ରୋମିୟ 13 - New Testament in Pengo Parja Languageସାସନ୍ କିନି ମାନାୟାରିଙ୍ଗ୍ ସନ୍ମାନ୍ ହିନି ବିଷୟ 1 ଏପେଙ୍ଗ୍ ୱିଜୁ ଅଦିକାର୍ ପାୟାଆତି ମାନାୟାର୍ କାତା ମାନିକିଜି ମାନାଟ୍। ଇନେସ୍କି ଈଶ୍ୱର ୱିଜୁ ଅଦିକାର୍ତିଙ୍ଗ୍ ହିଦ୍ନାନା ଆରେ ଏଚେକ୍ ମାନାୟାର୍ ଅଦିକାର୍ ପାୟାଆତାର୍ନା ହେ ମାନାୟାରିଙ୍ଗ୍ ଈଶ୍ୱର ଅଦିକାର୍ ହିତାନ୍ନା। 2 ଲାଗିଙ୍ଗ୍ ଇମ୍ଣି ମାନାୟାର୍ ସର୍କାର୍ ନିୟମ୍ତିଙ୍ଗ୍ ମାନିକିଉର୍, ହେୱାର୍ ଈଶ୍ୱର ନିୟମ୍ତିଙ୍ଗ୍ ପା ମାନିକିଉର୍। ଆରେ ହେୱାରିଙ୍ଗ୍ ଈଶ୍ୱର ଦଣ୍ଡ୍ ହିନାନ୍। 3 ଇମ୍ଣି ମାନାୟାର୍ ହାର୍ କାମାୟ୍ କିନାରା, ହେୱାର୍ ସର୍କାର୍ତିଙ୍ଗ୍ ପାଣ୍ଡ୍ରାଆଉର୍ ମାତର୍ ଇମ୍ଣି ମାନାୟ୍ କରାପ୍ କାମାୟ୍ କିଜି ମାନାନ୍, ଲାଗିଙ୍ଗ୍ ହେୱାନ୍ ସର୍କାର୍ତିଙ୍ଗ୍ ପାଣ୍ଡ୍ରା ଆନାନ୍। ଆରେ ଏପେଙ୍ଗ୍ ଯଦି ସର୍କାର୍ତିଙ୍ଗ୍ ପାଣ୍ଡ୍ରାଆୱି କାଜିଙ୍ଗ୍ ଇଚା କିନାଦେରା, ଲାଗିଙ୍ଗ୍ ହେୱାନ୍ ୱିଜୁଦିନ୍ ହାର୍ କାମାୟ୍ କିୟେନ୍ ଆରେ ସର୍କାର୍ ତାଙ୍ଗେଙ୍ଗ୍ ସନ୍ମାନ୍ ହିନାର୍। 4 ମି ହେବା କିନି କାଜିଙ୍ଗ୍, ଈଶ୍ୱର ହେ ମାନାୟାରିଙ୍ଗ୍ ଅଦିକାର୍ ହିଜି ପକ୍ତାତାନ୍ନା। ମାତର୍ ଏପେଙ୍ଗ୍ ଯଦି କରାପ୍ କାମାୟ୍ କିନାଦେରା, ଲାଗିଙ୍ଗ୍ ହେୱାରିଙ୍ଗ୍ ପାଣ୍ଡ୍ରା ଆଦେଙ୍ଗ୍ ଆନାତ୍, ଇନେସ୍କି ଏପେଙ୍ଗ୍ କିତି କରାପ୍ କାମାୟ୍ କାଜିଙ୍ଗ୍ ହେୱାର୍ ମିଙ୍ଗେଙ୍ଗ୍ ଦଣ୍ଡ୍ ହିଦ୍ନାର୍। ଇନେସ୍କି କରାପ୍ କାମାୟ୍ କିନାକାରିଙ୍ଗ୍ ଦଣ୍ଡ୍ ହିନି କାଜିଙ୍ଗ୍ ନେ ଈଶ୍ୱର ହେୱାରିଙ୍ଗ୍ ଅଦିକାର୍ ହିତାନ୍ନା। 5 ଲାଗିଙ୍ଗ୍, ରିଣ୍ଡାଙ୍ଗ୍ ବିଷୟ କାଜିଙ୍ଗ୍ ଏପେଙ୍ଗ୍ ସର୍କାର୍ ନିୟମ୍ତିଙ୍ଗ୍ ମାନିକିନି ଦର୍କାର୍, ଏପେଙ୍ଗ୍ ଦଣ୍ଡ୍ ପାୟାଆୱି କାଜିଙ୍ଗ୍ ଆରେ ହାର୍ ବିଷୟ ବାବିକିନି କାଜିଙ୍ଗ୍। 6 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ସର୍କାତିଙ୍ଗ୍ ସିସ୍ତୁ ପା ହିୟାଟ୍ ଇନେସ୍କି ସାସନ୍ କିନି ମାନାୟାର୍ ଈଶ୍ୱରତିଙ୍ଗ୍ ହେବାକିନାରା, ଆରେ ହେୱାର୍ ତା କାମାୟ୍ତିଙ୍ଗ୍ ହାର୍ କିଜି କିନାର୍। 7 ହେଦାଙ୍ଗ୍ କାଜିଙ୍ଗ୍ ୱିଜୁ ମାନାୟାରିଙ୍ଗ୍ ଏପେଙ୍ଗ୍ ହିୟାଟ୍ ହେୱାର୍ ଇମ୍ଣାକା ପାୟାଆନି ଅଦିକାର୍ ମାନାତ୍। ଇନେରିଙ୍ଗ୍ ସିସ୍ତୁ ହିନି କାତା ହେୱାନିଙ୍ଗ୍ ସିସ୍ତୁ ହିୟାଟ୍ ଇମ୍ଣାକାର୍ ମି କାଜିଙ୍ଗ୍ କାମାୟ୍ କିନାରା, ଆରେ ଇମ୍ଣି ମାନାୟାର୍ ସନ୍ମାନ୍ ପାୟାଆନି ଅଦିକାର୍ ମାନାତ୍ ହେୱାରିଙ୍ଗ୍ ସନ୍ମାନ୍ ହିୟାଟ୍। ଲାଡ୍ କାଜିଙ୍ଗ୍ ମୋଶା ଲେକିକିତି ନିୟମ୍ ସାସ୍ତର୍ ପୁରା ଆତାତ୍ 8 ଏପେଙ୍ଗ୍ ଜାର୍ ଜାର୍ବିତ୍ରେ ଲାଡ୍ କିନାକା ପିସ୍ତି ଜେକନିକାର୍ତାଙ୍ଗ୍ ରୁଣ୍ ଲାଗା ଆମାଟ୍। ଏପେଙ୍ଗ୍ ଇନାୱେଡ଼ାଙ୍ଗ୍ ପା ହୁଜାଆଦେଙ୍ଗ୍ ଆଡୁଦେର୍। ଯଦି ଏପେଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିନାଦେର୍, ଲାଗିଙ୍ଗ୍ ଏପେଙ୍ଗ୍ ଈଶ୍ୱର ଦରମ୍ ସାସ୍ତର୍ନି ନିୟମ୍ତିଙ୍ଗ୍ ପୁରା କିନାଦେରା। 9 ଇନେସ୍କି ଦରମ୍ ସାସ୍ତର୍ତାକେ ବେସି ଆଦେସ୍ ଲେକାଆତାତ୍ନା, ଏପେଙ୍ଗ୍ ଦାରି କାମାୟ୍ କିମାଟ୍। ଏପେଙ୍ଗ୍ ମାନାୟ୍ତିଙ୍ଗ୍ ଅହ୍ମାଟ୍। ଏପେଙ୍ଗ୍ ଚରି କିମାଟ୍ ଆରେ ଏପେଙ୍ଗ୍ ଲକାର୍ ଜିନିଷ୍ତିଙ୍ଗ୍ ଆହା କିମାଟ୍। ଆରେ ଏଚେକ୍ ଆଦେସ୍ ମାନାତ୍ ହେ ୱିଜୁ ପୁରା କିନି କାଜିଙ୍ଗ୍, “ଏପେଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିଦେଙ୍ଗ୍ ଆନାତ୍।” 10 ଇନେସ୍କି ଜାର୍-ଜାର୍ବିତ୍ରେ ଲାଡ୍ କିନାକା ଇନେରିଙ୍ଗ୍ ଲସ୍ କିଉତ୍, ଲାଗିଙ୍ଗ୍ ଈଶ୍ୱରତି ୱିଜୁ ନିୟମ୍ ପୁରା କିନି କାଜିଙ୍ଗ୍ ଲାଡ୍କିନି ଦର୍କାର୍। 11 ଲାଗିଙ୍ଗ୍ ଏପେଙ୍ଗ୍ ୱିଜାଦେର୍ ଜାର୍-ଜାର୍ବିତ୍ରେ ଲାଡ୍କିଜି ମାନାଟ୍, ଇନେସ୍କି ଏଚେକାଡ଼୍ଦ ଈଶ୍ୱର ମାଙ୍ଗେଙ୍ଗ୍ ଇ କରାପ୍ ପୁର୍ତିତାଙ୍ଗ୍ ଉଦାର୍ କିଦ୍ନାନ୍, ହେ ଦିନ୍ ୱାତାତେ। ଏଚେପାଦ୍ନା ଆପେଙ୍ଗ୍ ପାର୍ତୁମ୍ ଯୀଶୁ ଖ୍ରୀଷ୍ଟଙ୍ଗ୍ ପାର୍ତି କିଜି ମାଚାପ୍, ହେଦାଙ୍ଗ୍ ନଙ୍ଗୟ୍ ଲାଗେ ୱାତାତେ। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଇ ବିଷୟତିଙ୍ଗ୍ ବୁଜାଆଡ, ଆରେ ଏପେଙ୍ଗ୍ ହୁନ୍ଞ୍ଚିତାଙ୍ଗ୍ ନିଙ୍ଗାଟ୍ ଆରେ ଜାଗ୍ରତ୍ ଆଜି କାସିମାନାଟ୍। 12 ଆସେଙ୍ଗ୍ କରାପ୍ ପୁର୍ତିତାକେ ଜିନି ଦିନ୍ ର ରାତି ସେସ୍ ଆନିଲେକେ ସେସ୍ ଆନାତ୍ଦେ, ଆରେ ଖ୍ରୀଷ୍ଟ ଆରେରଗ ପୁର୍ତିତାକେ ୱାନିଦିନ୍ ଇକାୱାତାତେ। ଲାଗିଙ୍ଗ୍ ଆସେଙ୍ଗ୍ ମାଜାଗାତାକେ କିନି ୱିଜୁ କରାପ୍ କାମାୟ୍ ବନ୍ଦ୍ କିନି ଦର୍କାର୍, ଆରେ ର ସେନା ୱେଡ଼ାଲିଙ୍ଗ୍ ତା ଯୁଜ୍ କିନିହିଙ୍ଗ୍ ତା ଗାଗାଡ଼୍ତାକେ ଉସ୍ପାନାନ୍ ହେଲେକେ ଆସେଙ୍ଗ୍ କରାପ୍ କାମାୟ୍ତିଙ୍ଗ୍ ବନ୍ଦ୍ କିନି କାଜିଙ୍ଗ୍ ହାର୍ କାମାୟ୍ କିନି ଦର୍କାର୍। 13 ଆସେଙ୍ଗ୍ ଦରମ୍ ଆରେ ସତ୍ ଆଜି ୱିଜୁ କାମାୟ୍ କିନି ଦର୍କାର୍, ଲାଗିଙ୍ଗ୍ ୱିଜାର୍ ମାନାୟ୍ ମା ବ୍ୟବହାର୍ତିଙ୍ଗ୍ ହାର୍ ଇଞ୍ଜି ଇଞ୍ଜ୍ନାର୍। ଆସେଙ୍ଗ୍ କାଲିଙ୍ଗ୍ ଉଣି ଦଳ୍ତାଙ୍ଗ୍ କି ଦାରି କାମାୟ୍ କିନାକାର୍ତାଙ୍ଗ୍, କି ଜେକନି କଗ୍ଲେକ୍ ହୁଦାଙ୍ଗ୍ ମାନାକା କି ଗଣ୍ଡ୍ଗଲ୍ କିନି ଦଳ୍ତାକେ ମାନାକା ଆରେ ଆକାର୍ ଆନି ମାନାୟାର୍ ହୁଦାଙ୍ଗ୍ ମାହା ଆମାଟ୍। 14 ମାତର୍ ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ କଣ୍ଟ୍ରୁଲ୍ କିଦେନ୍, ଆରେ ମି କରାପ୍ କାମାୟ୍ କିନି ଚିନ୍ତାୱିଜୁ ପୁରା କିନି କାଜିଙ୍ଗ୍ ବାବିକିମାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation