ହତ୍ତି 8 - New Testament in Pengo Parja Languageମେଣ୍ଢା ଇନେର୍କି ଯୀଶୁ ସାତ୍ଗଟା ସିଲ୍କୁତାଙ୍ଗ୍ ସାତ୍ ନମ୍ବର୍ ସିଲ୍ତିଙ୍ଗ୍ ରିକ୍ତି ବିଷୟ 1 ତାପାଚେ ଏଚେପାଦ୍ନା ମେଣ୍ଢା ଇନେର୍କି ଯୀଶୁ ସାତ୍ ନମ୍ବର୍ ସିଲ୍ ରିକ୍ତାନ୍, ସରଗ୍ତାକେ ଅଦା ଗଣ୍ଟା ପାତେକ୍ ଚିମ୍ରା ଆତାତ୍। 2 ଆରେ ସାତ୍ଗଟା ସରଗ୍ନି ଦୁତ୍କୁ ଈଶ୍ୱର ଆଗେ ନିଲ୍ତାକା ଆନେଙ୍ଗ୍ ହୁଡ଼୍ତାଙ୍ଗ୍, ହେୱାରିଙ୍ଗ୍ ସାତ୍ଗଟା ମରିଙ୍ଗ୍ ହିଜିମାଚାନ୍। 3 ତାପାଚେ ଆରେ ରଞ୍ଜି ସରଗ୍ନି ଦୁତ୍ ଦୁପ୍ନି ଆହିକିନି ହନାତାଙ୍ଗ୍ ରସ୍ତି ଗିନା ଆସ୍ତି ୱାତାତ୍ ଆରେ ସରଗ୍ନି ବେଦି ଆଗେ ନିଲ୍ତାତ୍। ତାଙ୍ଗେଙ୍ଗ୍ ବେସି ଜବର୍ ଦୁପ୍ନି ହିଜି ମାଚାର୍, ହେ ଦୁତ୍ ହେ ଦୁପ୍ନିତିଙ୍ଗ୍ ଆରେ ଈଶ୍ୱରନି ମାନାୟାର୍ ପାର୍ତାନାତିଙ୍ଗ୍ ମାହାୟ୍କିତାତ୍ ଆରେ ହନାତାଙ୍ଗ୍ ରସ୍ତି ବେଦିତାକେ ହିତାତ୍। 4 ହେ ଦୁତ୍ ହନାତାଙ୍ଗ୍ ରସ୍ତି ବେଦି ଲାଗାୟ୍ ମାନି ଦୁପ୍ନି ଦୁଆଁ, ଈଶ୍ୱରନି ମାନାୟାର୍ ପାର୍ତାନା ହୁଦାଙ୍ଗ୍ ମାହାଆତାତ୍, ଆରେ ହେ ଦୁଆଁ ଈଶ୍ୱର ମାନି ବାହା ପାତେକ୍ ହାଚାତ୍। 5 ତାପାଚେ ହେ ଦୁତ୍ ଦୁପ୍ନି ଆହିକିନି ଗିନାତାକେ ସରଗ୍ନି ବେଦିତାକେ ମାନି ନାଣିତିଙ୍ଗ୍ ବାର୍ତି କିତାତ୍ ଆରେ ପୁର୍ତି ଜପି ତୁସିହିତାତ୍। ହେଦାପ୍ରେ ବାଦାଡ଼୍ ଗାର୍ଜା ଆଜି ବିଜ୍ଲି ଇଡ଼୍ତାତ୍ ଆରେ ବୟାଙ୍କାର୍ ବୁମିକମ୍ପ୍ ଆତାତ୍। ଚାରିଗଟା ମରିଙ୍ଗ୍ ଚାରିଗଟା ଦୁତ୍କୁ ତୁବ୍ତି ବିଷୟ 6 ତାପାଚେ ସାତ୍ଗଟା ମରିଙ୍ଗ୍ ଆସ୍ତିମାଚି ସାତ୍ଗଟା ସରଗ୍ନି ଦୁତ୍କୁ ଗାଜା ସବଦ୍ କିଜି ମରି ତୁବ୍ଦେଙ୍ଗ୍ ରେଡି ଆଜି ମାଚିକ୍। 7 ଆରେ ଏଚେପାଦ୍ନା ପାର୍ତୁମ୍ ଦୁତ୍ ମରି ତୁପ୍ତାତ୍, ହେଦାପ୍ରେ ଆଞ୍ଜ୍ଗା, ନାଣି ଆରେ ନେତେର୍ ମାହାଆଜି ପୁର୍ତି ଜପି ଆର୍ତାତ୍। ଆରେ ପୁର୍ତିନି ତିନ୍ ବାଗ୍ତାଙ୍ଗ୍ ର ବାଗ୍ ମାର୍, ଦେର୍, କାଚ୍ରା ନାଣିତାକେ କାଡ଼୍ତାତ୍। 8 ତାପାଚେ ଦୁଇ ନମ୍ବର୍ ଦୁତ୍ ଏଚେପାଦ୍ନା ତା ମରି ତୁପ୍ତାତ୍, ନାଣି ଆସ୍ତିମାଚି ଗାଜା ମାଡ଼ିଲେକେ ର ଗାଜା ଜିନିଷ୍ ହାମ୍ଦୁର୍ ଜପି ତୁସିହିତାନ୍। ହେଦାପ୍ରେ ହାମ୍ଦୁର୍ନି ତିନ୍ ବାଗ୍ତାଙ୍ଗ୍ ର ବାଗ୍ ଏଜୁଙ୍ଗ୍ ନେତେର୍ ଆତାତ୍। 9 ଆରେ ହାମ୍ଦୁର୍ନି ତିନ୍ ବାଗ୍ତାଙ୍ଗ୍ ର ବାଗ୍ ଜିବୁନ୍ ମାନି ପଶୁଙ୍ଗ୍ ହାଃତିକ୍, ଆରେ ପା ତିନ୍ ବାଗ୍ନି ର ବାଗ୍ ଜାଜ୍କୁ ୱିଜୁ ନଷ୍ଟ ଆତିକ୍। 10 ତାପାଚେ ଏଚେପାଦ୍ନା ତିନ୍ ନମ୍ବର୍ ଦୁତ୍ ତା ମରି ତୁବ୍ତାତ୍, ହେଦାପ୍ରେ ବାଦାଡ଼୍ତାଙ୍ଗ୍ ନାଣି ଆସ୍ତି ହୁକାଙ୍ଗ୍ ନାଗୁଡ଼୍ ଆରେ ଜାରାଣ୍ନି ତିନ୍ ବାଗ୍ତାଙ୍ଗ୍ ର ବାଗ୍ ଜପି ଆର୍ତିକ୍। ହେ ହୁକାଙ୍ଗ୍ ଆସ୍ତିମାଚି ନାଣି ହାତ୍ ଲାଇଟ୍ ଲେକେ ମାଚାତ୍। 11 ହେ ହୁକାଙ୍ଗ୍ ତର୍ କେନାକା ମାଚାତ୍। ଲାଗିଙ୍ଗ୍ ହେ ହୁକାଙ୍ଗ୍ ତିନ୍ ବାଗ୍ନି ର ବାଗ୍ ନାଗୁଡ଼୍ ଆରେ ଜାରାଣ୍ନି ଏଜୁକାଙ୍ଗ୍ କେଇ କିତିକ୍ ଆରେ ହେ ଏଜୁଙ୍ଗ୍ ଉଣ୍ଜି ବେସିହେନି ମାନାୟାର୍ ହାଃତାର୍। 12 ତାପାଚେ ଏଚେପାଦ୍ନା ଚାରି ନମ୍ବର୍ ଦୁତ୍ ତା ମରି ତୁବ୍ତାତ୍, ହେଦାପ୍ରେ ୱେଡ଼ାନି ତିନ୍ ବାଗ୍ତାଙ୍ଗ୍ ର ବାଗ୍, ଲେଞ୍ଜ୍ନି ତିନ୍ ବାଗ୍ତାଙ୍ଗ୍ ର ବାଗ୍ ଆରେ ହୁକାଙ୍ଗ୍ନି ତିନ୍ ବାଗ୍ତାଙ୍ଗ୍ ର ବାଗ୍ ବିନାସ୍ ଆତାତ୍। ଲାଗିଙ୍ଗ୍ ହେୱାରିଙ୍ଗ୍ ମାଜ୍ଗା ଆତାତ୍ ଆରେ ୱେଡ଼ାନି ଆରେ ନାଣାନି ତିନ୍ ବାଗ୍ତାଙ୍ଗ୍ ର ବାଗ୍ ମାଜ୍ଗା ଆତାତ୍। 13 ତାପାଚେ ଆନେଙ୍ଗ୍ ଆରେରଗ ହୁଡ଼୍ତିହିଙ୍ଗ୍, ବାଦାଡ଼୍ତାକେ ର ମୁକ୍ରି ଗାଜାକାଟ୍ କିଜି ଉମ୍ଜି-ଉମ୍ଜି ୱେଚ୍ଚି ମାଚାକା ଆନେଙ୍ଗ୍ ୱେଚାଙ୍ଗ୍। ହେଦାଙ୍ଗ୍ ଇଲେକେ ୱେଚ୍ଚି ମାଚାତ୍, “ହାୟ୍! କି ବୟାଙ୍କାର୍! ଜେକନି ତିନ୍ଗଟା ଦୁତ୍ ମରି ତୁବ୍ତିସ୍ ପୁର୍ତିନି ମାନାୟାର୍ ଅବସ୍ତା କେତେ ବୟାଙ୍କାର୍ ଆନାତ୍!” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation