ରୋମିୟ 4 - New Testament in Pengo Parja Languageଅବ୍ରାହାମତି ପାର୍ତିକିନି କାତା 1 ଲାଗିଙ୍ଗ୍ ଆପେଙ୍ଗ୍ ଯିହୁଦି ମାନାୟ୍କାପ୍ ମା ଆକଦାଦି ଅବ୍ରାହାମ ବିଷୟରେ ଇନାକା ଇଞ୍ଜି ଇନାପ୍। ହେୱାନ୍ ଇନେସ୍ ଈଶ୍ୱର ଆଗେ ଦରମ୍ ମାନାୟ୍ ଆଜି ମାଚାନ୍? 2 ଯଦି ଅବ୍ରାହାମ ତା ହାର୍ କାମାୟ୍ କାଜିଙ୍ଗ୍ ଈଶ୍ୱର ତାଙ୍ଗେଙ୍ଗ୍ ଦରମ୍ ଆତାନ୍ନା, ଲାଗିଙ୍ଗ୍ ହେୱାନ୍ ଗାର୍ବି ଆନାକା ଟିକ୍। ମାତର୍ ଈଶ୍ୱର ଆଗେ ହାର୍ କାମାୟ୍ କିତାଙ୍ଗ୍ନା ଇଞ୍ଜି ଗାର୍ବି ଆଦେଙ୍ଗ୍ ଆଡୁନ୍। 3 ଇନେସ୍କି ଦରମ୍ ସାସ୍ତର୍ତାକେ ଲେକା ମାନାତ୍, ଅବ୍ରାହାମ ଈଶ୍ୱରତିଙ୍ଗ୍ ପାର୍ତି କିତାନ୍। ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାନିଙ୍ଗ୍ ଦରମ୍ ମାନାୟ୍ କିତାନ୍। 4 ଇନେସ୍କି ଇନେର୍ କାମାୟ୍ କିନାନ୍, ତାଙ୍ଗେଙ୍ଗ୍ ଇନେର୍ପା ଦୟା କିଉର୍ ଆରେ ଦାନ୍ ହିଉର୍। ମାତର୍ ହେୱାନ୍ ନିଜେ କାମାୟ୍ କିଜି ଆର୍ଜା ଆତାଙ୍ଗ୍ନା ଇଞ୍ଜି ଇନାନ୍। 5 ମାତର୍ ମାନାୟାର୍ ତା କାମାୟ୍ କାଜିଙ୍ଗ୍ ଦରମ୍ ମାନାୟ୍ ଆୱାତାର୍ମା, ମାତର୍ ତା ପାର୍ତି କାଜିଙ୍ଗ୍ ଦରମ୍ ମାନାୟ୍ ଆତାର୍ନା। 6 ହେଲେକେ ଦାଉଦ ତା ସାସ୍ତର୍ତାକେ ଲେକିକିତାନ୍ ଯେ, ହାର୍ କାମାୟ୍ କିୱି ଅଦରମ୍ ମାନାୟ୍ତିଙ୍ଗ୍ ପା ଈଶ୍ୱର ତାଙ୍ଗେଙ୍ଗ୍ ଆଶ୍ରିବାଦ୍ ଆରେ ଦରମ୍ ମାନାୟ୍ କିନାତ୍। ଏଚେପାଦ୍ନା ହେୱାର୍ ଈଶ୍ୱରତିଙ୍ଗ୍ ପାର୍ତିକିନାର୍। 7 “ଇମ୍ଣି ମାନାୟ୍ତି ଅଦରମ୍ ୱିଜୁ କେମା ଆତାତ୍ନା, ଆରେ ଇମ୍ଣି ମାନାୟାର୍ ପାପ୍ ୱିଜୁ କେମା କିତ୍ତାତ୍ନା। ହେୱାର୍ ୱିଜାର୍ ଆଶ୍ରିବାଦ୍ ପାୟା ଆତାକାର୍। 8 ଇମ୍ଣି ମାନାୟ୍ନି ପାପ୍ତିଙ୍ଗ୍ ଈଶ୍ୱର ଗାଣା କିଉନ୍, ହେ ମାନାୟ୍ ଆଶ୍ରିବାଦ୍ ପାୟାଆତାନ୍ନା।” 9 ଏଲେଙ୍ଗ୍ ଆତିସ୍ ସୁନତ ଆତି ମାନାୟ୍ ଆରେ ସୁନତ ଆୱିତି ମାନାୟ୍ ପା ଆଶ୍ରିବାଦ୍ ପାୟାଆତାର୍ନା। ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ୱେଚ୍ଚାନାପା, ଅବ୍ରାହାମ ଈଶ୍ୱରତିଙ୍ଗ୍ ପାର୍ତିକିତି କାଜିଙ୍ଗ୍ ହେୱାନ୍ ଦରମ୍ ମାନାୟ୍ ଆତାନ୍। 10 ଲାଗିଙ୍ଗ୍ ଅବ୍ରାହାମ ଇନେସ୍କିଜି ଦରମ୍ ମାନାୟ୍ ଆତାନ୍? ହେୱାନ୍ ସୁନତ ଆତି ପାଚେ କି ସୁନତ୍ ଆୱି ପାଚେ? ଈଶ୍ୱର ତାଙ୍ଗେଙ୍ଗ୍ ପାର୍ତୁମ୍ ଆସ୍ତାନ୍ ତାପାଚେ ଅବ୍ରାହାମ ସୁନତ୍ ବିଦି ମାନି କିତାନ୍। 11 ଆରେ ହେପାଦ୍ନା ହେୱାନ୍ ଈଶ୍ୱରତାକେ ପାର୍ତିକିତି କାଜିଙ୍ଗ୍ ଈଶ୍ୱର ତାଙ୍ଗେଙ୍ଗ୍ ଦରମ୍ ମାନାୟ୍ କିତାନ୍। ହେପାଦ୍ନା ହେୱାନ୍ ସୁନତ୍ ଆୱାଦାଙ୍ଗ୍ ମାଚାନ୍। ସୁନତ୍ ଆନି ଅର୍ତ ଇଲେକେ ଯେ, ହେଦାଙ୍ଗ୍ ଈଶ୍ୱର ଆସ୍ତାନ୍ ଇଞ୍ଜି ର ଚିନ୍। ଲାଗିଙ୍ଗ୍ ହେୱାନ୍ ପାର୍ତିକିନି ମାନାୟାର୍ ଲାତ୍ରାହି ଆତାନ୍, ଆରେ ହେୱାନ୍ ସୁନତ ଆୱାଦାଙ୍ଗ୍ ମାଚାନ୍। ହେୱାର୍ ତା ପାର୍ତି କାଜିଙ୍ଗ୍ ଈଶ୍ୱର ଆଗେ ଦରମ୍ ମାନାୟ୍ ଆତାର୍। 12 ଆରେ ଏଚେଜାଣ୍ ସୁନତ୍ ଆତାର୍ନା ଅବ୍ରାହାମ ହେୱାର୍ ଲାତ୍ରାହି ଆତାନ୍, ୱାରା ହେୱାର୍ କାଜିଙ୍ଗ୍ ଆକାୟ୍, ମାତର୍ ମା ଆବା ଅବ୍ରାହାମ ଇନେସ୍ ସୁନତ୍ ଆୱି ଆଗେ ପାର୍ତି କିଜି ମାଚାନ୍, ହେଲେକେ ଯଦି ଜେକନିକାର୍ ଈଶ୍ୱରତିଙ୍ଗ୍ ପାର୍ତିକିନାର୍। ଅବ୍ରାହାମ ହେୱାର୍ ଲାତ୍ରାହି ପା ଆନାନ୍। ପାର୍ତି କିନାକାରିଙ୍ଗ୍ ଈଶ୍ୱର ପାର୍ମାଣ୍କିତି କାତା 13 ଈଶ୍ୱର ଅବ୍ରାହାମତିଙ୍ଗ୍ ଆରେ ତା କୁଟୁମ୍ତିଙ୍ଗ୍ ପାର୍ମାଣ୍ କିଜି ମାଚାନ୍ ଯେ, ହେୱାନ୍ ଇ ପୁର୍ତି ହେୱାରିଙ୍ଗ୍ ହିତାନ୍। ଆରେ ଈଶ୍ୱର ଇ ପାର୍ମାଣ୍ ଅବ୍ରାହାମତିଙ୍ଗ୍ ହିଜିମାଚାନ୍, ଇନେସ୍କି ଅବ୍ରାହାମ ଈଶ୍ୱର ନିୟମ୍ତିଙ୍ଗ୍ ମାନିକିତି କାଜିଙ୍ଗ୍ ଆକାୟ୍, ମାତର୍ ଈଶ୍ୱରତିଙ୍ଗ୍ ପାର୍ତିକିତି କାଜିଙ୍ଗ୍, ହେୱାନିଙ୍ଗ୍ ତା ଆଗେ ଦରମ୍ ମାନାୟ୍ କିଜି ଇ ପାର୍ମାଣ୍ ହିତାନ୍। 14 ଯଦି ଅବ୍ରାହାମ ଆରେ ତା କୁଟୁମ୍ତିଙ୍ଗ୍ ଈଶ୍ୱର ନିୟମ୍ତିଙ୍ଗ୍ ମାନିକିତି କାଜିଙ୍ଗ୍ ଇ ପାର୍ମାଣ୍ତିଙ୍ଗ୍ ହିତାନ୍ନା, ଲାଗିଙ୍ଗ୍ ଅବ୍ରାହାମ ପାର୍ତି କିତାକା ବେକାର୍ ଆତାତ୍ମା ଆରେ ଈଶ୍ୱର ହିତି ପାର୍ମାଣ୍ ପା ପୁରା ଆୱାତାତ୍ମା। 15 ଇନେସ୍କି ୱିଜୁ ନିୟମ୍ତିଙ୍ଗ୍ ମାନି କିୱାକାରିଙ୍ଗ୍ ଈଶ୍ୱର ଦଣ୍ଡ୍ ହିନାନ୍। ଲାଗିଙ୍ଗ୍ ନିୟମ୍ ହିଲିତିସ୍, ମାନାୟାର୍ ନିୟମ୍ତିଙ୍ଗ୍ ବାଙ୍ଗାୟ୍ କିୱାତାର୍ମା। 16 ଲାଗିଙ୍ଗ୍ ମାନାୟାର୍ ପାର୍ତି କାଜିଙ୍ଗ୍ ଈଶ୍ୱର ପାର୍ମାଣ୍ କିତାନ୍। ଇ ପାର୍ମାଣ୍ ଈଶ୍ୱର ଦୟା କିତି କାଜିଙ୍ଗ୍ ଗାଟାଆତ୍ତାନା। ଇ ପାର୍ମାଣ୍ ଈଶ୍ୱର ନିୟମ୍ତିଙ୍ଗ୍ ପାୟାଆତି ଅବ୍ରାହାମ କୁଟୁମ୍ନି ମାନାୟାର୍ କାଜିଙ୍ଗ୍ ନେ ଆକାୟ୍। ମାତର୍ ଏଚେଜାଣ୍ ପାର୍ତିକିନାରା, ହେ ୱିଜୁ ଅବ୍ରାହାମନି କୁଟୁମ୍ନି ମାନାୟାର୍ ଆନାର୍, ଇନେସ୍କି ହେୱାର୍ ଈଶ୍ୱରତିଙ୍ଗ୍ ପାର୍ତିକିନାରା, ଇନେସ୍ ଅବ୍ରାହାମ ପାର୍ତି କିଜି ମାଚାନ୍, ଆରେ ଅବ୍ରାହାମ ମା ଆକଦାଦି ଆତାନ୍। 17 ହେଦାଙ୍ଗ୍ କାଜିଙ୍ଗ୍ ସାସ୍ତର୍ତାକେ ଇଲେକେ ଲେକାଆତାତ୍ନା, “ଆନେଙ୍ଗ୍ ନିଙ୍ଗେଙ୍ଗ୍ ବେସିହେନି ଜାତିନି ଲାତ୍ରାହି କିତ୍ତାଙ୍ଗ୍।” ଅବ୍ରାହାମ ଇମ୍ଣି ଈଶ୍ୱରତିଙ୍ଗ୍ ପାର୍ତି କିତାନ୍, ହେୱାନ୍ ହାଃତି ମାନାୟ୍ତିଙ୍ଗ୍ ଜିବୁନ୍ କିନାନ୍ ଆରେ ହିଲ୍ୱି ଜିନିସ୍ତିଙ୍ଗ୍ ହେୱାନ୍ ରହ୍ନାନ୍, ହେ ଈଶ୍ୱର ଅବ୍ରାହାମତିଙ୍ଗ୍ ତା ଆଗେ ମା ଆବା କିତାନ୍ନା। 18 ଈଶ୍ୱର ଅବ୍ରାହାମତିଙ୍ଗ୍ ଇଚାନ୍ ତା କୁଟୁମ୍ ବେସି ଗାଜା ଆନାତ୍, ହେୱାନ୍ ବେସି ଜାତିନି ଲାତ୍ରାହି ଆନାଙ୍ଗ୍ ଇଞ୍ଜି ଆହା ହିଲିତିସ୍ ପା ହେୱାନ୍ ତା ଆହା ଆରାୟ୍ କିୱାଦାଙ୍ଗ୍ ଈଶ୍ୱର କାତାତିଙ୍ଗ୍ ପାର୍ତି କିତାନ୍। 19 ହେପାଦ୍ନା ଅବ୍ରାହାମତିଙ୍ଗ୍ ଶହେ ବାର୍ହୁ ଆଜି ମାଚାତ୍ ଆରେ ତା ଗାଗାଡ଼୍ ବେସି ଦୁର୍ବଲ୍ ମାଚାତ୍ ଆରେ ତା ଡକୃହି ସାରା ବାଞ୍ଜ୍ଣି ଇଞ୍ଜି ପୁନ୍ଞ୍ଜି ମାଚିସ୍ ପା, ହେୱାନ୍ ଈଶ୍ୱରତିଙ୍ଗ୍ ପାର୍ତି କିଜି ମାଚାନ୍। 20 ହେୱାନ୍ ଈଶ୍ୱର ପାର୍ମାଣ୍ତିଙ୍ଗ୍ ମିଚ୍ ଇଞ୍ଜି ଇନାୱେଡ଼ାଙ୍ଗ୍ ପା ବାବି କିୱାଦାଙ୍ଗ୍ ମାଚାନ୍, ମାତର୍ ହେୱାନ୍ ଆଦିକ୍ ଈଶ୍ୱରତିଙ୍ଗ୍ ପାର୍ତି କିତାନ୍ ଆରେ ଇଲେକେ କିଜି ହେୱାନ୍ ଈଶ୍ୱରତିଙ୍ଗ୍ ଗୌରବ କିତାନ୍। 21 ଈଶ୍ୱର ତାଙ୍ଗେଙ୍ଗ୍ ଇମ୍ଣି ପାର୍ମାଣ୍ ହିଜିମାଚାତ୍, ହେ ପାର୍ମାଣ୍ତିଙ୍ଗ୍ ହେୱାନ୍ ପୁରାୟ୍ କିଦେଙ୍ଗ୍ ଆଡ୍ନାନ୍ ଇଞ୍ଜି ହାର୍ କିଜି ପୁନ୍ଞ୍ଜି ମାଚାନ୍। ଆରେ ହେୱାନ୍ ଆଦିକ୍ ପାର୍ତି କିଜି ମାଚାନ୍। 22 ହେ ପାର୍ତି କାଜିଙ୍ଗ୍ ପା ତାଙ୍ଗେଙ୍ଗ୍ ଦରମ୍ ମାନାୟ୍ ଇଞ୍ଜି ଈଶ୍ୱର ଇଚାନ୍। 23 ହେୱାନ୍ ପାର୍ତିକିତି କାଜିଙ୍ଗ୍ ଦରମ୍ ମାନାୟ୍ ଆତାନ୍। ୱାରା ତା କାଜିଙ୍ଗ୍ ନେ ଆକାୟ୍, 24 ମାତର୍ ମା କାଜିଙ୍ଗ୍ ପା ଇଲେକେ ଆତାତ୍ନା, ଯଦି ଆସେଙ୍ଗ୍ ଯୀଶୁ ଖ୍ରୀଷ୍ଟ ହାଃଜି ଆରେରଗ ଜିବୁନ୍ ଆତାନ୍ନା ଇଞ୍ଜି ପାର୍ତି କିନାସ୍। ଇମ୍ଣି ଈଶ୍ୱର ଅବ୍ରାହାମତିଙ୍ଗ୍ ଦରମ୍ ମାନାୟ୍ କିଜି ମାଚାନ୍, ହେୱାନ୍ ମାଙ୍ଗେଙ୍ଗ୍ ଦରମ୍ ମାନାୟ୍ କିଦ୍ନାନ୍। 25 ହେ ଯୀଶୁ ମା ପାପ୍ କାଜିଙ୍ଗ୍ ହାଃତାନ୍ ଆରେ ଆପେଙ୍ଗ୍ ଈଶ୍ୱରତାକେ ଦରମ୍ ମାନାୟ୍ ଆନି କାଜିଙ୍ଗ୍, ଈଶ୍ୱର ତାଙ୍ଗେଙ୍ଗ୍ ହାଃତାକାନିଙ୍ଗ୍ ଆରେରଗ ଜିବୁନ୍ କିତାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation