ହତ୍ତି 4 - New Testament in Pengo Parja Languageସରଗ୍ତାକେ ପୁଜାକିନି ବିଷୟ 1 ଇ ୱିଜୁ ଗଟାଆତି ପାଚେ ଆନେଙ୍ଗ୍ ଯୋହନ ସରଗ୍ତାକେ ର କାପାଟ୍ ଜେୟା ଆଜି ମାଚାକା ହୁଡ଼୍ତାଙ୍ଗ୍, ଆରେ ହେବେତାଙ୍ଗ୍ ଇନେର୍ ରକାନ୍ ୱେଚ୍ଚି ମାଞ୍ଚାନ୍ ଇନେର୍ ବେଣ୍ ଆନେଙ୍ଗ୍ ଆଗେ ୱେନ୍ଞ୍ଜି ମାଚାଙ୍ଗ୍। ହେ ମାନାୟ୍ ବେଣ୍ ଲେକେ ମାଚାତ୍, ତା ବେଣ୍ ମରି ତୁପ୍ତି ସବଦ୍ ଲେକେ ମାଚାତ୍। ହେୱାନ୍ ନାଙ୍ଗେଙ୍ଗ୍ ୱେଚ୍ଚାତାନ୍, “ଇବେ ୱା, ଆରେ ଇନାକା ୱିଜୁ ଗଟାଆନାତ୍ ହେଦାଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ଚଚ୍ଚାନାଙ୍ଗ୍।” 2 ରଇବାର୍ ନାଞ୍ଜିଙ୍ଗ୍ ଏଚେପାଦ୍ନା ଆନେଙ୍ଗ୍ ଈଶ୍ୱରତିଙ୍ଗ୍ ଆରାଦନା କିଜି ମାଚାଙ୍ଗ୍ ପବିତ୍ର ଆତ୍ମା ନା ଜପି ୱାଜି ନାଙ୍ଗେଙ୍ଗ୍ କଣ୍ଟ୍ରୁଲ୍ ହିତ୍ତାତ୍। ଏଚେପାଦ୍ନା ପବିତ୍ର ଆତ୍ମା ନା ଜପି ୱାତାତ୍, ହେପାଦ୍ନା ଆନେଙ୍ଗ୍ ସରଗ୍ନି ସିଙ୍ଗାସନ୍ତାକେ ର ମାନାୟ୍ କୁଚ୍କା ହୁଡ଼୍ତାଙ୍ଗ୍। 3 ହେ ସିଙ୍ଗାସନ୍ତାକେ କୁଚ୍ଚି ମାନାୟ୍ ମୁମ୍ ହିରା ଆରେ ଦାମ୍ଦି ରାତା କାଲ୍ଲେକେ ଚମ୍କା ଆଜିମାଚାତ୍। ଆରେ ହେ ସିଙ୍ଗାସନ ଚାରିବେଣ୍ତାଙ୍ଗ୍ ତୁବ୍ଡ଼ାରାଚ୍ ମୁକ୍ଚି ମାଚାତ୍, ହେଦାଙ୍ଗ୍ ଆକି କଲର୍ କାଲ୍ଲେକେ ଚଞ୍ଜ୍ଜି ମାଚାତ୍। 4 ହେ ସିଙ୍ଗାସନ ଚାରିବେଣ୍ତାଙ୍ଗ୍ ଚବିଶ୍ ଗଟା ସିଙ୍ଗାସନ ମାଚିକ୍, ଆରେ ହେ ଚବିଶ୍ ଗଟା ସିଙ୍ଗାସନ୍ତାକେ ଚବିଶ୍ ଜାଣ୍ ପ୍ରାଚିନାର୍ ଡ଼ିଞ୍ଜ୍ନି ହେନ୍ଦ୍ରାଙ୍ଗ୍ ଉସ୍ପି କୁଚ୍ଚି ମାଚାର୍। ହେୱାର୍ କାପ୍ଡ଼ାତ ହନାତାଙ୍ଗ୍ ରସ୍ତି ମୁକୁଟ୍ ମାଚାତ୍। 5 ଆରେ ହେ ସିଙ୍ଗାସନତାଙ୍ଗ୍ ବିଜ୍ଲି, ବାରବିନି ବେଣ୍ ଆରେ ବାଦାଡ଼୍ ଗାର୍ଜାନ୍ ଆନି ସବଦ୍ ୱାଜି ମାଚାତ୍। ହେ ସିଙ୍ଗାସନ ଆଗେ ସାତ୍ଗଟା କାଚାଆନି ବଇଟାଙ୍ଗ୍ ମାଚିକ୍। ଇ ସାତ୍ଗଟା ବଇଟାଙ୍ଗ୍ ନେ ଈଶ୍ୱରତି ସାତ୍ ଗୁଣ୍ନି ଆତ୍ମା। 6 ଆରେ ପା ହେ ସିଙ୍ଗାସନ ଆଗେ ହାମ୍ଦୁର୍ ଲେକେ ଅହାର୍ ମେଦ୍ନି ମାଚାତ୍। ହେଦାଙ୍ଗ୍ କାଚ୍ଲେକେ କିଲେର୍ ମାଚାତ୍ ଆରେ ହେ ଗାଜା ସିଙ୍ଗାସନ ହେ ଚବିଶ୍ ଗଟା ସିଙ୍ଗାସନ ମାଦି ମାଚାତ୍। ହେ ସିଙ୍ଗାସନ ଚାରିଗଟା ଗିନାକାଙ୍ଗ୍ ଚାରିଗଟା ଜିବୁନ୍ ମାନି ପଶୁ ମାଚିକ୍ ଆରେ ହେୱାରିଙ୍ଗ୍ ଗାଗାଡ଼୍ ବାର୍ତି କାଣ୍କୁ ମାଚିକ୍। 7 ହେବେ ମାନି ଚାରିଗଟା ଜିବୁନ୍ ମାନି ପଶୁତିଙ୍ଗ୍ ପାର୍ତୁମ୍ ପଶୁ ସିଂହ ବୁର୍କା ଲେକେ ଚନ୍ଞ୍ଜି ମାଚାତ୍। ଦୁଇ ନମ୍ବର୍ ପଶୁ ସଣ୍ଡ୍ ବାଡ଼୍ଦୁଲେକେ ଚନ୍ଞ୍ଜି ମାଚାତ୍, ତିନ୍ ନମ୍ବର୍ ପଶୁତିଙ୍ଗ୍ ମାନାୟ୍ ମୁମ୍ ମାଚାତ୍ ଆରେ ଚାରି ନମ୍ବର୍ ପଶୁ ମୁକ୍ରିଲେକେ ଚନ୍ଞ୍ଜି ମାଚାତ୍ ଆରେ ତାଙ୍ଗେଙ୍ଗ୍ ମାରାଙ୍ଗ୍ ମାଚିଲେ ଉମ୍ଜି ମାଚାତ୍। 8 ହେ ଚାରିଗଟା ଜିବୁନ୍ ମାନି ପଶୁକାଙ୍ଗ୍ ଚଅଗଟା ଲାକା ମାରାଙ୍ଗ୍ ମାଚିକ୍, ଆରେ ହେୱାର୍ ଗାଗାଡ଼୍ ବାର୍ତି କାଣ୍କୁ ମାଚିକ୍ ଆରେ ହେୱାର୍ ମାରାକାଙ୍ଗ୍ ପା କାଣ୍କୁ ମାଚିକ୍। ହେୱାର୍ ୱିଜୁଦିନ୍ ୱେଡ଼ା ନାଣା ଇଲେକେ ୱେଚ୍ଚି ମାଚାର୍, “ୱିଜୁ ଶାକ୍ତିମାନି ଈଶ୍ୱର ନେ ପବିତ୍ର, ପବିତ୍ର, ମାପୃ ନେ ପବିତ୍ର ଇନେର୍ ୱିଜୁଦିନ୍ ମାଚାନ୍ ଇନେର୍ ନଙ୍ଗୟ୍ ମାନାନ୍ ଆରେ ଇନେର୍ ପାଚେ ମାନାନ୍।” 9 ଏଚେପାଦ୍ନା ହେ ଜିବୁନ୍ ମାନି ପଶୁଙ୍ଗ୍ ହେ ସିଙ୍ଗାସନ୍ତାକେ କୁଚ୍ଚାକାରିଙ୍ଗ୍ ଗୌରବ, ସନ୍ମାନ୍ ଆରେ ଦନ୍ଯବାଦ୍ ହିଜି ମାଚାର୍, ଇନେର୍ ୱିଜୁଦିନ୍ କାଜିଙ୍ଗ୍ ଜିବୁନ୍ ମାନ୍ଙ୍ଗାନାନ୍। 10 ଆରେ ହେପାଦ୍ନା ହେ ଚବିଶ୍ ଜାଣ୍ ପ୍ରାଚିନାର୍ ଇନେର୍ ୱିଜୁଦିନ୍ ସିଙ୍ଗାସନ୍ତାକେ କୁଚ୍ଚାନ୍ନା, ହେୱାନିଙ୍ଗ୍ ହେୱାର୍ ମେଣ୍ଢାକୁନ୍ଦିକିଜି ପୁଜାକିଜି ମାଚାର୍। ଆରେ ହେୱାର୍ କାପ୍ଡ଼ାନି ମୁକୁଟ୍ କୁତ୍ତି ହେ ସିଙ୍ଗାସନ ଆଗେ ଇଡ଼୍ଜି ୱେଚ୍ଚି ମାଚାର୍, 11 “ମା ମାପୃ, ଈଶ୍ୱର, ଏନେଙ୍ଗ୍ ଜୟ୍-ଜୟ୍ ପାୟାଆନି ଦର୍କାର୍। ଏନେଙ୍ଗ୍ ସନ୍ମାନ୍ ପାୟାଆନି ଦର୍କାର୍ ଆରେ ନିଙ୍ଗେଙ୍ଗ୍ ଶାକ୍ତି ମାଚି କାଜିଙ୍ଗ୍ ୱିଜୁ ଜିନିଷ୍ ଉବ୍ଜାଇ କିତାୟ୍ନା। ଏନେଙ୍ଗ୍ ଇଚାକିତି କାଜିଙ୍ଗ୍ ହେ ୱିଜୁ ଜିନିଷ୍ତିଙ୍ଗ୍ ଉବ୍ଜା ଆତାତ୍ନା ଆରେ ମାନାତା।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation