ରୋମିୟ 1 - New Testament in Pengo Parja Languageଜୱାର୍ 1 ଆନେଙ୍ଗ୍ ପାଉଲ ଯୀଶୁ ଖ୍ରୀଷ୍ଟ ଦାସ୍, ଇ ଚିଟି ଲେକିକିତାଙ୍ଗ୍ନା, ଈଶ୍ୱର ନାଙ୍ଗେଙ୍ଗ୍ ଇ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ବାଚିକିତି ଚେଲା କିଜି ପକ୍ତାତାନ୍ନା। 2 ଈଶ୍ୱର ଇ ହାର୍ଦିକାବୁର୍ ହିଦ୍ଦେଙ୍ଗ୍ ବେସିଦିନ୍ ଆଗେ ପାର୍ମାଣ୍ କିଜି ମାଚାନ୍। ଆରେ ଭବିଷ୍ଯତବକ୍ତା ତା ଦରମ୍ ସାସ୍ତର୍ତାକେ ଲେକିକିଜି ମାଚାର୍। 3 ଇ ହାର୍ଦିକାବୁର୍ ଈଶ୍ୱର ମେହି, ମା ମାପୃ ଯୀଶୁ ଖ୍ରୀଷ୍ଟ ବିଷୟରେ ହେୱାନ୍ ମାନାୟ୍ ରୁପ୍ ଆଜି ପୁର୍ତିତାକେ, ଦାଉଦ ରାଜାର୍ କୁଟୁମ୍ତାକେ ଜନମ୍ ଆଜି ମାଚାନ୍। 4 ଆରେ ମା ମାପୃ ଯୀଶୁ ଖ୍ରୀଷ୍ଟଙ୍ଗ୍ ଈଶ୍ୱର ମେହି ଇଞ୍ଜି ପୁଞ୍ଜେଙ୍ଗ୍ ଆଡ଼୍ତାସ୍, ଏଚେପାଦ୍ନା ଈଶ୍ୱର ପବିତ୍ର ଆତ୍ମା ଶାକ୍ତି ହୁଦାଙ୍ଗ୍ ଯୀଶୁଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିତାନ୍। 5 ଆନେଙ୍ଗ୍ ଖ୍ରୀଷ୍ଟ ଯୀଶୁଙ୍ଗ୍ ପାୟାଆତିଲେ ଈଶ୍ୱର ନାଙ୍ଗେଙ୍ଗ୍ ଦୟାକିତ୍ତାନ୍, ଆରେ ଈଶ୍ୱର ଇମ୍ଣାକା ୱିଜୁ ବିନ୍ଜାତିନି ମାନାୟାର୍ କାଜିଙ୍ଗ୍ କିତାନ୍ନା। ହେଦାଙ୍ଗ୍ ୱେଚ୍ନି କାଜିଙ୍ଗ୍ ଈଶ୍ୱର ନାଙ୍ଗେଙ୍ଗ୍ ଦୟାକିଜି ବାଚିକିତି ଚେଲାନି ଅଦିକାର୍ ହିତ୍ତାନ୍, ଲାଗିଙ୍ଗ୍ ହେୱାର୍ ପାର୍ତିକିନାର୍ ଆରେ ତା କାତା ୱିଜୁ ମାନିକିନାର୍, ଆରେ ପା ହେୱାନିଙ୍ଗ୍ ଗୌରବ କିନାର୍। 6 ରୋମ ଦେସ୍ତାକେ ମାନି ପାର୍ତିକିନି ମାନାୟ୍ କାଦେର୍ ପା ତା ବାଚିକିତି ମାନାୟାର୍ ହୁଦାଙ୍ଗ୍ ମାହାୟ୍ କିତ୍ତାନ୍ନା, ଈଶ୍ୱର ଇମ୍ଣି ମାନାୟାରିଙ୍ଗ୍ ଯୀଶୁ ଖ୍ରୀଷ୍ଟନି ଲକ୍ ଆନି କାଜିଙ୍ଗ୍ ବାଚି କିତ୍ତାନ୍ନା। 7 ଆନେଙ୍ଗ୍ ଇ ଚିଟି ରୋମ ସହରନି ମାନାୟାର୍ କାଜିଙ୍ଗ୍ ଲେକିକିନାଙ୍ଗା, ଈଶ୍ୱର ମିଙ୍ଗେଙ୍ଗ୍ ବେସି ଲାଡ୍ କିଦ୍ନାନା ଆରେ ମିଙ୍ଗେଙ୍ଗ୍ ତା ଜାର୍ ଲକ୍ ଆନି କାଜିଙ୍ଗ୍ ବାଚି କିତ୍ତାନ୍ନା। ଆବା ଈଶ୍ୱର ଆରେ ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା ଆରେ ଶାନ୍ତି ହିଦେନ୍। ପାଉଲ ରମ ସହରତ ହାଞ୍ଜେଙ୍ଗ୍ ମାନ୍ କିଜି ମାଚାନ୍ 8 ପାର୍ତୁମ୍, ଆନେଙ୍ଗ୍ ଯୀଶୁ ଖ୍ରୀଷ୍ଟ କାଜିଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଙ୍ଗା, ଇନେସ୍କି ଏପେଙ୍ଗ୍ ଯୀଶୁଙ୍ଗ୍ ପାର୍ତି କିନାଦେରା ଇଞ୍ଜି ୱିଜୁ ନିପ୍ଣି ମାନାୟାର୍ ଇଞ୍ଜ୍ନାରା। 9 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଈଶ୍ୱରତିଙ୍ଗ୍ ୱିଜୁଦିନ୍ ନାଣା ୱେଡ଼ା ପାର୍ତାନା କିନାଙ୍ଗା ଯେ, ଯଦି ହେୱାନ୍ ଇଚା କିଦ୍ନାନ୍ ଲାଗିଙ୍ଗ୍ ମିଙ୍ଗେଙ୍ଗ୍ ଗିଟାଆଦେଙ୍ଗ୍ ରଦିନ୍ ୱାନାଙ୍ଗ୍। 10 ଈଶ୍ୱର ପୁଚାନ୍ନା ଯେ, ମି କାଜିଙ୍ଗ୍ ଆରେ ମିଙ୍ଗେଙ୍ଗ୍ ଦର୍କାର୍ ଆଦ୍ନି ଜିନିଷ୍ କାଜିଙ୍ଗ୍ ଆନେଙ୍ଗ୍ ତାବେ ୱେଡ଼ା ନାଣା ପାର୍ତାନା କିନାଙ୍ଗା। ଆନେଙ୍ଗ୍ ତା ମେହି ହାର୍ଦିକାବୁର୍ ୱିଜାରିଙ୍ଗ୍ ଶୁଣାୟ୍ କିଜି ଈଶ୍ୱରତିଙ୍ଗ୍ ନା ଗରବ୍ତାଙ୍ଗ୍ ହେବା କିନାଙ୍ଗା, ଆରେ ଇବିଷୟ କାଜିଙ୍ଗ୍ ଈଶ୍ୱର ସାକି ମାନାନ୍। 11 ଇନେସ୍କି ଆନେଙ୍ଗ୍ ମିଙ୍ଗେଙ୍ଗ୍ ହୁଡ଼୍ଦେଦେଙ୍ଗ୍ ବେସି ଦିନ୍ତାଙ୍ଗ୍ ମାନ୍ କିନାଙ୍ଗା, ଆରେ ଆନେଙ୍ଗ୍ ମିଙ୍ଗେଙ୍ଗ୍ ସାସ୍ ହିଦ୍ନି ଆଶ୍ରିବାଦ୍ ହିଦ୍ଦେଙ୍ଗ୍ ଆଡ୍ନାଙ୍ଗ୍, ଲାଗିଙ୍ଗ୍ ଏପେଙ୍ଗ୍ ଆରେ ଆଦିକ୍ ଯୀଶୁଙ୍ଗ୍ ପାର୍ତି କିନାଦେର୍। 12 ଲାଗିଙ୍ଗ୍, ଆନେଙ୍ଗ୍ ମିଙ୍ଗେଙ୍ଗ୍ ସାସ୍ ହିଦ୍ନାଙ୍ଗ୍ ଆରେ ଏପେଙ୍ଗ୍ ନାଙ୍ଗେଙ୍ଗ୍ ସାସ୍ ହିଦ୍ନାଦେର୍। ଇନେସ୍କି ଏପେଙ୍ଗ୍ ନା ପାର୍ତିତିଙ୍ଗ୍ ପୁଚାଦେର୍ନା, ଆରେ ଆନେଙ୍ଗ୍ ମି ପାର୍ତିତିଙ୍ଗ୍ ପୁଚାଙ୍ଗ୍ନା। ଲାଗିଙ୍ଗ୍ ମା ପାର୍ତି ଆଦିକ୍ ବାଡା ଆନାତ୍ ହେଲେକେ ଆସେଙ୍ଗ୍ ଜାର୍-ଜାର୍ବିତ୍ରେ ସାସ୍ କିବା ଆୟା ଆନାତ୍। 13 ଏ ଟଣ୍ଡାର୍କାଦେର୍ ଆନେଙ୍ଗ୍ ମିଙ୍ଗେଙ୍ଗ୍ ପୁନି କିଦ୍ନାଙ୍ଗା ଯେ, ଆନେଙ୍ଗ୍ ମିତାକେ ୱାଦେଙ୍ଗ୍ ବେସି ଦିନ୍ତାଙ୍ଗ୍ ଉପାୟ୍ କିଜି ମାଚାଙ୍ଗ୍, ମାତର୍ ନଙ୍ଗୟ୍ ପାତେକ୍ ମିତାକେ ୱାଦେଙ୍ଗ୍ ଆଡ୍ୱାତାଙ୍ଗ୍ନା। ଇନେସ୍କି ବିନ୍ଜାତିନି ମାନାୟ୍ତିଙ୍ଗ୍ ଯୀଶୁଙ୍ଗ୍ ପାର୍ତି କିଦେଙ୍ଗ୍ ସାଇଜ କିତିଲେକେ ମିଙ୍ଗେଙ୍ଗ୍ ପା ଆଦିକ୍ ପାର୍ତି କିଦେଙ୍ଗ୍ ସାଇଜ କିଦ୍ଦେଙ୍ଗ୍ ଆଡ଼୍ତାଙ୍ଗ୍ମା। 14 ଗ୍ରୀକ୍ ଜାତିନି ମାନାୟାର୍ ଆୟେର୍ କି ବିନ୍ଜାତିନି ମାନାୟାର୍ ଆୟେର୍, ବୁଦି ମାନାକାର୍ ଆୟେର୍ କି ବୁଦି ହିଲାକାର୍ ଆୟେର୍, ଆନେଙ୍ଗ୍ ୱିଜୁ ମାନାୟ୍ତିଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ନା ଇଚା ମାନାତ୍। 15 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ରୋମ ଦେସ୍ତ ମାନି ମାନାୟ୍ତିଙ୍ଗ୍ ପା ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ମାନ୍ କିନାଙ୍ଗା। ହାର୍ଦିକାବୁର୍ନି ସାକ୍ତି 16 ଆନେଙ୍ଗ୍ ପୁରାପୁରି ବାବ୍ରେ ଖ୍ରୀଷ୍ଟତି ହାର୍ଦିକାବୁର୍ତିଙ୍ଗ୍ ପାର୍ତି କିନାଙ୍ଗା। ଇନେସ୍କି ହେଦାଙ୍ଗ୍ ୱିଜୁ ମାନାୟ୍ତିଙ୍ଗ୍ ଉଦାର୍ କିନି ଈଶ୍ୱରତି ଶାକ୍ତି, ଏଚେଜାଣ୍ ହାର୍ଦିକାବୁର୍ତିଙ୍ଗ୍ ପାର୍ତିକିନାର୍। ପାର୍ତୁମ୍ ଯିହୁଦି ମାନାୟ୍ତିଙ୍ଗ୍ ଉଦାର୍ କିଦେଙ୍ଗ୍ ଆରେ ପାଚେ ବିନ୍ଜାତିରିଙ୍ଗ୍ ଉଦାର୍ କିନାତ୍। 17 ଇନେସ୍କି ଇ ହାର୍ଦିକାବୁର୍ତାକେ, ଈଶ୍ୱର ପୁନି କିଦ୍ନାନା ଯେ, ହେୱାନ୍ ମାନାୟାରିଙ୍ଗ୍ ଇନେସ୍କିଜି ଦରମ୍ ଲକ୍ କିଦେଙ୍ଗ୍ ଆଡ୍ନାନ୍, ଯଦି ତାଙ୍ଗେଙ୍ଗ୍ ଆରମ୍ତାଙ୍ଗ୍ ହାରିହାରା ପାତେକ୍ ପାର୍ତି କିଜିମାନାର୍ ହେୱାରିଙ୍ଗ୍ ଦରମ୍ ମାନାୟ୍ କିଦେଙ୍ଗ୍ ଆଡ୍ନାତ୍। ଇଦାଙ୍ଗ୍ ବେସି ଆଗେ ଦରମ୍ ସାସ୍ତରତାକେ ଲେକାଆତାତ୍ନା, ପାର୍ତି କାଜିଙ୍ଗ୍ ଦରମ୍ ମାନାୟ୍ ଜିନାନ୍। ମାନାୟାର୍ ପାପ୍ କାଜିଙ୍ଗ୍ ଈଶ୍ୱର ରିସା ଆନାନା 18 ଇନେସ୍କି ଇମ୍ଣି ମାନାୟ୍ ଅଦରମ୍ କାମାୟ୍ ଆରେ ୱିଜୁ ପର୍କାର୍ ପାପ୍ କାମାୟ୍ କିନାନା, ହେୱାର୍ ସତ୍ ଈଶ୍ୱର ବିଷୟତିଙ୍ଗ୍ ମାନିକିୱାଦାଙ୍ଗ୍ ବିରଦ୍ କିନାର୍। ହେ କାମାୟ୍ କାଜିଙ୍ଗ୍ ଈଶ୍ୱର ସରଗ୍ତାଙ୍ଗ୍ ହେୱାରିଙ୍ଗ୍ ରିସା ଆନାନ୍। 19 ଈଶ୍ୱର ବିଷୟତିଙ୍ଗ୍ ୱିଜାର୍ ମାନାୟାର୍ ହାର୍ଦାଙ୍ଗ୍ ପୁଚାର୍ନା, ଇନେସ୍କି ଈଶ୍ୱର ହାର୍ଦାଙ୍ଗ୍ ପୁଞ୍ଜେଙ୍ଗ୍ ହେୱାରିଙ୍ଗ୍ ବୁଦି ହିତାନ୍ନା। 20 ଈଶ୍ୱର ପୁର୍ତିତିଙ୍ଗ୍ ଉବ୍ଜାଇ କିତିତାକେଣ୍ତାଙ୍ଗ୍ ମାନାୟାର୍ ତା ୱିଜ୍ୱି ଶାକ୍ତିତିଙ୍ଗ୍ ଆରେ ହେୱାନ୍ ସତ୍ ଈଶ୍ୱର ଇଞ୍ଜି ହାର୍ଦାଙ୍ଗ୍ ପୁଚାର୍ନା। ଲାଗିଙ୍ଗ୍ ଇନେର୍ପା ଆପେଙ୍ଗ୍ ଈଶ୍ୱରତିଙ୍ଗ୍ ପୁନ୍ୱାତାପ୍ନା ଇଞ୍ଜି ଇଞ୍ଜେଙ୍ଗ୍ ଆଡୁର୍। 21 ହେୱାର୍ ଈଶ୍ୱରତିଙ୍ଗ୍ ପୁଚାର୍ନା, ମାତର୍ ହେୱାନ୍ ଈଶ୍ୱର ଇଞ୍ଜି ଗୌରବ କିୱାତାର୍ କି ଦନ୍ଯବାଦ୍ ହିୱାତାର୍। ମାତର୍ ହେୱାର୍ ପାଙ୍ଗ୍ୱା ଚିନ୍ତାୱିଜୁ କିନାରା ଆରେ ହେୱାର୍ କରାପ୍ ଚିନ୍ତା ପା କିନାରା, ଇନେସ୍କି ହେୱାରିଙ୍ଗ୍ କରାପ୍ ମାନ୍ ମାଚିଲେ ହାର୍ ବିଷୟତିଙ୍ଗ୍ ବୁଜା ଆଦେଙ୍ଗ୍ ଆଡୁରା। 22 ହେୱାର୍ ଜାର୍-ଜାର୍ନେ ବୁଦି କାଟାକାପ୍ ଇଞ୍ଜି ବାବିକିତାର୍ ଆରେ ମୁର୍କ ଆତାର୍। 23 ଆରେ ହେୱାର୍ ଇନାୱେଡ଼ାଙ୍ଗ୍ ପା ହାଃୱି ଈଶ୍ୱରତିଙ୍ଗ୍ ଗୌରବ କିୱାଦାଙ୍ଗ୍, ଅଲପ୍ଦିନ୍ ଜିଜି ମାନି ମାନାୟାର୍, ପଟିଙ୍ଗ୍, ପଶୁଙ୍ଗ୍, ରାଚ୍କୁକାଙ୍ଗ୍ ମୁର୍ତି ରସ୍ତି ପୁଜା କିନାରା। 24 ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ତା ଗରବ୍ନି କରାପ୍ ଚିନ୍ତା ଅନୁସାରେ କାମାୟ୍ କିନି କାଜିଙ୍ଗ୍ ପିସ୍ତି ହିତାନ୍, ଆରେ ହେୱାର୍ ଇନେସ୍କି ଜାର୍-ଜାର୍ ଗାଗାଡ଼୍ ବିରଦ୍ତାଙ୍ଗ୍ ଗିଣ୍ କାମାୟ୍ କିତାର୍। 25 ହେୱାର୍ ଈଶ୍ୱରତି ସତ୍ ବିଷୟତିଙ୍ଗ୍ ପୁନ୍ଞ୍ଜି ପା ପାର୍ତି କିୱାତାର୍, ଆରେ ହେୱାର୍ ଜାର୍ ଇଚା ଅନୁସାରେ ମିଚ୍ ବିଷୟତିଙ୍ଗ୍ ପାର୍ତି କିତାର୍। ଇମ୍ଣି ଈଶ୍ୱର ୱିଜୁଦିନ୍ ପୁଜା ପାୟାଆନି ଦର୍କାର୍ ମାଚାତ୍ ହେୱାର୍ ହେ ଈଶ୍ୱରତିଙ୍ଗ୍ ପୁଜାକିୱାତାର୍। ମାତର୍ ହେୱାନ୍ ଉବ୍ଜାଇ କିତି ଜିନିସ୍ତିଙ୍ଗ୍ ପୁଜା କିତାର୍। ଆମେନ୍। 26 ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ବେସି ପାପ୍କିନି ମାନ୍ ହିତାନ୍। ଇନେସ୍କି ହେୱାର୍ ଡକୃହିକ୍ ଜାର୍ ଡକ୍ରାହିର୍ ହୁଦାଙ୍ଗ୍ ହୁଞ୍ଜ୍ୱାଦାଙ୍ଗ୍, ହେୱେକ୍ ତା ବିତ୍ରେ-ବିତ୍ରେ ହୁଞ୍ଜା ମାଗା ଆତିକ୍। ହେଦାଙ୍ଗ୍ ୱିଜୁତାଙ୍ଗ୍ ଗିଣ୍ନି ବିଷୟ। 27 ଆରେ, ଆଣ୍ଡ୍ରାଙ୍ଗ୍ ପା ହେଲେକେ ଗିଣ୍ କାମାୟ୍ କିତାର୍। ହେୱାର୍ ଜାର୍ ଡକ୍ରି ହୁଦାଙ୍ଗ୍ ହୁଞ୍ଜା ମାଗା ଆୱାଦାଙ୍ଗ୍ ହେୱାର୍ ଆଣ୍ଡ୍ରାଙ୍ଗ୍-ଆଣ୍ଡ୍ରାଙ୍ଗ୍ ହୁଞ୍ଜା ମାଗା ଆତାର୍, ଆରେ ହେୱାର୍ ହେ କରାପ୍ କାମାୟ୍ କିଜି ଟିକ୍ ଦଣ୍ଡ୍ତିଙ୍ଗ୍ ପାୟାଆତାର୍। 28 ଈଶ୍ୱରତି ସତ୍ ଜ୍ଞାନ୍ତିଙ୍ଗ୍ ମାନାୟାର୍ ମୁକ୍ଯ ଇଞ୍ଜି ବାବିକିୱାତାର୍, ଲାଗିଙ୍ଗ୍ ଈଶ୍ୱର ହେୱାରିଙ୍ଗ୍ ହେଲେକେ ବେସି ପାପ୍ କାମାୟ୍ କିନି କାଜିଙ୍ଗ୍ ହେୱାର୍ କରାପ୍ ଇଚା ଅନୁସାରେ ମାନ୍ ହିତାନ୍। ଆରେ ହେୱାର୍ ୱିଜୁ କିୱି କାମାୟ୍ କିତାର୍। 29 ହେୱାର୍ ୱିଜୁ ପର୍କାର୍ ପାପ୍, ଅଦରମ୍ କାମାୟ୍, ଲବ୍ରା ଆନାକା, ଆକାର୍ ଆନାକା, ରିସା ଆନାକା, ମାନାୟ୍ ଅହ୍ନାକା, ଗଣ୍ଡ୍ଗଲ୍ କିନାକା, ମିଚ୍ ୱେଚ୍ନାକା, ଟକାୟ୍ କିନାକା ଆରେ ଜାର୍-ଜାର୍ବିତ୍ରେ ବେସି କରାପ୍ ଚିନ୍ତା କିଜି ଯିବୁନ୍ କାଟିକିନାରା। 30 ଆରେ ହେୱାର୍ ଜାର୍-ଜାର୍ବିତ୍ରେ କରାପ୍ ବିଷୟ ୱେଚ୍ନାର୍, ଈଶ୍ୱରତିଙ୍ଗ୍ ଗିଣ୍ କିନାରା, ମାନାୟ୍ତିଙ୍ଗ୍ ଇନସ୍ତା କିନାରା, ଗର୍ବି ଆନାରା, ଆରେ ଜାର୍ତିଙ୍ଗ୍ ବେସି ହାର୍ ଇଞ୍ଜି ଚଞ୍ଜିଆ ଆନାରା। ହେୱାର୍ ପାପ୍ କିଦେଙ୍ଗ୍ ପୁନି ଉପାୟ୍ କିନାରା, ଆରେ ହେୱାର୍ ତା ତେହି ଲାତ୍ରାହିର୍ କାତାତିଙ୍ଗ୍ ମାନିକିଉର୍। 31 ହେୱାର୍ ବକୁୱା, ନିୟମ୍ତିଙ୍ଗ୍ ମାନିକିୱାକାର୍, ହେୱାର୍ ତା ପାର୍ତି ହିଲି ମାନାୟ୍, ଆରେ ହେୱାର୍ ଲାଡ୍ ଆରେ ଦୟା କିନାକା ପୁନ୍ୱାତାର୍ନା। 32 ଇମ୍ଣି ମାନାୟ୍ ହେଲେକେ ଯିବୁନ୍ କାଟିକିନାରା। ହେୱାର୍ ପୁଚାର୍ନା ଯେ, ଇଲେକେ କାମାୟ୍ କିତିସ୍ ଈଶ୍ୱର ମାଙ୍ଗେଙ୍ଗ୍ ହାଃନି ଦଣ୍ଡ୍ ହିଦ୍ନାନ୍, ଆରେ ହେୱାର୍ ପୁଚିସ୍ ପା ହେଲେକେ କାମାୟ୍ କିନାକାରିଙ୍ଗ୍ ଆଦିକ୍ କିଦେଙ୍ଗ୍ ୱାରିୟା ଆନାର୍ ଆରେ ଜେକନିକାରିଙ୍ଗ୍ କିନି କାଜିଙ୍ଗ୍ ଟିଉଲାୟ୍ କିନାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation