ରୋମିୟ 15 - New Testament in Pengo Parja Languageଜେକନିକାରିଙ୍ଗ୍ ୱାରିକିନି କାଜିଙ୍ଗ୍ ଜିବୁନ୍ କାଟିକିନି ବିଷୟ 1 ଆପେଙ୍ଗ୍ ପୁଚାପ୍ନା ଯେ, ଇ ୱିଜୁ ବିଷୟରେ ଇନା ଅର୍ତ ହିଲେତ୍, ମାତର୍ ଆପେଙ୍ଗ୍ ଜାର୍ତିଙ୍ଗ୍ ୱାରିକିନି କାଜିଙ୍ଗ୍ ଇ ୱିଜୁ କାମାୟ୍ କିୱି ଦର୍କାର୍। ମାତର୍ ଆସେଙ୍ଗ୍ ପାର୍ତିନି ଉଣା ମାନି ମାନାୟାର୍ ବିଷୟରେ ଚିନ୍ତା କିନି ଦର୍କାର୍, ଇମ୍ଣି ମାନାୟାର୍ ଇ ୱିଜୁ ବିଷୟତିଙ୍ଗ୍ ହାର୍ ଇଞ୍ଜି ବାବିକିନାରା। 2 ଆସେଙ୍ଗ୍ ଜେକନିକାରିଙ୍ଗ୍ ୱାରିକିନି ଦର୍କାର୍, ଯଦି ଆପେଙ୍ଗ୍ ଜେକନିକାରିଙ୍ଗ୍ ୱାରିୟା ଆନିଲେକେ ଆରେ ହେୱାରିଙ୍ଗ୍ ସାଇଜ କିନାପା, ଲାଗିଙ୍ଗ୍ ଆପେଙ୍ଗ୍ ମାପୃଙ୍ଗ୍ ଆଦିକ୍ ପାର୍ତିକିନି କାଜିଙ୍ଗ୍ ସାଇଜ କିୟାଆନାତ୍। 3 ଇନେସ୍କି ଖ୍ରୀଷ୍ଟ ପା ଜାର୍ତିଙ୍ଗ୍ ୱାରି କିନିଲେକେ କାମାୟ୍ କିୱାଦାଙ୍ଗ୍ ମାଚାନ୍। ଇନେସ୍ଲେକେ ଦରମ୍ ସାସ୍ତର୍ତାକେ ଲେକାଆତାତ୍ନା, “ଇମ୍ଣି ମାନାୟାର୍ ମିଙ୍ଗେଙ୍ଗ୍ ଇନସ୍ତା କିଦ୍ନାର୍ ହେୱାର୍ ନାଙ୍ଗେଙ୍ଗ୍ ପା ଇନସ୍ତା କିଦ୍ନାରା।” 4 ମାଙ୍ଗେଙ୍ଗ୍ ହିକାୟ୍ କିନି କାଜିଙ୍ଗ୍ ଇ ୱିଜୁ ବିଷୟ ବେସି ଆଗେ ଦର୍ମ୍ ସାସ୍ତର୍ତାକେ ଲେକାଆତାତ୍ନା, ଏଚେପାଦ୍ନା ଆପେଙ୍ଗ୍ ଈଶ୍ୱର ପାର୍ମାଣ୍ତିଙ୍ଗ୍ ପାୟାଆନି କାଜିଙ୍ଗ୍ ସାସ୍ ଆଜି କାନାପା, ହେପାଦ୍ନା ମାଙ୍ଗେଙ୍ଗ୍ ଇଦାଙ୍ଗ୍ ସାସ୍ ଆରେ ଆହା ହିଦ୍ନାତ୍। 5 ଆନେଙ୍ଗ୍ ମି କାଜିଙ୍ଗ୍ ଈଶ୍ୱରତାକେ ପାର୍ତାନା କିନାଙ୍ଗା ଯେ, ହେୱାନ୍ ମିଙ୍ଗେଙ୍ଗ୍ ସାସ୍ ହିଦେନ୍। ଲାଗିଙ୍ଗ୍ ଏପେଙ୍ଗ୍ ଜାର୍-ଜାର୍ବିତ୍ରେ ହାମାନ୍ ଆଜି ମାଞ୍ଜେଙ୍ଗ୍ ଆଡ୍ନାଦେର୍। ଇନେସ୍କି ଏପେଙ୍ଗ୍ ଯୀଶୁ ଖ୍ରୀଷ୍ଟ କିତିଲେକେ କିନାଦେରା 6 ଲାଗିଙ୍ଗ୍ ଏପେଙ୍ଗ୍ ୱିଜାଦେର୍ ର ମାନ୍ଆଜି ଈଶ୍ୱର ମା ମାପୃ ଯୀଶୁ ଖ୍ରୀଷ୍ଟ ଲାତ୍ରାହିଙ୍ଗ୍ ଦନ୍ଯବାଦ୍ ଆରେ ଗୌରବ ହିଦେଙ୍ଗ୍ ଆଡ୍ନାଦେର୍। 7 ଆରେ ଇନେସ୍ କିଜି ମିଙ୍ଗେଙ୍ଗ୍ ଖ୍ରୀଷ୍ଟ ଆସ୍ତାତାନ୍ନା, ଇଲେକେ ଏପେଙ୍ଗ୍ ପା ଜାର୍-ଜାର୍ତିଙ୍ଗ୍ ଆହାଟ୍ ଲାଗିଙ୍ଗ୍ ଈଶ୍ୱର ଗୌରବ ପାୟା ଆନାନ୍। ବିନ୍ଜାତିର୍ କାଜିଙ୍ଗ୍ ହାର୍ଦିକାବୁର୍ 8 ଏପେଙ୍ଗ୍ ମାନ୍ତ ଇଟାଟ୍ ଯେ, ଖ୍ରୀଷ୍ଟ ଚାକର୍ ଲେକେ ଆଜି ସୁନତ ଆତି ଯିହୁଦି ଜାତିନି ଆକଦାଦିରିଙ୍ଗ୍ ଈଶ୍ୱର ହିତି ପାର୍ମାଣ୍ତିଙ୍ଗ୍ ପୁରା କିଦେଙ୍ଗ୍ ୱାଜିମାଚାନ୍। 9 ଆରେ, ହେୱାନ୍ ବିନ୍ଜାତିନି ମାନାୟାର୍ କାଜିଙ୍ଗ୍ ପା ୱାଜିମାଚାନ୍, ହେୱାର୍ ଇନେସ୍ ଈଶ୍ୱରତିଙ୍ଗ୍ ଗୌରବ ହିନାର୍, ଇନେସ୍କି ଈଶ୍ୱର ହେୱାରିଙ୍ଗ୍ ପା ଦୟା କିତାନ୍ନା। ହେଦାଙ୍ଗ୍ କାଜିଙ୍ଗ୍ ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା “ଆନେଙ୍ଗ୍ ନିଙ୍ଗେଙ୍ଗ୍ ବିନ୍ଜାତିନି ମାନାୟାର୍ ବିତ୍ରେ ଜୟ୍-ଜୟ୍ କିନାଙ୍ଗ୍। ଆନେଙ୍ଗ୍ ନି ତର୍ଦିଙ୍ଗ୍ ଜୟ୍-ଜୟ୍ କିଜି କେର୍କଣ୍ କେର୍ନାଙ୍ଗ୍।” 10 ଆରେ ପା ଜେକନି ବହାତାକେ ଦରମ୍ ସାସ୍ତର୍ତାକେ ଇଲେକେ ଲେକାଆତାତ୍ନା, ହେ ବିନ୍ଜାତିନି ମାନାୟାର୍, “ଏପେଙ୍ଗ୍ ତା ନିଜର୍ ଯିହୁଦି ଜାତିନି ମାନାୟାର୍ ହୁଦାଙ୍ଗ୍ ମାହାଆଜି ୱାରି କିୟାଟ୍।” 11 ଆରେ ପା ଦରମ୍ ସାସ୍ତର୍ତାକେ ଲେକା ମାନାତ୍, “ଏପେଙ୍ଗ୍ ୱିଜାଦେର୍ ବିନ୍ଜାତିନି ମାନାୟାର୍ ମାପୃଙ୍ଗ୍ ଜୟ୍-ଜୟ୍ କିୟାଟ୍। ଇ ପୁର୍ତିନି ୱିଜାର୍ ମାନାୟ୍ କାଦେର୍, ଏପେଙ୍ଗ୍ ତାଙ୍ଗେଙ୍ଗ୍ ଜୟ୍-ଜୟ୍ କିୟାଟ୍।” 12 ଆରେ ଯିଶାୟ ଭବିଷ୍ଯତବକ୍ତା ଇଲେକେ ୱେଚ୍ଚାନ୍ନା ଯେ, “ଯିଶି ମେହି ଦାଉଦ ରାଜା କୁଟୁମ୍ତାଙ୍ଗ୍ ର ମାନାୟ୍ ତା ରାଜ୍ ଗାଦିତିଙ୍ଗ୍ ଅଦିକାର୍ କିଦେଙ୍ଗ୍ ୱାନାନ୍, ଆରେ ହେୱାନ୍ ୱିଜୁ ବିନ୍ଜାତିନି ମାନାୟାରିଙ୍ଗ୍ ସାସନ୍ କିନାନ୍। ହେ ବିନ୍ଜାତିନି ମାନାୟାର୍ ତାଙ୍ଗେଙ୍ଗ୍ ଆହା କିନାର୍।” 13 ଲାଗିଙ୍ଗ୍ ଆହା ହିଦ୍ନି ଈଶ୍ୱରତିଙ୍ଗ୍ ପାର୍ତାନା କିନାଙ୍ଗା ଯେ, ଏପେଙ୍ଗ୍ ତାଙ୍ଗେଙ୍ଗ୍ ପାର୍ତି କିଜି ମାଞ୍ଜେଙ୍ଗ୍ ହେୱାନ୍ ମିଙ୍ଗେଙ୍ଗ୍ ୱାରି କିଦେନ୍, ଆରେ ମିଙ୍ଗେଙ୍ଗ୍ ଶାନ୍ତି ହିଦେନ୍। ଏପେଙ୍ଗ୍ ପବିତ୍ର ଆତ୍ମାନି ଶାକ୍ତିତାଙ୍ଗ୍ ଆଦିକ୍ ତାଙ୍ଗେଙ୍ଗ୍ ଆହାକିନି କାଜିଙ୍ଗ୍ ହେୱାନ୍ ମିଙ୍ଗେଙ୍ଗ୍ ସାଇଜ କିଦେନ୍। ପାଉଲ ବିନ୍ଜାତିନି ମାନାୟାର୍ କାଜିଙ୍ଗ୍ ଯୀଶୁର୍ ଦାସ୍ ଆତାନ୍ 14 ଏ ଟଣ୍ଡାର୍କାଦେର୍ ଆନେଙ୍ଗ୍ ହାର୍ କିଜି ପୁଚାଙ୍ଗ୍ନା ଯେ, ଏପେଙ୍ଗ୍ ବେସି ହାର୍। ଏପେଙ୍ଗ୍ ଜାର୍-ଜାର୍ବିତ୍ରେ ହିକ୍ଷାହିଦେଙ୍ଗ୍ ଇ ୱିଜୁ ବିଷୟ ହାର୍ କିଜି ପୁଚାଦେର୍ନା। 15 ମାତର୍ ଏପେଙ୍ଗ୍ କେତ୍ଗଟା ଜିନିଷ୍ତିଙ୍ଗ୍ ମାନ୍ତ ଇଡ଼୍ଦେଙ୍ଗ୍ ଆନେଙ୍ଗ୍ ଇଚା କିନାଙ୍ଗ୍, ଆରେ ହେ ବିଷୟରେ ଲେକିକିତାଙ୍ଗ୍ନା। ଆନେଙ୍ଗ୍ ଇଲେକେ କିତାଙ୍ଗ୍ନା, ଇନେସ୍କି ଈଶ୍ୱର ନାଙ୍ଗେଙ୍ଗ୍ ଦୟା କିତ୍ତାନ୍ନା। 16 ଆନେଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ହେବା କିନି କାଜିଙ୍ଗ୍ ବିନ୍ଜାତିନି ମାନାୟାର୍ ବିତ୍ରେ ପୁଜାରି ଲେକେ କାମାୟ୍ କିନାଙ୍ଗା, ଆନେଙ୍ଗ୍ ହାର୍ଦିକାବୁର୍ ହିକ୍ଷାହିଜି ଈଶ୍ୱରତିଙ୍ଗ୍ ହେବା କିନାଙ୍ଗା। ଲାଗିଙ୍ଗ୍ ବିନ୍ଜାତିନି ଈଶ୍ୱରତିଙ୍ଗ୍ ହିନି ଦାନ୍ଲେକେ ଆନାର୍, ଆରେ ଈଶ୍ୱର ହେୱାରିଙ୍ଗ୍ ଆହ୍ନାନ୍। ଲାଗିଙ୍ଗ୍ ଏପେଙ୍ଗ୍ ପବିତ୍ର ଆତ୍ମା ସାଇଜରେ ପବିତ୍ର ଆନାଦେର୍ ଆରେ ତାଙ୍ଗେଙ୍ଗ୍ ୱାରି କିନାଦେର୍। 17 ଯୀଶୁ ହୁଦାଙ୍ଗ୍ ମାହାଆଜି ଈଶ୍ୱରତି ହେବା କିତି କାଜିଙ୍ଗ୍ ଆନେଙ୍ଗ୍ ୱାରିୟା ଆନାଙ୍ଗା। 18 ନା କାଜିଙ୍ଗ୍ ଯୀଶୁ ଖ୍ରୀଷ୍ଟ ଇମ୍ଣି ୱିଜୁ କାମାୟ୍ କିତାନ୍ନା, ହେଦାଙ୍ଗ୍ ଆନେଙ୍ଗ୍ ସାସ୍ ଆଜି ଇଞ୍ଜେଙ୍ଗ୍ ଆଡ୍ନାଙ୍ଗା। ଆନେଙ୍ଗ୍ ବିନ୍ଜାତିନି ମାନାୟାରିଙ୍ଗ୍ ଈଶ୍ୱର କାତା ମାନି କିଦେଙ୍ଗ୍ ସାଇଜ କିଦେଙ୍ଗ୍ ଆଡ୍ନାଙ୍ଗା। ହେୱାର୍ ନା କାତା ୱେଚାର୍ ଆରେ ନା କାମାୟ୍ ହୁଡ଼୍ଜି ଖ୍ରୀଷ୍ଟଙ୍ଗ୍ ପାର୍ତି କିତାର୍। 19 ଈଶ୍ୱର ନାଙ୍ଗେଙ୍ଗ୍ ପବିତ୍ର ଆତ୍ମା ଶାକ୍ତି ହିଜି ମାନ୍ଞ୍ଚି କାଜିଙ୍ଗ୍, ଆନେଙ୍ଗ୍ ଶାକ୍ତି ଚିନ୍ ଆରେ ଚାନିଆ କାମାୟ୍ କିଜି ମାଚାଙ୍ଗ୍। ଆନେଙ୍ଗ୍ ଯିରୁଶାଲାମ ସହର୍ତାଙ୍ଗ୍ ଇଲୁରିକ ସହର୍ତାକେ କେତେକ୍ ବାହାକାଙ୍ଗ୍ ହାଚାଙ୍ଗ୍, ଆନେଙ୍ଗ୍ ଯୀଶୁ ଖ୍ରୀଷ୍ଟ ବିଷୟନି ହାର୍ଦିକାବୁର୍ ୱିଜାକାରିଙ୍ଗ୍ ଶୁଣାୟ୍ କିଜି ମାଚାଙ୍ଗ୍। 20 ଆନେଙ୍ଗ୍ ନା ମାନ୍ତ ଇ ର ବିଷୟ ଇଚା କିଜି ମାଚାଙ୍ଗ୍ ଯେ, ଇମ୍ଣି ବାହାତାକେ ଖ୍ରୀଷ୍ଟ ବିଷୟରେ ୱେଚାର୍ ହେ ବାହାତାକେ ହାଲୁଙ୍ଗ୍, ଇମ୍ଣି ବାହାତାକେ ଯୀଶୁ ଖ୍ରୀଷ୍ଟ ବିଷୟରେ ପୁନ୍ୱାତାର୍ନା ହେ ବାହାତାକେ ହାର୍ଦିକାବୁର୍ ଶୁଣାୟ୍ କିନାଙ୍ଗ୍। 21 ଦରମ୍ ସାସ୍ତର୍ତାକେ ଲେକାଆତି ଉପାୟ୍ତିଙ୍ଗ୍ ମାନିକିନାଙ୍ଗା। ହେଦାଙ୍ଗ୍ ଇନାତା ଯେ, “ଇମ୍ଣି ମାନାୟାରିଙ୍ଗ୍ ତା ବିଷୟରେ ଇନାୱେଡ଼ାଙ୍ଗ୍ ପା ୱେଚ୍ୱାତାର୍ନା, ହେୱାର୍ ହୁଡ଼୍ନାର୍ ଆରେ ଇମ୍ଣି ମାନାୟାର୍ ତା ବିଷୟରେ ଇନାୱେଡ଼ାଙ୍ଗ୍ ପା ପୁନ୍ୱାତାର୍ନା ହେୱାର୍ ତା ବିଷୟରେ ବୁଜା ଆନାର୍।” ରୋମ ଦେସ୍ ହାଞ୍ଜେଙ୍ଗ୍ ପାଉଲ ଉପାୟ୍ କିତାନ୍ 22 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିତାକେ ୱାଦେଙ୍ଗ୍ ଲେଟ୍ ଆନାତା, ଇନେସ୍କି ଆନେଙ୍ଗ୍ ଇ ୱିଜୁ ବାହାତାକେ ଶୁଣାୟ୍ କିନାଙ୍ଗା। 23 ମାତର୍ ନଙ୍ଗୟ୍ ଆନେଙ୍ଗ୍ ଇ ୱିଜୁ ବାହାକାଙ୍ଗ୍ ନା କାମାୟ୍ ୱିସ୍ତାଙ୍ଗ୍ନା, ଆରେ ଆନେଙ୍ଗ୍ ବେସି ବରସ୍ କାତି ପାଚେ ମି ଲାଗେ ୱାନି କାଜିଙ୍ଗ୍ ବେସି ଇଚା କିନାଙ୍ଗା। 24 ଆନେଙ୍ଗ୍ ସ୍ପେନ୍ ଦେସ୍ତାକେ ହାନି କାଜିଙ୍ଗ୍ ଉପାୟ୍ କିନାଙ୍ଗା, ଆରେ ଆନେଙ୍ଗ୍ ଏଚେପାଦ୍ନା ହାନାଙ୍ଗ୍, ରମ ସହର୍ତାକେ ୱାଜି ମିଙ୍ଗେଙ୍ଗ୍ ହୁଡ଼୍ଦେଦେଙ୍ଗ୍ ଆହା କିନାଙ୍ଗା। ଆରେ ମିହୁଦାଙ୍ଗ୍ ମାହାଆଜି ୱାରିକିତି ପାଚେ, ଆନେଙ୍ଗ୍ ସ୍ପେନ୍ ସହର୍ତାକେ ହାନାଙ୍ଗ୍। 25 ମାତର୍ ଆନେଙ୍ଗ୍ ମି ଲାଗେ ୱାନି ଆଗେ ଯିରୁଶାଲାମତାକେ ହାଲ୍ଜି ଈଶ୍ୱର ଲକ୍ତିଙ୍ଗ୍ ଦାନ୍ ହିନାଙ୍ଗ୍। 26 ଇନେସ୍କି ମାକଦନିଆ ଆରେ ଆକାୟା ସହର୍ନି ମାନାୟାର୍ ଯିରୁଶାଲାମନି କେତେକ୍ ଗରିବ୍ନି ଖ୍ରୀଷ୍ଟାନ୍ ଟଣ୍ଡାରିଙ୍ଗ୍ ସାଇଜ କିନି କାଜିଙ୍ଗ୍ କେତେକ୍ ଚାନ୍ଦା ଆଦାୟ୍ କିତାର୍ନା। 27 ହେୱାର୍ ନିଜେ ଇଚା କିଜି ଇଲେକେ କିନାରା, ମାତର୍ ହେୱାର୍ ଯିରୁଶାଲାମନି ମାନାୟାର୍ତାଙ୍ଗ୍ ରୁଣ୍ ଆତାପ୍ନା ଇଞ୍ଜି ବାବିକିନାରା। ଇନେସ୍କି ଯଦି ବିନ୍ଜାତିନି ମାନାୟାର୍ ଯିହୁଦି ଜାତିନି ଖ୍ରୀଷ୍ଟାନ୍ ମାନାୟାର୍ କାଜିଙ୍ଗ୍ ପବିତ୍ର ଆତ୍ମାନି ଆଶ୍ରିବାଦ୍ ପାୟାଆତାର୍ନା, ହେଦାଙ୍ଗ୍ କାଜିଙ୍ଗ୍ ହେୱାର୍ ଡାବୁଙ୍ଗ୍ ହିଜି ସାଇଜ କିଦେଙ୍ଗ୍ ଇଚା କିନାରା। 28 ଲାଗିଙ୍ଗ୍ ଆନେଙ୍ଗ୍ ପାର୍ତୁମ୍ ଯିରୁଶାଲାମତାକେ ହାଲ୍ଜି ହେୱାରିଙ୍ଗ୍ ସାଇଜ କିନି ଇ ରୁଣ୍ଡାୟ୍ କିତି ଡାବୁକାଙ୍ଗ୍ ହିନାଙ୍ଗ୍। ତାପାଚେ ଆନେଙ୍ଗ୍ ରମ ସହରତାକେ ୱାଜି ମିଙ୍ଗେଙ୍ଗ୍ ମାହାଆଜି ସ୍ପେନ୍ ଦେସ୍ତାକେ ହାନାଙ୍ଗ୍। 29 ଆନେଙ୍ଗ୍ ହାର୍ କିଜି ପୁଚାଙ୍ଗ୍ନା ଯେ, ଆନେଙ୍ଗ୍ ଏଚେପାଦ୍ନା ମି ଲାଗେ ୱାନାଙ୍ଗ୍ ମିଙ୍ଗେଙ୍ଗ୍ ହିଦ୍ନି କାଜିଙ୍ଗ୍ ଖ୍ରୀଷ୍ଟ ନାଙ୍ଗେଙ୍ଗ୍ ଗାଜା ଆଶ୍ରିବାଦ୍ ହିଦ୍ନାନ୍। 30 ଏ ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ମାପୃ ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ଗୁୱାରି କିଦ୍ନାଙ୍ଗା, ଏପେଙ୍ଗ୍ ଈଶ୍ୱରତିଙ୍ଗ୍ ପାର୍ତାନା କିଜି ନା ଦୁଃକ୍ କଷ୍ଟତାକେ ମାହାଆଡ। ଏପେଙ୍ଗ୍ ନାଙ୍ଗେଙ୍ଗ୍ ଲାଡ୍ କିଜିମାଚି କାଜିଙ୍ଗ୍, ପବିତ୍ର ଆତ୍ମା ସାଇଜତାଙ୍ଗ୍ ଇଦାଙ୍ଗ୍ କିୟାଟ୍। 31 ଏପେଙ୍ଗ୍ ନା କାଜିଙ୍ଗ୍ ପାର୍ତାନା କିୟାଟ୍ ଯେ, ଈଶ୍ୱର କାତାତିଙ୍ଗ୍ ମାନିକିୱି ଯିହୁଦା ଦେସ୍ନି ମାନାୟାର୍ତାଙ୍ଗ୍ ନାଙ୍ଗେଙ୍ଗ୍ ରକ୍ଷା କିଦେନ୍। ଆରେ ପା ପାର୍ତାନା କିୟାଟ୍ ଯେ, ଯିରୁଶାଲାମ ସହର୍ତାକେ ମାନି ଖ୍ରୀଷ୍ଟାନ୍ ଟଣ୍ଡାର୍ ଆନେଙ୍ଗ୍ ଅନି ଚାନ୍ଦା ଡାବୁକାଙ୍ଗ୍ ଆସ୍ତେଙ୍ଗ୍ ଇଚା କିନାର୍। 32 ଲାଗିଙ୍ଗ୍ ଈଶ୍ୱର ଇଚା କିତିସ୍ ଆନେଙ୍ଗ୍ ୱାରିୟା ଆଜି ମିତାକେ ୱାଦେଙ୍ଗ୍ ଆଡ୍ନାଙ୍ଗ୍ ଆରେ ଆସେଙ୍ଗ୍ ଜାର୍-ଜାର୍ତିଙ୍ଗ୍ ସାସ୍ ହିୟାଆନାତ୍। 33 ଆରେ ନଙ୍ଗୟ୍ ଇମ୍ଣି ଈଶ୍ୱର ମାଙ୍ଗେଙ୍ଗ୍ ଶାନ୍ତି ହିଦ୍ନାନା, ହେୱାନ୍ ମି ୱିଜାର୍ ହୁଦାଙ୍ଗ୍ ମାନେନ୍। ଆମେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation