର୍ନି ମାନାୟାରିଙ୍ଗ୍ ବିନାସ୍ କିତାନ୍, ହେଲେକେ ଆସେଙ୍ଗ୍ ପା ବିନାସ୍ ଆୟା ଆନାତ୍।” ଇସ୍ରାଏଲନି ମାନାୟାର୍ ପାର୍ତି କିୱିତି ବିଷୟ 30 ବିନ୍ଜାତିନି ମାନାୟାର୍ ନିଜେ ଈଶ୍ୱର ଆଗେ ଦରମ୍ ମାନାୟ୍ ଆଦେଙ୍ଗ୍ ଉପାୟ୍ କିଉରା, ମାତର୍ ଈଶ୍ୱର ହେୱାରିଙ୍ଗ୍ ତା ଆଗେ ଦରମ୍ ମାନାୟ୍ କିତାନ୍ନା, ଇନେସ୍କି ହେୱାର୍ ତାଙ୍ଗେଙ୍ଗ୍ ପାର୍ତିକିନାରା। 31 ମାତର୍ ଇସ୍ରାଏଲ ଜାତିନି ମାନାୟାର୍ ଦରମ୍ ସାସ୍ତର୍ନି ନିୟମ୍ତିଙ୍ଗ୍ ମାନିକିଜି ଈଶ୍ୱର ଆଗେ ଦରମ୍ ମାନାୟ୍ ଆନି କାଜିଙ୍ଗ୍ ବେସି ଉପାୟ୍ କିତାର୍, ହେୱାର୍ ତା ଆଗେ ଦରମ୍ ମାନାୟ୍ ଆଦେଙ୍ଗ୍ ଆଡ୍ୱାତାର୍। 32 ହେୱାର୍ ଈଶ୍ୱର ଆଗେ ଦରମ୍ ମାନାୟ୍ ଆଦେଙ୍ଗ୍ ଆଡ୍ୱାତାର୍, ଇନେସ୍କି ହେୱାର୍ ତାଙ୍ଗେଙ୍ଗ୍ ପାର୍ତି କିୱାଦାଙ୍ଗ୍, ହାର୍ କାମାୟ୍ କିଜି ଦରମ୍ ସାସ୍ତର୍ତିଙ୍ଗ୍ ମାନିକିଜି ତା ଆଗେ ଦରମ୍ ମାନାୟ୍ ଆଦେଙ୍ଗ୍ ଉପାୟ୍ କିଜି ମାଚାର୍। ଆରେ ହେୱାର୍ ହେ ଗାଜା କାଲ୍ଦ ଉସ୍ତାର୍। 33 ଈଶ୍ୱର ଦରମ୍ ସାସ୍ତର୍ତାକେ ଇଲେକେ ୱେଚ୍ଚାନ୍ନା ଯେ, “ଆନେଙ୍ଗ୍ ଯିରୁଶାଲାମ ସହର୍ତାକେ ର କାଲ୍ଦିଙ୍ଗ୍ ହେୱାର୍ ଉସ୍ଦେଙ୍ଗ୍ ଇଡ଼୍ତାଙ୍ଗ୍ନା, ଆରେ ହେୱାର୍ ହେବେ ଉଜ୍ଦି ଗୁର୍ନାର୍। ମାତର୍ ଇମ୍ଣାକାନ୍ ତାଙ୍ଗେଙ୍ଗ୍ ପାର୍ତିକିନାନ୍, ହେଦାଙ୍ଗ୍ କାଜିଙ୍ଗ୍ ହେୱାରିଙ୍ଗ୍ ଇନେର୍ ପା ଲାଜ୍ କିଉର୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation