ରୋମିୟ 10 - New Testament in Pengo Parja Language1 ଏ ଟଣ୍ଡାର୍କାଦେର୍, ଆନେଙ୍ଗ୍ ଈଶ୍ୱରତାକେ ନା ଗରବ୍ତାଙ୍ଗ୍ ପାର୍ତାନା କିଦେଙ୍ଗ୍ ଇଚା କିନାଙ୍ଗା, ଇନେସ୍କି ଯିହୁଦି ଜାତିନି ମାନାୟାରିଙ୍ଗ୍ ପା ଈଶ୍ୱର ଉଦାର୍ କିୟେନ୍। 2 ଇନେସ୍କି ହେୱାର୍ ଈଶ୍ୱରତିଙ୍ଗ୍ ଆହା କିନାରା, ମାତର୍ ହେୱାର୍ ଈଶ୍ୱରତିଙ୍ଗ୍ ଟିକ୍ ବାବ୍ରେ ହେବା କିଦେଙ୍ଗ୍ ପୁଞ୍ଜେଙ୍ଗ୍ ଆଡୁରା। ଆନେଙ୍ଗ୍ ତା ସାକି ମାନାଙ୍ଗ୍। 3 ଇନେସ୍କି ଈଶ୍ୱର ମାନାୟାରିଙ୍ଗ୍ ଦରମ୍ କିନାନା, ଇ ଦରମ୍ ବିଷୟତିଙ୍ଗ୍ ଯିହୁଦିନି ମାନାୟାର୍ ବୁଜା ଆଦେଙ୍ଗ୍ ଆଡୁରା, ଆରେ ହେୱାର୍ ନିଜେ-ନିଜେ ଦରମ୍ ମାନାୟ୍ ଆନି କାଜିଙ୍ଗ୍ ଉପାୟ୍ କିନାରା। 4 ଲାଗିଙ୍ଗ୍ ଖ୍ରୀଷ୍ଟ ଦରମ୍ ସାସ୍ତର୍ତାକେ ଲେକାଆତି ନିୟମ୍ ୱିଜୁତିଙ୍ଗ୍ ପୁରା କିତାନ୍ନା, ଲାଗିଙ୍ଗ୍ କେତେକ୍ ମାନାୟ୍ ତାଙ୍ଗେଙ୍ଗ୍ ପାର୍ତିକିନାର୍, ଈଶ୍ୱର ହେୱାରିଙ୍ଗ୍ ଦରମ୍ ମାନାୟ୍ କିନାନ୍। ୱିଜାର୍ କାଜିଙ୍ଗ୍ ରକ୍ଷା ପାୟାଆନି କାତା 5 ମୋଶା ଏଚେପାଦ୍ନା ଦରମ୍ ସାସ୍ତର୍ ଲେକିକିତାନ୍ନା, ହେୱାନ୍ ହେବେ ଇଦାଙ୍ଗ୍ ଲେକିକିତାନ୍ନା ଯେ, ଦରମ୍ ସାସ୍ତର୍ନି ନିୟମ୍ ବିଷୟରେ ମାନିକିତିସ୍ ଈଶ୍ୱର ହେୱାରିଙ୍ଗ୍ ଦରମ୍ ମାନାୟ୍ କିନାନ୍। 6 ମାତର୍ ମାନାୟାର୍ ପାର୍ତି କିଜି ଈଶ୍ୱର ଆଗେ ଦରମ୍ ଆନାର୍, ହେ ବିଷୟରେ ସାସ୍ତର୍ ଇଲେକେ ୱେଚ୍ନାତା ଯେ, “ଏପେଙ୍ଗ୍ ମାନ୍ତ-ମାନ୍ତ ୱେଚ୍ମାଟ୍ ଇନେର୍ ସରଗ୍ତାକେ ହାଲ୍ଜି ଖ୍ରୀଷ୍ଟଙ୍ଗ୍ ଇନେର୍ ଜୁତ୍ତି ତାନାନ୍,” 7 ନଇଲେ ଇନେର୍ ନରକ୍ତାକେ ହାଲ୍ଜି ଯୀଶୁ ଖ୍ରୀଷ୍ଟଙ୍ଗ୍ ହାଃତିତାଙ୍ଗ୍ ନିକ୍ଚି ତାନାନ୍। 8 ଆପେଙ୍ଗ୍ ଶୁଣାୟ୍ କିନାପା ଯେ, ଖ୍ରୀଷ୍ଟଙ୍ଗ୍ ପାର୍ତିକିତି କାଜିଙ୍ଗ୍ ଉଦାର୍ ପାୟାଆତାସ୍ନା। ଏପେଙ୍ଗ୍ ଇ କାତାତିଙ୍ଗ୍ ୱେଚ୍ନାଦେରା ଆରେ ଏପେଙ୍ଗ୍ ଜାର୍ ମାନ୍ତ ଇଡ଼୍ତାଦେର୍ନା, ହେ ସାସ୍ତର୍ତାକେ ଲେକାଆତାତ୍ନା ଯେ, ଏପେଙ୍ଗ୍ ଈଶ୍ୱରତିଙ୍ଗ୍ ପାର୍ତିକିନି ଦର୍କାର୍। 9 ଇନେସ୍କି ଏପେଙ୍ଗ୍ ଯଦି ୱେଇଦାଙ୍ଗ୍ ଯୀଶୁଙ୍ଗ୍ ମାପୃ ଇନାଦେରା, ଆରେ ତାଙ୍ଗେଙ୍ଗ୍ ଈଶ୍ୱର ହାଃତିତାଙ୍ଗ୍ ନିକ୍ତାନ୍ ଇଞ୍ଜି ଏପେଙ୍ଗ୍ ଗରବ୍ତାଙ୍ଗ୍ ପାର୍ତି କିନାଦେର୍, ଲାଗିଙ୍ଗ୍ ଏପେଙ୍ଗ୍ ରକ୍ଷା ପାୟାଆନାଦେର୍। 10 ଆସେଙ୍ଗ୍ ଯଦି ଦରମ୍ ମାନାୟ୍ ଆନି କାଜିଙ୍ଗ୍ ଗରବ୍ତାଙ୍ଗ୍ ପାର୍ତି କିନାସ୍ ଆରେ ଉଦାର୍ ପାୟାଆନି କାଜିଙ୍ଗ୍ ଜାର୍ ୱେଇଦାଙ୍ଗ୍ ଖ୍ରୀଷ୍ଟ ନେ ମାପୃ ଇଞ୍ଜି ୱେଚ୍ନାସ୍ ଆସେଙ୍ଗ୍ ଉଦାର୍ ପାୟାଆନାସ୍। 11 ଇନେସ୍କି ଦରମ୍ ସାସ୍ତର୍ତାକେ ଲେକା ମାନାତ୍, ଇମ୍ଣି ମାନାୟ୍ ତାଙ୍ଗେଙ୍ଗ୍ ପାର୍ତି କିନାନା ହେୱାନ୍ ଇନାୱେଡ଼ାଙ୍ଗ୍ ପା ନିରାସ୍ ଆଉନ୍। 12 ଯିହୁଦି ଜାତିନି ମାନାୟାର୍ ଆୟେର୍ କି ବିନ୍ଜାତିନି ମାନାୟାର୍ ଆଏର୍ ହାମାନ୍ ସନ୍ମାନ୍ ପାୟାଆନାର୍। ହେୱାର୍ ୱିଜାର୍ ର ଈଶ୍ୱରତିଙ୍ଗ୍ ନେ ପାର୍ତିକିନାରା, ଏଚେପାଦ୍ନା ହେୱାର୍ ଈଶ୍ୱରତିଙ୍ଗ୍ ପାର୍ତାନା କିଜି ଇନାକା ଏନ୍ନାର୍। ଲାଗିଙ୍ଗ୍ ହେୱାନ୍ ହେୱାରିଙ୍ଗ୍ ଦୟା କିନାନ୍। 13 ଇନେସ୍କି ଦରମ୍ ସାସ୍ତର୍ତାକେ ଲେକାଆତାତ୍ନା, “ଏଚେଜାଣ୍ ଈଶ୍ୱରତାଙ୍ଗ୍ ରକ୍ଷା ପାୟା ଆଦେଙ୍ଗ୍ ପାର୍ତାନା କିନାର୍, ହେ ୱିଜାରିଙ୍ଗ୍ ଈଶ୍ୱର ରକ୍ଷା କିନାନ୍।” 14 ଯଦି ହେୱାର୍ ଈଶ୍ୱରତିଙ୍ଗ୍ ପାର୍ତି କିଉର୍? ଲାଗିଙ୍ଗ୍ ତାଙ୍ଗେଙ୍ଗ୍ ପାର୍ତାନା କିଜି ଏନ୍ତେଙ୍ଗ୍ ଆଡୁର୍। ଇନେସ୍କି ହେୱାର୍ ତା ବିଷୟରେ ଇନାୱେଡ଼ାଙ୍ଗ୍ ପା ପୁନ୍ୱାତାର୍ନା। ଲାଗିଙ୍ଗ୍ ହେୱାର୍ ପାର୍ତି ପା କିଦେଙ୍ଗ୍ ଆଡୁର୍, ଆରେ ହେୱାରିଙ୍ଗ୍ ଇନେର୍ ଯଦି ତା ବିଷୟରେ ୱେଚୁର୍, ଲାଗିଙ୍ଗ୍ ହେୱାର୍ ଇନେସ୍କିଜି ୱେନାର୍? 15 ଇନେସ୍କି ହେ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ରୱାନିଙ୍ଗ୍ ପକ୍ତିତିସ୍ନେ ହେୱାନ୍ ହେୱାରିଙ୍ଗ୍ ଶୁଣାୟ୍ କିନାନ୍, ହେଦାଙ୍ଗ୍ କାଜିଙ୍ଗ୍ ଦରମ୍ ସାସ୍ତରତାକେ ଲେକାଆତାତ୍ନା, ଇମ୍ଣି ମାନାୟ୍ ଈଶ୍ୱରତି ହାର୍ଦିକାବୁର୍ତିଙ୍ଗ୍ ତାନାର୍ ହେୱାର୍ ପାନାଙ୍ଗ୍ ବେସି ସୁନ୍ଦର୍। 16 ମାତର୍ ୱିଜାର୍ ମାନାୟ୍ ଈଶ୍ୱରତି ହାର୍ଦିକାବୁର୍ତିଙ୍ଗ୍ ଆହୁର୍, ଇନେସ୍କି ଯିଶାୟ ଭବିଷ୍ଯତବକ୍ତା ତା ଦରମ୍ ସାସ୍ତର୍ତାକେ ଲେକିକିତାନ୍ନା, “ଏ ମାପୃ ଇନେର୍ ପା ଆପେଙ୍ଗ୍ ଶୁଣାଇକିତି ହାର୍ଦିକାବୁର୍ତିଙ୍ଗ୍ ପାର୍ତି କିୱାତାର୍। 17 ଇନେସ୍କି ହାର୍ଦିକାବୁର୍ତିଙ୍ଗ୍ ୱେଚିସ୍ ନେ ପାର୍ତି କିୟାଆନାତ୍, ଆରେ ଖ୍ରୀଷ୍ଟ ନେ ହେ ହାର୍ଦିକାବୁର୍। 18 ମାତର୍ ଯିହୁଦି ଜାତିନି ମାନାୟାର୍ ବିଷୟରେ, ଆସେଙ୍ଗ୍ ଇନାକା ଇଞ୍ଜି ୱେଚ୍ନାସ୍? ହେୱାର୍ ହାତ୍ପା ହାର୍ଦିକାବୁର୍ତିଙ୍ଗ୍ ୱେଚାର୍ନା କି? ଆଁ, ହେୱାର୍ ୱେଚାର୍ନା। ଇନେସ୍କି ସାସ୍ତର୍ତାକେ ଲେକାଆତାତ୍ନା, ଈଶ୍ୱର ପୁର୍ତି ଉବ୍ଜାଇ କିତି ବିଷୟ ୱିଜାର୍ ମାନାୟାର୍ ପୁଚାର୍ନା, ଆରେ ତା କାତା ପୁର୍ତିନି ୱିଜୁ ବାହାତାକେ ଇକାତାତ୍ନା।” 19 ମାତର୍ ଇସ୍ରାଏଲନି ମାନାୟାର୍ ଖ୍ରୀଷ୍ଟନି ହାର୍ଦିକାବୁର୍ତିଙ୍ଗ୍ ହାତ୍ପା ପୁନ୍ଞ୍ଜି ମାଚାର୍, ଆରେ ଈଶ୍ୱର ଆଗେ ପା ମୋଶା କାଜିଙ୍ଗ୍ ହେୱାରିଙ୍ଗ୍ ୱେଚ୍ଚି ମାଚାନ୍, “ଆନେଙ୍ଗ୍ ବିନ୍ଜାତିନି ମାନାୟାରିଙ୍ଗ୍ ଲାଡ୍ କିନାଙ୍ଗ୍, ଆରେ ଏପେଙ୍ଗ୍ ଆକାର୍ ଆନାଦେର୍। ଆନେଙ୍ଗ୍ ହେ ବକ୍ୱା ବିନ୍ଜାତିରିଙ୍ଗ୍ ଆଶ୍ରିବାଦ୍ କିନାଙ୍ଗ୍, ଆରେ ଏପେଙ୍ଗ୍ ରିସା ଆନାଦେର୍। 20 ଆରେ ପାଚେ ଯିଶାୟ ଭବିଷ୍ଯତବକ୍ତା ତା କାଜିଙ୍ଗ୍ ସାସ୍ ଆଜି ହେୱାରିଙ୍ଗ୍ ୱେଚ୍ଚାନ୍, ନାଙ୍ଗେଙ୍ଗ୍ ଦାସ୍ତାୱାକାର୍ ଗାଟା ଆତ୍ତାର୍ନା। ଆରେ ନା ବିଷୟରେ ୱେନ୍ବାଆଦ୍ୱି ମାନାୟାର୍ ଆଗେ ଆନେଙ୍ଗ୍ ନିଜେ ଚଞ୍ଜିଆ ଆତାଙ୍ଗ୍। 21 ମାତର୍ ଈଶ୍ୱର ଇସ୍ରାଏଲ ବିଷୟରେ ଇଲେକେ ୱେଚ୍ଚି ମାଚାନ୍ ଯେ, ଆନେଙ୍ଗ୍ ୱେଡ଼ାବୁଡି ମିଙ୍ଗେଙ୍ଗ୍ ପମ୍ନ୍ଦେଦେଙ୍ଗ୍ କେଇ ଲାମାୟ୍ କିଜି ମାଚାଙ୍ଗ୍, ଏପେଙ୍ଗ୍ ନା କାତା ମାନିକିଜି ନାତାକେ ୱାୱାତାଦେର୍ନା, ମାତର୍ ନା ହୁଦାଙ୍ଗ୍ ଜିକାଟାଣା ଆଜି ମାଚାଦେର୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation