ହତ୍ତି 7 - New Testament in Pengo Parja Language1-2 ତାପାଚେ ଆନେଙ୍ଗ୍ ହୁଡ଼୍ତାଙ୍ଗ୍, ଚାରିଗଟା ଦୁତ୍କୁ ପୁର୍ତିନି ଚାରିଗଟା କନାକାଙ୍ଗ୍ ନିଲ୍ଚି ମାଚିକ୍। ହେ ଦୁତ୍କୁକାଙ୍ଗ୍ ପୁର୍ତିନି ହାମ୍ଦୁର୍ ଆଏତ୍ କି ମେଦ୍ନି ଆଏତ୍ ବିନାସ୍ କିନି କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ଅଦିକାର୍ ହିଜିମାଚାନ୍। ହାମ୍ଦୁର୍ତାକେ, ମେଦ୍ନି ଜପି, ଆରେ ମାର୍କୁକାଙ୍ଗ୍ ପା ଦୁକା ଆମେତ୍ ଇଞ୍ଜି ପୁର୍ତିନି ଚାରିଗଟା କନାକାଙ୍ଗ୍ ହେୱାର୍ ଦୁକାତିଙ୍ଗ୍ ଟେବାଇ କିଜି ଇଡ଼୍ଜି ମାଚାର୍। ଆରେ ଜେକନିକା ର ଦୁତ୍ ୱେଡ଼ା ହତ୍ନି ନିପଣ୍ ହତ୍ନାକା ହୁଡ଼୍ତାଙ୍ଗ୍, ତାବେ ୱିଜୁଦିନ୍ ଜିବୁନ୍ ମାନି ଈଶ୍ୱରତି ସିଲ୍ ମାଚାତ୍, ହେ ଦୁତ୍ ଗାଜାକାଟ୍ କିଜି ଚାରିଗଟା କନାକାଙ୍ଗ୍ ମାନି ଦୁତ୍କୁକାଙ୍ଗ୍ ୱେଚ୍ଚାତ୍। 3 “ମାନାଟ୍ ଆସେଙ୍ଗ୍ ଈଶ୍ୱରତିଙ୍ଗ୍ ହେବାକିନି ମାନାୟାର୍ କାପ୍ଡ଼ାତ ସିଲ୍ ଇଡ଼୍ୱି ପାତେକ୍ ଏପେଙ୍ଗ୍ ପୁର୍ତିନି, ହାମ୍ଦୁର୍, କି ମାର୍ ଦେର୍ ବିନାସ୍ କିମାଟ୍।” 4 ଆରେ ହେ ଦୁତ୍ ୱେଚ୍ନାକା ଆନେଙ୍ଗ୍ ୱେଚାଙ୍ଗ୍ ଇସ୍ରାଏଲ ଜାତିନି ୱିଜୁ କୁଟୁମ୍ନି ମାନାୟାର୍ତାଙ୍ଗ୍ ୧, ୪୪,୦୦୦ ମାନାୟାରିଙ୍ଗ୍ ଈଶ୍ୱରତି ସିଲ୍ ହେୱାର୍ କାପ୍ଡ଼ାକାଙ୍ଗ୍ ଇଡ଼୍ଜି ମାଚାର୍।, 5-8 ଇସ୍ରାଏଲ ଜାତିନି ୧୨ କୁଟୁମ୍ ଯିହୁଦା, ରୁବେନ୍, ଗାଦ୍, ଆଶେର୍, ନପ୍ତାଲି, ମନଶି, ଶିମିୟନ୍, ଲେବି, ଇସାଖର୍, ସବୁଲୁନ୍, ଯୋଷେପ, ବିନ୍ଯାମିନତାଙ୍ଗ୍ ୧, ୪୪,୦୦୦ ମାନାୟାର୍ କାପ୍ଡ଼ାତ ଈଶ୍ୱରତି ସିଲ୍ ଇଡ଼୍ଜି ମାଚାର୍। ୱିଜୁ ବାରଗଟା କୁଟୁମ୍ତାଙ୍ଗ୍ ବାର ହାଜାର୍ ଜାଣ୍ ଲାକା ମାନାୟାର୍ ମାଚାର୍। ଈଶ୍ୱର ସିଙ୍ଗାସନ ମୁମ୍ଦ ବେସିହେନି ମାନାୟାର୍ ତା ଜୟ୍-ଜୟ୍ କିନି ବିଷୟ। 9 ତାପାଚେ ଗାଣାକିୟା ଆଉତ୍ ଏଲେଙ୍ଗ୍ ର ଗାଜା ଦଳ୍ନି ମାନାୟାର୍ ଈଶ୍ୱର ସିଙ୍ଗାସନ ଆଗେ ଆରେ ମେଣ୍ଢା ଇନେର୍କି ଯୀଶୁ ଆଗେ ନିଲ୍ତାକା ଆନେଙ୍ଗ୍ ହୁଡ଼୍ତାଙ୍ଗ୍। ହେୱାର୍ ୱିଜୁ ଜାତିନି, କୁଟୁମ୍, ଦେସ୍ ଆରେ ୱିଜୁ ବାଷାନି ମାନାୟାର୍ ୱାଜିମାଚାର୍, ହେୱାର୍ ଡ଼ିଞ୍ଜ୍ନି ହେନ୍ଦ୍ରା ଉସ୍ପି ମାଚାର୍ ଆରେ ହେୱାର୍ କେଇଦ କାଜ୍ରି କେନ୍ଦାଙ୍ଗ୍ ଆସ୍ତି ମାଚାର୍। 10 ଆରେ ହେୱାର୍ ଗାଜାକାଟ୍ କିଜି ୱେଚ୍ଚି ମାଚାର୍, “ୱାଡ ଆସେଙ୍ଗ୍ ସିଙ୍ଗାସନ୍ତାକେ କୁଚ୍ଚି ଈଶ୍ୱରତିଙ୍ଗ୍ ଆରେ ମେଣ୍ଢା ଇନେର୍କି ଯୀଶୁଙ୍ଗ୍ ପା ଜୟ୍-ଜୟ୍ କିନାସ୍, ଇନେସ୍କି ହେୱାର୍ ନେ ଆସେଙ୍ଗ୍ କିତି ପାପ୍ କାମାୟ୍ନି ଦଣ୍ଡ୍ତାଙ୍ଗ୍ ଉଦାର୍ କିତ୍ତାର୍ନା।” 11 ତାପାଚେ ସିଙ୍ଗାସନ ଚାରିବେଣ୍ତାଙ୍ଗ୍ କୁଚ୍ଚି ମାଚି ଚବିଶ୍ ଜାଣ୍ ପ୍ରାଚିନାର୍ ଆରେ ଚାରିଗଟା ଜିବୁନ୍ ମାନି ପଶୁ ଆରେ ନିଲ୍ଚିମାଚି ୱିଜୁ ଦୁତ୍କୁ ସିଙ୍ଗାସନ ଆଗେ ଈଶ୍ୱରତିଙ୍ଗ୍ ସନ୍ମାନ୍ ହିନି କାଜିଙ୍ଗ୍ ମେଣ୍ଢାକୁନ୍ଦିକିଜି ମୁଣ୍ଡିଆ ଇଡ଼୍ଜି ପୁଜା କିତାର୍। 12 ହେୱାର୍ ୱେଚ୍ଚି ମାଚାର୍, “ଏ ମା ଈଶ୍ୱର ଏନେଙ୍ଗ୍ ୱିଜୁଦିନ୍ ପୁଜା, ଦନ୍ଯବାଦ୍, ସନ୍ମାନ୍ ପାୟାଆନି ଯଗ୍ୟ ମାନାତ୍। ଆପେଙ୍ଗ୍ ହାର୍ କିଜି ପୁଚାପ୍ନା। ନିଙ୍ଗେଙ୍ଗ୍ ନେ ଜ୍ଞାନ୍ ମାନାତ୍, ଏନେଙ୍ଗ୍ନେ ୱିଜୁତାଙ୍ଗ୍ ଶାକ୍ତିମାନି ଲକ୍ ଆରେ ଏନେଙ୍ଗ୍ନେ ୱିଜୁଦିନ୍ ୱିଜୁ ଜିନିଷ୍ କିଦେଙ୍ଗ୍ ଆଡ୍ନାୟ୍! ଆମେନ୍।” 13 ତାପାଚେ ହେ ଚବିଶ୍ ଜାଣ୍ ପ୍ରାଚିନାର୍ତାଙ୍ଗ୍ ର ପ୍ରାଚିନ୍ ନାଙ୍ଗେଙ୍ଗ୍ ୱେନ୍ବା ଆତ୍ତାନ୍, “ଇ ଡ଼ିଞ୍ଜ୍ନି ହେନ୍ଦ୍ରା ଉସ୍ପିତି ମାନାୟାର୍ ଇନେର୍ ଆରେ ହେୱାର୍ ଇମେତାଙ୍ଗ୍ ୱାତାର୍ନା?” 14 ଆନେଙ୍ଗ୍ ତାଙ୍ଗେଙ୍ଗ୍ ୱେଚ୍ଚାଙ୍ଗ୍, “ମାପୃ ଆନେଙ୍ଗ୍ ପୁନ୍ୱାତାଙ୍ଗ୍ନା ମାତର୍ ଏନେଙ୍ଗ୍ ପୁଚାୟ୍ନା।” ଲାଗିଙ୍ଗ୍ ହେୱାନ୍ ନାଙ୍ଗେଙ୍ଗ୍ ୱେଚ୍ଚାତାନ୍, “ଇୱାର୍ନେ ହେ ମାନାୟ୍ ଇମ୍ଣି ମାନାୟାର୍ ହେ ଗାଜା ଦୁଃକ୍ କଷ୍ଟ ୱେଡ଼ାଙ୍ଗ୍ ଦୁଃକ୍ କଷ୍ଟ ପାୟାଆଜି ହାଃଜି ମାଚାନ୍। ହେୱାର୍ ନଙ୍ଗୟ୍ ତା ହେନ୍ଦ୍ରାତିଙ୍ଗ୍ ମେଣ୍ଢା ଇନେର୍କି ଯୀଶୁ ନେତେର୍ତାଙ୍ଗ୍ ନୁସ୍ଦି ଡ଼ିଚ୍ଚାର୍ନା। ତା ସତ୍ ହେୱାର୍ ୱିଜୁ ପାପ୍ତିଙ୍ଗ୍ ନୁସ୍ତାତ୍ନା।” 15 “ହେଦାଙ୍ଗ୍ କାଜିଙ୍ଗ୍ ହେୱାର୍ ଈଶ୍ୱର କୁଚ୍ଚି ସିଙ୍ଗାସନନି ଆଗେ ନିଲ୍ତାର୍ନା ଆରେ ୱେଡ଼ା ନାଣା ତା ମନ୍ଦିର୍ତାକେ ମାନ୍ଞ୍ଜି ତା ହେବା କିନାର୍। ଆରେ ହେ ସିଙ୍ଗାସନ ଜପି କୁଚ୍ଚି ଈଶ୍ୱର ହେୱାର୍ ହୁଦାଙ୍ଗ୍ ମାନ୍ଗାନାନ୍ ଆରେ ହେୱାରିଙ୍ଗ୍ ଉଦାର୍ କିନାନ୍। 16 ହେୱାର୍ ଇନାୱେଡ଼ାଙ୍ଗ୍ ପା ନାସ୍କି କି ଏସ୍କି ଆଉର୍, ଆରେ ହେୱାର୍ ଈଶ୍ୱର ୱେଡ଼ା ବାର୍ଟାନି କାରାତାଙ୍ଗ୍ ପା ଉଦାର୍ କିଦ୍ନାନ୍। 17 ଇନେସ୍କି ମେଣ୍ଢା ଗଡ଼ିୟା ଇନେସ୍ ତା ମେଣ୍ଢାକାଙ୍ଗ୍ ଉଦାର୍ କିନାନ୍ ହେଲେକେ ହେ ସିଙ୍ଗାସନ ଆଗେ ନିଲ୍ତି ମେଣ୍ଢା ଇନେର୍କି ଯୀଶୁ ହେୱାରିଙ୍ଗ୍ ଉଦାର୍ କିନାନ୍। ହେୱାନ୍ ହେୱାରିଙ୍ଗ୍ କିଲେର୍ ଏଜୁଙ୍ଗ୍ ଉଣ୍ଡେଙ୍ଗ୍ ହିନାନ୍ ଇମ୍ଣି ଏଜୁଙ୍ଗ୍ ମାନାୟାରିଙ୍ଗ୍ ଜିବୁନ୍ ହିନାତ୍। ଆରେ ଈଶ୍ୱର ହେୱାର୍ କାଣ୍କୁନି ୱିଜୁ କାଣେଲିଙ୍ଗ୍ ନେନ୍ଦ୍ନାନ୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation