ହତ୍ତି 3 - New Testament in Pengo Parja Languageସାର୍ଦ୍ଦୀ ସହର୍ତ ମାନି ମଣ୍ଡ୍ଲିତିଙ୍ଗ୍ କାବୁର୍ ହିନି ବିଷୟ 1 ହେୱାନ୍ ପା ନାଙ୍ଗେଙ୍ଗ୍ ୱେଚ୍ଚାତାନ୍, “ସାର୍ଦ୍ଦୀ ସହର୍ତ ମାନି ମଣ୍ଡ୍ଲିନି ଦୁତ୍ତିଙ୍ଗ୍ ଇ କାବୁର୍ ଲେକିକିୟାଟ୍: ହେ କାବୁର୍ ଇଲେକେ। ଆନେଙ୍ଗ୍ ନେ ହେ ମାନାୟ୍ତଙ୍ଗ୍ ଇନେର୍ତାକେ ଈଶ୍ୱରତି ସାତ୍ଗୁଣ୍ ଆତ୍ମାଙ୍ଗ୍ ମାନିକ୍ ଆରେ ଇନେର୍ କେଇଦ ସାତ୍ଗଟା ହୁକାଙ୍ଗ୍ ମାନିକ୍।” ଆନେଙ୍ଗ୍ ମି କାମାୟ୍ତିଙ୍ଗ୍ ପୁଚାଙ୍ଗ୍ନା ଏପେଙ୍ଗ୍ ନାଙ୍ଗେଙ୍ଗ୍ ହାତ୍ପା ପାର୍ତି କିନାକାର୍ ଲେକେ ଚଞ୍ଜ୍ନାଦେରା, ମାତର୍ ଏପେଙ୍ଗ୍ ହାତ୍ପା ନା ଆଦେସ୍ତିଙ୍ଗ୍ ମାନି କିଉଦେରା ଆରେ ହାଃତାକାର୍ ଲେକେ ଆତାଦେର୍ନା। 2 ହେଦାଙ୍ଗ୍ କାଜିଙ୍ଗ୍, ଏପେଙ୍ଗ୍ ହୁନ୍ଞ୍ଚିତାଙ୍ଗ୍ ନିଙ୍ଗାଟ୍। ଆରେ ନାଙ୍ଗେଙ୍ଗ୍ ଆଦିକ୍ ପାର୍ତି କିଦାଟ୍ ଇନେସ୍କି ଏପେଙ୍ଗ୍ କେତ୍ଜାଣ୍ ନାଙ୍ଗେଙ୍ଗ୍ ପାର୍ତି କିଦ୍ନାକା ବନ୍ଦ୍ କିତାଦେର୍ନା, ଲାଗିଙ୍ଗ୍ ମିତାକେ ମାନି ଖ୍ରୀଷ୍ଟାନ୍ ଗୁଣ୍ ପୁରାପୁରି ବାବ୍ରେ ମିବେତାଙ୍ଗ୍ ଦେହା ହାଲୁତ୍। ଇନେସ୍କି ଆନେଙ୍ଗ୍ ପୁଚାଙ୍ଗ୍ନା ମିଙ୍ଗେଙ୍ଗ୍ ବେସି ଖ୍ରୀଷ୍ଟାନ୍ ଗୁଣ୍ ଦର୍କାର୍ ମାନାତ୍, ଏପେଙ୍ଗ୍ ଈଶ୍ୱରତିଙ୍ଗ୍ ୱାରିଆ ଆନିଲେକେ କାମାୟ୍ କିଉଦେରା। 3 ଲାଗିଙ୍ଗ୍ ଏପେଙ୍ଗ୍ ଆଗେ ୱେଚାକା ଏତୁକିୟାଟ୍ ଆରେ ପାର୍ତୁମ୍ ପାର୍ତି କିତିଲେକେ ପାର୍ତିକିୟାଟ୍। ଏପେଙ୍ଗ୍ ନାଙ୍ଗେଙ୍ଗ୍ ଆଦିକ୍ ପାର୍ତି କିଜି ମାନ୍ବାଦ୍ଲାୟ୍ କିଜି ନାବେ ୱାଡ, ଯଦି ଏପେଙ୍ଗ୍ ହେଲେକେ କିଉଦେର୍, ଆନେଙ୍ଗ୍ ମିଙ୍ଗେଙ୍ଗ୍ ଦଣ୍ଡ୍ ହିଦ୍ଦେଙ୍ଗ୍ ତିପ୍କୁ ୱାନାଙ୍ଗ୍ ଇନେସ୍ ର ଚରେନ୍ ତିପ୍କୁ ଚର୍କିଦେଙ୍ଗ୍ ୱାନାନ୍। 4 ମାତର୍ ମି ବିତ୍ରେତାଙ୍ଗ୍ ସାର୍ଦ୍ଦୀ ସହର୍ନି ଅଲପ୍ ହେନି ମାନାର୍ ହେୱାର୍ ପାପ୍ କାମାୟ୍ କିଜି ଜାର୍ତିଙ୍ଗ୍ କରାପ୍ କିୱାତାର୍ନା, ହେୱାର୍ ହାତ୍ପା ପାର୍ତି କିଜି ପବିତ୍ର ଜିବୁନ୍ କାଟିକିନାରା। ହେୱାର୍ ପୁରା ଡ଼ିଞ୍ଜ୍ନି ହେନ୍ଦ୍ରା ଉସ୍ପି ନା ହୁଦାଙ୍ଗ୍ ମାନାର୍, ଇନେସ୍କି ହେୱାର୍ ଅଦିକାର୍ ମାନାତ୍। 5 ଇମ୍ଣି ମାନାୟାର୍ ଶୟତାନ ଶାକ୍ତିତିଙ୍ଗ୍ ଆରାୟ୍ କିନାର୍ ହେୱାର୍ ପା ହେୱାର୍ ଲେକେ ଡ଼ିଞ୍ଜ୍ନି ହେନ୍ଦ୍ରା ଉସ୍ପାନାର୍। ହେୱାର୍ ତର୍ ୱିଜ୍ୱି ଜିବୁନ୍ ପାୟାଆନି ମାନାୟାର୍ ବହିତାକେ ଈଶ୍ୱର ଲେକିକିତାନ୍ନା, ଆରେ ଆନେଙ୍ଗ୍ ହେୱାର୍ ତର୍ଦିଙ୍ଗ୍ ହେ ବହିତାକେ ଲେକିକିତାକା ଲିବାୟ୍ କିଉଙ୍ଗ୍। ଆନେଙ୍ଗ୍ ନା ଆବା ଆଗେ ଆରେ ଦୁତ୍କୁ ଆଗେ ୱେଚ୍ନାଙ୍ଗ୍ ଇୱାର୍ ନାଲକ୍। 6 ଇମ୍ଣି ମାନାୟାର୍ ନା କାତାତିଙ୍ଗ୍ ବୁଜା ଆଦେଙ୍ଗ୍ ଇଚା କିନାରା, ପବିତ୍ର ଆତ୍ମା ମଣ୍ଡ୍ଲିନି ମାନାୟାରିଙ୍ଗ୍ ୱେଚ୍ଚି ବିଷୟତିଙ୍ଗ୍ ହେୱାର୍ ଜାଗ୍ରତ୍ ଆଜି ୱେନି ଦର୍କାର୍। ଫିଲାଦେଲ୍ଫିଆ ସହର୍ତ ମାନି ମଣ୍ଡ୍ଲିତିଙ୍ଗ୍ କାବୁର୍ ହିନି କାତା 7 ହେୱାନ୍ ପା ନାଙ୍ଗେଙ୍ଗ୍ ୱେଚ୍ଚାତାନ୍, “ଫିଲାଦେଲ୍ଫିଆ ସହର୍ତ ମାନି ମଣ୍ଡ୍ଲିନି ଦୁତ୍ତିଙ୍ଗ୍ ଇ କାବୁର୍ ଲେକିକିୟାଟ୍: ହେ କାବୁର୍ ଇଲେକେ, ଆନେଙ୍ଗ୍ ନେ ହେ ମାନାୟ୍ତଙ୍ଗ୍, ଇନେର୍ ପବିତ୍ର ଆରେ ସତ୍ ଆରେ ଇନେର୍ତାକେ ଦାଉଦ ରାଜାତି କୁଚିକାଡିଙ୍ଗ୍ ମାନିକ୍। ଆନେଙ୍ଗ୍ ଏଚେକାଡ଼୍ଦ ହେ କୁଚିକାଡିଙ୍ଗ୍ତାଙ୍ଗ୍ ର କାପାଟ୍ ଜେନାଙ୍ଗ୍ ହେଦାଙ୍ଗ୍ ଇନେର୍ ପା ଗେସ୍ତେଙ୍ଗ୍ ଆଡୁର୍, ଆରେ ଆନେଙ୍ଗ୍ ଏଚେପାଦ୍ନା ହେ କୁଚିକାଡି ସାଇଜତାଙ୍ଗ୍ ହେ କାପାଟ୍ ଗେହ୍ନାଙ୍ଗ୍ ଇନେର୍ ପା ଜେତେଙ୍ଗ୍ ଆଡୁର୍। 8 ଆନେଙ୍ଗ୍ ପୁଚାଙ୍ଗ୍ନା ଯେ, ମିଙ୍ଗେଙ୍ଗ୍ ଅଲପ୍ ଶାକ୍ତି ମାନାତ୍। ମାତର୍ ଏପେଙ୍ଗ୍ ନା କାତାତିଙ୍ଗ୍ ପାର୍ତି କିତାଦେର୍ନା ଆରେ ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିନାପା ଇଞ୍ଜି ମୁନା କିୱାତାଦେର୍ନା, ଲାଗିଙ୍ଗ୍ ମି କାଜିଙ୍ଗ୍ ର କାପାଟ୍ ଜେତାଙ୍ଗ୍ନା ହେଦାଙ୍ଗ୍ ଇନେର୍ ଗେସ୍ତେଙ୍ଗ୍ ଆଡୁର୍। 9 ଲାଗିଙ୍ଗ୍ ହୁଡ଼ାଟ୍, ଇମ୍ଣି ମାନାୟାର୍ ଶୟତାନ ଦଳ୍ନି ମାନାୟାର୍ ହେୱାର୍ ଈଶ୍ୱର ବାଚି କିତ୍ତି ସତ୍ ଯିହୁଦି ମାନାୟାର୍ ଇଞ୍ଜି ଚଞ୍ଜିଆ ଆନାରା, ମାତର୍ ହେୱାର୍ ସତ୍ ଯିହୁଦି ମାନାୟାର୍ ଆକାୟ୍। ହେୱାର୍ ୱାଜି ମି କାଲ୍ପାନାତାକେ ମୁଣ୍ଡିଆ ଇଡ଼୍ଦାନାର୍ ଆରେ ଆନେଙ୍ଗ୍ ମିଙ୍ଗେଙ୍ଗ୍ ଲାଡ୍ କିନାଙ୍ଗା ଇଞ୍ଜି ହେୱାର୍ ପୁଞ୍ଜ୍ନାର୍।” 10 ଏପେଙ୍ଗ୍ ଦୁଃକ୍ କଷ୍ଟ ପାୟାଆତିହିଙ୍ଗ୍ ସାସ୍ ଆଜି ନା କାତାତିଙ୍ଗ୍ ମାନିକିଜି ସମ୍ବାଲି କିଜି ମାଚାଦେର୍, ହେଦାଙ୍ଗ୍ କାଜିଙ୍ଗ୍ ଇ ପୁର୍ତିନି ୱିଜାର୍ ମାନାୟାରିଙ୍ଗ୍ ୱାନି ଗାଜା ପରିକ୍ଷାତାଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଉଦାର୍ କିଦ୍ନାଙ୍ଗ୍। 11 ହୁଡ଼ାଟ୍ ଆନେଙ୍ଗ୍ ବେଗି ୱାନାଙ୍ଗା, ଲାଗିଙ୍ଗ୍ ଏପେଙ୍ଗ୍ ନାଙ୍ଗେଙ୍ଗ୍ ଆଦିକ୍ ପାର୍ତି କିଜି ମାଞ୍ଜାଟ୍, ଆରେ ଇନେର୍ ପା ମି ପୁରଷ୍କାର୍ନି ମୁକୁଟ୍ ଜେଲ୍ଜି ଅଦେଙ୍ଗ୍ ଆଡୁର୍। 12 ଇମ୍ଣି ମାନାୟାର୍ ଶୟତାନ ଶାକ୍ତିତିଙ୍ଗ୍ ଆରାୟ୍ କିଜି ଜିତାଆଜି ମାନାର୍, ହେୱାର୍ ଈଶ୍ୱର ମନ୍ଦିର୍ତାକେ କମ୍ମୁଣ୍ଡା ଲେକେ ଆଜି ୱିଜୁଦିନ୍ କାଜିଙ୍ଗ୍ ମାନାର୍, ଇନେର୍ ହେବା ଆନେଙ୍ଗ୍ କିନାଙ୍ଗା। ଆରେ ଆନେଙ୍ଗ୍ ହେୱାର୍ ଗାଗାଡ଼୍ତାକେ ନା ଈଶ୍ୱର ତର୍ ଲେକିକିନାଙ୍ଗ୍ ଆରେ ହେୱାର୍ ନା ଈଶ୍ୱର ସହର୍ନି ମାନାୟ୍ ଆନାର୍, ହେଦେଲିଙ୍ଗ୍ ନେ ଇନାର୍ ପୁନି ଯିରୁଶାଲାମ। ହେ ପୁନି ସହର୍, ନା ଈଶ୍ୱର ମାନି ସରଗ୍ତାଙ୍ଗ୍ ୱାନାତ୍। ଆନେଙ୍ଗ୍ ପା ତା ଗାଗାଡ଼୍ତାକେ ନା ପୁନି ତର୍ ଲେକିକିନାଙ୍ଗ୍। 13 ଇମ୍ଣି ମାନାୟାର୍ ନା କାତାତିଙ୍ଗ୍ ବୁଜା ଆଦେଙ୍ଗ୍ ଇଚା କିନାରା, ପବିତ୍ର ଆତ୍ମା ମଣ୍ଡ୍ଲିନି ମାନାୟାରିଙ୍ଗ୍ ୱେଚ୍ଚି ବିଷୟତିଙ୍ଗ୍ ହେୱାର୍ ଜାଗ୍ରତ୍ ଆଜି ୱେନି ଦର୍କାର୍। ଲାଅଦିକୀଆ ସହର୍ତ ମାନି ମଣ୍ଡ୍ଲିତିଙ୍ଗ୍ କାବୁର୍ ହିନି କାତା 14 ହେୱାନ୍ ପା ନାଙ୍ଗେଙ୍ଗ୍ ୱେଚ୍ଚାତାନ୍, “ଲାଅଦିକୀଆ ସହର୍ତ ମାନି ମଣ୍ଡ୍ଲିନି ଦୁତ୍ତିଙ୍ଗ୍ ଇ କାବୁର୍ ଲେକିକିୟାଟ୍। ହେ କାବୁର୍ ଇଲେକେ, ଆନେଙ୍ଗ୍ ନେ ହେ ମାନାୟ୍ତଙ୍ଗ୍ ଇନେରିଙ୍ଗ୍ ଆମେନ୍ ଇନାର୍, ଇନେସ୍କି ଆନେଙ୍ଗ୍ ଦରମ୍ ଲକ୍ ଆରେ ଆନେଙ୍ଗ୍ ଈଶ୍ୱର ବିଷୟରେ ୱେଚ୍ନାକା ୱିଜୁ ସତ୍। ଆରେ ପା ଈଶ୍ୱର ନା କାଜିଙ୍ଗ୍ ପୁର୍ତିନି ୱିଜୁ ଜିନିଷ୍ ଉବ୍ଜାଇ କିତାନ୍ନା। 15 ଆନେଙ୍ଗ୍ ମି ୱିଜୁ କାମାୟ୍ତିଙ୍ଗ୍ ପୁଚାଙ୍ଗ୍ନା ଯେ, ଏପେଙ୍ଗ୍ ନାଙ୍ଗେଙ୍ଗ୍ ପୁରାପୁରି ବାବ୍ରେ ପାର୍ତି କିଦୁଦେରା କି ଜାର୍ ଗରବ୍ତାଙ୍ଗ୍ ଲାଡ୍ କିଦୁଦେରା। ଲାଗିଙ୍ଗ୍ ଆନେଙ୍ଗ୍ ଇଚା କିନାଙ୍ଗା ଯେ, ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦ୍ନାକା ବନ୍ଦ୍ କିୟାଟ୍ ନଇଲେ ମି ଗରବ୍ତାଙ୍ଗ୍ ନାଙ୍ଗେଙ୍ଗ୍ ଲାଡ୍ କିଦାଟ୍। 16 ଇନେସ୍କି ଏପେଙ୍ଗ୍ ଗରମ୍ ଆକାୟ୍ କି କାକର୍ ଆକାୟ୍ ଉସୁମ୍ ଏଜୁଙ୍ଗ୍ଲେକେ ମି ମାନ୍ତ ନା ବିଷୟରେ ଡାଉଟ୍ କିନାଦେରା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଆସ୍ତେୱେଦେଙ୍ଗ୍ କାତ୍ନାଙ୍ଗା। 17 ଏପେଙ୍ଗ୍ ବାବିକିନାଦେରା ଯେ, ଏପେଙ୍ଗ୍ ହାଉକାର୍ ଆରେ ମିତାକେ ୱିଜୁ ଜିନିଷ୍ ମାନାତ୍, ମାତର୍ ଏପେଙ୍ଗ୍ ସତ୍ ବିଷୟତିଙ୍ଗ୍ ପୁନୁଦେର୍। ହେଦାଙ୍ଗ୍ ଇଲେକେ ଯେ, ଏପେଙ୍ଗ୍ ନେ ଗରିବ୍ ମିଙ୍ଗେଙ୍ଗ୍ ବସ୍ତ୍ର ହିଲେତ୍ ଆରେ ଏପେଙ୍ଗ୍ କାଣା ହେଦାଙ୍ଗ୍ ମି କାଜିଙ୍ଗ୍ ବେସି ଦୁଃକ୍ନି ବିଷୟ। 18 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଉପାୟ୍ ହିଦ୍ନାଙ୍ଗା ଯେ, ଏପେଙ୍ଗ୍ ହାଉକାର୍ ଆନି କାଜିଙ୍ଗ୍ ନାବେତାଙ୍ଗ୍ ନାଣିତାକେ ପରିକ୍ଷା କିତି ହାର୍ଦି ହନା କଡ଼ାଟ୍। ଆରେ ନାବେତାଙ୍ଗ୍ ଡ଼ିଞ୍ଜ୍ନି ହେନ୍ଦ୍ରା କଡ଼୍ନି ଦର୍କାର୍, ଲାଗିଙ୍ଗ୍ ମାନାୟାର୍ ମିଙ୍ଗେଙ୍ଗ୍ ହେନ୍ଦ୍ରା ଉସ୍ପାୱାତାନ୍ନା ଇଞ୍ଜି ଲାଜ୍ କିଦ୍ଦେଙ୍ଗ୍ ଆଡ଼୍ଦୁର୍। ଆରେ ମି କାଣ୍କୁକାଙ୍ଗ୍ ହାର୍କିଦେଙ୍ଗ୍ ନାବେତାଙ୍ଗ୍ ଅହ କଡ଼ାଟ୍, ଲାଗିଙ୍ଗ୍ ଏପେଙ୍ଗ୍ ହାର୍ କିଜି ହୁଡ଼୍ଦେଙ୍ଗ୍ ଆଡ୍ନାଦେର୍। 19 ଆନେଙ୍ଗ୍ ଇନେରିଙ୍ଗ୍ ଲାଡ୍ କିନାଙ୍ଗା ତାଙ୍ଗେଙ୍ଗ୍ ହିକାୟ୍ କିନାଙ୍ଗ୍ ଆରେ ଦନ୍ ହିନାଙ୍ଗ୍, ଲାଗିଙ୍ଗ୍ ହେୱାର୍ ହାର୍ଦି ମାନାୟାର୍ ଆନାର୍। ଲାଗିଙ୍ଗ୍ ଏପେଙ୍ଗ୍ ହାର୍ କାମାୟ୍ କିୟାଟ୍ ଆରେ ପାପ୍ କାମାୟ୍ କିନାକା ବନ୍ଦ୍ କିୟାଟ୍।” 20 ହୁଡ଼ାଟ୍, ମି ଗରବ୍ତାକେ ୱାନି କାଜିଙ୍ଗ୍ ଆନେଙ୍ଗ୍ ର ମାନାୟ୍ ଲେକେ ଇଲ୍ ଦୁୱେର୍ତ ନିଲ୍ଚି ଜେତେଙ୍ଗ୍ କାପାଟ୍ତ ଇଡ଼୍ନାଙ୍ଗା। ଯଦି ଏପେଙ୍ଗ୍ ନା କାତାତିଙ୍ଗ୍ ୱେନାଦେର୍ ଆରେ ମି ଗରବ୍ତିଙ୍ଗ୍ ଜେନାଦେର୍, ଲାଗିଙ୍ଗ୍ ଆନେଙ୍ଗ୍ ମି ବିତ୍ରେ ୱାନାଙ୍ଗ୍ ଆରେ ଆସେଙ୍ଗ୍ ମାହା ବିଡ଼ା ଆଜି ମାନାସ୍। 21 ଇମ୍ଣି ମାନାୟାର୍ ଶୟତାନ ଶାକ୍ତିତିଙ୍ଗ୍ ଆରାୟ୍ କିଜି ଜିତାଆନାର୍। ଇନେସ୍ ଆନେଙ୍ଗ୍ ଶୟତାନ ଶାକ୍ତିତିଙ୍ଗ୍ ଆରାୟ୍ କିଜି ଜିତା ଆତାଙ୍ଗ୍ ଆରେ ନା ଆବା ହୁଦାଙ୍ଗ୍ ତା ସିଙ୍ଗାସନ୍ତାକେ କୁଚ୍ଚାଙ୍ଗ୍ନା ହେଲେକେ ଆନେଙ୍ଗ୍ ହେୱାରିଙ୍ଗ୍ ନା ସିଙ୍ଗାସନ୍ତାକେ କୁଚ୍ଚେଙ୍ଗ୍ ହିନାଙ୍ଗ୍। 22 ଇମ୍ଣି ମାନାୟାର୍ ନା କାତାତିଙ୍ଗ୍ ବୁଜା ଆଦେଙ୍ଗ୍ ଇଚା କିନାରା, ପବିତ୍ର ଆତ୍ମା ମଣ୍ଡ୍ଲିନି ମାନାୟାରିଙ୍ଗ୍ ୱେଚ୍ଚି ବିଷୟତିଙ୍ଗ୍ ହେୱାର୍ ଜାଗ୍ରତ୍ ଆଜି ୱେନି ଦର୍କାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation