ରୋମିୟ 5 - New Testament in Pengo Parja Languageଈଶ୍ୱରତିଙ୍ଗ୍ ପାର୍ତିକିତି କାଜିଙ୍ଗ୍ ତା ହୁଦାଙ୍ଗ୍ ଶାନ୍ତିତାଙ୍ଗ୍ ମାନାପ୍ 1 ଲାଗିଙ୍ଗ୍, ଯୀଶୁ ଖ୍ରୀଷ୍ଟ ମା କାଜିଙ୍ଗ୍ ଇମ୍ଣି କାମାୟ୍ କିତାନ୍ନା, ଆରେ ଆସେଙ୍ଗ୍ ପାର୍ତିକିତି କାଜିଙ୍ଗ୍ ଈଶ୍ୱର ଆଗେ ଦରମ୍ ମାନାୟ୍ ଆତାପ୍ନା ଆରେ ଆସେଙ୍ଗ୍ ତା ହୁଦାଙ୍ଗ୍ ଶାନ୍ତିତାଙ୍ଗ୍ ମାନାପ୍। 2 ଆପେଙ୍ଗ୍ ଖ୍ରୀଷ୍ଟଙ୍ଗ୍ ପାର୍ତିକିତି କାଜିଙ୍ଗ୍, ଈଶ୍ୱର ମାଙ୍ଗେଙ୍ଗ୍ ଦୟା ପାୟା ଆଦେଙ୍ଗ୍ ଅଦିକାର୍ ହିତ୍ତାନ୍ନା। ଆରେ ପୁରା ପାର୍ତି ହୁଦାଙ୍ଗ୍ ଆରେ ୱାରିୟା ଆଜି ତା ଗୌରବ ପାୟା ଆଦେଙ୍ଗ୍ ଆହାକିଜି କାନାପା। 3 ୱାରା ଏଚେକ୍ ଆକାୟ୍, ମାତର୍ ଆପେଙ୍ଗ୍ ଦୁଃକ୍ କଷ୍ଟ ୱାତିସ୍ ପା ୱାରି କିନାପା। ଇନେସ୍କି ଆପେଙ୍ଗ୍ ଦୁଃକ୍ କଷ୍ଟ ପାୟାଆଜି ପୁଚାପ୍ନା ଯେ, ଦୁଃକ୍ କଷ୍ଟ ପାୟାଆତିସ୍ନେ ସାସ୍ ଆୟା ଆନାତ୍। 4 ଈଶ୍ୱର ମାଙ୍ଗେଙ୍ଗ୍ ଆସ୍ତାତାନ୍ନା, ଇନେସ୍କି ଆପେଙ୍ଗ୍ ଦୁଃକ୍ କଷ୍ଟ ପାୟାଆଜି ସାସ୍ ଆନାକା ହିକା ଆତାପ୍ନା। ଆରେ ଆପେଙ୍ଗ୍ ହେୱାନିଙ୍ଗ୍ ଆହା କିନାପା। 5 ଏଚେପାଦ୍ନା ଆସେଙ୍ଗ୍ ଈଶ୍ୱରତିଙ୍ଗ୍ ଆହା କିନାସ୍ ମାଙ୍ଗେଙ୍ଗ୍ ଇମ୍ଣି ମାନାୟ୍ ପା ଲାଜ୍ କିଦ୍ଦେଙ୍ଗ୍ ଆଡ଼୍ଦୁନ୍, ଇନେସ୍କି ଈଶ୍ୱର ମାଙ୍ଗେଙ୍ଗ୍ ପବିତ୍ର ଆତ୍ମା ହିତ୍ତାନ୍ନା ଆରେ ହେୱାନ୍ ତା ଲାଡ୍ତିଙ୍ଗ୍ ମା ଗରବ୍ ବିତ୍ରେ ହିତ୍ତାନ୍ନା। 6 ଏଚେପାଦ୍ନା ମାଙ୍ଗେଙ୍ଗ୍ ସାଇଜ ଦର୍କାର୍ ମାଚାତ୍, ଟିକ୍ ହେପାଦ୍ନା ଯୀଶୁ ଖ୍ରୀଷ୍ଟ ୱାତାନ୍ ଆରେ ମା ପାପ୍ କାଜିଙ୍ଗ୍ ହାଃତାନ୍। 7 ଦରମ୍ ମାନାୟାର୍ କାଜିଙ୍ଗ୍ ଇନେର୍ ପା ଜାର୍ ଜିବୁନ୍ତିଙ୍ଗ୍ ହିଉନ୍। ହେୱାନ୍ ହାର୍ ମାନାୟାର୍ କାଜିଙ୍ଗ୍ ଜାର୍ ଜିବୁନ୍ ହିଦେଙ୍ଗ୍ ଇଚା କିତିସ୍ ପା ତା କାଜିଙ୍ଗ୍ ହେୱାନ୍ ହାଃଦେଙ୍ଗ୍ ଆଡୁନ୍। 8 ମାତର୍ ଈଶ୍ୱର ମାଙ୍ଗେଙ୍ଗ୍ ଇଲେକେ ଲାଡ୍ କିତ୍ତାନ୍ ଯେ, ଆସେଙ୍ଗ୍ ପାପିଆଜି ମାନିହିଙ୍ଗ୍ ତା ମେହି ଯୀଶୁ ଖ୍ରୀଷ୍ଟଙ୍ଗ୍ ମା କାଜିଙ୍ଗ୍ ହାଃଦେଙ୍ଗ୍ ପକ୍ତାତାନ୍। 9 ଲାଗିଙ୍ଗ୍ ଆପେଙ୍ଗ୍ ନଙ୍ଗୟ୍ ଈଶ୍ୱର ଆଗେ ଦରମ୍ ମାନାୟ୍ ଆତାପ୍, ଇନେସ୍କି ଖ୍ରୀଷ୍ଟ ମା କାଜିଙ୍ଗ୍ ହାଃତାନ୍ ଆରେ ମା ପାପ୍ତିଙ୍ଗ୍ ନୁଜ୍ଦେଙ୍ଗ୍ ତା ନେତେର୍ତିଙ୍ଗ୍ ୱାକ୍ତାନ୍। ହେୱାନ୍ ଈଶ୍ୱର ଦଣ୍ଡ୍ତାଙ୍ଗ୍ ମାଙ୍ଗେଙ୍ଗ୍ ରକ୍ଷା କିଦ୍ନାନା। 10 ଇନେସ୍କି ଆସେଙ୍ଗ୍ ଏଚେପାଦ୍ନା ଈଶ୍ୱରତିଙ୍ଗ୍ ବିରଦ୍ କିଜି ମାଚାସ୍, ହେପାଦ୍ନା ମା ଯୀଶୁ ଖ୍ରୀଷ୍ଟ ମା କାଜିଙ୍ଗ୍ ହାଃତିଲେ ଆସେଙ୍ଗ୍ ଈଶ୍ୱର ହୁଦାଙ୍ଗ୍ ହାର୍ ରୱାଣ୍ ଇଡ଼୍ଜି ମାହା ଆତାସ୍। ନଙ୍ଗୟ୍ ଆପେଙ୍ଗ୍ ହାର୍ଦାଙ୍ଗ୍ ପୁଚାପ୍ନା ଯେ, ଈଶ୍ୱର ହୁଦାଙ୍ଗ୍ ହାର୍ ରୱାଣ୍ ଇଡ଼୍ତାପ୍ନା, ଆରେ ଯୀଶୁ ମାଙ୍ଗେଙ୍ଗ୍ ରକ୍ଷା କିଦ୍ନାନା, ଇନେସ୍କି ହେୱାନ୍ ନଙ୍ଗୟ୍ ପାତେକ୍ ଯିବୁନ୍ ମାନାନ୍। 11 ୱାରା ଏଚେକ୍ ଆକାୟ୍, ମାତର୍ ନଙ୍ଗୟ୍ ଯୀଶୁ ଖ୍ରୀଷ୍ଟ କାଜିଙ୍ଗ୍ ଈଶ୍ୱର ହୁଦାଙ୍ଗ୍ ହାର୍ ରୱାଣ୍ ଇଡ଼୍ଜି ମାହାଆତାପ୍ନା, ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ୱାରି କିନାପା। ଆଦମ କାଜିଙ୍ଗ୍ ମାରାଣ୍ ୱାତାତ୍ ଆରେ ଯୀଶୁ ଖ୍ରୀଷ୍ଟ କାଜିଙ୍ଗ୍ ଯିବୁନ୍ 12 ଈଶ୍ୱର ପାର୍ତୁମ୍ ଆଦମତିଙ୍ଗ୍ ଉବ୍ଜାଇ କିତାନ୍, ହେ ମାନାୟ୍ କାଜିଙ୍ଗ୍ ପୁର୍ତିତାକେ ପାପ୍ ୱାତାତ୍, ଆରେ ହେ ଆଦମ ପାପ୍ କିତି କାଜିଙ୍ଗ୍ ପୁର୍ତିନି ୱିଜାର୍ ମାନାୟ୍ତିଙ୍ଗ୍ ମାରାଣ୍ ୱାତାତ୍। ହେୱାନ୍ ପାପ୍ କିତିଲେ ଆସେଙ୍ଗ୍ ପା ପାପ୍ କିତାସ୍, ଇନେସ୍କି ଆସେଙ୍ଗ୍ ୱିଜାକାସ୍ ତା କୁଟୁମ୍ ନିକାସ୍। 13 ମଶା ଲେକିକିତି ଦରମ୍ ସାସ୍ତର୍ ହିଲ୍ୱି ଆଗେ ପା ମାନାୟାର୍ ପାପ୍ କାମାୟ୍ କିଜି ମାଚାର୍, ମାତର୍ ଦରମ୍ ସାସ୍ତର୍ ହିଲିତି କାଜିଙ୍ଗ୍, ହେୱାରିଙ୍ଗ୍ ପାପ୍ କାମାୟ୍ କିତାର୍ନା ଇଞ୍ଜି ଈଶ୍ୱର ଦସ୍ ହିୱାତାନ୍ନା, ଇନେସ୍କି ନିୟମ୍ ବାଙ୍ଗାୟ୍ କିଦେଙ୍ଗ୍ ଦରମ୍ ସାସ୍ତର୍ ହିଲାତାତ୍। 14 ଆତିସ୍ପା, ଆଦମ ଈଶ୍ୱର ଆଦେସ୍ତିଙ୍ଗ୍ ମାନିକିୱାଦାଙ୍ଗ୍ ପାପ୍ କିତିଲେକେ ମାନାୟାର୍ ପାପ୍ କିୱାଦାଙ୍ଗ୍ ମାଚାର୍, ମାତର୍ ଆଦମତାଙ୍ଗ୍ ମୋଶା ପାତେକ୍ ଏଚେ ହେନି ମାଚାର୍ ହେୱାର୍ ୱିଜାକାର୍ ହାଃତାର୍। ଆଦମ ପାପ୍ କିତିଲେ ୱିଜାକାର୍ ପାପିର୍ ଆତାର୍, ଇନେସ୍କି ଖ୍ରୀଷ୍ଟ ଦରମ୍ କାମାୟ୍ କିତିଲେ ୱିଜାକାର୍ ଦରମ୍ ଆତାର୍। 15 ଈଶ୍ୱର ମାଙ୍ଗେଙ୍ଗ୍ ଦୟାକିଜି ଦାନ୍ ହିତିଲେକେ ଆଦମ ପାପ୍ ଆକାୟ୍। ଇନେସ୍କି ର ମାନାୟ୍ ପାପ୍ କାଜିଙ୍ଗ୍ ୱିଜାକାରିଙ୍ଗ୍ ମାରାଣ୍ ୱାତାତ୍। ମାତର୍ ଈଶ୍ୱର ଦୟା ଆରେ ଦରମ୍ ମାନାୟ୍ ଆନି ଦାନ୍ ହେୱାନ୍ ମାଙ୍ଗେଙ୍ଗ୍ ହିତ୍ତାନ୍, ବେସିହେନି ମାନାୟ୍ ହେଦାଙ୍ଗ୍ ପୁଚାର୍ ଆରେ ହେଦାଙ୍ଗ୍ ବେସି ମୁଲ୍ଯବାନ୍। ଯୀଶୁ ଖ୍ରୀଷ୍ଟ ଦୟାକିଜି ଇନା କାମାୟ୍ କିତାନ୍ନା ହେଦାଙ୍ଗ୍ କାଜିଙ୍ଗ୍ ଈଶ୍ୱର ମା ପାପ୍ କେମା କିତ୍ତାନ୍। 16 ଆରେ ଈଶ୍ୱର ମାଙ୍ଗେଙ୍ଗ୍ ଇମ୍ଣି ଦାନ୍ ହିତ୍ତାନ୍ନା। ହେଦାଙ୍ଗ୍ ଆଦମ କିତି ପାପ୍ ଲେକେ ଆକାୟ୍, ଇନେସ୍କି ର ମାନାୟ୍ ପାପ୍ କିତି କାଜିଙ୍ଗ୍ ୱିଜାକାର୍ ଦସି ଆତାର୍। ମାତର୍ ଆସେଙ୍ଗ୍ ବେସି ପାପ୍ କିଜିମାଚିସ୍ ପା, ଈଶ୍ୱର ମାଙ୍ଗେଙ୍ଗ୍ ଦୟାନି ଦାନ୍ ହିତ୍ତାନ୍ ଆରେ ହେ ଦାନ୍ କାଜିଙ୍ଗ୍ ଆସେଙ୍ଗ୍ ତା ଆଗେ ଦରମ୍ ମାନାୟ୍ ଆତାସ୍। 17 ଯଦି ର ମାନାୟ୍ ପାପ୍ କିତି କାଜିଙ୍ଗ୍ ୱିଜାକାରିଙ୍ଗ୍ ମାରାଣ୍ ୱାତାତ୍ନା, ଲାଗିଙ୍ଗ୍ ଇମ୍ଣି ମାନାୟାର୍ ଈଶ୍ୱର ଦୟା ଆରେ ଦରମ୍ ମାନାୟ୍ ଆନି ଦାନ୍ତିଙ୍ଗ୍ ପାୟାଆତାର୍ନା, ହେୱାର୍ ଯୀଶୁ ଖ୍ରୀଷ୍ଟ କାଜିଙ୍ଗ୍ ଆଦିକ୍ ୱିଜ୍ୱି ଜିବୁନ୍ ପାୟାଆନାର୍। ଆରେ ହେୱାର୍ ଯୀଶୁ ହୁଦାଙ୍ଗ୍ ସାସନ୍ କିନାର୍। ଇନେସ୍କି ହେୱାର୍ ତାଙ୍ଗେଙ୍ଗ୍ ପାର୍ତି କିତାର୍ନା। 18 ଆଦମତି ର ପାପ୍ ୱିଜାକାରିଙ୍ଗ୍ ଈଶ୍ୱର ଆଗେ ଦସ୍ କିତ୍ତାତ୍, ମାତର୍ ଖ୍ରୀଷ୍ଟ ଇମ୍ଣାକା ର ଦରମ୍ କାମାୟ୍ କିତାନ୍, ହେଦାଙ୍ଗ୍ କାଜିଙ୍ଗ୍ ୱିଜୁ ମାନାୟାର୍ ଈଶ୍ୱର ଆଗେ ଦରମ୍ ମାନାୟ୍ ଆତାର୍ ଆରେ ହେୱାନ୍ ହେୱାରିଙ୍ଗ୍ ଜିବୁନ୍ ହିତାନ୍। 19 ଇନେସ୍କି ର ମାନାୟ୍ ଈଶ୍ୱର ଆଦେସ୍ତିଙ୍ଗ୍ ମାନିକିୱାତାନ୍, ଆରେ ୱିଜୁ ମାନାୟାର୍ ପାପିର୍ ଆତାର୍। ମାତର୍ ର ମାନାୟ୍ ଈଶ୍ୱର ଆଦେସ୍ତିଙ୍ଗ୍ ମାନି କିତାନ୍, ଆରେ ୱିଜାକାର୍ ଈଶ୍ୱର ଆଗେ ଦରମ୍ ମାନାୟାର୍ ଆନାର୍। 20 ଈଶ୍ୱର ହିତି ନିୟମ୍ କାଜିଙ୍ଗ୍ ମାନାୟାର୍ ନିଜେ ବେସି ପାପ୍ କିନାପା ଇଞ୍ଜି ପୁଚାର୍। ମାତର୍ ଏଚେପାଦ୍ନା ମାନାୟାର୍ ଆଦିକ୍ତାଙ୍ଗ୍ ଆଦିକ୍ ପାପ୍ କିତାର୍, ହେପାଦ୍ନା ଈଶ୍ୱର ମାନାୟାରିଙ୍ଗ୍ ଆଦିକ୍ତାଙ୍ଗ୍ ଆଦିକ୍ ଦୟା କିତାନ୍। 21 ଲାଗିଙ୍ଗ୍ ପାପ୍ ଇନେସ୍ଲେକେ ମାନାୟାରିଙ୍ଗ୍ ସାସନ୍ କିଜି ମାଚାତ୍ ଆରେ ହେୱାର୍ ହାଃତାର୍, ହେଲେକେ ଈଶ୍ୱର ଦୟା ସାସନ୍ କିନାତ୍ ଆରେ ଈଶ୍ୱର ଆଗେ ୱିଜାକାର୍ ଦରମ୍ ମାନାୟ୍ ଆତାର୍। ଆରେ ଯୀଶୁ ଖ୍ରୀଷ୍ଟ କାଜିଙ୍ଗ୍ ୱିଜାକାର୍ ୱିଜ୍ୱି ଜିବୁନ୍ ପାୟାଆନାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation