ହତ୍ତି 6 - New Testament in Pengo Parja Languageମେଣ୍ଢା ଇନେର୍କି ଯୀଶୁ ସାତ୍ଗଟା ସିଲ୍କୁତାଙ୍ଗ୍ ର ସିଲ୍ତିଙ୍ଗ୍ ରିକ୍ତି ବିଷୟ 1 ଆରେ ଆନେଙ୍ଗ୍ ହୁଡ଼୍ତାଙ୍ଗ୍ ହେ ମେଣ୍ଢା ଇନେର୍କି ଯୀଶୁ ସାତ୍ଗଟା ସିଲ୍କୁତାଙ୍ଗ୍ ହେ ହୁରିପିୟା ଆତି ବହିତାଙ୍ଗ୍ ପାର୍ତୁମ୍ ସିଲ୍ ରିକ୍ତାନ୍। ଲାଗିଙ୍ଗ୍ ହେବେ ମାଚି ଚାରିଗଟା ଜିବୁନ୍ ମାନି ପଶୁଙ୍ଗ୍ ବିତ୍ରେତାଙ୍ଗ୍ ର ପଶୁ ଗାଜାକାଟ୍ କିଜି ୱେଚ୍ଚାତ୍, “ୱା।” ଆନେଙ୍ଗ୍ ହେଦାଙ୍ଗ୍ ୱେଚାଙ୍ଗ୍ ତା ବେଣ୍ ବିଜ୍ଲି ଇଡ଼୍ତିଲେକେ ମାଚାତ୍। 2 ହେପାଦ୍ନା ଆନେଙ୍ଗ୍ ର ଡ଼ିଞ୍ଜ୍ନି ଗଡ଼ା ହୁଡ଼୍ତାଙ୍ଗ୍ ଆରେ ହେ ଗଡ଼ା ଜପି ଦୁମ୍ତି ମାନାୟ୍ କେଇଦ ରଞ୍ଜାଙ୍ଗ୍ ଗିନା ମାଚାତ୍ ଆରେ ହେୱାନ୍ କାପ୍ଡ଼ାତ ର ମୁକୁଟ୍ ମାଚାତ୍। ହେୱାନ୍ ସରଗ୍ତାଙ୍ଗ୍ ପୁର୍ତିତାକେ ୱାତାନ୍ ଇନେର୍ ଆଗେ ଜିତାଆଜି ମାଚାନ୍, ଆରେ ନଙ୍ଗୟ୍ ପା ହେୱାନ୍ ଜିତାଆନାନ୍। 3 ଏଚେପାଦ୍ନା ମେଣ୍ଢା ଇନେର୍କି ଯୀଶୁ ଦୁଇ ନମ୍ବର୍ ସିଲ୍ ରିକ୍ତାନ୍, ହେ ଚାରିଗଟା ଜିବୁନ୍ ମାନି ପଶୁ ବିତ୍ରେତାଙ୍ଗ୍ ଦୁଇ ନମ୍ବର୍ ପଶୁ ୱେଚ୍ଚାତାତ୍, “ୱା,” ହେ କାଟ୍ ଆନେଙ୍ଗ୍ ୱେଚାଙ୍ଗ୍। 4 ହେପାଦ୍ନା ଆନେଙ୍ଗ୍ ର ରାତା ଗଡ଼ା ହୁଡ଼୍ତାଙ୍ଗ୍। ହେ ଗଡ଼ାତାକେ କୁଚ୍ଚି ମାଚି ମାନାୟ୍ତିଙ୍ଗ୍ ର କାଣ୍ଡା ହିଜିମାଚାନ୍। ପୁର୍ତିନି ଶାନ୍ତିତିଙ୍ଗ୍ ଉର୍ଡାୟ୍ କିଜି ଅଦେଙ୍ଗ୍ ଆରେ ମାନାୟାରିଙ୍ଗ୍ ହରିଆଣ୍ କିଦେଙ୍ଗ୍ ଅଦିକାର୍ ହିଜିମାଚାନ୍, ଲାଗିଙ୍ଗ୍ ହେୱାର୍ ଜାର୍-ଜାର୍ବିତ୍ରେ ମାର୍ନେ ଅସ୍ପା ଆନାର୍। 5 ଆରେ ଏଚେପାଦ୍ନା ମେଣ୍ଢା ଇନେର୍କି ଯୀଶୁ ତିନ୍ ନମ୍ବର୍ ସିଲ୍ତିଙ୍ଗ୍ ରିକ୍ତାନ୍, ତିନ୍ ନମ୍ବର୍ ଜିବୁନ୍ ମାନି ପଶୁ ୱେଚ୍ଚାକା ଆନେଙ୍ଗ୍ ୱେଚାଙ୍ଗ୍। ହେୱାନ୍ ୱେଚ୍ଚାନ୍, “ୱା” ଲାଗିଙ୍ଗ୍ ଆନେଙ୍ଗ୍ ହେଦାପ୍ରେ ର କାର୍ହାଆତି ଗଡ଼ା ବାର୍ତ ୱାନାକା ହୁଡ଼୍ତାଙ୍ଗ୍, ଆରେ ହେ ଗଡ଼ା ଜପି କୁଚ୍ଚି ମାଚି ମାନାୟ୍ କେଜିକାଟା ଆସ୍ତି ମାଚାନ୍। 6 ଆରେ ହେ ଚାରିଗଟା ଜିବୁନ୍ ମାନି ପଶୁ ବିତ୍ରେତାଙ୍ଗ୍ ର ପଶୁ ୱେଚ୍ଚିଲେକେ ହେ ଗଡ଼ାତାକେ କୁଚ୍ଚାକାନିଙ୍ଗ୍ ୱେଚ୍ଚାକା ଆନେଙ୍ଗ୍ ୱେଚାଙ୍ଗ୍, “ର କେଜି ପେରିଙ୍ଗ୍ ନଇଲେ ତିନ୍ କେଜି ଗହମ୍ କଡ଼୍ଦେଙ୍ଗ୍ ରଦିନ୍ତି ହାଜ୍ରି ଡାବୁଙ୍ଗ୍ ଆନିକ୍। ମାତର୍ ଚିକାଣ୍ ଆରେ ଅଙ୍ଗୁର୍ ରାସ୍ନି ଦାମ୍ ହାମାନ୍ ମାନାଙ୍ଗାନାତ୍।” 7 ଆରେ ଏଚେପାଦ୍ନା ମେଣ୍ଢା ଇନେର୍କି ଯୀଶୁ ଚାରି ନମ୍ବର୍ ସିଲ୍ ରିକ୍ତାନ୍, ଚାରି ନମ୍ବର୍ ଜିବୁନ୍ ମାନି ପଶୁ ୱେଚ୍ଚାନାକା ଆନେଙ୍ଗ୍ ୱେଚାଙ୍ଗ୍, “ୱା।” 8 ହେଦାପ୍ରେ ର ଚାର୍ୱା କଲର୍ନି ଗଡ଼ା ବାର୍ତ ୱାନାକା ହୁଡ଼୍ତାଙ୍ଗ୍। ଆରେ ହେ ଗଡ଼ାତାକେ କୁଚ୍ଚି ମାଚି ମାନାୟ୍ ତର୍ ମାରାଣ୍ ମାଚାତ୍, ଆରେ ତାପାଚେ-ପାଚେ ମାରାଣ୍ନି ପାତାଳ୍ ହାଲ୍ଜି ମାଚାତ୍। ଆରେ ପୁର୍ତିନି ଚାରି ବାଗ୍ତାଙ୍ଗ୍ ର ବାଗ୍ନି ମାନାୟାରିଙ୍ଗ୍ ମାର୍ନେ ଅସ୍ତେଙ୍ଗ୍ ଅଦିକାର୍ ପାୟାଆଜି ମାଚାର୍, ହେୱାର୍ କାଣ୍ଡା, କାତାର୍, ବେମାର୍ ଆରେ ପୁର୍ତିନି ରାନ୍ତି ପଶୁଙ୍ଗ୍ ହୁଦାଙ୍ଗ୍ ମାର୍ନେ ଅସ୍ତେଙ୍ଗ୍ ଅଦିକାର୍ ହିତାନ୍ନା। 9 ଆରେ ଏଚେପାଦ୍ନା ମେଣ୍ଢା ଇନେର୍କି ଯୀଶୁ ପାଞ୍ଚ୍ ନମ୍ବର୍ ସିଲ୍ତିଙ୍ଗ୍ ରିକ୍ତାନ୍। ହେପାଦ୍ନା ଆନେଙ୍ଗ୍ ଈଶ୍ୱର ବେଣ୍ ଶୁଣାୟ୍ କିତାକାର୍ ଆତ୍ମାଙ୍ଗ୍ ଆରେ ଦରମ୍ଆଜି ଈଶ୍ୱର ବିଷୟରେ ସାକି ହିନି ମାନାୟାରିଙ୍ଗ୍ ମାର୍ନେ ଅସ୍ତି ମାନାୟାର୍ ଆତ୍ମାକାଙ୍ଗ୍ ସରଗ୍ନି ବେଦିନି ତାରେନ୍ ହୁଡ଼୍ତାଙ୍ଗ୍। 10 ହେୱାର୍ ଗାଜାକାଟ୍ କିଜି ଈଶ୍ୱରତିଙ୍ଗ୍ ୱେଚ୍ଚାର୍, “ହେ ପବିତ୍ର ଆରେ ସତ୍ ମାପୃ ଆରେ ୱିଜୁ ଶାକ୍ତିମାନି ଈଶ୍ୱର, ଏନେଙ୍ଗ୍ ଇନାକିଦେଙ୍ଗ୍ ପୁର୍ତିତାକେ ମାନି କରାପ୍ ମାନାୟାରିଙ୍ଗ୍ ଦଣ୍ଡ୍ ହିଦେଙ୍ଗ୍ ବେସି ଲେଟ୍ କିନାୟା? ଆପେଙ୍ଗ୍ ନିଙ୍ଗେଙ୍ଗ୍ ଗୁୱାରି କିଦ୍ନାପା ମାଙ୍ଗେଙ୍ଗ୍ ମାର୍ନେ ଅସ୍ତାତାକାରିଙ୍ଗ୍ ଏନେଙ୍ଗ୍ ମାର୍ନେ ଅହା।” 11 ହେ ୱିଜାରିଙ୍ଗ୍ ରଞ୍ଜି-ରଞ୍ଜି ଡ଼ିଞ୍ଜ୍ନି ହେନ୍ଦ୍ରାଙ୍ଗ୍ ହିଜିମାଚାନ୍, ଆରେ “ହେୱାରିଙ୍ଗ୍ ୱେଚ୍ଚି ମାଚାନ୍ ଅଲପ୍ଦିନ୍ କାଡ। ଇନେସ୍କି ମିହୁଦାଙ୍ଗ୍ ମାହାଆଜି କାମାୟ୍ କିଜି ମାଚାକାର୍ ଆରେ ମି ପାର୍ତିନି ଟଣ୍ଡାର୍ ମିଙ୍ଗେଙ୍ଗ୍ ଅସ୍ତିତିଲେକେ ହେୱାରିଙ୍ଗ୍ ଅହ୍ୱାତାର୍ନା, ଏଚେପାଦ୍ନା ମି ଦଳ୍ନି ମାନାୟାରିଙ୍ଗ୍ ମାର୍ନେ ଅହ୍ନାର୍। ହେପାଦ୍ନା ଆନେଙ୍ଗ୍ ହେୱାରିଙ୍ଗ୍ ମାର୍ନେ ଅହ୍ନାଙ୍ଗ୍। 12 ଆରେ ଏଚେପାଦ୍ନା ମେଣ୍ଢା ଇନେର୍କି ଯୀଶୁ ଚଅ ନମ୍ବର୍ ସିଲ୍ ରିକ୍ତାନ୍, ହେଦାପ୍ରେ ର ଗାଜା ବୁମିକମ୍ପ୍ ଆନାକା ଆନେଙ୍ଗ୍ ହୁଡ଼୍ତାଙ୍ଗ୍। ଆରେ ୱେଡ଼ାତିଙ୍ଗ୍ କାର୍ହାଆତି ବାସ୍ତା ପାକ୍ତିଲେକେ ମାଜ୍ଗା ଆତାତ୍ ଆରେ ଲେଞ୍ଜ୍ ପା ନେତେର୍ ଲେକେ ରାତା ଆତାତ୍। 13 ଲାଗିଙ୍ଗ୍ ଗାଜା ଦୁକାତି ତଗାମାର୍ ଜଲାଆଜି ପେଜେ ତଗା ଆର୍ତିଲେକେ ବାଦାଡ଼୍ନି ହୁକାଙ୍ଗ୍ ପା ପୁର୍ତିତାକେ ଆର୍ତିକ୍। 14 ଆରେ ସାସ୍ତର୍ତିଙ୍ଗ୍ ହୁର୍ପିତି ଲେକେ ବାଦାଡ଼୍ ଡ଼ୁକ୍ତାତ୍। ଆରେ ୱିଜୁ ମାଡ଼ି ଆରେ ହାମ୍ଦୁର୍ନି ୱିଜୁ ଦ୍ବିପ୍କୁ ଜାର୍ ବାହାଙ୍ଗ୍ତାଙ୍ଗ୍ ଗୁଚା ଆତିକ୍। 15 ଲାଗିଙ୍ଗ୍ ପୁର୍ତିନି ରାଜାର୍, ସାସନ୍ କିନାକାର୍, ସେନାର୍ ମୁକ୍ୟାର୍, ହାଉକାରିଙ୍ଗ୍, ବେସି ଶାକ୍ତିକାଟି ମାନାୟାର୍ ଆରେ ଚାକରାର୍। ଚାକର୍ ଆୱାତାକାର୍ ପା, ଡ଼ୁଗ୍ଦେଙ୍ଗ୍ ପାରାତାକେ ଆରେ ମାଡ଼ିନି କାଲ୍କୁ ତାରେନ୍ ୱିଜାକାର୍ ହାଚାର୍। 16 ଆରେ, ହେୱାର୍ କାଲ୍କୁକାଙ୍ଗ୍ ଆରେ ମାଡ଼ିକାଙ୍ଗ୍ ଚେରାଆଜି ୱେଚ୍ଚାର୍, ସିଙ୍ଗାସନ୍ତାକେ କୁଚ୍ଚି ମାନାୟ୍ ଆରେ ମେଣ୍ଢା ଇନେର୍କି ଯୀଶୁ ଦଣ୍ଡ୍ ହିଦ୍ନି ଦଣ୍ଡ୍ତାଙ୍ଗ୍ ଉଦାର୍ କିଦ୍ଦେଙ୍ଗ୍ ମା ଜପି ଆର୍ଜି ମାଙ୍ଗେଙ୍ଗ୍ ଡ଼ୁକ୍ତାଟ୍। 17 ଇନେସ୍କି ବେସି କଷ୍ଟନି ଦିନ୍ ୱାତାତ୍ନା ଏଚେପାଦ୍ନା ଈଶ୍ୱର ଆରେ ମେଣ୍ଢା ଇନେର୍କି ଯୀଶୁ ୱିଜାକାରିଙ୍ଗ୍ ଦଣ୍ଡ୍ ହିଦ୍ନାର୍, ହେ ଦଣ୍ଡ୍ତିଙ୍ଗ୍ ଇନେର୍ ପା ସମ୍ବାଲି କିଦେଙ୍ଗ୍ ଆଡୁର୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation