ରୋମିୟ 14 - New Testament in Pengo Parja Languageଜାର୍-ଜାର୍ବିତ୍ରେ ବିଚାର୍ କିୱି ବିଷୟ 1 ଇମ୍ଣି ଖ୍ରୀଷ୍ଟାନ୍ ଟଣ୍ଡାର୍ତି ପାର୍ତି ଉଣା ହେୱାରିଙ୍ଗ୍ ଏପେଙ୍ଗ୍ ଆହାଟ୍, ଆରେ ହେୱାର୍ ବାବି କିନାକା ଟିକ୍ କରାପ୍ ବିଷୟ କାଜିଙ୍ଗ୍ ଜିକାଟାଣା ଆମାଟ୍। 2 ଇନେସ୍କି ର ମାନାୟ୍ ଜେଇ ତିନାକା ଟିକ୍ ଇଞ୍ଜି ପାର୍ତି କିନାନା, ମାତର୍ ବିନେନିକାନ୍ ଇନେରିଙ୍ଗ୍ ଉଣା ପାର୍ତି କିନାନା ହେୱାନ୍ ୱାରା ପନି ପରିବା ନେ ତିନାନ୍। 3 ଲାଗିଙ୍ଗ୍ ଇମ୍ଣାକାର୍ ଜେଇ ତିନାକା ଟିକ୍ ଇଞ୍ଜି ପାର୍ତିକିନାରା, ହେୱାର୍ ପନି ପରିବା ତିନାକାରିଙ୍ଗ୍ ଇନସ୍ତା କିନାକା ଟିକ୍ ଆକାୟ୍। ଆରେ କେତେକ୍ ମାନାୟାର୍ କେତେକ୍ କାଦିତିଙ୍ଗ୍ ତିନୁର୍, ହେୱାରିଙ୍ଗ୍ ନିନ୍ଦା କିୱି ଦର୍କାର୍। ଇନେସ୍କି ଈଶ୍ୱର ହେୱାରିଙ୍ଗ୍ ଆସ୍ତାନ୍ନା। 4 ଏପେଙ୍ଗ୍ ଈଶ୍ୱର ଦାସ୍ରିଙ୍ଗ୍ ନିନ୍ଦାକିନାକା ଟିକ୍ ଆକାୟ୍, ହେୱାର୍ ଈଶ୍ୱର ଆଗେ ଦାଇ ଆନାର୍। ଲାଗିଙ୍ଗ୍ ହେୱାର୍ ଟିକ୍ କରାପ୍ କିନାରା ଇଞ୍ଜି ହେୱାନ୍ ହେୱାରିଙ୍ଗ୍ ୱେଚ୍ନାନ୍। ହେୱାର୍ ଇନାକା କିନି ଦର୍କାର୍ ମାପୃ ସାକ୍ତି ହେୱାରିଙ୍ଗ୍ ସାଇଜ କିନାତ୍। 5 ହେଲେକେ କେତ୍ଜାଣ୍ ବାବିକିନାର୍ ଯେ, ୱିଜୁଦିନ୍ ପିସ୍ତି ରଦିନ୍ ଆଦିକ୍ ପବିତ୍ର, ମାତର୍ ଜେକନିକାର୍ ୱିଜୁଦିନ୍ ହାମାନ୍ ଇଞ୍ଜି ବାବିକିନାର୍। ୱିଜାର୍ ମାନାୟାର୍ ଜାର୍ କାଜିଙ୍ଗ୍ ଜାର୍ ଇ ବିଷୟରେ ପାର୍ତିକିନି ଦର୍କାର୍। 6 ଇମ୍ଣି ମାନାୟାର୍ ମାପୃଙ୍ଗ୍ ପୁଜାକିନି କାଜିଙ୍ଗ୍ ରଦିନ୍ ବାଚିକିତାର୍ନା, ଇନେସ୍କି ତାଙ୍ଗେଙ୍ଗ୍ ସନ୍ମାନ୍ ହିଦେଙ୍ଗ୍ ଇଚା କିନାରା। ଇମ୍ଣି ମାନାୟାର୍ ବାରବିନି କାଦି କିନାରା ହେୱାର୍ ପା ମାପୃଙ୍ଗ୍ ସନ୍ମାନ୍ ହିନାରା। ହେୱାର୍ ତିନି ଆଗେ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାରା, ଆରେ ଇମ୍ଣି ମାନାୟାର୍ ୱିଜୁ ଜିନିଷ୍ ତିନୁରା, ହେୱାର୍ ପା ମାପୃଙ୍ଗ୍ ସାର୍ଦା କିୟିକିଦେଙ୍ଗ୍ ଇଚା କିନାରା ଆରେ ଈଶ୍ୱରତିଙ୍ଗ୍ ଦନ୍ଯବାଦ୍ କିନାରା। 7 ଇନେସ୍କି ଆସେଙ୍ଗ୍ ହାଃତିସ୍ କି ଜିତିସ୍ ଆସେଙ୍ଗ୍ ମା କାଜିଙ୍ଗ୍ ମାଲିକ୍ ଆକାୟ୍। 8 ଯଦି ଆସେଙ୍ଗ୍ ଜିନାସା, ଲାଗିଙ୍ଗ୍ ଆସେଙ୍ଗ୍ ମାପୃଙ୍ଗ୍ ସାର୍ଦା କିଦେଙ୍ଗ୍ ଜିନାସା, ଆରେ ଯଦି ଆସେଙ୍ଗ୍ ହାଃନାସ୍, ଆସେଙ୍ଗ୍ ତା ହୁଦାଙ୍ଗ୍ ମାଞ୍ଜେଙ୍ଗ୍ ହାଃନାସା। ଲାଗିଙ୍ଗ୍ ଆସେଙ୍ଗ୍ ଜିବୁନ୍ ମାଚିସ୍ କି ହାଃତିସ୍ ପା ଆସେଙ୍ଗ୍ ମାପୃ ଲକ୍ ଆତାସ୍ନା। 9 ଇଦାଙ୍ଗ୍ କାଜିଙ୍ଗ୍ ନେ ଖ୍ରୀଷ୍ଟ ହାଃଜି ଆରେରଗ ଜିବୁନ୍ ଆତାନ୍, ଲାଗିଙ୍ଗ୍ ହେୱାନ୍ ଜିବୁନ୍ ମାନାକାରିଙ୍ଗ୍ ଆରେ ହାଃତାକାର୍ ମାଲିକ୍ ପା ଆନାନ୍। 10 ଲାଗିଙ୍ଗ୍ ଇନାକିଦେଙ୍ଗ୍ ଏପେଙ୍ଗ୍ ଜେକନି ଖ୍ରୀଷ୍ଟାନାରିଙ୍ଗ୍ ନିନ୍ଦା କିନାଦେରା? ଆରେ ଏପେଙ୍ଗ୍ ଇନାକିଦେଙ୍ଗ୍ ଜେକନି ଖ୍ରୀଷ୍ଟାନାରିଙ୍ଗ୍ ଇନସ୍ତା କିନାଦେରା? ଏପେଙ୍ଗ୍ ମାନ୍ତ ଇଟାଟ୍ ଯେ, ମାଙ୍ଗେଙ୍ଗ୍ ୱିଜାକାରିଙ୍ଗ୍ ଈଶ୍ୱର ବିଚାର୍ କିଦ୍ନାନ୍ ଆରେ ଆସେଙ୍ଗ୍ ୱିଜାକାସ୍ ତା ବିଚାର୍କିନି ବାହାତାକେ ନିଲ୍ୟା ଆନାତ୍। 11 ଇନେସ୍କି ଦରମ୍ ସାସ୍ତର୍ତାକେ ଲେକାଆତାତ୍ନା, “ମାପୃ ୱେଚ୍ନାନା, ଆନେଙ୍ଗ୍ ଜିବୁନ୍ ମାଚି କାଜିଙ୍ଗ୍ ୱିଜାର୍ ମାନାୟାର୍ ନାଙ୍ଗେଙ୍ଗ୍ ମେଣ୍ଡାକୁନ୍ଦିକିଜି ଜୱାର୍ କିଦ୍ନାର୍। ଆରେ ୱିଜାର୍ ମାନାୟାର୍ ଈଶ୍ୱରତିଙ୍ଗ୍ ଜୟ୍-ଜୟ୍ କିନାର୍।” 12 ଆଁ ଆପେଙ୍ଗ୍ ୱିଜାକାପ୍ ଈଶ୍ୱର ଆଗେ ଜାର୍-ଜାର୍ ଇସାବ୍ ହିୟାଆନାତ୍। ଜେକନି ଟଣ୍ଡାର୍ ହାଜି ନଷ୍ଟ ଆମେତ୍ 13 ଲାଗିଙ୍ଗ୍ ଜାର୍-ଜାର୍ବିତ୍ରେ ଦସ୍ ହିବା ଆମାଟ୍। ତା ବାଦୁଲ୍ରେ ଏପେଙ୍ଗ୍ ଜାର୍-ଜାର୍ କାତାତିଙ୍ଗ୍ ରାଜି ଆଜି, ଜେକନି ଖ୍ରୀଷ୍ଟାନାରିଙ୍ଗ୍ କଷ୍ଟ ହିୱାଦାଙ୍ଗ୍ ଜିବୁନ୍ କାଟିକିନି ଦର୍କାର୍। 14 ଆନେଙ୍ଗ୍ ମାପୃ ଯୀଶୁ ଅଦିକାର୍ତାଙ୍ଗ୍ ହାର୍ କିଜି ପୁଚାଙ୍ଗ୍ନା ଯେ, ଇମ୍ଣି କାଦି ପା ତିନାକା ବୁଲ୍ ଆକାୟ୍। ମାତର୍ ଯଦି ଇମ୍ଣି ମାନାୟ୍ ୱିଜୁ କାଦି ତିନାକା ବୁଲ୍ ଇଞ୍ଜି ପାର୍ତି କିନାନା, ଲାଗିଙ୍ଗ୍ ହେଦାଙ୍ଗ୍ ତା କାଜିଙ୍ଗ୍ ବୁଲ୍। 15 ଆରେ ଯଦି ଏପେଙ୍ଗ୍ ତିନି କାଜିଙ୍ଗ୍ ଜେକନି ଖ୍ରୀଷ୍ଟାନ୍ ଟଣ୍ଡେନ୍ ଈଶ୍ୱରତିଙ୍ଗ୍ ଲାଡ୍ତାଙ୍ଗ୍ ମାନିକିଉନା, ଲାଗିଙ୍ଗ୍ ଏପେଙ୍ଗ୍ ହେଦାଙ୍ଗ୍ ତିନ୍ମାଟ୍, ଇନେସ୍କି ଖ୍ରୀଷ୍ଟ ତା କାଜିଙ୍ଗ୍ ପା ହାଃତାନ୍ନା। 16 ଯଦି ଏପେଙ୍ଗ୍ କିନି କାମାୟ୍ ହାର୍ ଆଜିମାନାତ୍, ମାତର୍ ଯଦି ଜେକନିକାର୍ କାଜିଙ୍ଗ୍ ହେଦାଙ୍ଗ୍ କରାପ୍ ଆଜି ମାନାତ୍, ଲାଗିଙ୍ଗ୍ ଏପେଙ୍ଗ୍ କିମାଟ୍। 17 ଇନେସ୍କି ଈଶ୍ୱର ସାସନ୍ କିନି ରାଜି ତିନି ଉଣି ବିଷୟରେ ଆକାୟ୍, ମାତର୍ ଦରମ୍ ଲକ୍ ଆନି ବିଷୟ, ଶାନ୍ତିରେ ମାନି ବିଷୟ ଆରେ ପବିତ୍ର ଆତ୍ମା ହୁଦାଙ୍ଗ୍ ୱାରିୟାଆନି ବିଷୟ ନେ ମୁକ୍ୟ। 18 ଯଦି ଏପେଙ୍ଗ୍ ଇଲେକେ ବ୍ୟବହାର୍ କିଜି ଖ୍ରୀଷ୍ଟଙ୍ଗ୍ ହେବା କିନାଦେର୍, ଏପେଙ୍ଗ୍ ଈଶ୍ୱରତିଙ୍ଗ୍ ୱାରି କିନାଦେର୍। ଆରେ ଜେକନିକାର୍ ପା ମିଙ୍ଗେଙ୍ଗ୍ ସନ୍ମାନ୍ ହିଦ୍ନାର୍। 19 ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ମଣ୍ଡ୍ଲିତାକେ ଜାର୍-ଜାର୍ବିତ୍ରେ ହାମାନ୍ ଆଜି ମାଞ୍ଜେଙ୍ଗ୍ ଚିନ୍ତା କିନି ଦର୍କାର୍, ଆରେ ବେସି ପାର୍ତିକିନି କାଜିଙ୍ଗ୍ ଜାର୍-ଜାର୍ବିତ୍ରେ ସାଇଜ କିନି କାଜିଙ୍ଗ୍ ଉପାୟ୍ କିନି ଦର୍କାର୍। 20 ଏପେଙ୍ଗ୍ ତିନିକାଦି କାଜିଙ୍ଗ୍ ଈଶ୍ୱର କାମାୟ୍ତିଙ୍ଗ୍ ବେକାର୍ କିମାଟ୍। ଏପେଙ୍ଗ୍ ମାନ୍ତ ଇଟାଟ୍ ଯେ, ୱିଜୁ ପର୍କାର୍ କାଦି ତିନାକା ବୁଲ୍ ଆକାୟ୍। ମାତର୍ ଯଦି ର ମାନାୟ୍ ଏପେଙ୍ଗ୍ ତିନି ର କାଦି କାଜିଙ୍ଗ୍ ଈଶ୍ୱରତିଙ୍ଗ୍ ପାର୍ତି କିନାକା ବନ୍ଦ୍ କିନାନା, ଲାଗିଙ୍ଗ୍ ହେଦାଙ୍ଗ୍ ବୁଲ୍। 21 ଏପେଙ୍ଗ୍ ଜେଇ ତିନ୍ମାଟ୍ କି ଅଙ୍ଗୁର୍ ରାସ୍ ଉଣ୍ମାଟ୍ କି ଇନାକା ପା କିମାଟ୍, ହେଦାଙ୍ଗ୍ କାଜିଙ୍ଗ୍ ଯଦି ହେୱାନ୍ ଈଶ୍ୱରତିଙ୍ଗ୍ ପାର୍ତି କିନାକା ବନ୍ଦ୍ କିନାନା। 22 ଏପେଙ୍ଗ୍ ପାର୍ତି କିଜି ମାନାଦେର୍ ଯେ, ଏପେଙ୍ଗ୍ କିଜିମାଚି କାମାୟ୍ ୱିଜୁ ବୁଲ୍ ଆକାୟ୍। ମାତର୍ ହେ ବିଷୟତିଙ୍ଗ୍ ମି ବିତ୍ରେ ଆରେ ଈଶ୍ୱର ବିତ୍ରେ ଇଟ୍ନାକା ହାର୍, ଇମ୍ଣି ମାନାୟାର୍ ପୁନାର୍ ଯେ, ଆନେଙ୍ଗ୍ ଟିକ୍ କାମାୟ୍ କିଜି ଜାର୍ତିଙ୍ଗ୍ ନିନ୍ଦା କିଉଙ୍ଗା, ହେୱାର୍ ଈଶ୍ୱର ତାକେତାଙ୍ଗ୍ ଆଶ୍ରିବାଦ୍ ପାୟା ଆତାକାର୍। 23 ମାତର୍ ଇମ୍ଣି ମାନାୟାର୍ ତିନି କାଜିଙ୍ଗ୍ ରି ମାନ୍ୟା ଆନାର୍ ହେୱାର୍ ତିନ୍ୱି ଦର୍କାର୍। ନଇଲେ ହେୱାର୍ ଈଶ୍ୱରତିଙ୍ଗ୍ ପାର୍ତି କିଉରା ଇଞ୍ଜି ଦସି କିନାର୍। ଯଦି ଏପେଙ୍ଗ୍ ଇଦାଙ୍ଗ୍ ଟିକ୍ କାମାୟ୍ ଆକାୟ୍ ଇଞ୍ଜି ହେ କାମାୟ୍ କିନାଦେର୍, ଲାଗିଙ୍ଗ୍ ଏପେଙ୍ଗ୍ ପାପ୍ କିନାଦେରା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation