ରୋମିୟ 16 - New Testament in Pengo Parja Languageପାଉଲ ତା ସାଙ୍ଗହିରିଙ୍ଗ୍ ଜୱାର୍ କିତାନ୍ 1 ମା ପାର୍ତି ତଣ୍ଦେଲ୍ ପଇବି ତର୍ଦାକାଦେଲ୍ କେଙ୍କ୍ରେୟା ମଣ୍ଡ୍ଲିନି ପ୍ରାଚିନ୍ ଆତାତ୍ନା ହେଦେଲ୍ ମିଙ୍ଗେଙ୍ଗ୍ ହୁଡ଼୍ଗା ୱାଦେଙ୍ଗ୍ ବେଗି ୱାନାତ୍। 2 ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଏପେଙ୍ଗ୍ ତାଙ୍ଗେଙ୍ଗ୍ ସନ୍ମାନ୍ କିଜି ମାପୃ ତର୍ଦାଙ୍ଗ୍ ଆହାଟ୍, ଇନେସ୍ କିଜି ଈଶ୍ୱରନି ମାନାୟାରିଙ୍ଗ୍ ସନ୍ମାନ୍ ହିଜି ଆହ୍ନି ଦର୍କାର୍। ତାଙ୍ଗେଙ୍ଗ୍ ଯଦି ଇନା ସାଇଜ ଦର୍କାର୍ ମାନ୍ଙ୍ଗାନାତ୍ ଲାଗିଙ୍ଗ୍ ଏପେଙ୍ଗ୍ ସାଇଜ କିୟାଟ୍, ଇନେସ୍କି ହେଦେଲ୍ ବେସି ମାନାୟାରିଙ୍ଗ୍ ସାଇଜ କିଜି ମାଚାତ୍ ଆରେ ହେଦେଲ୍ ନାଙ୍ଗେଙ୍ଗ୍ ପା ସାଇଜ କିଜି ମାନ୍ଞ୍ଚାତ୍। 3 ଏପେଙ୍ଗ୍ ଖ୍ରୀଷ୍ଟାନ୍ ଟଣ୍ଡେନ୍ ପ୍ରିସ୍କିଲା ଆରେ ତା ଡକୃହି ଆର୍କିଲାଙ୍ଗ୍ ଜୁୱାର୍ କିୟାଟ୍, ହେୱାର୍ ନା ହୁଦାଙ୍ଗ୍ ମାହାଆଜି ଯୀଶୁ ଖ୍ରୀଷ୍ଟଙ୍ଗ୍ ହେବାକିଜି ମାଚାର୍। 4 ଆରେ ହେୱାର୍ ନା କାଜିଙ୍ଗ୍ ତା ଜିବୁନ୍ ବିପତ୍ତାକେ ହାଲ୍ଜି ମାଚାର୍। ଆନେଙ୍ଗ୍ ଆରେ ୱିଜୁ ବିନ୍ଜାତି ମଣ୍ଡ୍ଲିନି ମାନାୟାର୍ ହେୱାରିଙ୍ଗ୍ ଦନ୍ଯବାଦ୍ ହିନାର୍। 5 ଆନେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାଙ୍ଗା ଯେ, ଇଞ୍ଜ କିନି ମଣ୍ଡ୍ଲିନି ପାର୍ତିକିନି ଟଣ୍ଡାରିଙ୍ଗ୍ ନା ଜୁୱାର୍ ଜଣାୟ୍ କିୟା। ଆରେ ନା ଲାଡ୍ନି ସାଙ୍ଗ ଏପାଇନେତଙ୍ଗ୍ ପା ନା ଜୁୱାର୍ ଜଣାୟ୍ କିୟାଟ୍, ହେୱାନ୍ ନେ ଏସିଆ ଦେସ୍ନି ପାର୍ତୁମ୍ ଖ୍ରୀଷ୍ଟାନ୍ ଆଜି ମାଚାନ୍। 6 ମରିୟମ ମି ହାର୍ କାଜିଙ୍ଗ୍ ବେସି କଷ୍ଟକିଜି ମାଚାତ୍, ଆରେ ତାଙ୍ଗେଙ୍ଗ୍ ପା ନା ଜୁୱାର୍ ଜାଣାୟ୍ କିୟାଟ୍। 7 ତାପାଚେ ନା ନିଜର୍ ଯିହୁଦି ଲକ୍ ଆନ୍ଦ୍ରନିକସ୍ ଆରେ ତା ଡକ୍ରୁହି ୟୁନିୟାଙ୍ଗ୍ ଇନେର୍ ନା ହୁଦାଙ୍ଗ୍ ଜଇଲ୍ ଇଞ୍ଜ ମାଚାର୍, ହେୱାର୍ ବାଚିକିତି ଚେଲାହିର୍ତାଙ୍ଗ୍ ସନ୍ମାନ୍ ପାୟାଆଜି ମାଚାର୍। ହେୱାର୍ ଆନେଙ୍ଗ୍ କିନି ଆଗେ ଖ୍ରୀଷ୍ଟାନ୍ ଆଜି ମାଚାର୍ ଆରେ ହେୱାରିଙ୍ଗ୍ ପା ଆନେଙ୍ଗ୍ ନା ଜୁୱାର୍ ଜଣାୟ୍ କିନାଙ୍ଗା। 8 ଆମ୍ପ୍ଲିୟାତଙ୍ଗ୍ ନା ଜୁୱାର୍ ଜଣାୟ୍ କିନାଙ୍ଗା, ଇନେରିଙ୍ଗ୍ ଆନେଙ୍ଗ୍ ମାପୃନି ଜାର୍ ମାଜି ଇଞ୍ଜି ବାବିକିଜି ଲାଡ୍ କିନାଙ୍ଗା, 9 ଆରେ ମା ହୁଦାଙ୍ଗ୍ ମାହାଆଜି ଖ୍ରୀଷ୍ଟ କାଜିଙ୍ଗ୍ କାମାୟ୍ କିଦେଙ୍ଗ୍ ଉର୍ବାଣ ଆରେ ନା ଲାଡ୍ନି ସ୍ତାଖୀୟଙ୍ଗ୍ ଜୁୱାର୍ ଜଣାୟ୍ କିୟାଟ୍। 10 ଆପେଲା ଇନେର୍କି ଦୁଃକ୍ କଷ୍ଟ ପାୟାଆତି ପାଚେ ଖ୍ରୀଷ୍ଟ ତାଙ୍ଗେଙ୍ଗ୍ ଆସ୍ତି ମାଚାନ୍ ତାଙ୍ଗେଙ୍ଗ୍ ନା ଜୁୱାର୍ ଜଣାୟ୍ କିୟାଟ୍। ଆରେ ଆରସ୍ତବୁଲଙ୍ଗ୍ କୁଟୁମ୍ନି ୱିଜାରିଙ୍ଗ୍ ନା ଜୁୱାର୍ ଜାଣାୟ୍ କିୟାଟ୍। 11 ନା ଯିହୁଦି ଲକ୍ ହେରୋଦିୟନ୍ ଆରେ ନାରସିସଙ୍ଗ୍ କୁଟୁମ୍ନି ଖ୍ରୀଷ୍ଟାନ୍ ଟଣ୍ଡାରିଙ୍ଗ୍ ପା ନା ଜୁୱାର୍ ଜଣାୟ୍ କିୟାଟ୍। 12 ମା ଖ୍ରୀଷ୍ଟାନ୍ ତଣ୍ଦେଲ୍ ତ୍ରିପେନା ଆରେ ତ୍ରିପୋସାଙ୍ଗ୍ ଆରେ ମାପୃ କାଜିଙ୍ଗ୍ ବେସି କଷ୍ଟ କିନି ପେର୍ଶିସତିଙ୍ଗ୍ ନା ଜୁୱାର୍ ଜଣାୟ୍ କିୟାଟ୍। 13 ମାପୃନି ଦାସ୍ ରୁଫସ୍ ଆରେ ମାଞ୍ଜି ଆୟା ଲେକେ ତା ତେହିଙ୍ଗ୍ ପା ନା ଜୁୱାର୍ ଜଣାୟ୍ କିୟାଟ୍। 14 ଆରେ ଆସୁଙ୍କ୍ରିତ, ପ୍ଲେଗନ୍, ହର୍ମିସ୍, ପାତ୍ରବା, ହରମାସ୍ ଆରେ ହେୱାର୍ ହୁଦାଙ୍ଗ୍ ମାନି ଜେକନି ଖ୍ରୀଷ୍ଟାନ୍ ଟଣ୍ଡାରିଙ୍ଗ୍ ନା ଜୁୱାର୍ ଜାଣାୟ୍ କିୟାଟ୍। 15 ଫିଲଲଗ ଆରେ ୟୁଲିୟା, ନୀରୁସ୍ ଆରେ ତା ତଣ୍ଦେହି ଆରେ ଅଲୁଦା ଆରେ ହେୱାର୍ ହୁଦାଙ୍ଗ୍ ମାନି ୱିଜାର୍ ଈଶ୍ୱରନି ମାନାୟାରିଙ୍ଗ୍ ନା ଜୁୱାର୍ ଜଣାୟ୍ କିୟାଟ୍। 16 ୱିଜୁ ଖ୍ରୀଷ୍ଟାନ୍ ମଣ୍ଡ୍ଲିନି ପାର୍ତିକିନି ମାନାୟାର୍ ଜୁୱାର୍ ଜଣାୟ୍ କିନାରା। ଏପେଙ୍ଗ୍ ଜାର୍-ଜାର୍ତିଙ୍ଗ୍ ଲାଡ୍ତାଙ୍ଗ୍ ଜୁୱାର୍ କିୟାଟ୍। ପାଉଲ ସେସ୍ ହିକ୍ଷା ହିତାନ୍ 17 ଏ ପାର୍ତି ଟଣ୍ଡାର୍କାଦେର୍, ଆନେଙ୍ଗ୍ ନଙ୍ଗୟ୍ ମିଙ୍ଗେଙ୍ଗ୍ ଆରେ ରଞ୍ଜି ଗୁୱାରି କିଦ୍ନାଙ୍ଗା ଯେ, ଏପେଙ୍ଗ୍ ଜାର୍-ଜାର୍ବିତ୍ରେ ଗଣ୍ଡ୍ଗଲ୍ କିଜି ବାଗ୍ କିନି ମାନାୟାର୍ତାଙ୍ଗ୍ ଆରେ ମାନାୟାର୍ ପାର୍ତିତିଙ୍ଗ୍ ଉଣା କିନି ମାନାୟାର୍ତାଙ୍ଗ୍ ଜାଗ୍ରତ୍ ଆଜି ମାନାଟ୍। ହେୱାର୍ ଆପେଙ୍ଗ୍ ହିଜିମାଚି ସତ୍ ହିକ୍ଷା ବିରୁଦ୍ତାକେ ଇଞ୍ଜ୍ନାର୍, ଲାଗିଙ୍ଗ୍ ଏପେଙ୍ଗ୍ ହେୱାର୍ତାଙ୍ଗ୍ ଦେହା ମାନାଟ୍। 18 ହେ ଲେଗ୍ଦି ମାନାୟାର୍ ମା ମାପୃ ଯୀଶୁ ଖ୍ରୀଷ୍ଟଙ୍ଗ୍ ହେବା କିଉରା, ହେୱାର୍ ଜାର୍ତିଙ୍ଗ୍ ହେବାକିନାରା। ହେୱାର୍ ଦରମ୍ ମାନାୟାରିଙ୍ଗ୍ ଟକାୟ୍ କିଦେଙ୍ଗ୍ ଚିକ୍ଣାୟ୍ କିଜି କାତା ଇନାର୍। 19 ମାତର୍ ୱିଜାର୍ ମାନାୟାର୍ ପୁଚାର୍ନା ଏପେଙ୍ଗ୍ ମାପୃକାତାତିଙ୍ଗ୍ ମାନି କିନାଦେରା। ଇଦାଙ୍ଗ୍ ନାଙ୍ଗେଙ୍ଗ୍ ବେସି ୱାରି କିଦ୍ନାତା। ଆନେଙ୍ଗ୍ ଇଚା କିନାଙ୍ଗା ଯେ, ଏପେଙ୍ଗ୍ ହାର୍ ବିଷୟରେ ବୁଦି ଆଡ ଆରେ କରାପ୍ କାମାୟ୍ କିନିତାଙ୍ଗ୍ ଦେହା ମାନାଟ୍। 20 ଲାଗିଙ୍ଗ୍ ଶାନ୍ତି ହିଦ୍ନି ଈଶ୍ୱର ବେଗି ଶୟତାନ ସାକ୍ତିତିଙ୍ଗ୍ ବିନାସ୍ କିଜି ମି ତାରେନ୍ ତାହିୱାନାତ୍, ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା କିଦେନ୍। 21 ନା ହୁଦାଙ୍ଗ୍ କାମାୟ୍ କିନି ତିମତି ଆରେ ମା ଯିହୁଦି ଟଣ୍ଡେନ୍ ଲୁକିୟ, ଯାସୋନା ଆରେ ଖ୍ରୀଷ୍ଟାନ୍ ଟଣ୍ଡେନ୍ ସୋସିପାତ୍ର ମିଙ୍ଗେଙ୍ଗ୍ ଜୁୱାର୍ ଜଣାୟ୍ କିଦ୍ନାଙ୍ଗା। 22 ଆନେଙ୍ଗ୍ ତର୍ତ୍ତିୟ ଇ ଚିଟି ପାଉଲ ୱେଚ୍ଚିତିଲେ ଲେକିକିତାଙ୍ଗ୍ନା, ଆରେ ଆନେଙ୍ଗ୍ ପା ରକାଙ୍ଗ୍ ଖ୍ରୀଷ୍ଟାନ୍ତଙ୍ଗ୍ ମାପୃ ତର୍ଦାଙ୍ଗ୍ ଜୁୱାର୍ ଜଣାୟ୍ କିଦ୍ନାଙ୍ଗା। 23 ନା ହୁଦାଙ୍ଗ୍ ମାନି ପାର୍ତିକିନି ଟଣ୍ଡେନ୍ ଗାୟସ୍ ମିଙ୍ଗେଙ୍ଗ୍ ଜୁୱାର୍ କିଦ୍ନାନା। ମଣ୍ଡ୍ଲିନି ୱିଜାର୍ ପାର୍ତିକିନି ଟଣ୍ଡାର୍ ତା ଇଞ୍ଜ ପାର୍ତାନା କିନି କାଜିଙ୍ଗ୍ ରୁଣ୍ଡା ଆନାପା। ଆରେ ଇ ସହର୍ନି ଏରାଷ୍ଟ ଟଣ୍ଡେନ୍ ଇନେର୍ ଡାବୁଙ୍ଗ୍ ବିଷୟରେ ଦେକାଶୁଣା କିନାନା, ଆରେ କ୍ୱାର୍ତ୍ତପା ମିଙ୍ଗେଙ୍ଗ୍ ଜୁୱାର୍ କିଦ୍ନାନା। 24 ଆନେଙ୍ଗ୍ ପାର୍ତାନା କିନାଙ୍ଗା ଯେ, ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା କିଦେନ୍। 25 ଆନେଙ୍ଗ୍ ମିଙ୍ଗେଙ୍ଗ୍ ଯୀଶୁ ଖ୍ରୀଷ୍ଟତି ହାର୍ଦିକାବୁର୍ ବିଷୟରେ ଶୁଣାୟ୍ କିଜି ମାନ୍ଞ୍ଚାଙ୍ଗ୍, ଆରେ ଈଶ୍ୱର ବିନ୍ଜାତିନି ମାନାୟାର୍ କାଜିଙ୍ଗ୍ ଇମ୍ଣି ଉପାୟ୍ ବେସି ଆଗେତାଙ୍ଗ୍ ଡ଼ୁକ୍ଚି ମାଚାନ୍ ହେ ବିଷୟରେ ୱେଚ୍ଚି ମାନ୍ଞ୍ଚାଙ୍ଗ୍। ଈଶ୍ୱର ମିଙ୍ଗେଙ୍ଗ୍ ଆଦିକ୍ ପାର୍ତି କିଦେଙ୍ଗ୍ ସାଇଜ କିଦେନ୍। 26 ମାତର୍ ନଙ୍ଗୟ୍ ୱିଜୁ ବିନ୍ଜାତିନି ମାନାୟାର୍ ପୁନାର୍, ଆରେ ଈଶ୍ୱରତିଙ୍ଗ୍ ପାର୍ତି କିଜି ମାନିକିନାର୍। ହେଦାଙ୍ଗ୍ କାଜିଙ୍ଗ୍ ଭବିଷ୍ଯତବକ୍ତାର୍, ୱିଜୁଦିନ୍ ଜିବୁନ୍ ମାନି ଈଶ୍ୱର ସାସ୍ତର୍ତାକେ ଲେକାଆଜି ମାଚି ୱିଜୁ ବିଷୟ ପୁନି କିତାତ୍। 27 ଯୀଶୁ ଖ୍ରୀଷ୍ଟ କାଜିଙ୍ଗ୍ ରକାନ୍ ବୁଦି ମାନି ଈଶ୍ୱରତି ଗୌରବ ଆୟେତ୍। ଆମେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation