ରୋମିୟ 3 - New Testament in Pengo Parja Languageଈଶ୍ୱର ୱିଜୁଦିନ୍ ଦରମ୍ 1 ଯଦି ଇନେର୍ ମିଙ୍ଗେଙ୍ଗ୍ ୱେନ୍ବା ଆଦ୍ନାର୍, ବିନ୍ଜାତିନି ମାନାୟାର୍ତାଙ୍ଗ୍ ଯିହୁଦି ଜାତିନି ମାନାୟାର୍ ଆନାକା ଆରେ ସୁନତ୍ କିନି ବିଦି ମାନିକିନାକା ଇନା ଲାବ୍ ମାନାତ୍ କି? 2 ଆଁ, ଯିହୁଦି ମାନାୟ୍ ଆନାକା ବେସି ଲାବ୍ ମାନାତ୍। ଇନେସ୍କି ଈଶ୍ୱର ହିତ୍ତି ଦରମ୍ ସାସ୍ତର୍ ହେୱାର୍ତାକେ ମାନାତ୍, ହେଦାଙ୍ଗ୍ନେ ହେୱାର୍ କାଜିଙ୍ଗ୍ ବେସି ଗାଜା ଲାବ୍। 3 ସତ୍ନେ, କେତ୍ଜାଣ୍ ଯିହୁଦି ଜାତିନି ମାନାୟ୍ ମାନାର୍, ହେୱାର୍ ଈଶ୍ୱର ପାର୍ମାଣ୍ତିଙ୍ଗ୍ ବାଙ୍ଗାୟ୍ କିନାରା। ଲାଗିଙ୍ଗ୍ ହେୱାର୍ ଈଶ୍ୱର ପାର୍ମାଣ୍ ବାଙ୍ଗାୟ୍ କିତିଲେକେ ଈଶ୍ୱର ତା ପାର୍ମାଣ୍ତିଙ୍ଗ୍ ବାଙ୍ଗାୟ୍ କିଉନ୍। 4 ପୁର୍ତିନି ୱିଜୁ ମାନାୟାର୍ ମିଚ୍ ୱେଚ୍ନାର୍, ମାତର୍ ଈଶ୍ୱର ୱିଜୁଦିନ୍ ସତ୍ ୱେଚ୍ନାନ୍, ଇନେସ୍କି ଇଲେକେ ଦରମ୍ ସାସ୍ତର୍ତାକେ ଈଶ୍ୱର ବିଷୟରେ ଲେକା ମାନାତ୍, ଏପେଙ୍ଗ୍ ୱେଚ୍ନି ୱିଜୁ କାତା ଟିକ୍ ଆନାତ୍, ଆରେ ବିଚାର୍ କିଦ୍ନି ବାହାତାକେ ଏପେଙ୍ଗ୍ ଜିତା ଆନାଦେର୍। 5 ମାତର୍ କେତ୍ଜାଣ୍ ଇନାର୍ ମା ପାପ୍ କାମାୟ୍ କାଜିଙ୍ଗ୍ ହାର୍ ବିଷୟ ଗଟାଆନାତା, ଇନେସ୍କି ମାନାୟାର୍ ଈଶ୍ୱରତି ହାର୍ ବିଷୟତିଙ୍ଗ୍ ହୁଡ଼୍ନାର୍, ଏଚେପାଦ୍ନା ହେ ପାପିରିଙ୍ଗ୍ ଦରମ୍ ମାନାୟ୍ କିନାନ୍। ଲାଗିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ରିସାଆଜି ଦଣ୍ଡ୍ ହିଦ୍ନାକା ଟିକ୍ ଆକାୟ୍। ଇଲେକେ କେତେକ୍ ମାନାୟାର୍ ଇନାରା। 6 ହେଦାଙ୍ଗ୍ ଇନାୱେଡ଼ାଙ୍ଗ୍ ପା ଆମେତ୍, ଯଦି ଈଶ୍ୱର ଯିହୁଦି ଜାତିନି ମାନାୟାରିଙ୍ଗ୍ ନ୍ୟାୟ୍ ବିଚାର୍ କିଦେଙ୍ଗ୍ ଆଡୁନା, ଲାଗିଙ୍ଗ୍ ଈଶ୍ୱର ଇନେସ୍ କିଜି ପୁର୍ତିନି ମାନାୟାରିଙ୍ଗ୍ ନ୍ୟାୟ୍ ବିଚାର୍ କିନାନ୍। 7 କେତେକ୍ ମାନାୟ୍ ଇଲେକେ ଇଞ୍ଜେଙ୍ଗ୍ ଆଡ୍ନାର୍, ଯଦି ଆନେଙ୍ଗ୍ ମିଚ୍ ୱେଚ୍ନି କାଜିଙ୍ଗ୍ ଈଶ୍ୱରତି ସତ୍ ଆରେ ତା ଗୌରବ ଆନାତ୍, ଲାଗିଙ୍ଗ୍ ଈଶ୍ୱର ନାଙ୍ଗେଙ୍ଗ୍ ଇନେସ୍ କିଜି ପାପି ଇଞ୍ଜି ଦସ୍ କିଦ୍ନାନ୍। 8 ଆରେ କେତେକ୍ ମାନାୟ୍ ଇଲେକେ ଆପେଙ୍ଗ୍ କିନାପା ଇଞ୍ଜି ୱେଚ୍ନାରା ଯେ, ୱାଡ ଆସେଙ୍ଗ୍ କରାପ୍ କାମାୟ୍ କିନାସ୍, ଲାଗିଙ୍ଗ୍ ହାର୍ ପାଡ଼୍ ଗାଟାଆଦ୍ନାତ୍। ଇଲେକେ ଇମ୍ଣି ମାନାୟ୍ ନା ବିଷୟତିଙ୍ଗ୍ ଏଲେଙ୍ଗ୍ ଇଞ୍ଜି ୱେଚ୍ନାନ୍, ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍। ପୁର୍ତିନି ୱିଜୁ ମାନାୟ୍ ପାପିର୍ 9 ଲାଗିଙ୍ଗ୍ ଇ ଅର୍ତ ଇନାକା? ଆସେଙ୍ଗ୍ ଇନାକା ଯିହୁଦି ଜାତିନି ମାନାୟାର୍, ବିନ୍ଜାତିନି ମାନାୟାର୍ତାଙ୍ଗ୍ ହାର୍ କି? ଅଲପ୍ପା ଆକାୟ୍, ଇନେସ୍କି ଯିହୁଦି ଜାତିନି ମାନାୟାର୍ ଆଏର୍ କି ବିନ୍ଜାତିନି ମାନାୟାର୍ ଆଏର୍, ଆସେଙ୍ଗ୍ ୱିଜାକାସ୍ ପାପ୍ କାମାୟ୍ କିନାସା, ଆରେ ଆପେଙ୍ଗ୍ ପାପ୍ନି ତାରେନ୍ ମାନାପ୍। 10 ଇନେସ୍ଲେକେ ଦରମ୍ ସାସ୍ତର୍ତାକେ ଲେକାଆତାତ୍ନା, ଇନେର୍ ପା ଈଶ୍ୱର ଆଗେ ଦରମ୍ ମାନାୟ୍ ଆକାୟ୍ 11 ଇଲେକେ ଇନେର୍ ପା ହିଲୁର୍, ଇନେର୍ ଟିକ୍ ବିଷୟତିଙ୍ଗ୍ ବୁଜାଆନାରା। ଆରେ ଈଶ୍ୱରତିଙ୍ଗ୍ ଇନେର୍ ପା ପୁଞ୍ଜେଙ୍ଗ୍ ଇଚା କିଉରା। 12 ୱିଜୁ ମାନାୟାର୍ ଈଶ୍ୱରତାଙ୍ଗ୍ ଦେହା ଆତାର୍ନା। ୱିଜୁ ମାନାୟାର୍ ଈଶ୍ୱର କାଜିଙ୍ଗ୍ ବେକାର୍ ଆତାର୍ନା। ଇନେର୍ ପା ହାର୍ କାମାୟ୍ କିନି ମାନାୟ୍ ହିଲୁର୍, ଇନେସ୍କି ରୱାନ୍ ପା ହିଲୁନ୍। 13 ହେୱାର୍ କାତା ୱିଜୁ, ର ଦୁଗେର୍ନି କରାପ୍ ବାସ୍ନାଲେକେ। ହେୱାର୍ ୱାରା ମିଚ୍ ୱେଚ୍ନାର୍, ଆରେ ହେୱାର୍ କାତା ୱିଜୁ ର ରାଚ୍ନି ବିସ୍ଲେକେ ମାନାୟ୍ତିଙ୍ଗ୍ ବିପତ୍ ଆରେ ମାରାଣ୍ ତାନାତ୍। 14 ହେୱାର୍ ୱିଜୁଦିନ୍ ମାନାୟାରିଙ୍ଗ୍ ଅବିଶାପ୍ ହିନାର୍ ଆରେ ଗିଣ୍ କିନାର୍। 15 ହେୱାର୍ ମାନାୟାରିଙ୍ଗ୍ ମାର୍ନେ ଅସ୍ତେଙ୍ଗ୍ ତେର୍-ତେର୍ ଆଜି ମାନାର୍। 16 ହେୱାର୍ ଇମେ ହାଚିସ୍ ପା, ଜିନିଷ୍ ପତର୍ତିଙ୍ଗ୍ ନଷ୍ଟ କିନାର୍, ଆରେ ମାନାୟାରିଙ୍ଗ୍ ଦୁଃକ୍ ହିନାର୍। 17 ହେୱାର୍ ମାନାୟାର୍ ହୁଦାଙ୍ଗ୍ ଶାନ୍ତିତାଙ୍ଗ୍ ମାଞ୍ଜେଙ୍ଗ୍ ଆଡୁର୍, ଆରେ ହେୱାର୍ ୱିଜୁଦିନ୍ ମାନାୟାର୍ ହୁଦାଙ୍ଗ୍ ଗଣ୍ଡ୍ଗଲ୍ କିଜିମାନାର୍। 18 ହେୱାର୍ ଈଶ୍ୱରତିଙ୍ଗ୍ ଅଲପ୍ପା ପାଣ୍ଡ୍ରାଆଉର୍। 19 ଲାଗିଙ୍ଗ୍ ଆପେଙ୍ଗ୍ ପୁଚାପ୍ନା ଯେ, ମଶା ଲେକିକିତି ଦରମ୍ ସାସ୍ତରନି ନିୟମ୍ ଇମ୍ଣି ମାନାୟାରିଙ୍ଗ୍ ହିତାତ୍ନା। ହେଦାଙ୍ଗ୍ ପୁର୍ତିନି ୱିଜୁ ମାନାୟାର୍ ମାନିକିନି ଦର୍କାର୍। ଏଚେଜାଣ୍ ଦରମ୍ ସାସ୍ତର୍ତିଙ୍ଗ୍ ପୁଚାର୍ନା। ହେୱାର୍ ୱିଜାକାର୍ ଈଶ୍ୱର ଆଗେ ଚିମ୍ରା ଆଜି ମାନାର୍ ଆରେ ଈଶ୍ୱର ହେୱାରିଙ୍ଗ୍ ତା ପାପ୍ କାମାୟ୍ କାଜିଙ୍ଗ୍ ଦଣ୍ଡ୍ ହିନାତ୍। 20 ଇନେସ୍କି ଇଲେକେ ଇମ୍ଣି ମାନାୟ୍ ପା ହିଲେନ୍ ଯେ, ନିୟମ୍ତିଙ୍ଗ୍ ମାନିକିଜି ଈଶ୍ୱର ଆଗେ ଟିକ୍ ମାନାୟ୍ ଆତାନ୍ନା, ଆସେଙ୍ଗ୍ ଏଚେକ୍ ଈଶ୍ୱର ଦରମ୍ ସାସ୍ତର୍ତିଙ୍ଗ୍ ପୁଚିସ୍, ହେ ଏଚେକ୍ ପାପ୍ନି ବିଷୟରେ ପୁନାସ୍। ଯୀଶୁ ଖ୍ରୀଷ୍ଟ ମା ପାପ୍ତିଙ୍ଗ୍ ପିଣ୍ଜି ଅତାନ୍ 21 ମାତର୍ ନଙ୍ଗୟ୍ ଈଶ୍ୱର ମାଙ୍ଗେଙ୍ଗ୍ ତା ହୁଦାଙ୍ଗ୍ ଟିକ୍ ମାନାୟ୍ ଆଦେଙ୍ଗ୍ ଅଲଗା ଉପାୟ୍ ହିତ୍ତାନ୍ନା। ହେଦାଙ୍ଗ୍ ଆସେଙ୍ଗ୍ ଦରମ୍ ସାସ୍ତର୍ନି ନିୟମ୍ତିଙ୍ଗ୍ ମାନିକିଜି ଟିକ୍ ମାନାୟ୍ ଆନି ବିଷୟରେ ଆକାୟ୍, ହେଦାଙ୍ଗ୍ ଦର୍ମ୍ ସାସ୍ତର୍ତାକେ ଆରେ ଭବିଷ୍ଯତବକ୍ତାର୍ ସାସ୍ତର୍ତାକେ ବେସି ଆଗେ ଲେକାଆଜି ମାଚାତ୍, “ଈଶ୍ୱର ମାଙ୍ଗେଙ୍ଗ୍ ଦରମ୍ ମାନାୟ୍ କିତ୍ତାନ୍।” 22 ତା ଅର୍ତ ଇଲେକେ ଯେ, ଏଚେପାଦ୍ନା ଆସେଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ମା ପାପ୍ ପିଣ୍ଜି ଅନାନ୍ ଇଞ୍ଜି ପାର୍ତି କିନାସ୍, ଈଶ୍ୱର ମାଙ୍ଗେଙ୍ଗ୍ ଦରମ୍ ମାନାୟ୍ କିଦ୍ନାନ୍। ଆସେଙ୍ଗ୍ ଯିହୁଦି ଆଏସ୍ କି ବିନ୍ ଜାତିନିକାସ୍ ଆଏସ୍ ୱିଜାରିଙ୍ଗ୍ ହାମାନ୍ ଅଦିକାର୍ ହିତ୍ତାନ୍ନା। 23 ଇନେସ୍କି ୱିଜାକାର୍ ପାପ୍ କିତାର୍ନା, ଆରେ ୱିଜାକାର୍ ଈଶ୍ୱରତି ଗୌରବତାଙ୍ଗ୍ ଦେହା ମାନାର୍। 24 ଈଶ୍ୱର ମାଙ୍ଗେଙ୍ଗ୍ ଦୟାକିତ୍ତାନ୍। ହେୱାନ୍ ମାଙ୍ଗେଙ୍ଗ୍ ଯୀଶୁ ମାପୃ ଖ୍ରୀଷ୍ଟଙ୍ଗ୍ ହିତ୍ତାନ୍, ଆରେ ଆସେଙ୍ଗ୍ କିତି ପାପ୍ କାଜିଙ୍ଗ୍ ଯୀଶୁ ମାପୃ ହାଃତାନ୍। ଇଲେକେ ଈଶ୍ୱର ମାଙ୍ଗେଙ୍ଗ୍ ମୁକ୍ତି କିଜି ଦରମ୍ ମାନାୟ୍ କିତ୍ତାନ୍ନା। 25 ଈଶ୍ୱର ମା ପାପ୍ନି ଦଣ୍ଡ୍ତିଙ୍ଗ୍ ପିଣ୍ଜି ଅଦେଙ୍ଗ୍ ଆରେ ତା ରିସାତିଙ୍ଗ୍ ତିର୍ କିଦେଙ୍ଗ୍ ଯୀଶୁ ମାପୃଙ୍ଗ୍ ପକ୍ତାତାନ୍ନା। ଏଚେକାଡ଼୍ଦ ଯୀଶୁ ମାପୃ ମା କାଜିଙ୍ଗ୍ କୃଶକାଟ୍ତାକେ ହାଃତାନ୍ ଆରେ ତା ନେତେର୍ ବଡ଼ାୟ୍ କିତାନ୍ନା। ହେପାଦ୍ନା ଆସେଙ୍ଗ୍ ଈଶ୍ୱର ଆଗେ ଟିକ୍ ମାନାୟ୍ ଆତାସ୍ନା। ଆଗେ ପାପ୍ କିତାକାରିଙ୍ଗ୍ ଈଶ୍ୱର କେମାକିଜି ମାଚାନ୍, ଇନେସ୍କି ଈଶ୍ୱର ନ୍ୟାୟ୍ ବିଚାର୍ କିନାକାନ୍। 26 ହେଲେକେ ନଙ୍ଗୟ୍ ପା ଈଶ୍ୱର, ସତ୍ ଆରେ ନ୍ୟାୟ୍ ବିଚାର୍ କିନାନ୍, ଏଚେପାଦ୍ନା ଆସେଙ୍ଗ୍ ଯୀଶୁ ମାପୃଙ୍ଗ୍ ପାର୍ତି କିନାସ୍, ହେୱାନ୍ ମାଙ୍ଗେଙ୍ଗ୍ ତା ହୁଦାଙ୍ଗ୍ ଟିକ୍ ମାନାୟ୍ କିଦ୍ନାନ୍। 27 ଲାଗିଙ୍ଗ୍ ଆପେଙ୍ଗ୍ ଈଶ୍ୱର ହୁଦାଙ୍ଗ୍ ଟିକ୍ ମାନାୟ୍ ଆତାପ୍ନା ଇଞ୍ଜି ଗାର୍ବି ଆଦେଙ୍ଗ୍ ଆଡୁପ୍, ଇନେସ୍କି ମା ହାର୍ କାମାୟ୍ କାଜିଙ୍ଗ୍ ଈଶ୍ୱର ଆଗେ ଟିକ୍ ମାନାୟ୍ ଆୱାତାପ୍ନା। ମାତର୍ ଆପେଙ୍ଗ୍ ଯୀଶୁ ଖ୍ରୀଷ୍ଟତାକେ ପାର୍ତିକିତି କାଜିଙ୍ଗ୍, 28 ଈଶ୍ୱର ମାଙ୍ଗେଙ୍ଗ୍ ତା ଟିକ୍ ମାନାୟ୍ କିତ୍ତାନ୍ନା, ଆରେ ଆପେଙ୍ଗ୍ ନିୟମ୍ତିଙ୍ଗ୍ ମାନିକିତି କାଜିଙ୍ଗ୍ ଆକାୟ୍। 29 ଈଶ୍ୱର ୱାରା ଯିହୁଦି ଜାତିନି ଈଶ୍ୱର ଆକାୟ୍, ମାତର୍ ହେୱାନ୍ ବିନ୍ଜାତିନି ମାନାୟାର୍ ନି ଈଶ୍ୱର ପା। 30 ଇନେସ୍କି ପୁର୍ତିତାକେ ର ଈଶ୍ୱରନେ ମାନାନ୍, ଆରେ ର ଉପାୟ୍ ମାନାତ୍ ତା ହୁଦାଙ୍ଗ୍ ଟିକ୍ ଆୟା ଆନାତ୍। ମା ପାର୍ତି କାଜିଙ୍ଗ୍ ହେୱାନ୍ ନେ ମାଙ୍ଗେଙ୍ଗ୍ ଟିକ୍ ମାନାୟ୍ କିଦ୍ନାନ୍, ଯିହୁଦି ଜାତିନି ମାନାୟାର୍ ଆଏର୍ କି ବିନ୍ଜାତିନି ମାନାୟାର୍ ଆଏର୍। 31 ଲାଗିଙ୍ଗ୍ ଆସେଙ୍ଗ୍ ପାର୍ତି କାଜିଙ୍ଗ୍ ନିୟମ୍ତିଙ୍ଗ୍ ଗୁଚାୟ୍ କିନାସା କି? ହେଦାଙ୍ଗ୍ ଇନାୱେଡ଼ାଙ୍ଗ୍ ପା ଆମେତ୍, ମାତର୍ ଆପେଙ୍ଗ୍ ଦରମ୍ ସାସ୍ତର୍ତିଙ୍ଗ୍ ପୁରା କିନାପ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation