ହତ୍ତି 5 - New Testament in Pengo Parja Languageମେଣ୍ଢା ସିଲ୍ ଇଡ଼୍ତି ବହିତିଙ୍ଗ୍ ପିଟାଇ କିନି ବିଷୟ (ଇନେର୍କି ଯୀଶୁ) 1 ଆରେ ହେ ସିଙ୍ଗାସନ୍ତାକେ କୁଚ୍ଚି ମାନାୟ୍ ତିନି କେଇଦ ର ସାସ୍ତର୍ ଆସ୍ତାକା ଆନେଙ୍ଗ୍ ହୁଡ଼୍ତାଙ୍ଗ୍ ହେବେ ରିକଣ୍ଡାଙ୍ଗ୍ ଲେକାଆଜି ମାଚାତ୍। ହେ ବହି ହୁରିପିୟା ଆଜିମାଚାତ୍, ଆରେ ହେ ସାସ୍ତର୍ତିଙ୍ଗ୍ ସାତ୍ ବାନି ସିଲ୍ ହୁଦାଙ୍ଗ୍ ସିଲ୍ ଇଡ଼୍ଜି ମାଚାର୍। 2 ଆରେ ଆନେଙ୍ଗ୍ ହୁଡ଼୍ତାଙ୍ଗ୍ ର ଶାକ୍ତିମାନି ଦୁତ୍ ଗାଜାକାଟ୍ କିଜି ୱେଚ୍ଚି ମାଚାନ୍, “ଇନେରିଙ୍ଗ୍ ଯଗ୍ଯ ମାନାତ୍ ଇ ସିଲ୍ତିଙ୍ଗ୍ ଡ୍ରିକ୍ତେଙ୍ଗ୍ ଆଡ୍ନାନ୍ ଆରେ ଇ ସାସ୍ତର୍ତିଙ୍ଗ୍ ରିକ୍ତେଙ୍ଗ୍ ଆଡ୍ନାନ୍?” 3 ମାତର୍ ସରଗ୍ତାକେ କି, ପୁର୍ତିତାକେ କି, ପାତାଳ୍ତାକେ ଇନେର୍ ପା ଇ ସାସ୍ତର୍ତିଙ୍ଗ୍ ରିକ୍ଚି ପଡ଼ିକିଦେଙ୍ଗ୍ ଯଗ୍ୟ ହିଲାତାର୍। 4 ଲାଗିଙ୍ଗ୍ ଆନେଙ୍ଗ୍ ଆଡ଼୍ବାତାଙ୍ଗ୍, ଇନେସ୍କି ହେ ସାସ୍ତର୍ତିଙ୍ଗ୍ ରିକ୍ଚି ପଡ଼ିକିଦେଙ୍ଗ୍ ଇନେର୍ ପା ଯଗ୍ୟ ହିଲାତାର୍। 5 ମାତର୍ ହେ ଚବିଶ୍ ଜାଣ୍ ପ୍ରାଚିନାର୍ ବିତ୍ରେତାଙ୍ଗ୍ ରକାନ୍ ନାଙ୍ଗେଙ୍ଗ୍ ୱେଚ୍ଚାତାନ୍, “ଆଡ଼୍ବାମା, ହୁଡ଼ା, ଯିହୁଦା କୁଟୁମ୍ନି ମାନାୟାରିଙ୍ଗ୍ ସାସନ୍ କିନି ଶାକ୍ତିମାନି ମାନାୟ୍ ଇନେରିଙ୍ଗ୍ ସିଂହ ଇନାର୍। ହେୱାନ୍ ଶୟତାନତିଙ୍ଗ୍ ଆରାୟ୍ କିଜି ଜିତା ଆତାନ୍ନା, ଆରେ ଦାଉଦ ରାଜା ସିଙ୍ଗାସନ୍ତାକେ କୁଚ୍ଚେଙ୍ଗ୍ ଯଗ୍ୟ ମାନାତ୍। ହେୱାନ୍ ନେ ଇ ସାସ୍ତର୍ତିଙ୍ଗ୍ ରିକ୍ତେଙ୍ଗ୍ ଆଡ୍ନାନ୍ ଆରେ ଇ ସାତ୍ଗଟା ସିଲ୍ତିଙ୍ଗ୍ ଡ୍ରିକ୍ତେଙ୍ଗ୍ ଆଡ୍ନାନ୍।” 6 ଲାଗିଙ୍ଗ୍ ଆନେଙ୍ଗ୍ ହୁଡ଼୍ତାଙ୍ଗ୍, ର ମେଣ୍ଢା ଇନେର୍କି ଯୀଶୁ ସିଙ୍ଗାସନ କଚଣ୍ତାକେ ଆରେ ଚାରିଗଟା ଜିବୁନ୍ ମାନି ପଶୁ, ଆରେ ଚବିଶ୍ ଜାଣ୍ ପ୍ରାଚିନାର୍ ମାଦି ନିଲ୍ଚି ମାଚାନ୍। ହେ ମେଣ୍ଢା ଗଡ଼ିୟା ଗାଗାଡ଼୍ତାକେ ଆଗେ ମାର୍ନେ ଅସ୍ତି ଚିନାଙ୍ଗ୍ ମାନିକ୍, ହେୱାନ୍ ନଙ୍ଗୟ୍ ଆରେରଗ ଜିବୁନ୍ ଆତାନ୍ନା। ତାବେ ସାତ୍ଗଟା କମଙ୍ଗ୍ ଆରେ ସାତ୍ଗଟା କାଣ୍କୁ ମାନିକ୍, ହେଦାଙ୍ଗ୍ ଈଶ୍ୱରତି ସାତ୍ ଗୁଣ୍ନି ଆତ୍ମା ପୁର୍ତିନି ୱିଜୁ ବାହାକାଙ୍ଗ୍ ପକ୍ତାନ୍ନା। 7 ହେୱାନ୍ ଆଗେ ୱାତାନ୍ ଆରେ ସିଙ୍ଗାସନ୍ତାକେ କୁଚ୍ଚି ମାଚି ମାନାୟ୍ ତିନି କେଇଦ ଆସ୍ତିମାଚି ସାସ୍ତର୍ତିଙ୍ଗ୍ ଅତାନ୍। 8 ଏଚେପାଦ୍ନା ହେୱାନ୍ ସାସ୍ତର୍ତିଙ୍ଗ୍ ଅତାନ୍, ହେପାଦ୍ନା ହେ ଚାରିଗଟା ଜିବୁନ୍ ମାନି ପଶୁ ଆରେ ଚବିଶ୍ ଜାଣ୍ ପ୍ରାଚିନାର୍ ମେଣ୍ଢା ଇନେର୍କି ଯୀଶୁ ଆଗେ ମେଣ୍ଢାକୁନ୍ଦିକିଜି ମୁଣ୍ଡିୟା ଇଡ଼୍ତାର୍। ୱିଜାର୍ ପ୍ରାଚିନାର୍ ମରି ଆରେ ହନାତାଙ୍ଗ୍ ରସ୍ତି ଦୁପ୍ନି ମାନି ଗିନାଙ୍ଗ୍ ଆସ୍ତି ମାଚାର୍ ହେ ଦୁପ୍ନି ଅର୍ତ ଈଶ୍ୱର ଲକ୍ନି ପାର୍ତାନା। 9 ଆରେ ହେୱାର୍ ଇଲେକେ କିଜି ର ପୁନି କେର୍କଣ୍ କେର୍ତାର, “ନିଦି ନେ ଇ ସାସ୍ତର୍ ଆସ୍ତେଙ୍ଗ୍ ଯଗ୍ୟ ମାନାତ୍ ଆରେ ତା ସିଲ୍ ଡ୍ରିକ୍ଚି ରିକ୍ତେଙ୍ଗ୍ ଆଡ୍ନାନ୍। ଇନେସ୍କି ଏନେଙ୍ଗ୍ ମାନାୟାର୍ କାଜିଙ୍ଗ୍ ହାଃଜି ମାଚାୟ୍, ଆରେ ମାନାୟାରିଙ୍ଗ୍ ଉଦାର୍ କିଦେଙ୍ଗ୍ କୃଶକାଟ୍ତାକେ ନି ନେତେର୍ ବଡ଼ାୟ୍ କିଜି ମାଚାୟ୍। ଲାଗିଙ୍ଗ୍ ହେୱାର୍ ଈଶ୍ୱର ଲକ୍ ଆତାର୍ନା, ଇ ମାନାୟାର୍ ୱିଜୁ ଜାତିର୍ତାଙ୍ଗ୍, ୱିଜୁ ବାଷାତାଙ୍ଗ୍, ୱିଜୁ ବାହାତାଙ୍ଗ୍ ଆରେ ୱିଜୁ ଦେସ୍ତାଙ୍ଗ୍ ୱାତାର୍ନା। 10 ଆରେ, ଏନେଙ୍ଗ୍ ହେୱାରିଙ୍ଗ୍ ରାଜା ଆରେ ମା ମାପୃ ଈଶ୍ୱରତିଙ୍ଗ୍ ପୁଜା କିଦେଙ୍ଗ୍ ପୁଜାରି କିତାୟ୍ନା। ହେୱାର୍ ରାଜାର୍ଲେକେ ପୁର୍ତିତାକେ ସାସନ୍ କିନାର୍।” 11 ଲାଗିଙ୍ଗ୍ ଆନେଙ୍ଗ୍ ଆରେରଗ ହୁଡ଼୍ତାଙ୍ଗ୍, ତିପ୍କୁ କଟି-କଟି ଦୁତ୍କୁ ବେଣ୍ ୱେଚାଙ୍ଗ୍, ହେୱାରିଙ୍ଗ୍ ଗାଣାକିୟା ଆଉତ୍। ହେୱାର୍ ଚାରିଗଟା ଜିବୁନ୍ ମାନି ପଶୁ ଆରେ ଚବିଶ୍ ଜାଣ୍ ପ୍ରାଚିନାର୍ ଚାରିବେଣ୍ତାଙ୍ଗ୍ ମୁକ୍ତିଲେକେ ରାଜା ସିଙ୍ଗାସନନି ଚାରିବେଣ୍ତାଙ୍ଗ୍ ମୁକ୍ଚି ମାଚିକ୍। 12 ହେୱାର୍ ଗାଜା କାଟ୍ତାଙ୍ଗ୍ ଦନ୍ଯବାଦ୍କିଜି ଇଲେକେ କେର୍ଜି ମାଚାର୍, “ହାଃଜି ମାଚି ମେଣ୍ଢା ଇନେର୍କି ଯୀଶୁ ଜୟ୍-ଜୟ୍ ପାୟାଆନି ଯଗ୍ୟ ମାନାତ୍, ତାଙ୍ଗେଙ୍ଗ୍ ଗାଜା ଅଦିକାର୍ ମାନାତ୍। ତାଙ୍ଗେଙ୍ଗ୍ ବେସି ଜ୍ଞାନ୍ ମାନାତ୍। ହେୱାନିଙ୍ଗ୍ନେ ବେସି ଶାକ୍ତି ମାନାତ୍। ହେୱାନ୍ ନେ ହାତ୍ପା ହାଉକାର୍, ହେୱାନ୍ ସନ୍ମାନ୍ ପାୟାଆନି ଯଗ୍ୟ, ହେୱାନ୍ ଗୌରବ ପାୟାଆନି ଯଗ୍ୟ, ହେୱାନ୍ ଜୟ୍-ଜୟ୍ ପାୟାଆନି ଯଗ୍ୟ।” 13 ଆରେ ପାଚେ ଆନେଙ୍ଗ୍ ୱେଚାଙ୍ଗ୍, ସରଗ୍ତାଙ୍ଗ୍, ପୁର୍ତିତାଙ୍ଗ୍, ପାତାଳ୍ତାଙ୍ଗ୍ ଆରେ ହାମ୍ଦୁର୍ତାଙ୍ଗ୍ ୱିଜୁ ଜିବୁନ୍ ମାନି ପଶୁଙ୍ଗ୍ ପା କେର୍କଣ୍ କେର୍ତିକ୍। “ୱାଡ ଆସେଙ୍ଗ୍ ସିଙ୍ଗାସନ୍ତାକେ କୁଚ୍ଚି ମାନାୟ୍ତିଙ୍ଗ୍ ଦନ୍ଯବାଦ୍ ହିଜି ଜୟ୍-ଜୟ୍ କିନାସ୍। ୱାଡ ଆସେଙ୍ଗ୍ ମେଣ୍ଢା ଇନେର୍କି ଯୀଶୁଙ୍ଗ୍ ଜୟ୍-ଜୟ୍ କିନାସ୍। ୱାଡ ଆସେଙ୍ଗ୍ ତାଙ୍ଗେଙ୍ଗ୍ ସନ୍ମାନ୍ ହିନାସ୍ ଆରେ ୱିଜୁଦିନ୍ ତାଙ୍ଗେଙ୍ଗ୍ ସନ୍ମାନ୍ ହିନାସ୍, ଇନେସ୍କି ହେୱାନ୍ ନେ ୱିଜୁତାଙ୍ଗ୍ ଶାକ୍ତି ମାନାକାନ୍।” 14 ଆରେ ଚାରିଗଟା ଜିବୁନ୍ ମାନି ପଶୁ ୱେଚ୍ଚାର, “ଆମେନ୍,” ଆରେ, ଚବିଶ୍ ଜାଣ୍ ପ୍ରାଚିନ୍ନାର୍ ମେଣ୍ଡାକୁନ୍ଦିକିଜି ମୁଣ୍ଡିୟା ଇଡ଼୍ତାର୍ ଆରେ ଈଶ୍ୱରତିଙ୍ଗ୍ ଆରେ ମେଣ୍ଢା ଇନେର୍କି ଯୀଶୁଙ୍ଗ୍ ପୁଜା କିତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation