ରୋମିୟ 12 - New Testament in Pengo Parja Languageଈଶ୍ୱରତିଙ୍ଗ୍ ହେବା କିତିସ୍ ଜିବୁନ୍ ପାୟାଆନାସ୍ 1 ଲାଗିଙ୍ଗ୍, ଏ ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା ଈଶ୍ୱର ମାଙ୍ଗେଙ୍ଗ୍ ଦୟା କିତ୍ତାନ୍ନା। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଜାର୍-ଜାର୍ ଜିବୁନ୍ନି ଗାଗାଡ଼୍ତିଙ୍ଗ୍, ପବିତ୍ର ଆରେ ଈଶ୍ୱରତିଙ୍ଗ୍ ଆହ୍ନିଲେକେ ବଲିପୁଜା ଲେକେ କିୟାଟ୍, ହେଦାଙ୍ଗ୍ନେ ଈଶ୍ୱରତିଙ୍ଗ୍ ହେବାକିନି ସତ୍ ଉପାୟ୍। 2 ଏପେଙ୍ଗ୍ ଇ ପୁର୍ତିନି ମାନାୟାର୍ ବ୍ୟବହାର୍ କିନିଲେକେ କିମାଟ୍, ମାତର୍ ଈଶ୍ୱର ମି ମାନ୍ତି ବାବ୍ନାତିଙ୍ଗ୍ ବାଦ୍ଲାୟ୍ କିଜି ପୁନି ମାନାୟ୍ ଲେକେ କିଦେନ୍, ଆରେ ଏପେଙ୍ଗ୍ ହାର୍ ବାବ୍ନା ବାବିକିଦେଙ୍ଗ୍ ଆଡ୍ନାଦେର୍। ଲାଗିଙ୍ଗ୍ ଏପେଙ୍ଗ୍ ଈଶ୍ୱର ଇଚାକିତି କାମାୟ୍ ୱିଜୁତିଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍ ଆରେ ହେଲେକେ କିନାଦେର୍। ଆରେ ଏପେଙ୍ଗ୍ ପୁନାଦେର୍ ଯେ, ହେୱାନ୍ ହାର୍ କି, ଟିକ୍ ଆରେ ୱାରି କିନିଲେକେ କାମାୟ୍ କିଦେଙ୍ଗ୍ ଇଚା କିନାନା। ଦୟାକିଜି ହିତ୍ତି ଦାନ୍ ବିଷୟନି କାତା 3 ଈଶ୍ୱର ନାଙ୍ଗେଙ୍ଗ୍ ଦୟାକିଜି ରକାଙ୍ଗ୍ ତା ଡାଣ୍ଡାସି କିଜି ବାଚି କିତାନ୍ନା, ଲାଗିଙ୍ଗ୍ ଆନେଙ୍ଗ୍ ୱିଜାକାରିଙ୍ଗ୍ ଜାଗ୍ରତ୍ କିକିନାଙ୍ଗା ଯେ, ଏପେଙ୍ଗ୍ ଗାଜାକାପ୍ ଇଞ୍ଜି ଚଞ୍ଜିଆ ଆମାଟ୍। ମାତର୍ ଈଶ୍ୱର ମିଙ୍ଗେଙ୍ଗ୍ ଏଚେକ୍ ପାର୍ତି କିଦେଙ୍ଗ୍ ହିତ୍ତାନ୍ନା ଏପେଙ୍ଗ୍ ହେଏଚେକ୍ ତାଙ୍ଗେଙ୍ଗ୍ ପାର୍ତିକିୟାଟ୍। ଇ ବିଷୟତିଙ୍ଗ୍ ମାନ୍ତ ଇଡ଼୍ଜି ମାନାଟ୍। 4 ଇନେସ୍ଲେକେ ମା ଗାଗାଡ଼୍ତାକେ ବେସି ଜିନିଷ୍ ମାନାତ୍ ଆରେ ହେ ୱିଜୁ ଜିନିଷ୍ ଜାର୍-ଜାର୍ କାମାୟ୍ କିନିକ୍। 5 ହେଦାଙ୍ଗ୍ ପା ଇଲେକେ, ଆସେଙ୍ଗ୍ ୱିଜାକାସ୍ ଖ୍ରୀଷ୍ଟଙ୍ଗ୍ ପାର୍ତି କିନାସା, ଆସେଙ୍ଗ୍ ୱିଜାକାସ୍ ଖ୍ରୀଷ୍ଟ ଗାଗାଡ଼୍ନି ରଞ୍ଜି-ରଞ୍ଜି ଜିନିଷ୍, ଆରେ ଆସେଙ୍ଗ୍ ଜାର୍-ଜାର୍ବିତ୍ରେ ଜଡ଼ା ଆତାସ୍ନା। ଆରେ ଈଶ୍ୱର ମାଙ୍ଗେଙ୍ଗ୍ ଅଲଗା ଅଲ୍ଗା କାମାୟ୍ କିଦେଙ୍ଗ୍ ହିତ୍ତାନ୍ନା। 6 ଈଶ୍ୱର ମା କାମାୟ୍ ହୁଡ଼୍ଜି, ମାଙ୍ଗେଙ୍ଗ୍ ବିନ୍-ବିନ୍ ଦାନ୍ କିନି କାଜିଙ୍ଗ୍ ହିତ୍ତାନ୍ନା, ଲାଗିଙ୍ଗ୍ ଯଦି ଈଶ୍ୱର କାତା ୱେଚ୍ନି ଦାନ୍ ହିତ୍ତାନ୍ନା, ଲାଗିଙ୍ଗ୍ ଈଶ୍ୱର ୱେଚ୍ଚାତାନ୍ନା ଇଞ୍ଜି ପାର୍ତି କିଜି ୱେଚ୍ନି ଦର୍କାର୍। 7 ଯଦି ଈଶ୍ୱର ମାନାୟାରିଙ୍ଗ୍ ହେବା କିଦେଙ୍ଗ୍ ଦାନ୍ ହିତ୍ତାନ୍ନା, ଲାଗିଙ୍ଗ୍ ଆସେଙ୍ଗ୍ ହାର୍ କିଜି ତା ହେବା କିନି ଦର୍କାର୍, ଆରେ ଯଦି ଈଶ୍ୱର ଇମ୍ଣାକାରିଙ୍ଗ୍ ହିକାୟ୍ କିନି ଦାନ୍ ହିତାନ୍ନା, ଲାଗିଙ୍ଗ୍ ହେୱାନ୍ ହାର୍ କିଜି ହିକାୟ୍ କିନି ଦର୍କାର୍। 8 ଯଦି ଈଶ୍ୱର ମିଙ୍ଗେଙ୍ଗ୍ ଜେକନିକାରିଙ୍ଗ୍ ହାର୍ କିଜି ଜିଦେଙ୍ଗ୍ ସାସ୍ ହିନି ଦାନ୍ ହିତ୍ତାନ୍ନା, ଲାଗିଙ୍ଗ୍ ସାସ୍ ହିୟାଟ୍। ଯଦି ଈଶ୍ୱର ମିଙ୍ଗେଙ୍ଗ୍ ଡାବୁଙ୍ଗ୍ ହିଜି ସାଇଜ କିନି ଦାନ୍ ହିତ୍ତାନ୍ନା, ଲାଗିଙ୍ଗ୍ ଡାବୁଙ୍ଗ୍ ହିଜି ସାଇଜ କିୟାଟ୍। ଆରେ ଯଦି ଈଶ୍ୱର ମିଙ୍ଗେଙ୍ଗ୍ ମାନାୟାର୍ ନେତା ଆନି ଦାନ୍ ହିତ୍ତାନ୍ନା, ଲାଗିଙ୍ଗ୍ ଏପେଙ୍ଗ୍ ହେ କାମାୟ୍ତିଙ୍ଗ୍ ହାର୍ କିଜି କିୟାଟ୍। ଆରେ ଯଦି ଈଶ୍ୱର ମିଙ୍ଗେଙ୍ଗ୍ ମାନାୟାରିଙ୍ଗ୍ ଦୟାକିନି ଦାନ୍ ହିତ୍ତାନ୍ନା, ଲାଗିଙ୍ଗ୍ ଏପେଙ୍ଗ୍ ହେ କାମାୟ୍ତିଙ୍ଗ୍ ନେ ୱାରିୟା ଆଜି କିୟାଟ୍। ସତ୍ ଖ୍ରୀଷ୍ଟାନାର୍ କାମାୟ୍ 9 ଏପେଙ୍ଗ୍ ଜେକନିକାରିଙ୍ଗ୍ ଲାଡ୍ କିନାଙ୍ଗା ଇଞ୍ଜି ମିଚ୍ ୱେଚ୍ମାଟ୍, ମାତର୍ ସତ୍ ଲାଡ୍ କିୟାଟ୍। କରାପ୍ କାମାୟ୍ କାଜିଙ୍ଗ୍ ଗିଣ୍ କିୟାଟ୍ ଆରେ ୱିଜୁଦିନ୍ ହାର୍ କାମାୟ୍ କିନି ମାନାୟାର୍ ହୁଦାଙ୍ଗ୍ ରବେ ମାହାଆଜି ହାର୍ କାମାୟ୍ କିୟାଟ୍। 10 ଏପେଙ୍ଗ୍ ଜାର୍ କୁଟୁମ୍ନି ମାନାୟାରିଙ୍ଗ୍ ଲାଡ୍ କିନିଲେକେ ଜାର୍-ଜାର୍ବିତ୍ରେ ଲାଡ୍ କିୟାଟ୍। ଆରେ ଜାର୍-ଜାର୍ତିଙ୍ଗ୍ ସନ୍ମାନ୍ ହିବାଆଡ। 11 ଏପେଙ୍ଗ୍ ଜାର୍ କାମାୟ୍ କିଦେଙ୍ଗ୍ ଆଡ଼୍ସାୟ୍ ଆମାଟ୍, ମାତର୍ ଏପେଙ୍ଗ୍ ଆଦିକ୍ ୱାରିୟା ଆଜି ମାପୃଙ୍ଗ୍ ହେବା କିୟାଟ୍। 12 ଯଦି ଏପେଙ୍ଗ୍ ଈଶ୍ୱରତିଙ୍ଗ୍ ଆହା କିନାଦେରା ଲାଗିଙ୍ଗ୍ ୱାରିୟା ଆଡ, ଇନେସ୍କି ଈଶ୍ୱର ମି କାଜିଙ୍ଗ୍ ହାର୍ ଉପାୟ୍ କିନାନା। ଏପେଙ୍ଗ୍ ଦୁଃକ୍ କଷ୍ଟ କାଜିଙ୍ଗ୍ ସାସ୍ ଆଜି ମାନାଟ୍, ଆରେ ଏପେଙ୍ଗ୍ ୱିଜୁଦିନ୍ ଈଶ୍ୱରତାକେ ପାର୍ତାନା କିଜି ମାନାଟ୍। 13 ଏପେଙ୍ଗ୍ ଦରମ୍ ମାନାୟାରିଙ୍ଗ୍ ଦର୍କାର୍ଆନି ଜିନିଷ୍ କାଜିଙ୍ଗ୍ ସାଇଜ କିୟାଟ୍। ଆରେ ଗତାଙ୍ଗ୍ ମିଞ୍ଜ ୱାତିସ୍, ହେୱାରିଙ୍ଗ୍ ହେବା କିୟାଟ୍। 14 ଏପେଙ୍ଗ୍ ଖ୍ରୀଷ୍ଟାନ୍ କାଦେର୍, ଯଦି ମାନାୟାର୍ ମିଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍ନାର୍, ଲାଗିଙ୍ଗ୍ ଏପେଙ୍ଗ୍ ହେୱାରିଙ୍ଗ୍ ଅବିଶାପ୍ ହିମାଟ୍, ମାତର୍ ହେୱାର୍ କାଜିଙ୍ଗ୍ ଈଶ୍ୱରତାକେ ପାର୍ତାନା କିୟାଟ୍। 15 ଏଚେପାଦ୍ନା ମାନାୟାର୍ ୱାରି କିନାର୍, ଲାଗିଙ୍ଗ୍ ଏପେଙ୍ଗ୍ ପା ହେୱାର୍ ହୁଦାଙ୍ଗ୍ ମାହାଆଜି ୱାରି କିୟାଟ୍। ଆରେ ଯଦି ହେୱାର୍ ଦୁଃକ୍ ଆନାରା, ଲାଗିଙ୍ଗ୍ ଏପେଙ୍ଗ୍ ପା ହେୱାର୍ ହୁଦାଙ୍ଗ୍ ଦୁଃକ୍ ଆଡ। 16 ଏପେଙ୍ଗ୍ ଜାର୍ତିଙ୍ଗ୍ ଗାଜାକାଙ୍ଗ୍ ଆରେ ୱିଜୁ ପୁଚାଙ୍ଗ୍ନା ଇଞ୍ଜି ଚଚିୟା ଆମାଟ୍, ମାତର୍ ୱିଜାର୍ ହୁଦାଙ୍ଗ୍ ହାମାନ୍ ଆଜି ମାନାଟ୍ ଆରେ ହେୱାର୍ ହୁଦାଙ୍ଗ୍ ୱାରିୟା ଆଡ। 17 ମି ବିରଦ୍ତାଙ୍ଗ୍ ଇମ୍ଣି ମାନାୟ୍ ପା କରାପ୍ କାମାୟ୍ କିନାନ୍, ଲାଗିଙ୍ଗ୍ ଏପେଙ୍ଗ୍ ଲେଉଟା ଆଜି ତା ବିରଦ୍ତାକେ କରାପ୍ କାମାୟ୍ କିମାଟ୍। ମାତର୍ ଇଲେକେ ହାର୍ କାମାୟ୍ କିୟାଟ୍ ଯେ, ୱିଜାକାର୍ ମି କାମାୟ୍ତିଙ୍ଗ୍ ହୁଡ଼୍ଜି ମିଙ୍ଗେଙ୍ଗ୍ ସନ୍ମାନ୍ ହିଦ୍ନାର୍। 18 ଏପେଙ୍ଗ୍ ଆଡ୍ନି ପାତେକ୍ ମି କାମାୟ୍ ୱିଜୁ କିୟାଟ୍ ଆରେ ଏପେଙ୍ଗ୍ ୱିଜାର୍ ହୁଦାଙ୍ଗ୍ ଶାନ୍ତିତାଙ୍ଗ୍ ମାନାଟ୍। 19 ହେଦାଙ୍ଗ୍ କାଜିଙ୍ଗ୍ ଏ ଟଣ୍ଡାର୍କାଦେର୍, ଏପେଙ୍ଗ୍ ମି ବିରଦ୍ତାକେ କରାପ୍ କାମାୟ୍ କିଜିମାଚି ମାନାୟାର୍ ବିରଦ୍ତାକେ କିନି କାଜିଙ୍ଗ୍ ଉଲ୍ଟା ହେୱାର୍ ବିରଦ୍ତାକେ କରାପ୍ କାମାୟ୍ କିମାଟ୍, ମାତର୍ ଈଶ୍ୱର କାଜିଙ୍ଗ୍ ପିସ୍ତି ହିୟାଟ୍। ହେୱାନ୍ ମି କାଜିଙ୍ଗ୍ ହେୱାରିଙ୍ଗ୍ ଦଣ୍ଡ୍ ହିନାନ୍। ଇନେସ୍କି ଦରମ୍ ସାସ୍ତର୍ତାକେ ଲେକାଆତାତ୍ନା, ମାପୃ ଇନାନା, “ଆନେଙ୍ଗ୍ ମି କାଜିଙ୍ଗ୍ ବାଦ୍ଲାୟ୍ କିଦେଙ୍ଗ୍ ନା ଅଦିକାର୍ ମାନାତ୍। ହେୱାର୍ କିତି କାମାୟ୍ କାଜିଙ୍ଗ୍ ଆନେଙ୍ଗ୍ ହେୱାରିଙ୍ଗ୍ ଦଣ୍ଡ୍ ହିନାଙ୍ଗ୍। 20 ମାତର୍ ଯଦି ମିଙ୍ଗେଙ୍ଗ୍ ବିରଦ୍ କିଦ୍ନି ମାନାୟାର୍ ଇନାକା ତିନ୍ୱାଦାଙ୍ଗ୍ ନାସ୍କି ମାନାର୍, ଲାଗିଙ୍ଗ୍ ହେୱାରିଙ୍ଗ୍ ଚିଞ୍ଜେଙ୍ଗ୍ ହିୟାଟ୍। ଆରେ ଯଦି ହେୱାନ୍ ଏସ୍କି ଆନାନା ଲାଗିଙ୍ଗ୍ ତାଙ୍ଗେଙ୍ଗ୍ ଉଣ୍ଡେଙ୍ଗ୍ ଏଜୁଙ୍ଗ୍ ହିୟାଟ୍। ଲାଗିଙ୍ଗ୍ ହେୱାର୍ ମି ବିରଦ୍ରେ କିତି କାମାୟ୍ କାଜିଙ୍ଗ୍ ଲାଜ୍ ପାୟାଆନାର୍।” 21 ଏପେଙ୍ଗ୍ କରାପ୍ କାମାୟ୍ କିଜି ଆରା ଆମାଟ୍, ମାତର୍ ହାର୍ କାମାୟ୍ କିଜି କରାପ୍ କାମାୟ୍ତିଙ୍ଗ୍ ଆରାୟ୍ କିୟାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation