ରୋମିୟ 11 - New Testament in Pengo Parja Languageଈଶ୍ୱର ଇସ୍ରାଏଲନି ମାନାୟାରିଙ୍ଗ୍ ଦୟା କିତାନ୍ 1 ଲାଗିଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା, “ଈଶ୍ୱର ତା ଇସ୍ରାଏଲ ଜାତିନି ମାନାୟାରିଙ୍ଗ୍ ପିହୁନ୍। ଇଦାଙ୍ଗ୍ ଏପେଙ୍ଗ୍ ମାନ୍ତ ଇଟାଟ୍ ଯେ, ଆନେଙ୍ଗ୍ ପା ର ଯିହୁଦି ଜାତିନି ମାନାୟ୍ତଙ୍ଗ୍। ଆରେ ଆନେଙ୍ଗ୍ ଅବ୍ରାହାମ ଲାତ୍ରାନି ବିନ୍ଯାମିନ କୁଟୁମ୍ ନିକାଙ୍ଗ୍।” 2 ଈଶ୍ୱର ହେୱାରିଙ୍ଗ୍ ପାର୍ତୁମ୍ତାଙ୍ଗ୍ ବାଚି କିତାନ୍ନା, ଆରେ ହେୱାନ୍ ତା ମାନାୟ୍ତିଙ୍ଗ୍ ଇନାୱେଡ଼ାଙ୍ଗ୍ ପିହ୍ୱାତାନ୍ନା। ଏପେଙ୍ଗ୍ ତ ହେଦାଙ୍ଗ୍ ପୁଚାଦେର୍ନା, ଭବିଷ୍ଯତବକ୍ତା ଏଲିୟ ତା ସାସ୍ତର୍ତାକେ ଇନାକା ଇଞ୍ଜି ୱେଚ୍ଚାନ୍ନା, ହେୱାନ୍ ଇନେସ୍ କିଜି ଇସ୍ରାଏଲତିଙ୍ଗ୍ ବିରୁଦ୍ କିଜି ଈଶ୍ୱରତାକେ ପାର୍ତାନା କିତାନ୍ନା। 3 ଏଲିୟ ୱେଚ୍ଚାନ୍, “ଏ ମାପୃ, ହେୱାର୍ ନି ଭବିଷ୍ଯତବକ୍ତାରିଙ୍ଗ୍ ମାର୍ନେ ଅସ୍ତାର୍ନା, ଆରେ ନି ବେଦିତିଙ୍ଗ୍ ବାଡ଼୍ହାୟ୍ କିତାର୍, ଆନେଙ୍ଗ୍ ରକାଙ୍ଗ୍ ନେ ଜିତାଙ୍ଗ୍ନା ନଙ୍ଗୟ୍ ହେୱାର୍ ନାଙ୍ଗେଙ୍ଗ୍ ପା ମାର୍ନେ ଅସ୍ତେଦେଙ୍ଗ୍ ଉପାୟ୍ କିନାରା।” 4 ଆରେ ଈଶ୍ୱର ତାଙ୍ଗେଙ୍ଗ୍ ଇଲେକେ ୱେଚ୍ଚି ମାଚାନ୍, “ଏନେଙ୍ଗ୍ ରକାୟ୍ ନେ ହାର୍ୱାତାୟ୍ନା, ମାତର୍ ଆନେଙ୍ଗ୍ ବାଲ୍ ମୁର୍ତିତିଙ୍ଗ୍ ପୁଜା କିୱିତି ସାତ୍ ହାଜାର୍ ମାନାୟାରିଙ୍ଗ୍ ଉଦାର୍ କିଦେଙ୍ଗ୍ ବାଚିକିତାଙ୍ଗ୍ନା।” 5 ହେଲେକେ ନଙ୍ଗୟ୍ ପା କେତେକ୍ ଯିହୁଦି ଜାତିନି ମାନାୟାର୍ ଈଶ୍ୱରତିଙ୍ଗ୍ ପିହୁରେ, ଇନେସ୍ ଈଶ୍ୱର ତା ଦୟା କାଜିଙ୍ଗ୍ କେତେକ୍ ମାନାୟ୍ତିଙ୍ଗ୍ ଉଦାର୍ କିଦେଙ୍ଗ୍ ବାଚିକିନାନା। 6 ଆରେ ହେୱାର୍ ଯଦି ଈଶ୍ୱର ଦୟା କାଜିଙ୍ଗ୍ ଉଦାର୍ ପାୟାଆନାର୍, ଲାଗିଙ୍ଗ୍ ହେଦାଙ୍ଗ୍ ତା ହାର୍ କାମାୟ୍ କିତି କାଜିଙ୍ଗ୍ ଆକାୟ୍। ଯଦି ହେଲେକେ ଆନାତ୍ ଲାଗିଙ୍ଗ୍ ଈଶ୍ୱରତି ଦୟା ଆରେ ଦୟା ଆକାୟ୍, ମାତର୍ ହେୱାର୍ କାମାୟ୍ କାଜିଙ୍ଗ୍ ଆନାତ୍। 7 ଲାଗିଙ୍ଗ୍ ଇଲେକେ ଆତାତ୍ନା। ଇସ୍ରାଏଲ ଜାତିନି ମାନାୟାର୍ ଈଶ୍ୱର ଆଗେ ଦରମ୍ ମାନାୟ୍ ଆଦେଙ୍ଗ୍ ଉପାୟ୍ କିତାର୍, ହେୱାର୍ ଆଦେଙ୍ଗ୍ ଆଡ୍ୱାତାର୍। ମାତର୍ ଈଶ୍ୱର ଇମ୍ଣି ମାନାୟାରିଙ୍ଗ୍ ଦରମ୍ ଆଦେଙ୍ଗ୍ ବାଚି କିତାନ୍ନା ହେୱାର୍ ତା ଆଗେ ଦରମ୍ ମାନାୟ୍ ଆତାର୍ନା, ଆରେ ବାକି ମାନାୟାର୍ ଦରମ୍ ଆଦେଙ୍ଗ୍ ଆଡ୍ୱାତାର୍। ଇନେସ୍କି ହେୱାର୍ ଈଶ୍ୱରତିଙ୍ଗ୍ ଗୌରବ କିୱାତାର୍, ଆରେ ଈଶ୍ୱର କାତାତିଙ୍ଗ୍ ୱେଞ୍ଜେଙ୍ଗ୍ ମୁନା କିତାର୍। 8 ଇଲେକେ ଯିଶାୟ ଭବିଷ୍ଯତବକ୍ତା ତା ସାସ୍ତର୍ତାକେ ଲେକିକିତାନ୍ନା, “ଈଶ୍ୱର ହେୱାରିଙ୍ଗ୍ ବେସି ଗାଡ଼ି ହୁଚ୍ପାତାନ୍। ହେୱାର୍ ୱେନୁ-ୱେନୁ ୱେନାର୍, ମାତର୍ ବୁଜାଆଦେଙ୍ଗ୍ ଆଡୁର୍, ଆରେ ହୁଡ଼ୁ-ହୁଡ଼ୁ ହୁଡ଼୍ନାର୍ ମାତର୍ ହୁଡ଼୍ଦେଙ୍ଗ୍ ଆଡୁର୍, ନଇଲେ ଈଶ୍ୱର ପାପ୍ କେମା କିତାନ୍ମା।” 9 ଆରେ ଦାଉଦ ରାଜା ଇଲେକେ ୱେଚ୍ଚାନ୍ନା, “ହେୱାର୍ ବଜି କିନିହିଙ୍ଗ୍ ତିପ୍କୁ ଡ଼ୁକାତ ହେଜେର୍, ଇନେସ୍କି ର ପଟି ତିପ୍କୁ ଡ଼ୁକାତାକେ ହେଜ୍ନାତ୍, ନଇଲେ ହେୱାର୍ ର ପଶୁ କଦ୍ରାତ ଆର୍ତିଲେକେ ଆନାର୍, ଲାଗିଙ୍ଗ୍ ହେୱାର୍ ହାର୍ କିଜି ଦଣ୍ଡ୍ ପାୟାଆନାର୍। 10 ଆରେ ହେୱାର୍ କାଣ୍କୁ କାଣା ଆଏକ୍, ଲାଗିଙ୍ଗ୍ ହେୱାର୍ ହୁଡ଼୍ଦେଙ୍ଗ୍ ଆଡୁର୍। ଆରେ ହେୱାରିଙ୍ଗ୍ ଦୁକ୍ ଆଏତ୍, ଲାଗିଙ୍ଗ୍ ହେୱାର୍ ମେଙ୍ଗାଙ୍ଗ୍ ୱିଜୁଦିନ୍ କାଜିଙ୍ଗ୍ ଦୁର୍ବଲ୍ ଆନାତ୍।” ବିନ୍ଜାତିନି ମାନାୟାର୍ ଉଦାର୍ ପାୟାଆତି କାତା। 11 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଯିହୁଦି ଜାତିନି ମାନାୟାର୍ ବିନାସ୍ ଆଦେଙ୍ଗ୍ ଈଶ୍ୱର ଆଦେସ୍ତିଙ୍ଗ୍ ମାନି କିୱାତାର୍ କି? ଏଲେଙ୍ଗ୍ ଆକାୟ୍, ମାତର୍ ବିନ୍ଜାତିନି ମାନାୟାରିଙ୍ଗ୍ ଉଦାର୍ କିନି କାଜିଙ୍ଗ୍ ଈଶ୍ୱର ଇଲେକେ କିତାନ୍, ଲାଗିଙ୍ଗ୍ ଇସ୍ରାଏଲନି ମାନାୟାର୍ ଆକାର୍ ଆନାର୍ ଆରେ ହେୱାର୍ ପା ପାପ୍ କାମାୟ୍ତାଙ୍ଗ୍ ଉଦାର୍ ପାୟା ଆଦେଙ୍ଗ୍ ଇଚା କିନାର୍। 12 ଯଦି ଯିହୁଦି ଜାତିନି ମାନାୟାର୍ ଈଶ୍ୱର କାତାତିଙ୍ଗ୍ ମାନିକିୱିତି କାଜିଙ୍ଗ୍, ବିନ୍ଜାତିନି ମାନାୟାର୍ କାଜିଙ୍ଗ୍ ବେସି ହାର୍ ଆତାତ୍। ଲାଗିଙ୍ଗ୍ ଯିହୁଦି ଜାତିନି ମାନାୟାର୍ ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିଜି ଈଶ୍ୱର କାତାତିଙ୍ଗ୍ ମାନିକିନାର୍, ବିନ୍ଜାତିନି ମାନାୟାର୍ ଆରେ ବେସି ଆଶ୍ରିବାଦ୍ ପାୟାଆନାର୍। 13 ଆନେଙ୍ଗ୍ ବିନ୍ଜାତିନି ମାନାୟାର୍ କାଜିଙ୍ଗ୍ ୱେଚ୍ଚାନାଙ୍ଗା ଯେ, ଈଶ୍ୱର ନାଙ୍ଗେଙ୍ଗ୍ ବିନ୍ଜାତିନି ମାନାୟାର୍ କାଜିଙ୍ଗ୍ ତା ବାଚିକିତି ଚେଲା କିଜି ପକ୍ତାତାନ୍ନା, ଲାଗିଙ୍ଗ୍ ଆନେଙ୍ଗ୍ ଇ କାମାୟ୍ତିଙ୍ଗ୍ ହାର୍ କିଜି କିନାଙ୍ଗା। ଇନେସ୍କି ଆନେଙ୍ଗ୍ ଇ କାମାୟ୍ତିଙ୍ଗ୍ ବେସି ଗାଜା କାମାୟ୍ ଇଞ୍ଜି ବାବିକିନାଙ୍ଗା। 14 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଉପାୟ୍ କିନାଙ୍ଗା ଯେ, ବିନ୍ଜାତିନି ମାନାୟାର୍ ଇନେସ୍ଲେକେ ଉଦାର୍ ପାୟାଆତାର୍, ହେୱାର୍ ପା ମା ଯିହୁଦି ଜାତିନି କେତେକ୍ ମାନାୟ୍ ଈଶ୍ୱରତାକେ ମାନ୍ବାଦ୍ଲାୟ୍ କିଜି ଉଦାର୍ ପାୟା ଆଏର୍। 15 ଇନେସ୍କି ଯଦି ଯିହୁଦି ଜାତିନି ମାନାୟାର୍ ଈଶ୍ୱରତାକେ ଉଦାର୍ ପାୟାଆନାକା ଆହ୍ୱିତି କାଜିଙ୍ଗ୍, ଈଶ୍ୱର ପୁର୍ତିନି ୱିଜୁ ମାନାୟ୍ତିଙ୍ଗ୍ ଉଦାର୍ ପାୟାଆନି କାଜିଙ୍ଗ୍ ସୁଯଗ୍ ଗାଟା ଆତାତ୍ନା। ଲାଗିଙ୍ଗ୍ ହେୱାର୍ ଯଦି ଈଶ୍ୱରତାକେ ଉଦାର୍ ପାୟା ଆନାକାଦିଙ୍ଗ୍ ଆହ୍ନାର୍ ହେଦାଙ୍ଗ୍ ବେସି ହାର୍ ଆନାତ୍। ହେଦାଙ୍ଗ୍ ହାଃତି ମାନାୟ୍ ଆରେରଗ ଜିବୁନ୍ ପାୟାଆଜି ମାହା ଆତିଲେକେ ଆନାତ୍। 16 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଯିହୁଦି ଜାତି ବିଷୟରେ ର କାତା ୱେଚ୍ଚାନାଙ୍ଗା। ମା ଯିହୁଦି ଜାତିତାକେ ର ନିୟମ୍ ମାନାତ୍, ଆସେଙ୍ଗ୍ ଏଚେକାଡ଼୍ଦ ରୁଟି ରସ୍ତେଙ୍ଗ୍ ଅଟାଗୁଣ୍ଡାତିଙ୍ଗ୍ ଚାଟ୍କାଇ କିନାସ୍, ପାର୍ତୁମ୍ ଆସେଙ୍ଗ୍ ଈଶ୍ୱରତିଙ୍ଗ୍ ମୁଟେକ୍ ହିନାସ୍। ଯଦି ହେଦାଙ୍ଗ୍ ଈଶ୍ୱରତି ଆନାତ୍, ଲାଗିଙ୍ଗ୍ ହେ ୱିଜୁ ଚାଟ୍କାଇ କିତି ଅଟାଗୁଣ୍ଡା ଈଶ୍ୱରତି ଆନାତ୍। ଆରେ ଇଲେକେ ର ମାର୍ତି କାତା ପା। ଯଦି ମାର୍ତି ଚିରା ଈଶ୍ୱରତି ଆନାତ୍, ଲାଗିଙ୍ଗ୍ ହେ ମାର୍ତି କେନ୍ଦା ପା ଈଶ୍ୱରତି ଆନିକ୍। 17 ଇସ୍ରାଏଲ ଜାତିନି ମାନାୟାର୍ ରଞ୍ଜାଙ୍ଗ୍ ହାର୍ଦି ଜିତ୍ମାର୍ତି କେନ୍ଦାଲେକେ ଆରେ ମା ଆକଦାଦି ଅବ୍ରାହାମ, ଇସାକ ଆରେ ଯାକୁବ ହେ ମାର୍ତି ଚିରାଙ୍ଗ୍ ଲେକେ, ଆରେ ଏପେଙ୍ଗ୍ ବିନ୍ଜାତିନି ମାନାୟାର୍ ର ରାନ୍ତି ଜିତ୍ମାର୍ତି କେନ୍ଦାଙ୍ଗ୍ ଲେକେ ମାଚାଦେର୍। ଏଚେପାଦ୍ନା ଈଶ୍ୱର ଅଲିବ୍ ମାର୍ତି କେନ୍ଦାକାଙ୍ଗ୍ କାତ୍ତାନ୍ ହେପାଦ୍ନା ମିଙ୍ଗେଙ୍ଗ୍ ଅଲିବ୍ ମାର୍ତ ଅଜି ଜଡ଼ାୟ୍ କିତ୍ତାନ୍, ଆରେ ଏପେଙ୍ଗ୍ ଅବ୍ରାହାମତିଙ୍ଗ୍ ଈଶ୍ୱରକିତି ପାର୍ମାଣ୍ନି ଆଶ୍ରିବାଦ୍ ପାୟାଆତାଦେର୍ ଆରେ ତା ହିମ୍ଣାୱାକ୍ଡ଼ା ଆତାଦେର୍। 18 ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ସାବ୍ଦାନ୍ ଆଜି ମାନି ଦର୍କାର୍, ଇନେସ୍କି ଏପେଙ୍ଗ୍ ହେ କେନ୍ଦାତାକେ ମାହା ଆତାଦେର୍ନା, ଏଚେପାଦ୍ନା ହେୱାରିଙ୍ଗ୍ ହେ ମାର୍ତି କେନ୍ଦା କାଦ୍ଦି ମାଚାର୍, ଇନେସ୍କି ମିଙ୍ଗେଙ୍ଗ୍ ଚିରାଙ୍ଗ୍ ହିଲେକ୍ ଇଦାଙ୍ଗ୍ ଏପେଙ୍ଗ୍ ପୁନ୍ଞ୍ଜି ମାନାଟ୍। 19 ଏପେଙ୍ଗ୍ ଜାର୍ ମାନ୍ତ ବାବିକିମାଟ୍, ର ମାର୍ତାଙ୍ଗ୍ କେନ୍ଦାଙ୍ଗ୍ କାତ୍ତିଲେକେ ଈଶ୍ୱର ତା ନିଜର୍ ଯିହୁଦି ଜାତିନି ମାନାୟାରିଙ୍ଗ୍ ପିସ୍ତି ହିୱାତାନ୍ନା। ଲାଗିଙ୍ଗ୍ ଏପେଙ୍ଗ୍ ବିନ୍ଜାତିନି ମାନାୟାରିଙ୍ଗ୍ ଈଶ୍ୱର ଆସ୍ତାନ୍ନା। ଏପେଙ୍ଗ୍ ତ ତୁଇଜି ମାଚି ର କେନ୍ଦାତିଙ୍ଗ୍ ମାର୍ତ ଜଡ଼ାୟ୍କିତି ଲେକେ। 20 ହେୱାର୍ ଈଶ୍ୱରତିଙ୍ଗ୍ ପାର୍ତି କିୱିତି କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ତାବେତାଙ୍ଗ୍ କାଦ୍ଦି ତୁହିହିତାନ୍। ଆରେ ଏପେଙ୍ଗ୍ ତାଙ୍ଗେଙ୍ଗ୍ ପାର୍ତିକିତି କାଜିଙ୍ଗ୍ ଏପେଙ୍ଗ୍ ହେୱାର୍ ବାହା ପାୟାଆତାଦେର୍, ଲାଗିଙ୍ଗ୍ ଏପେଙ୍ଗ୍ ଜାର୍ତିଙ୍ଗ୍ ଗାଜାକାଙ୍ଗ୍ ଇଞ୍ଜି ବାବିକିମାଟ୍, ମାତର୍ ଈଶ୍ୱରତିଙ୍ଗ୍ ପାଣ୍ଡ୍ରାଆଡ। 21 ଲାଗିଙ୍ଗ୍ ଯଦି ଈଶ୍ୱର ତା ହାର୍ କେନ୍ଦାଲେକେ ଯିହୁଦି ଜାତିନି ମାନାୟାରିଙ୍ଗ୍ ଦୟା କିୱାଦାଙ୍ଗ୍ କାତ୍ତାନ୍, ଆରେ ଏପେଙ୍ଗ୍ ର ରାନ୍ତି ଅଲିବ୍ ମାର୍ତି କେନ୍ଦାଲେକେ, ମିଙ୍ଗେଙ୍ଗ୍ ତ ମୁଡ଼୍କେ ଦୟା କିଦ୍ୱାଦାଙ୍ଗ୍ କାଦ୍ଦି ତୁସିହିନାନ୍। 22 ଲାଗିଙ୍ଗ୍ ଏପେଙ୍ଗ୍ ଈଶ୍ୱର ଦୟା ଆରେ ତା କାତା ମାନିକିୱି ମାନାୟାରିଙ୍ଗ୍ ଦଣ୍ଡ୍ ହିନି ବିଷୟତିଙ୍ଗ୍ ବୁଜାଆଡ, ଇନେସ୍କି ହେୱାନ୍ ତା କାତା ମାନି କିୱାକାରିଙ୍ଗ୍ ଦଣ୍ଡ୍ ହିନାନ୍। ମାତର୍ ହେୱାନ୍ ମିଙ୍ଗେଙ୍ଗ୍ ଦୟା କିଦ୍ନାନା, ଇନେସ୍କି ଏପେଙ୍ଗ୍ ତାଙ୍ଗେଙ୍ଗ୍ ପାର୍ତି କିନାଦେରା। ମାତର୍ ଏପେଙ୍ଗ୍ ଯଦି ତାଙ୍ଗେଙ୍ଗ୍ ପାର୍ତି କିନାକା ବନ୍ଦ୍ କିନାଦେର୍, ଲାଗିଙ୍ଗ୍ ହେୱାନ୍ ମିଙ୍ଗେଙ୍ଗ୍ ପା କାଦ୍ଦି ତୁସିହିଦ୍ନାନ୍। 23 ଆରେ ଯଦି ହେୱାର୍ ଆରେରଗ ତା ମାନ୍ବାଦ୍ଲାୟ୍ କିନାର୍ ଆରେ ଈଶ୍ୱରତିଙ୍ଗ୍ ପାର୍ତିକିନାର୍, ଲାଗିଙ୍ଗ୍ ଈଶ୍ୱର ହେୱାରିଙ୍ଗ୍ ଆରେରଗ ମାର୍ତ ଜଡ଼ାୟ୍ କିଦେଙ୍ଗ୍ ଆଡ୍ନାନ୍। ତାବେ ଏଲେଙ୍ଗ୍ କିନି ଶାକ୍ତି ମାନାତ୍। 24 ଏପେଙ୍ଗ୍ ବିନ୍ଜାତିନି ମାନାୟାର୍ ରାନ୍ତି ଜିତ୍ମାର୍ତି କେନ୍ଦାଲେକେ। ଯଦି ଈଶ୍ୱର ତା ହାର୍ କେନ୍ଦାଲେକେ ଯିହୁଦି ଜାତିନି ମାନାୟାରିଙ୍ଗ୍ ହଣ୍ଜି ଅଲ୍ଗା କିନାନ୍ ଆରେ ମିଙ୍ଗେଙ୍ଗ୍ ତାବେ ଜଡ଼ାୟ୍ କିଦେଙ୍ଗ୍ ଆଡ୍ନାନ୍। ଲାଗିଙ୍ଗ୍ ହେୱାନ୍ ତା ହାର୍ ଜିତ୍ମାର୍ତି କେନ୍ଦାଲେକେ ଯିହୁଦି ଜାତିନି ମାନାୟାରିଙ୍ଗ୍ ଆରେରଗ ଜଡ଼ାୟ୍ କିଦେଙ୍ଗ୍ ବେସି ତେର୍-ତେର୍ ଆନାନ୍। ଏଚେପାଦ୍ନା ହେୱାର୍ ଆରେରଗ ଈଶ୍ୱରତିଙ୍ଗ୍ ପାର୍ତିକିନାର୍, ଇନେସ୍କି ହେୱାର୍ ନେ ହେ ହାର୍ଦି ଜିତ୍ମାର୍ତି କେନ୍ଦା। ଇସ୍ରାଏଲ ଜାତିନି ମାନାୟାର୍ ଉଦାର୍ ପାୟାଆନି କାତା 25 ଏ ଟଣ୍ଡାର୍କାଦେର୍ ମିଙ୍ଗେଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା, ଏପେଙ୍ଗ୍ ଜାର୍ତିଙ୍ଗ୍ ଚଞ୍ଜିଆ ଆମାଟ୍। ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ଇସ୍ରାଏଲ ଜାତିନି ମାନାୟାର୍ ବିଷୟରେ ର ଚାନିଆଆନି କାତା ୱେଚ୍ଚାନାଙ୍ଗା। କେତ୍ଜାଣ୍ ଇସ୍ରାଏଲ ଜାତିନି ମାନାୟାର୍ ଈଶ୍ୱରତିଙ୍ଗ୍ ପାର୍ତିକିନି କାଜିଙ୍ଗ୍ ଜାର୍ ମାନ୍ତ ଗାର୍ବି ଆତାର୍। ମାତର୍ ଈଶ୍ୱର ବାଚିକିତି ୱିଜାର୍ ବିନ୍ଜାତିନି ମାନାୟାର୍ ଖ୍ରୀଷ୍ଟଙ୍ଗ୍ ପାର୍ତି କିୱିପାତେକ୍, ହେୱାର୍ ଇଲେକେ ଈଶ୍ୱର କାତାତିଙ୍ଗ୍ ଗାର୍ବି ଆଜି ମାନାର୍। 26 ତାପାଚେ ୱିଜୁ ଇସ୍ରାଏଲ ଜାତିନି ମାନାୟାରିଙ୍ଗ୍ ଈଶ୍ୱର ଉଦାର୍ କିନାନ୍। ମି ମାନ୍ତ ମାନାତ୍ ଭବିଷ୍ଯତବକ୍ତାର୍ ଇନାକା ଇଞ୍ଜି ୱେଚ୍ଚାର୍ନା, “ଯିରୁଶାଲାମ ସହର୍ତାଙ୍ଗ୍ ରକାନ୍ ରକ୍ଷା କିଦ୍ନି ମାନାୟ୍ ୱାନାନ୍ ଆରେ ହେୱାନ୍ ଯାକୁବ କୁଟୁମ୍ନି ଇସ୍ରାଏଲ ମାନାୟାର୍ ଅଦରମ୍ନି କାମାୟ୍ତାଙ୍ଗ୍ ଉଦାର୍ ପାୟା ଆଦେଙ୍ଗ୍ ସାଇଜ କିନାନ୍।” 27 ଆରେ ଆପେଙ୍ଗ୍ ଏଚେପାଦ୍ନା ହେୱାର୍ ପାପ୍ତିଙ୍ଗ୍ କେମା କିନାସ୍, ହେପାଦ୍ନା ଆପେଙ୍ଗ୍ ହେୱାର୍ ହୁଦାଙ୍ଗ୍ ନିୟମ୍ କିନାପ୍। 28 ଯିହୁଦି ଜାତିନି ମାନାୟାର୍ ଈଶ୍ୱରତିଙ୍ଗ୍ ବିରଦ୍ କିନାରା, ଇନେସ୍କି ହେୱାର୍ ହାର୍ଦିକାବୁର୍ତିଙ୍ଗ୍ ପାର୍ତିକିନି ଇଚା କିଉରା ଆରେ ହେଦାଙ୍ଗ୍ ମି କାଜିଙ୍ଗ୍ ବେସି ଲାବ୍ ଆତାତ୍ନା। ମାତର୍ ତା ଆକଦାଦିରିଙ୍ଗ୍ ଈଶ୍ୱର ବେସି ଲାଡ୍ କିନାନା ଇନେସ୍କି ହେୱାରିଙ୍ଗ୍ ତା ଲକ୍ କିଦେଙ୍ଗ୍ ଆଗେତାଙ୍ଗ୍ ବାଚି କିତାନ୍ନା। 29 ଇନେସ୍କି ଈଶ୍ୱର ହିତି ଦାନ୍ ଆରେ ହେୱାନ୍ ବାଚିକିତି ମାନାୟାରିଙ୍ଗ୍ ହିତି କାତା ଇନାୱେଡ଼ାଙ୍ଗ୍ ପା ଅଲ୍ଗା କିଉନ୍। 30 ଇନେସ୍କି ଆଗେ ଏପେଙ୍ଗ୍ ବିନ୍ଜାତିନି ମାନାୟ୍ କାଦେର୍ ଈଶ୍ୱର ଆଦେସ୍ତିଙ୍ଗ୍ ମାନିକିୱାଦାଙ୍ଗ୍ ମାଚାଦେର୍, ଆରେ ନଙ୍ଗୟ୍ ତା ଯିହୁଦି ଜାତିନି ମାନାୟାର୍ ତା କାତା ମାନିକିୱିତିଲେ, ଈଶ୍ୱର ମିଙ୍ଗେଙ୍ଗ୍ ଦୟା କିତ୍ତାନ୍ନା। 31 ହେଲେକେ ନଙ୍ଗୟ୍ ଇସ୍ରାଏଲନି ମାନାୟାର୍ ଈଶ୍ୱର କାତାତିଙ୍ଗ୍ ମାନି କିଉରା, ଆରେ ଈଶ୍ୱର ମିଙ୍ଗେଙ୍ଗ୍ ଦୟା କିତ୍ତାନ୍ନା। ମାତର୍ କେତେକ୍ ଦିନ୍ ପାଚେ ହେୱାରିଙ୍ଗ୍ ପା ଈଶ୍ୱର ଦୟା କିନାନ୍। 32 ଈଶ୍ୱର ୱିଜୁ ବିନ୍ଜାତିନି ମାନାୟାରିଙ୍ଗ୍ ଦୟାକିନି କାଜିଙ୍ଗ୍, ହେୱାନ୍ ଯିହୁଦିରିଙ୍ଗ୍ ତା କାତାତିଙ୍ଗ୍ ମାନି କିୱେଦେଙ୍ଗ୍ ହିତାନ୍ନା। 33 ଆପେଙ୍ଗ୍ ଈଶ୍ୱର କାଜିଙ୍ଗ୍ ବେସି ଚାନିଆ ଆନାପା, ଇନେସ୍କି ତା ଇଚାତାଙ୍ଗ୍ ଇମ୍ଣି ମାନାୟ୍ ପା ବୁଜାୟ୍ କିଦେଙ୍ଗ୍ ଆଡୁନ୍ ଆରେ ତା ଉପାୟ୍ତିଙ୍ଗ୍ ଇମ୍ଣି ମାନାୟ୍ ପା ବୁଜା ଆଦେଙ୍ଗ୍ ଆଡୁନ୍। ଇନେସ୍କି ହେୱାନ୍ ଦୟା କିଦ୍ଦେଙ୍ଗ୍, ଆରେ ତା ବୁଦି ଆରେ ଜ୍ଞାନ୍ ବେସି ଗାଜା। 34 ଲାଗିଙ୍ଗ୍ ଇନେର୍ ପା ପୁନୁର୍ ଈଶ୍ୱର ଇନାକା ତା ମାନ୍ତ ବାବିକିନାନା। ଆରେ ଇନେରିଙ୍ଗ୍ ପା ବେସି ବୁଦି ହିଲେତ୍ ଯେ, ଈଶ୍ୱରତିଙ୍ଗ୍ ଉପାୟ୍ ହିଦେଙ୍ଗ୍ ଆଡ୍ନାନ୍। 35 ଆରେ ଇଲେକେ ଇନେର୍ ପା ହିଲୁର୍ ଯେ ଈଶ୍ୱରତିଙ୍ଗ୍ ହିଦେଙ୍ଗ୍ ଆଡ୍ନାନ୍, ଆରେ ଈଶ୍ୱର ତାଙ୍ଗେଙ୍ଗ୍ ରୁଣ୍ ହୁଜା ଆନାନ୍। 36 ଇନେସ୍କି ୱିଜୁ ଜିନିଷ୍ ଈଶ୍ୱରତାଙ୍ଗ୍ ୱାନାତ୍। ହେୱାନ୍ ୱିଜୁ ଜିନିଷ୍ ରସ୍ତାନ୍ନା ଆରେ ହେ ୱିଜୁ ଜିନିଷ୍ ତାଦାଙ୍ଗ୍। ହେୱାନ୍ ୱିଜୁଦିନ୍ ସନ୍ମାନ୍ ପାୟାଆନି ଦର୍କାର୍। ଆମେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation