ହତ୍ତି 9 - New Testament in Pengo Parja Languageପାଞ୍ଚ୍ ନମ୍ବର୍ ମରି ଆଡ଼୍ତିଲେ ପୁର୍ତିତାକେ ପାର୍ତୁମ୍ ବିପତ୍ ୱାତାତ୍। 1 ତାପାଚେ ଏଚେପାଦ୍ନା ପାଞ୍ଚ୍ ନମ୍ବର୍ ଦୁତ୍ ମରି ତୁପ୍ତାତ୍, ହେପାଦ୍ନା ଆନେଙ୍ଗ୍ ହୁଡ଼୍ତାଙ୍ଗ୍ ଯେ, ବାଦାଡ଼୍ତାଙ୍ଗ୍ ପୁର୍ତିତାକେ ର ହୁକା ଆର୍ଦାତାତ୍। ତାଙ୍ଗେଙ୍ଗ୍ ପାତାଳ୍ନି କୁଚିକାଡିଙ୍ଗ୍ ହିଜିମାଚାନ୍। 2 ଏଚେପାଦ୍ନା ହେ ହୁକା ନେ କରାପ୍ ଦୁତ୍ ପାତାଳ୍ତିଙ୍ଗ୍ ଦୁୱେର୍ ଜେତାନ୍, ହେପାଦ୍ନା ଗାଜା ହଲିତାଙ୍ଗ୍ ଦୁଆଁ ହତ୍ତିଲେକେ ହେ ପାତାଳ୍ତାଙ୍ଗ୍ ଦାଅ-ଦାଅ ଆଜି ଦୁଆଁ ହତ୍ତାତ୍। ୱେଡ଼ା ଆରେ, ବାଦାଡ଼୍ତିଙ୍ଗ୍ ବେସି ମାଜ୍ଗା କିତାତ୍। 3 ହେ ଦୁଆଁତାଙ୍ଗ୍ ପାମିଙ୍ଗ୍ ହତ୍ତିକ୍, ଆରେ ପୁର୍ତିନି ୱିଜୁ ବାହାତାକେ ବାର୍ତି ଆତିକ୍। କାଚାକୁପି କାପ୍ତିଲେକେ ହେ ପାମିକାଙ୍ଗ୍ ହେଲେକେ ଈଶ୍ୱର ମାନାୟାରିଙ୍ଗ୍ କାପ୍ତେଙ୍ଗ୍ ଶାକ୍ତି ହିଜିମାଚାନ୍। 4 ହେ ପାମିକାଙ୍ଗ୍ ୱେଚ୍ଚି ମାଚାର୍, ଏପେଙ୍ଗ୍ କାଚ୍ରା, ଆରେ ମାର୍କୁକାଙ୍ଗ୍ ନଷ୍ଟ କିମାଟ୍, ମାତର୍ ଈଶ୍ୱରତି ସିଲ୍ ଇନେର୍ ନିଦାଣ୍ତ ସିଲ୍ ଅୱାତାର୍ନା ହେୱାରିଙ୍ଗ୍ ନେ କାପ୍ତେଙ୍ଗ୍ ଈଶ୍ୱର ଅଦିକାର୍ ହିଜିମାଚାନ୍। 5 ହେ ପାମିକାଙ୍ଗ୍ ମାନାୟାରିଙ୍ଗ୍ ମାର୍ନେ ଅହ୍ୱେଦେଙ୍ଗ୍ ୱେଚ୍ଚି ମାଚାର୍, ମାତର୍ କାଚାକୁପି କାପ୍ତିସ୍ ଇନେସ୍ ବିସ୍ କିନାତ୍ ପାଞ୍ଚ୍ମାସ୍ ପାତେକ୍ ହେ ପାମିଙ୍ଗ୍ ମାନାୟ୍ରିଙ୍ଗ୍ ଦୁଃକ୍ ହିଜି ମାଚିକ୍। 6 ହେ ଜୁଗ୍ତ ମାନାୟାର୍ ହାଃଦେଙ୍ଗ୍ ଦାହ୍ନାର୍ ମାତର୍ ହେୱାର୍ ମାରାଣ୍ ୱାଉତ୍। ହେୱାର୍ ହାଃଦେଙ୍ଗ୍ ବେସି ଇଚା କିନାର୍, ମାତର୍ ହେୱାର୍ ହାଃଦେଙ୍ଗ୍ ଆଡୁର୍। 7 ହେ ପାମିକାଙ୍ଗ୍ ଯୁଜ୍ କିନି ଗଡ଼ାତିଙ୍ଗ୍ ଜାଗ୍ରତ୍ କିତିଲେକେ ଚଞ୍ଜ୍ଜି ମାଚିକ୍, ହେୱାର୍ ହନାତାଙ୍ଗ୍ ରସ୍ତି ମୁକୁଟ୍ ତୁସ୍ଦି ମାଚିକ୍, ହେୱାର୍ ମୁମ୍ ମାନାୟାର୍ ମୁମ୍ଲେକେ ଚଞ୍ଜ୍ଜି ମାଚାତ୍। 8 ହେୱାର୍ ତେମୁଲ୍ ର କଗ୍ଲେ ତେମୁଲ୍ଲେକେ ଡେଙ୍ଗା ମାଚାତ୍, ଆରେ ହେୱାର୍ ଟାଡାଙ୍ଗ୍ ସିଂହ ବୁର୍କାନି ଟାଡାଙ୍ଗ୍ଲେକେ ମାଚିକ୍। 9 ହେୱାର୍ ଅସ୍ତର୍ ସସ୍ତର୍ ଲୱାତାଙ୍ଗ୍ ରସ୍ତି ମାଚାତ୍, ଆରେ ହେୱାର୍ ମାରାଙ୍ଗ୍ ଯୁଜ୍ କିଦେଙ୍ଗ୍ ଗୁଦ୍-ଗୁଦ୍ ଇନ୍ଙ୍ଗା ୱାନି ସେନାର୍ ରତ୍ ଗଡ଼ାଲେକେ ସବଦ୍ ଆଜିମାଚାତ୍। 10 କାଚାକୁପିତିଙ୍ଗ୍ ଇନେସ୍ ନିଙ୍ଗୁଣ୍ତାକେ ବିସ୍ ମାନାତ୍, ହେ ପାମିକାଙ୍ଗ୍ ପା ନିଙ୍ଗୁଣ୍ତାକେ ବିସ୍ ମାଚାତ୍, ହେୱାର୍ ଶାକ୍ତି ହୁଦାଙ୍ଗ୍ ମାନାୟାରିଙ୍ଗ୍ ଦୁଃକ୍ ହିଜି ମାଚିକ୍। ହେୱାରିଙ୍ଗ୍ ଇ ଶାକ୍ତି ପାଞ୍ଚ୍ମାସ୍ କାଜିଙ୍ଗ୍ ହିଜି ମାଚାର୍। 11 ପାତାଳ୍ନି ଦୁତ୍ ହେୱାର୍ ରାଜା ମାଚାତ୍, ଏବ୍ରୀ ବାଷାତାଙ୍ଗ୍ ତା ତର୍ ଆବାଦାନ୍ ମାଚାତ୍, ଆରେ ଗ୍ରୀକ୍ ବାଷାତାଙ୍ଗ୍ ତା ତର୍ ଅପଲ୍ଲିୟୋନ୍ ମାଚାତ୍, ତା ଅର୍ତ ବିନାସ୍ କିନି ମାନାୟ୍। 12 ପାଞ୍ଚ୍ମାସ୍ ପାଚେ ଇ ବିପତ୍ ସେସ୍ ଆତାତ୍, ମାତର୍ ତାପାଚେ ଆରେ ରିଣ୍ଡାଙ୍ଗ୍ ତାବେତାଙ୍ଗ୍ ଆଦିକ୍ କଷ୍ଟ ହିନି ବିପତ୍ ୱାନାତା। ଚଅ ନମ୍ବର୍ ମରି ଆଡ଼୍ତିଲେ ପୁର୍ତିତାକେ ଦୁଇ ନମ୍ବର୍ ବିପତ୍ ୱାତାତ୍। 13 ଲାଗିଙ୍ଗ୍ ଚଅ ନମ୍ବର୍ ଦୁତ୍ ଏଚେପାଦ୍ନା ମରି ତୁପ୍ତାତ୍, ଈଶ୍ୱର ଆଗେ ହନାତାଙ୍ଗ୍ ରସ୍ତି ସରଗ୍ନି ବେଦିତାକେ ମାନି ଚାରିଗଟା କମଙ୍ଗ୍ କଚଣ୍ତାକେ ନିଲ୍ଚିମାଚି ମାନାୟାର୍ତାଙ୍ଗ୍ ରକାନ୍ ୱେଚ୍ଚାକା ଆନେଙ୍ଗ୍ ୱେଚାଙ୍ଗ୍। 14 ହେୱାନ୍ ହେ ମରି ତୁପ୍ତି ଚଅ ନମ୍ବର୍ ଦୁତ୍ତିଙ୍ଗ୍ ଇଲେକେ ୱେଚ୍ଚି ମାଚାନ୍, “ୟୁଫ୍ରେଟିସ୍ ଗାଜା ନାଗୁଡ଼୍ତାକେ ବନ୍ଦି ଆଜିମାଚି ଚାରିଗଟା ଶୟତାନ୍ନି ଦୁତ୍କୁକାଙ୍ଗ୍ ପିସ୍ତି ହିୟାଟ୍।” 15 ହେ ଦୁତ୍କୁକାଙ୍ଗ୍ ହେପାଦ୍ନା କାଜିଙ୍ଗ୍, ହେଦିନ୍ କାଜିଙ୍ଗ୍, ହେ ମାସ୍ କାଜିଙ୍ଗ୍, ହେ ବାର୍ହୁ କାଜିଙ୍ଗ୍, ପୁର୍ତିନି ଚାରି ବାଗ୍ତାଙ୍ଗ୍ ତିନ୍ ବାଗ୍ନି ମାନାୟାରିଙ୍ଗ୍ ମାର୍ନେ ଅସ୍ତେଙ୍ଗ୍ ହେ ଚାରିଗଟା ଦୁତ୍କୁକାଙ୍ଗ୍ ଜାଗ୍ରତ୍ କିଜି ଇଡ଼୍ଜି ମାଚାର୍। 16 ଆରେ ହେୱାର୍ ଗଡ଼ାକାଙ୍ଗ୍ କୁଚ୍ଚି କଡ଼େ କଟି ସେନାର୍ ହୁଦାଙ୍ଗ୍ ଯୁଜ୍ କିଦେଙ୍ଗ୍ ହାଲ୍ଜି ମାଚାର୍, ହେବେ କେତ୍ଜାଣ୍ ସେନାର୍ ମାନାର୍ ଇଞ୍ଜି ୱେଚ୍ନାକା ଆନେଙ୍ଗ୍ ୱେଚାଙ୍ଗ୍। 17 ଆନେଙ୍ଗ୍ ହୁଡ଼୍ତାଙ୍ଗ୍ ହେୱାର୍ ପିତାଡ଼୍ତାଙ୍ଗ୍ ରସ୍ତି ଆଙ୍ଗି ଆର୍ପି ମାଚାର୍, ହେ ପିତାଡ଼୍ତାଙ୍ଗ୍ ରସ୍ତି ଆଙ୍ଗି କଲର୍ ନାଣି ଲେକେ ରାତା, ନିଲି, ଗନ୍ଦକଲେକେ କଲର୍ ମାଚାତ୍। ହେ ଗଡ଼ାଙ୍ଗ୍ କାପ୍ଡ଼ା ସିଂହ ବୁର୍କା କାପ୍ଡ଼ାଲେକେ ମାଚାତ୍ ଆରେ ତା ୱେଇଦାଙ୍ଗ୍ ନାଣି, ଦୁଆଁ ଆରେ ଗନ୍ଦକ ହସିମାଚାତ୍। 18 ହେ ଗଡ଼ାଙ୍ଗ୍ ୱେଇଦାଙ୍ଗ୍ ନାଣି, ଦୁଆଁ, ଗନ୍ଦକ ହସି ମାନ୍ଞ୍ଚି କାଜିଙ୍ଗ୍ ପୁର୍ତିନି ତିନ୍ ବାଗ୍ତାଙ୍ଗ୍ ର ବାଗ୍ ମାନାୟାର୍ ହାଃନାର୍। 19 ହେ ଗଡ଼ାଙ୍ଗ୍ ଶାକ୍ତି ହେୱାର୍ ୱେଇଦ ଆରେ ନିଙ୍ଗୁଣ୍ତ ମାଚାତ୍, ଇନେସ୍କି ହେୱାର୍ ନିଙ୍ଗୁଣ୍ତ ରାଚ୍ ଲେକେ କାପ୍ଡ଼ା ମାଚାତ୍ ଆରେ ହେ ନିଙ୍ଗୁଣ୍ ସାଇଜତାଙ୍ଗ୍ ମାନାୟାରିଙ୍ଗ୍ କଷ୍ଟ ହିଜି ମାଚିକ୍। 20-21 ମାତର୍ ଇମ୍ଣି ମାନାୟାର୍ ନାଣି, ଦୁଆଁ ଆରେ ଗନ୍ଦକ କାଜିଙ୍ଗ୍ ହାଃୱାତାର୍ନା। ହେୱାର୍ ପା ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିଜି କରାପ୍ କାମାୟ୍ କିନାକା ବନ୍ଦ୍ କିୱାତାର୍ନା। ହେୱାର୍ ମାନାୟାରିଙ୍ଗ୍ ମାର୍ନେ ଆହ୍ନିତାଙ୍ଗ୍, ମାନାୟାରିଙ୍ଗ୍ ପାଙ୍ଗାଣ୍ କିନାକା, ଦାରି କାମାୟ୍ କିନିତାଙ୍ଗ୍, ଚରି କିନିତାଙ୍ଗ୍ ମାନ୍ବାଦ୍ଲାୟ୍ କିୱାତାର୍ନା। ଆରେ ହେୱାର୍ ଜାର୍ କେଇଦାଙ୍ଗ୍ ହନା, ରୁପା, ପିତାଡ଼୍, କାଲ୍ ଆରେ ମାର୍ତାଙ୍ଗ୍ ରସ୍ତି ମୁର୍ତିଙ୍ଗ୍ ଇନେର୍କି ଶୟତାନତିଙ୍ଗ୍ ପୁଜା କିନାକା ବନ୍ଦ୍ କିୱାତାର୍ନା ଇମ୍ଣି ମୁର୍ତିଙ୍ଗ୍ ହୁଡ଼୍ଦେଙ୍ଗ୍ ଆଡୁକ୍, ୱେଞ୍ଜେଙ୍ଗ୍ ଆଡୁକ୍, କି ତାଙ୍ଗ୍ଦେଙ୍ଗ୍ ଆଡୁକ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation