ରୋମିୟ 7 - New Testament in Pengo Parja Language

ନଙ୍ଗୟ୍ ଆରେ ବ୍ଯବସ୍ଥାନି ତାରେନ୍ ହିଲୁସ୍

^1-2 ଏ ଟଣ୍ଡାର୍‌କାଦେର୍, ଏପେଙ୍ଗ୍ ପୁଚାଦେର୍‌ନା, ଆରେ ଦରମ୍ ସାସ୍ତର୍‌ତିଙ୍ଗ୍ ମାନି କିନାଦେରା ଯେ, ଏଚେପାଦ୍ନା ର କଗ୍‌ଲେ ବିବା ଆନାତ୍, ନିୟମ୍ ଅନୁସାରେ ତା ଡକ୍ରାହି ଜିବୁନ୍ ମାନି ପାତେକ୍ ହେଦେଲ୍ ତା ହୁଦାଙ୍ଗ୍ ମାଞ୍ଜେଙ୍ଗ୍ ଆଡ୍‌ନାତ୍। ମାତର୍ ଯଦି ତା ଡକ୍ରାହି ହାଃନାନ୍ ଲାଗିଙ୍ଗ୍ ହେଦେଲ୍ ବିବାଆତି ନିୟମ୍ ଆରେ ତା କାଜିଙ୍ଗ୍ ମାନ୍‌ଗୁତ୍। ହେଲେକେ ମଶା ଲେକିକିତି ଦରମ୍ ସାସ୍ତର୍ ଜିବୁନ୍ ମାନି ମାନାୟାର୍ କାଜିଙ୍ଗ୍ ନେ ଲେକାଆତାତ୍‌ନା।

³ ଯଦି ର କଗ୍‌ଲେ ତା ଡକ୍ରାହି ଜିବୁନ୍ ମାନୁ-ମାନୁ ଆରେ ରକାନ୍ ହୁଦାଙ୍ଗ୍ ବିବା ଆନାତ୍, ଲାଗିଙ୍ଗ୍ ହେଦେଲ୍ ଦାରି କାମାୟ୍ କିନାତ୍, ମାତର୍ ଯଦି ତା ଡକ୍ରାହି ହାଃନାନ୍ ଆରେ ହେୱାନ୍ ନିୟମ୍ ବାଙ୍ଗା ଆନାତ୍। ଆରେ ହେଦେଲ୍ ଆରେ ରକାନ୍ ଆଣ୍ଡ୍ରେନ୍ ହୁଦାଙ୍ଗ୍ ବିବା ଆତିସ୍‌ପା ଦାରି କାମାୟ୍ କିନାତା ଇଞ୍ଜି ଇନୁର୍।

⁴ ହେଲେକେ ପାର୍ତିକିନି ଟଣ୍ଡାର୍‌କାଦେର୍, ଏପେଙ୍ଗ୍ ନଙ୍ଗୟ୍ ହେ ନିୟମ୍‌ନି ତାରେନ୍ ହିଲୁଦେର୍, ଇନେସ୍‌କି ଏପେଙ୍ଗ୍ ନିୟମ୍ କାଜିଙ୍ଗ୍ ହାଃତାଦେର୍‌ନା। ଏଚେପାଦ୍ନା ଖ୍ରୀଷ୍ଟ ହାଃତାନ୍ ଆରେ ଆରେରଗ ଜିବୁନ୍ ଆତାନ୍, ଏପେଙ୍ଗ୍ ତା ହୁଦାଙ୍ଗ୍ ହାଃତାଦେର୍ ଆରେ ତା ହୁଦାଙ୍ଗ୍ ଏକ୍ ଆତାଦେର୍‌ନା। ଲାଗିଙ୍ଗ୍ ଏପେଙ୍ଗ୍ ଈଶ୍ୱର କାଜିଙ୍ଗ୍ ହାର୍ କାମାୟ୍ କିଦେଙ୍ଗ୍ ଆଡ୍‌ନାଦେର୍।

⁵ ଏଚେକାଡ଼୍‌ଦ ମା ପାପ୍ କାମାୟ୍ କିଦେଙ୍ଗ୍ ଇଚା ମାଙ୍ଗେଙ୍ଗ୍ କଣ୍ଟ୍ରୁଲ୍ କିଜି ମାଚାତ୍, ହେ ଇଚା ମା ବିତ୍ରେ କାମାୟ୍ କିଜି ମାଚାତ୍। ଆରେ ହେ ନିୟମ୍ କାଜିଙ୍ଗ୍ ହେଲେକେ କରାପ୍ ଚିନ୍ତା ପାପ୍ କାମାୟ୍ କିଜି ମାଚାତ୍, ଲାଗିଙ୍ଗ୍ ହେ ପାପ୍ କାମାୟ୍ କାଜିଙ୍ଗ୍ ଆପେଙ୍ଗ୍ ହାଃଜି ମାଚାପ୍।

⁶ ମାତର୍ ନଙ୍ଗୟ୍ ହେ ନିୟମ୍ ମାଙ୍ଗେଙ୍ଗ୍ ବନ୍ଦିକିଜି ଇଡ଼୍‌ଦାୱାତାତ୍‌ନା, ଇନେସ୍‌କି ଆସେଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ହାଃତାସ୍‌ନା, ଦିନେକ୍ ହେ ନିୟମ୍ ମାଙ୍ଗେଙ୍ଗ୍ ଜଇଲ୍ ଇଞ୍ଜ ଇଡ଼୍‌ତିଲେକେ ଇଡ଼୍‌ଜି ମାନ୍‌ଞ୍ଚାତ୍‌। ନଙ୍ଗୟ୍ ଆସେଙ୍ଗ୍ ଈଶ୍ୱରତିଙ୍ଗ୍ ହେବା କିୟାଆନାତ୍, ଆଗେ ଦରମ୍ ସାସ୍ତର୍‌ତ ଲେକାଆତି ନିୟମ୍‌ତିଙ୍ଗ୍ ମାନି କିତିଲେକେ ମାନିକିୱାଦାଙ୍ଗ୍, ପୁନି ଜିବୁନ୍ ପାୟା ଆତିଲେକେ ତା ପବିତ୍ର ଆତ୍ମା ହୁଦାଙ୍ଗ୍ ଜିବୁନ୍ କାଟି କିନାସା।

ଈଶ୍ୱରତି ସାସ୍ତର୍ କାଜିଙ୍ଗ୍ ମାଙ୍ଗେଙ୍ଗ୍ ପାପିର୍ ଇଞ୍ଜି ପୁନି କିତ୍‌ତାତ୍

⁷ ଆନେଙ୍ଗ୍ ୱେଚ୍‌ଚୁଙ୍ଗା ଯେ ଈଶ୍ୱର ନିୟମ୍ ପାପ୍ ଇଞ୍ଜି, ମାତର୍ ଦରମ୍ ସାସ୍ତର୍ କାଜିଙ୍ଗ୍ ନେ ପାପ୍ ଇନାକା ଆନେଙ୍ଗ୍ ପୁଞ୍ଜେଙ୍ଗ୍ ଆଡ଼୍‌ତାଙ୍ଗ୍। ଇନେସ୍‌କି ଦରମ୍ ସାସ୍ତର୍‌ତାକେ ଲେକାଆତାତ୍‌ନା, “ଏପେଙ୍ଗ୍ ଜେକନିକାର୍ ଜିନିସ୍‌ତିଙ୍ଗ୍ ଆହା କିମାଟ୍।” ଯଦି ଈଶ୍ୱର ଦରମ୍ ସାସ୍ତର୍‌ତାକେ ଲେକାଆୱାଦାଙ୍ଗ୍ ମାଚିସ୍, ଆନେଙ୍ଗ୍ ପାପ୍ କିତାଙ୍ଗ୍‌ନା ଇଞ୍ଜି ଇନାୱେଡ଼ାଙ୍ଗ୍ ପା ପୁନ୍‌ୱାତାଙ୍ଗ୍‌ମା।

⁸ ମାତର୍ ପାପ୍, ନିୟମ୍‌ନି ସାଇଜତାଙ୍ଗ୍ ନା ବିତ୍ରେ ୱିଜୁ ପର୍‌କାର୍ କରାପ୍ ଇଚା କିୟିକିତ୍‌ତାତ୍। ଯଦି ନିୟମ୍ ହିଲାତାତ୍‌ମା, ଲାଗିଙ୍ଗ୍ ପାପ୍‌ନି ସାକ୍ତି ହିଲାତାତ୍‌ମା।

⁹ ଆନେଙ୍ଗ୍ ଆଗେ ନିୟମ୍‌ତିଙ୍ଗ୍ ପୁନ୍‌ୱାଦାଙ୍ଗ୍ ମାଚାଙ୍ଗ୍, ମାତର୍ ଆନେଙ୍ଗ୍ ଏଚେପାଦ୍ନା ନିୟମ୍‌ତିଙ୍ଗ୍ ପୁଚାଙ୍ଗ୍, ହେପାଦ୍ନା ଆନେଙ୍ଗ୍ ନିୟମ୍‌ତିଙ୍ଗ୍ ବାଙ୍ଗାୟ୍ କିତାଙ୍ଗ୍ ଆରେ ଆନେଙ୍ଗ୍ ନିଜେ ପାପି ଇଞ୍ଜି ପୁଚାଙ୍ଗ୍। ଆରେ ହେ ପାପ୍ କାଜିଙ୍ଗ୍ ଆନେଙ୍ଗ୍ ହାଃତାଙ୍ଗ୍।

¹⁰ ଲାଗିଙ୍ଗ୍ ଈଶ୍ୱର ହିତ୍‌ତି ହେ ହାର୍ଦି ନିୟମ୍ ଜିବୁନ୍‌ହିନି ବାଦୁଲ୍ ନାଙ୍ଗେଙ୍ଗ୍ ଈଶ୍ୱର ତାକେତାଙ୍ଗ୍ ଅଲ୍‌ଗା କିତ୍‌ତାନ୍।

¹¹ ଲାଗିଙ୍ଗ୍ ପାପ୍, ଦରମ୍ ସାସ୍ତର୍ କାଜିଙ୍ଗ୍ ଉପାୟ୍ କିଜି ନାଙ୍ଗେଙ୍ଗ୍ ଟକାୟ୍ କିତ୍‌ତାତ୍। ହେ ହାର୍ଦି ନିୟମ୍ ସାଇଜତାଙ୍ଗ୍ ନାଙ୍ଗେଙ୍ଗ୍ ଈଶ୍ୱର ଆଗେ ଦସ୍ କିତ୍‌ତାତ୍ ଆରେ ତାବେତାଙ୍ଗ୍ ଦେହା କିତ୍‌ତାତ୍।

¹² ଲାଗିଙ୍ଗ୍ ହେଦାଙ୍ଗ୍ କାଜିଙ୍ଗ୍, ଦରମ୍ ସାସ୍ତର୍ ଆରେ ହେବେ ଲେକାଆଜି ମାନାକା ୱିଜୁ ନିୟମ୍ ଟିକ୍ ଆରେ ପବିତ୍ର।

¹³ ଲାଗିଙ୍ଗ୍ ଆନେଙ୍ଗ୍ ଇମ୍‌ଣି ଦରମ୍ ସାସ୍ତର୍‌ତିଙ୍ଗ୍ ହାର୍ ଇଞ୍ଜି ଇନାରା, ହେଦାଙ୍ଗ୍ ନା କାଜିଙ୍ଗ୍ ମାରାଣ୍ ତାତାତ୍ କି? ମୁଡ଼୍‌କେ ଆକାୟ୍, ମାତର୍ ପାପ୍ ହେଲେକେ କିତାତ୍। ପାପ୍ ହେ ହାର୍ଦି ଦରମ୍ ସାସ୍ତର୍‌ତିଙ୍ଗ୍ ଅଜି ବ୍ଯବହାର୍ କିତାତ୍ ଆରେ ନା କାଜିଙ୍ଗ୍ ମାରାଣ୍ ତାତାତ୍। ଇଲେକେ ଦରମ୍ ସାସ୍ତର୍‌ନି ଜ୍ଞାନ୍ ପାପ୍ କରାପ୍ ଇଞ୍ଜି ଚଚ୍‌ଚାତ୍, ଆରେ ପାପ୍ ବେସି କରାପ୍ ଇଞ୍ଜି ପୁନ୍ୟା ଆତାତ୍।

¹⁴ ଲାଗିଙ୍ଗ୍ ଆସେଙ୍ଗ୍ ପୁଚାସ୍ ଯେ, ଦରମ୍ ସାସ୍ତର୍‌ନି ନିୟମ୍ ହାର୍, ମାତର୍ ଆନେଙ୍ଗ୍ ନିଜେ କରାପ୍, ଆରେ ଆନେଙ୍ଗ୍ ପାପ୍‌ନି ଦାସ୍ ଆତାଙ୍ଗ୍‌ନା, ଆରେ ପାପ୍ ନା ମାଲିକ୍ ଆତାତ୍‌ନା।

¹⁵ ଆନେଙ୍ଗ୍ ଇନାକା କିନାଙ୍ଗା ହେଦାଙ୍ଗ୍ ଆନେଙ୍ଗ୍ ନିଜେ ପୁନୁଙ୍ଗା। ଇନେସ୍‌କି ଆନେଙ୍ଗ୍ ଇମ୍‌ଣି ଟିକ୍ କାମାୟ୍ କିଦେଙ୍ଗ୍ ହାତ୍‌ପା ଇଚା କିନାଙ୍ଗା ହେଦାଙ୍ଗ୍ କିଉଙ୍ଗା। ମାତର୍ ତା ବାଦୁଲ୍‌ତାଙ୍ଗ୍ ଇମ୍‌ଣାକାଦିଙ୍ଗ୍ ଆନେଙ୍ଗ୍ ଗିଣ୍ କିନାଙ୍ଗା ହେଦାଙ୍ଗ୍ ନେ ଆନେଙ୍ଗ୍ କିନାଙ୍ଗା।

¹⁶ ଯଦି ଆନେଙ୍ଗ୍ ଇଚା କିୱି କାମାୟ୍ କିନାଙ୍ଗ୍, ଲାଗିଙ୍ଗ୍ ଆନେଙ୍ଗ୍ ହାର୍ କିଜି ପୁଚାଙ୍ଗ୍‌ନା ଯେ, ଆନେଙ୍ଗ୍ କରାପ୍ କାମାୟ୍ କିନାଙ୍ଗା, ଆରେ ନା କରାପ୍ ମାନ୍ ରାଜି ଆନାତା ଯେ ଦରମ୍ ସାସ୍ତର୍‌ନି ନିୟମ୍ ହାର୍।

¹⁷ ଲାଗିଙ୍ଗ୍ ଆନେଙ୍ଗ୍ ହେ କରାପ୍ କାମାୟ୍ କିଉଙ୍ଗା, ମାତର୍ ନା ବିତ୍ରେ ଇନାକା ମାନାତ୍ ହେଦାଙ୍ଗ୍ ଇଲେକେ ପାପ୍ କାମାୟ୍ କିନାତା।

¹⁸ ଆନେଙ୍ଗ୍ ପୁଚାଙ୍ଗ୍‌ନା ଯେ, ନା ବିତ୍ରେ ପାପ୍ କାମାୟ୍ କିନି ଚିନ୍ତା ମାନାତ୍, ଲାଗିଙ୍ଗ୍ ଆନେଙ୍ଗ୍ ହାର୍ କାମାୟ୍ ୱିଜୁ କିଦେଙ୍ଗ୍ ଇଚା କିତିସ୍ ପା କିଦେଙ୍ଗ୍ ଆଡୁଙ୍ଗା। ଇନେସ୍‌କି ଆନେଙ୍ଗ୍ ହାର୍ କାମାୟ୍ କିଦେଙ୍ଗ୍ ନାତାକେ ଶାକ୍ତି ହିଲେତ୍।

¹⁹ ଏଚେକାଡ଼୍‌ଦ ଆନେଙ୍ଗ୍ ହାର୍ କାମାୟ୍ କିଦେଙ୍ଗ୍ ଇଚା କିନାଙ୍ଗା, ଆନେଙ୍ଗ୍ ହେଦାଙ୍ଗ୍ କିଦେଙ୍ଗ୍ ଆଡୁଙ୍ଗା। ଆରେ ଆନେଙ୍ଗ୍ କରାପ୍ କାମାୟ୍ କିୱେଦେଙ୍ଗ୍ ଉପାୟ୍ କିତିସ୍ ପା ହେଦାଙ୍ଗ୍ ନେ କିନାଙ୍ଗା।

²⁰ ମାତର୍ ଆନେଙ୍ଗ୍ ଇଚା କିୱି କାମାୟ୍ ଯଦି କିନାଙ୍ଗା, ଲାଗିଙ୍ଗ୍ ଆନେଙ୍ଗ୍ ନିଜେ ହେଦାଙ୍ଗ୍ କିଉଙ୍ଗା, ମାତର୍ ନା ବିତ୍ରେ ମାନି ପାପ୍ ହେ କାମାୟ୍‌ତିଙ୍ଗ୍ କିୟିକିଦ୍‌ନାତା।

²¹ ଲାଗିଙ୍ଗ୍, ଏଚେପାଦ୍ନା ଆନେଙ୍ଗ୍ ହାର୍ କାମାୟ୍ କିଦେଙ୍ଗ୍ ଇଚା କିନାଙ୍ଗା ହେପାଦ୍ନା ଆନେଙ୍ଗ୍ ଅଦରମ୍‌ କାମାୟ୍ ନେ କିନାଙ୍ଗା, ଇ ନିୟମ୍‌ତିଙ୍ଗ୍ ଆନେଙ୍ଗ୍ ହୁଡ଼୍‌ନାଙ୍ଗା।

²² ଆନେଙ୍ଗ୍ ନା ଗରବ୍‌ତାଙ୍ଗ୍ ଈଶ୍ୱର ଦରମ୍ ସାସ୍ତର୍‌ନି ନିୟମ୍‌ତିଙ୍ଗ୍ ଲାଡ୍ କିନାଙ୍ଗା,

²³ ମାତର୍ ଆନେଙ୍ଗ୍ ନା ଗାଗାଡ଼୍‌ନି ଜିନିଷ୍‌ତାକେ ର ଅଲଗା ନିୟମ୍‌ତିଙ୍ଗ୍ ହୁଡ଼୍‌ନାଙ୍ଗା। ହେଦାଙ୍ଗ୍ ନା ମାନ୍ତି ନିୟମ୍ ବିରଦ୍‌ତାକେ ଯୁଜ୍ କିନାତା ଆରେ ନା ଗାଗାଡ଼୍‌ନି ଜିନିଷ୍ ପାପ୍‌ନି ତାରେନ୍ ମାନାତ୍ ଆରେ ନାଙ୍ଗେଙ୍ଗ୍ ପାପ୍‌ନି ଚାକର୍ କିଜି ହେବେ ବନ୍ଦି କିତ୍‌ତାତ୍‌ନା।

²⁴ ହାୟ୍, ଆନେଙ୍ଗ୍ ଏଚେକ୍ କାକୁଲ୍‌ତି ନିକାଙ୍ଗ୍, ପାପ୍ ସାସନ୍ କିନି ଜିବୁନ୍‌ତାଙ୍ଗ୍ ଇନେର୍ ନାଙ୍ଗେଙ୍ଗ୍ ଉଦାର୍ କିଦ୍‌ନାନ୍?

²⁵ ଆନେଙ୍ଗ୍ ମା ମାପୃ ଯୀଶୁ ଖ୍ରୀଷ୍ଟ କାଜିଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଙ୍ଗା, ଇନେସ୍‌କି ହେୱାନ୍ ନାଙ୍ଗେଙ୍ଗ୍ ଉଦାର୍ କିଦ୍‌ନାନ୍। ଆନେଙ୍ଗ୍ ନା ମାନ୍ତ ତା ଦରମ୍ ସାସ୍ତର୍‌ନି ନିୟମ୍ ମାନି କିଦେଙ୍ଗ୍ ଇଚା କିନାଙ୍ଗା, ମାତର୍ ନା ଗରବ୍‌ତାକେ କରାପ୍ ଇଚା ମାନି କାଜିଙ୍ଗ୍ ଆନେଙ୍ଗ୍ ନଙ୍ଗୟ୍ ପାତେକ୍ ପାପ୍ କିନାଙ୍ଗା।