ରୋମିୟ 8 - New Testament in Pengo Parja Languageପାର୍ତି କିନାକାର୍ ପବିତ୍ର ଆତ୍ମା ସାଇଜତାଙ୍ଗ୍ ଜିବୁନ୍ କାଟିକିନି ଦର୍କାର୍ 1 ଲାଗିଙ୍ଗ୍ ନଙ୍ଗୟ୍ ଏଚେଜାଣ୍ ଯୀଶୁ ଖ୍ରୀଷ୍ଟନି ଲକ୍ ଆତାର୍ନା, ହେୱାରିଙ୍ଗ୍ ଈଶ୍ୱର ଦସ୍ କିଉନ୍। 2 ଇନେସ୍କି ପବିତ୍ର ଆତ୍ମା ମାଙ୍ଗେଙ୍ଗ୍ ଜିବୁନ୍ ହିଦ୍ନାତ୍ ହେଦାଙ୍ଗ୍ ଯୀଶୁ ଖ୍ରୀଷ୍ଟତାଙ୍ଗ୍ ୱାନାତ୍, ଆରେ ପାପ୍ନି ଶାକ୍ତିତାଙ୍ଗ୍ ଆରେ ମାରାଣ୍ତାଙ୍ଗ୍ ମୁକ୍ତି କିଦ୍ନାତ୍। 3 ମଶା ଲେକିକିତି ଦରମ୍ ସାସ୍ତର୍ନି ନିୟମ୍ ଉଦାର୍ କିଦେଙ୍ଗ୍ ଆଡ୍ୱାତାତ୍, ଇନେସ୍କି ମା ବିତ୍ରେ ପାପ୍କିନି ଇଚା ମାଚାତ୍। ମାତର୍ ଈଶ୍ୱର ତା ଜାର୍ ମାଜିଙ୍ଗ୍ ମାନାୟ୍ ରୁପ୍ ଆଜି ପକ୍ତାତାନ୍, ଆରେ ହେୱାନ୍ ପାପ୍ତିଙ୍ଗ୍ ତା ମେହି ଜପି ଲେଦି କିତାନ୍ ଆରେ ହେୱାନ୍ ମା ପାପ୍ କାଜିଙ୍ଗ୍ ହାଃତାନ୍, ଆରେ ଇଲେକେ କିଜି ଈଶ୍ୱର ମାଙ୍ଗେଙ୍ଗ୍ ଉଦାର୍ କିତ୍ତାନ୍। 4 ହେୱାନ୍ ଇଲେକେ କିଜି ଦରମ୍ ସାସ୍ତର୍ନି ନିୟମ୍ତିଙ୍ଗ୍ ମା କାଜିଙ୍ଗ୍ ପୁରା କିତାନ୍, ଆରେ ଆପେଙ୍ଗ୍ ମା ପାପ୍କିନି ଇଚା ଅନୁସାରେ ଜିବୁନ୍ କାଟି କିୱାଦାଙ୍ଗ୍ ପବିତ୍ର ଆତ୍ମା ସାଇଜତାଙ୍ଗ୍ ଜିବୁନ୍ କାଟିକିନାପା। 5 ଇମ୍ଣି ମାନାୟାରିଙ୍ଗ୍ ପାପ୍କିନି ଇଚା କଣ୍ଟ୍ରୁଲ୍ କିନାତା, ହେୱାର୍ ପାପ୍କିନି ବିଷୟରେ ଚିନ୍ତା କିଜିମାନାର୍। ମାତର୍ ଇମ୍ଣି ମାନାୟାରିଙ୍ଗ୍ ପବିତ୍ର ଆତ୍ମା କଣ୍ଟ୍ରୁଲ୍ କିନାତା ହେୱାର୍ ହେ ଆତ୍ମାତିଙ୍ଗ୍ ସାର୍ଦା କିନିଲେକେ କାମାୟ୍ କିଦେଙ୍ଗ୍ ଚିନ୍ତା କିନାର୍। 6 ଯଦି ମିଙ୍ଗେଙ୍ଗ୍ ପାପ୍ କାମାୟ୍ କିନି ଇଚା ମି ମାନ୍ତିଙ୍ଗ୍ କଣ୍ଟ୍ରୁଲ୍ କିନାତା, ଏପେଙ୍ଗ୍ ହାଃନାଦେର୍। ମାତର୍ ଯଦି ପବିତ୍ର ଆତ୍ମା ମି ମାନ୍ତିଙ୍ଗ୍ କଣ୍ଟ୍ରୁଲ୍ କିନାତା, ଏପେଙ୍ଗ୍ ଜିବୁନ୍ ଆରେ ଶାନ୍ତି ପାୟାଆନାଦେର୍। 7 ଇନେସ୍କି ପାପ୍କିନି ଇଚା ୱିଜୁଦିନ୍ ଈଶ୍ୱରତିଙ୍ଗ୍ ବିରଦ୍ କିନାତ୍, ହେଦାଙ୍ଗ୍ ଈଶ୍ୱର ନିୟମ୍ତିଙ୍ଗ୍ ମାନି କିଦେଙ୍ଗ୍ ଇଚା କିଉତ୍ ଆରେ ଇନାୱେଡ଼ାଙ୍ଗ୍ ମାନିକିଉତ୍। 8 ହେଦାଙ୍ଗ୍ କାଜିଙ୍ଗ୍ କେତେକ୍ ମାନାୟ୍ତିଙ୍ଗ୍ ପାପ୍ କାମାୟ୍ କିନି ଇଚା କଣ୍ଟ୍ରୁଲ୍ କିନାତା, ହେୱାର୍ ଇନାୱେଡ଼ାଙ୍ଗ୍ ପା ଈଶ୍ୱରତିଙ୍ଗ୍ ସାର୍ଦା ଆନିଲେକେ କାମାୟ୍ କିଉର୍। 9 ମାତର୍ ମିଙ୍ଗେଙ୍ଗ୍ ପାପ୍ କାମାୟ୍ କିନି ଇଚା କଣ୍ଟ୍ରୁଲ୍ କିଦୁତା, ଇନେସ୍କି ଯଦି ମି ବିତ୍ରେ ମାନି ଈଶ୍ୱରତି ପବିତ୍ର ଆତ୍ମା କଣ୍ଟ୍ରୁଲ୍ କିନାତା। ଆରେ ଏପେଙ୍ଗ୍ ମାନ୍ତ ଇଟାଟ୍ ଯେ, ଇମ୍ଣି ମାନାୟାର୍ ବିତ୍ରେ ଖ୍ରୀଷ୍ଟ ଆତ୍ମା ମାନୁତା, ହେୱାର୍ ସତ୍ ଖ୍ରୀଷ୍ଟାନ୍ ଆକାୟ୍। 10 ଯଦି ମା ବିତ୍ରେ ଖ୍ରୀଷ୍ଟ ମାନାନା, ଲାଗିଙ୍ଗ୍ ଆସେଙ୍ଗ୍ ପାପ୍ କିତି କାଜିଙ୍ଗ୍ ମା ଗାଗାଡ଼୍ ହାଃତିସ୍ ପା ମା ଆତ୍ମା ଜିବୁନ୍ ମାନ୍ଗାନାତ୍, ଇନେସ୍କି ଆସେଙ୍ଗ୍ ଈଶ୍ୱର ଆଗେ ଦରମ୍ ମାନାୟ୍ ଆତାସ୍ନା। 11 ଯୀଶୁଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ ହିତାନ୍, ହେ ପବିତ୍ର ଆତ୍ମା ମି ବିତ୍ରେ ମାନାତା। ହେୱାନ୍ ଇନେସ୍ କିଜି ଖ୍ରୀଷ୍ଟଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ ହିତାନ୍, ହେଲେକେ ମି ବିତ୍ରେ ମାନି ଆତ୍ମା, ମି ହାଃନି ଗାଗାଡ଼୍ତିଙ୍ଗ୍ ଆରେରଗ ଜିବୁନ୍ କିଦ୍ନାତ୍। 12 ଲାଗିଙ୍ଗ୍, ଏ ଲାଡ୍ନି ପାର୍ତିକିନି ଟଣ୍ଡାର୍କାଦେର୍, ଆସେଙ୍ଗ୍ ମା ଗାଗାଡ଼୍ନି ଇଚା ଅନୁସାରେ ଜିବୁନ୍ କାଟି କିୱାଦାଙ୍ଗ୍, ଈଶ୍ୱର ଆତ୍ମା ୱେଚ୍ଚିତି ଲେକେ ଜିବୁନ୍ କାଟିକିନି ଦର୍କାର୍। 13 ଯଦି ଆସେଙ୍ଗ୍ ପାପ୍କିନି ଇଚା ଅନୁସାରେ ଜିବୁନ୍ କାଟି କିନାସା, ଆସେଙ୍ଗ୍ ଈଶ୍ୱରତାଙ୍ଗ୍ ଦେହା ଆୟା ଆନାତ୍। ମାତର୍ ଯଦି ଆସେଙ୍ଗ୍ ପବିତ୍ର ଆତ୍ମା ସାଇଜତାଙ୍ଗ୍ ପାପ୍ କାମାୟ୍ କିନି ଇଚାତିଙ୍ଗ୍ ବନ୍ଦ୍ କିତିସ୍, ଲାଗିଙ୍ଗ୍ ଆସେଙ୍ଗ୍ ଜିଜି ମାନାସ୍। 14 ଇନେସ୍କି କେତେକ୍ ମାନାୟ୍ ପବିତ୍ର ଆତ୍ମା ସାଇଜତାଙ୍ଗ୍ ଜିବୁନ୍ କାଟିକିନାରା, ହେୱାର୍ ୱିଜାର୍ ଈଶ୍ୱର ମେହିର୍। 15 ଲାଗିଙ୍ଗ୍ ଏପେଙ୍ଗ୍ ଚାକର୍ ଆଜି ଈଶ୍ୱରତିଙ୍ଗ୍ ପାଣ୍ଡ୍ରାଆନି ଆତ୍ମା ପାୟା ଆୱାତାଦେର୍ନା, ମାତର୍ ପବିତ୍ର ଆତ୍ମା ମାଙ୍ଗେଙ୍ଗ୍ ଈଶ୍ୱର ମେହିର୍ କିଜି ତା କୁଟୁମ୍ତାକେ ମାହାୟ୍ କିତ୍ତାତ୍ନା। ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ଈଶ୍ୱରତିଙ୍ଗ୍, “ଆବା-ଆବା ଇଞ୍ଜି ହିର୍ବାନାସା।” 16 ଇନେସ୍କି ତା ପବିତ୍ର ଆତ୍ମା ମା ଗରବ୍ ବିତ୍ରେ ୱେଚ୍ନାତା ଯେ, ଆପେଙ୍ଗ୍ ଈଶ୍ୱର ମେହିକାପ୍। 17 ଆରେ ଯଦି ଆପେଙ୍ଗ୍ ଈଶ୍ୱର ମେହିକାପ୍ ଆତାପ୍ନା, ଲାଗିଙ୍ଗ୍ ତା ମେହି ଖ୍ରୀଷ୍ଟଙ୍ଗ୍ ହିନି ଦନ୍ ସମ୍ପତି ପା ମାଦାଙ୍ଗ୍ ଆନାତ୍। ମାତର୍ ଯଦି ଆସେଙ୍ଗ୍ ତା ଗୌରବ ପାୟାଆନାସ୍, ଲାଗିଙ୍ଗ୍ ହେୱାନ୍ ଦୁଃକ୍ କଷ୍ଟ ପାୟା ଆତିଲେକେ ଆସେଙ୍ଗ୍ ପା ପାୟା ଆଦେଙ୍ଗ୍ ଆନାତ୍। ଈଶ୍ୱର ମାଙ୍ଗେଙ୍ଗ୍ ଗୌରବ ହିଦ୍ନି ବିଷୟ 18 ଆନେଙ୍ଗ୍ ହାର୍ କିଜି ପୁଚାଙ୍ଗ୍ ଯେ, ନଙ୍ଗୟ୍ ଆନେଙ୍ଗ୍ ଇମ୍ଣି ଦୁଃକ୍ କଷ୍ଟ ପାୟାଆନାଙ୍ଗା ହେବେତାଙ୍ଗ୍ ଈଶ୍ୱର ନାଙ୍ଗେଙ୍ଗ୍ ଇମ୍ଣି ଗୌରବ ପାଚେ ହିଦ୍ନାନ୍ ହେଦାଙ୍ଗ୍ ଗାଜା। 19 ଇନେସ୍କି ଈଶ୍ୱର ଉବ୍ଜାଇ କିତି ୱିଜୁ ଜିନିଷ୍ କାତାତ୍ନା ଯେ, ଈଶ୍ୱର ଇନାୱେଡ଼ାଙ୍ଗ୍ ତା ସତ୍ ହିମ୍ଣାକାଙ୍ଗ୍ ଚଚ୍ଚାନାନ୍। 20 ଈଶ୍ୱର ଉବ୍ଜାଇ କିତି ୱିଜୁ ଜିନିଷ୍ ବେକାର୍ ଆତାତ୍ନା, ଆରେ ହେୱାର୍ ନିଜେ ବେକାର୍ ଆୱାତାର୍, ମାତର୍ ଈଶ୍ୱର ହେ ୱିଜୁତିଙ୍ଗ୍ ବେକାର୍ ଆଦେଙ୍ଗ୍ ହିତାନ୍, ମାତର୍ ନଙ୍ଗୟ୍ ପା ଆହା ମାନାତ୍। 21 ଈଶ୍ୱର ତା ହିମ୍ଣାରିଙ୍ଗ୍ ଇମ୍ଣି ଗୌରବ ହିନାନ୍, ଆରେ ହେୱାର୍ ମାରାଣ୍ତିଙ୍ଗ୍ ୱିଜୁଦିନ୍ କାଜିଙ୍ଗ୍ ବିନାସ୍ କିନାତ୍। ହେ ଦିନ୍ତିଙ୍ଗ୍ ଈଶ୍ୱର ରସ୍ତି ୱିଜୁ ଜିନିଷ୍ ହେବେ ମାହା ଆଦେଙ୍ଗ୍ କାତିକ୍ନା। 22 ଆସେଙ୍ଗ୍ ପୁଚାସ୍ନା ଯେ, ଆଦମ ପାପ୍ କିତି ଦିନ୍ତାଙ୍ଗ୍ ନଙ୍ଗୟ୍ ପାତେକ୍ ଈଶ୍ୱର ରସ୍ତି ପୁର୍ତିନି ୱିଜୁ ଜିନିଷ୍, ର କଗ୍ଲେ ହିମ୍ଣା ଜନମ୍ କିନିହିଙ୍ଗ୍ ଇନେସ୍ ନନାତ୍ ହେଲେକେ ପୁର୍ତି କଷ୍ଟ ପାୟା ଆନାତା। 23 ଆରେ ଇ ପୁର୍ତି ୱାରା ହେଲେକେ କଷ୍ଟ ପାୟା ଆଉତା, ମାତର୍ ମାଙ୍ଗେଙ୍ଗ୍ ଈଶ୍ୱର ତା ପବିତ୍ର ଆତ୍ମା ପାର୍ମାଣ୍କିତି ଚିନ୍ଲେକେ ହିତ୍ତାନ୍ନା। ଆରେ ମା ଗାଗାଡ଼୍ ବିତ୍ରେ ଦୁଃକ୍ କଷ୍ଟ ପାୟାଆନାସା, ଆରେ ଆସେଙ୍ଗ୍ ପା ହେ ଦିନ୍ତିଙ୍ଗ୍ ମୁକ୍ତି ପାୟା ଆଦେଙ୍ଗ୍ ବେସି ଆହା କିଜି କାତାସ୍ନା। ଈଶ୍ୱର ଏଚେପାଦ୍ନା ମାଙ୍ଗେଙ୍ଗ୍ ତା ହିମ୍ଣା ଆଦେଙ୍ଗ୍ ପୁରା ଅଦିକାର୍ ହିଦ୍ନାନ୍। ଆରେ ଇମ୍ଣି ପୁନି ଗାଗାଡ଼୍ ହିଦ୍ନାଙ୍ଗ୍ ଇଞ୍ଜି ପାର୍ମାଣ୍ କିଜି ମାଚାନ୍ ହେଦାଙ୍ଗ୍ ପୁରା କିନାନ୍। 24-25 ଈଶ୍ୱର ମାଙ୍ଗେଙ୍ଗ୍ ଆହା ଚଚ୍ଚାତାନ୍ନା, ଏଚେପାଦ୍ନା ହେୱାନ୍ ମାଙ୍ଗେଙ୍ଗ୍ ରକ୍ଷା କିତ୍ତାନ୍। ଈଶ୍ୱର ମାଙ୍ଗେଙ୍ଗ୍ ପାର୍ମାଣ୍କିତି ୱିଜୁ ଜିନିଷ୍ ପାୟାଆୱାତାସ୍ନା, ହେଦାଙ୍ଗ୍ କାଜିଙ୍ଗ୍ ନଙ୍ଗୟ୍ ପାତେକ୍ ହେଦାଙ୍ଗ୍ ପାୟା ଆଦେଙ୍ଗ୍ ଆହା କିନାପା। ଲାଗିଙ୍ଗ୍ ଆପେଙ୍ଗ୍ ନଙ୍ଗୟ୍ ସାସ୍ ଆଜି ତାବେତାଙ୍ଗ୍ ପାୟାଆୱି ପାତେକ୍ କାନାପା। 26 ଆରେ, ଆସେଙ୍ଗ୍ ଦୁଃକ୍ ଆଜି ମାନିହିଙ୍ଗ୍ ପବିତ୍ର ଆତ୍ମା ମାଙ୍ଗେଙ୍ଗ୍ ସାଇଜ କିଦ୍ନାତା, ଇନେସ୍କି ଆସେଙ୍ଗ୍ ଇନେସ୍କିଜି ପାର୍ତାନା କିୟାଆନାତ୍ ଆରେ ଇନାକାଦିଙ୍ଗ୍ ପାର୍ତାନା କିୟାଆନାତ୍ ହେଦାଙ୍ଗ୍ ଆସେଙ୍ଗ୍ ପୁନ୍ୱାତାସ୍ନା ପା। ମାତର୍ ପବିତ୍ର ଆତ୍ମା ମା କାଜିଙ୍ଗ୍ ଆଡ଼୍ବିସ୍ ପାର୍ତାନା କିନାତା ଯେ, ଆସେଙ୍ଗ୍ ହେଦାଙ୍ଗ୍ କାତାତାକେ ବୁଜାୟ୍ କିୟାଆଉତ୍। 27 ଆରେ, ଆବା ଈଶ୍ୱର ୱିଜାକାର୍ ଗରବ୍ତିଙ୍ଗ୍ ପୁଚାନ୍ନା, ଲାଗିଙ୍ଗ୍ ହେ ପବିତ୍ର ଆତ୍ମାନି କାତାତିଙ୍ଗ୍ ବୁଜା ଆନାନା, ଇନେସ୍କି ଈଶ୍ୱର ଜାର୍ ଇଚା ଅନୁସାରେ ହାମାନ୍ ଆଜି ମାନି କାଜିଙ୍ଗ୍ ପବିତ୍ର ଆତ୍ମା ମା କାଜିଙ୍ଗ୍ ତାତାକେ ଗୁୱାରି କିନାତା। 28 ଆସେଙ୍ଗ୍ ପୁଚାସ୍ନା ଯେ, ଈଶ୍ୱର ୱିଜୁ ଜିନିଷ୍ତିଙ୍ଗ୍ ହାର୍ କିଜି ସେସ୍ କିୟିକିନାତ୍, ଏଚେଜାଣ୍ ହେୱାନିଙ୍ଗ୍ ଲାଡ୍ କିନାରା ଆରେ ହେୱାନ୍ ତା କାମାୟ୍ କାଜିଙ୍ଗ୍ ହେୱାରିଙ୍ଗ୍ ବାଚି କିତାନ୍ନା। 29 ଇନେସ୍କି ଈଶ୍ୱର ତା ମାନାୟାରିଙ୍ଗ୍ ଆଗେନେ ପୁଚାନ୍ନା, ଆରେ ହେୱାନ୍ ତା ମେହି ଲେକେ ଆନି କାଜିଙ୍ଗ୍ ହେୱାରିଙ୍ଗ୍ ବାଚି କିତାନ୍ନା, ଲାଗିଙ୍ଗ୍ ତା ମେହି ୱିଜାର୍ ଟଣ୍ଡାହିର୍ ଆରେ ତଣ୍ଦିହିକ୍ ବିତ୍ରେତାଙ୍ଗ୍ ପାର୍ତୁମ୍ ଆନାନ୍। 30 ହେୱାନ୍ ହେୱାରିଙ୍ଗ୍ ଆଗେ ବାଚିକିଜି ମାଚିଲେ ତାବେ ହାଞ୍ଜେଙ୍ଗ୍ ହେୱାରିଙ୍ଗ୍ ହିର୍ବାତାନ୍ନା, ଏଚେଜାଣ୍ତିଙ୍ଗ୍ ହିର୍ବାଆତ୍ତାନ୍ନା ହେୱାରିଙ୍ଗ୍ ତା ଆଗେ ଦରମ୍ ମାନାୟ୍ କିତାନ୍, ଆରେ ହେୱାନ୍ ତା ଗୌରବ ପା ହିନି କାଜିଙ୍ଗ୍ ପାର୍ମାଣ୍ କିତାନ୍ନା। ଈଶ୍ୱର ଲାଡ୍ତାଙ୍ଗ୍ ଇନାକା ପା ମାଙ୍ଗେଙ୍ଗ୍ ବିନେ କିଦେଙ୍ଗ୍ ଆଡ଼୍ଦୁତ୍ 31 ଲାଗିଙ୍ଗ୍ ଇ ୱିଜୁ ବିଷୟରେ ଆସେଙ୍ଗ୍ ଇଲେକେ ୱେଚ୍ଚେଙ୍ଗ୍ ଆଡ୍ନାସ୍ ଯେ, ଈଶ୍ୱର ଯଦି ମା ହୁଦାଙ୍ଗ୍ ମାନାନ୍, ଲାଗିଙ୍ଗ୍ ଇନେର୍ ପା ମା ବିରଦ୍ କିଦେଙ୍ଗ୍ ଆଡ଼୍ଦୁର୍। 32 ଈଶ୍ୱର ତା ମେହିଙ୍ଗ୍ ନେ ତାବେ ଇଟ୍ୱାତାନ୍, ମାତର୍ ମା କାଜିଙ୍ଗ୍ ତାଙ୍ଗେଙ୍ଗ୍ ଶତ୍ରୁ କେଇଦ ହିତାନ୍, ଲାଗିଙ୍ଗ୍ ହେୱାନ୍ ପାର୍ମାଣ୍କିତି ୱିଜୁ ଜିନିଷ୍ ପା ମାଙ୍ଗେଙ୍ଗ୍ ଆଶ୍ରିବାଦ୍ କିତାନ୍। 33 ଇନେର୍ ପା ମାଙ୍ଗେଙ୍ଗ୍ ଈଶ୍ୱର ମୁମ୍ଦ ଦସି ଇଞ୍ଜି ଇଞ୍ଜେଙ୍ଗ୍ ଆଡୁର୍, ଇନେସ୍କି ହେୱାନ୍ ନେ ହେ ମାନାୟ୍ ଇନେର୍ ମାଙ୍ଗେଙ୍ଗ୍ ଦରମ୍ ମାନାୟ୍ କିତ୍ତାନ୍ନା। 34 ଇନେର୍ ପା ମାଙ୍ଗେଙ୍ଗ୍ ଦସି କିତ୍ଦେଙ୍ଗ୍ ଆଡ଼୍ଦୁର୍, ଇନେସ୍କି ଯୀଶୁ ଖ୍ରୀଷ୍ଟ ମା କାଜିଙ୍ଗ୍ ହାଃତାନ୍ନା। ଆରେ ହେ ମାରାଣ୍ତାଙ୍ଗ୍ ମା କାଜିଙ୍ଗ୍ ଜିବୁନ୍ ଆତାନ୍ନା। ହେୱାନ୍ ସନ୍ମାନ୍ ପାୟାଆନି ବାହାତାକେ ଈଶ୍ୱରତାକେ ତିନାବାଗାୟ୍ କୁଚ୍ଚାନ୍ନା, ଆରେ ହେୱାନ୍ ମାପଣ୍ଡାଙ୍ଗ୍ ଆଜି ଈଶ୍ୱରତିଙ୍ଗ୍ ଗୁୱାରି କିନାନା। 35 ମାଙ୍ଗେଙ୍ଗ୍ ଖ୍ରୀଷ୍ଟନି ଲାଡ୍ତାଙ୍ଗ୍ ଇନାକା ଅଲ୍ଗା କିଦ୍ଦେଙ୍ଗ୍ ଆଡ଼୍ଦୁତ୍। ଆସେଙ୍ଗ୍ ଯଦି ଦୁଃକ୍ କଷ୍ଟ ପାୟାଆଜି ମାଚିସ୍ କି, ଆରେ ମାନାୟାର୍ ମା ବିରଦ୍ତାକେ କରାପ୍ କାମାୟ୍ କିଜିମାଚିସ୍ କି, ଆରେ ଚିଞ୍ଜେଙ୍ଗ୍ ଉସ୍ପେଦେଙ୍ଗ୍ ହିଲିତିସ୍ କି, ଆସେଙ୍ଗ୍ ହାଃତିସ୍ କି ଇନେର୍ ରକାନ୍ ମାଙ୍ଗେଙ୍ଗ୍ ଅସ୍ତିତିସ୍ ଇ ୱିଜୁ ଜିନିଷ୍ ଈଶ୍ୱର ଲାଡ୍ତାଙ୍ଗ୍ ଅଲ୍ଗା କିଦେଙ୍ଗ୍ ଆଡୁକ୍। 36 ଦାଉଦ ତା ସାସ୍ତର୍ତାକେ ଈଶ୍ୱରତିଙ୍ଗ୍ ଇଲେକେ ଇଚାନ୍ନା। “ୱିଜୁଦିନ୍ ମାନାୟାର୍ ମାଙ୍ଗେଙ୍ଗ୍ ମାର୍ନେ ଅସ୍ତେଦେଙ୍ଗ୍ ଉପାୟ୍ କିନାରା, ଆରେ ଆସେଙ୍ଗ୍ ମାର୍ନେ ଅହ୍ନି ମେଣ୍ଢାଲେକେ ଆତାସ୍ନା।” 37 ମା କାଜିଙ୍ଗ୍ ଇ ୱିଜୁ କରାପ୍ ଜିନିଷ୍ ଗଟା ଆତିସ୍ପା ଖ୍ରୀଷ୍ଟ କାଜିଙ୍ଗ୍ ଆସେଙ୍ଗ୍ ଜିତା ଆନାସ୍, ଇନେସ୍କି ହେୱାନ୍ ମାଙ୍ଗେଙ୍ଗ୍ ଲାଡ୍ କିଦ୍ନାନା। 38-39 ଆରେ ଆନେଙ୍ଗ୍ ପୁଚାଙ୍ଗ୍ନା ଯେ, ଇନାକା ପା ଈଶ୍ୱର ଲାଡ୍ତାଙ୍ଗ୍ ମାଙ୍ଗେଙ୍ଗ୍ ଅଲ୍ଗା କିଦ୍ଦେଙ୍ଗ୍ ଆଡ଼୍ଦୁତ୍। ମାରାଣ୍ କି ଜିବୁନ୍, ଦୁତ୍ କି ବୁତ୍ଆତ୍ମା ନେଞ୍ଜେଙ୍ଗ୍ କି ୱିଗା ଆରେ ନରକ୍ନି ଶାକ୍ତି ପା ଈଶ୍ୱର ଲାଡ୍ତାଙ୍ଗ୍ ମାଙ୍ଗେଙ୍ଗ୍ ଅଲ୍ଗା କିଦ୍ଦେଙ୍ଗ୍ ଆଡ଼୍ଦୁତ୍। ବାଦାଡ଼୍ଜପି କି ପୁର୍ତିନି ତାରେନ୍ ଇଲେକେ ଇନା ସାକ୍ତି ହିଲୁତ୍, ଆରେ ଇ ପୁର୍ତିତାକେ ଈଶ୍ୱର ଉବ୍ଜାଇ କିତି ଜିନିଷ୍ ପା ହିଲୁତ୍। ଇମ୍ଣାକା ମାଙ୍ଗେଙ୍ଗ୍ ଈଶ୍ୱର ଲାଡ୍ତାଙ୍ଗ୍ ଅଲ୍ଗା କିଦ୍ଦେଙ୍ଗ୍ ଆଡ୍ନାତ୍, ଇମ୍ଣାକା ମା ମାପୃ ଯୀଶୁ ଖ୍ରୀଷ୍ଟ କାଜିଙ୍ଗ୍ ମାଙ୍ଗେଙ୍ଗ୍ ପୁନି କିତ୍ତାନ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation